Bisan pa wala kita sing direkta nga mabasa parte sa sini, maathag nga ginapakita sang Biblia nga wala sing asawa si Jesus. a Binagbinaga ang masunod.

1.   Pirme ginasambit sa Biblia ang parte sa pamilya ni Jesus pati na ang mga babayi nga kaupod niya sa iya ministeryo kag nag-unong sa iya asta sa iya kamatayon, pero wala ini nagsiling nga may asawa sia. (Mateo 12:46, 47; Marcos 3:​31, 32; 15:40; Lucas 8:​2, 3, 19, 20; Juan 19:25) Ang posible gid nga rason kon ngaa wala sing ginsiling ang Biblia parte sa sini amo nga wala nagpangasawa si Jesus.

2.   Parte sa mga nagpabilin nga singgol para makaalagad sila sing bug-os sa Dios, ginsilingan ni Jesus ang iya mga disipulo: “Sia nga makahatag sang lugar sa sini [pagpabilin nga singgol] sa iya kabuhi, maghimo sini.” (Mateo 19:10-​12) Nangin halimbawa sia para sa mga nagdesisyon nga indi mangasawa ukon mamana para makaalagad sing bug-os sa Dios.​—Juan 13:15; 1 Corinto 7:​32-​38.

3.   Antes sia napatay, ginsiguro niya nga may maatipan sa iya iloy. (Juan 19:25-​27) Kon may asawa sia ukon mga bata, mahimo gid nga siguruhon niya nga pati sila maatipan man sing maayo.

4.   Sa Biblia, ginagamit si Jesus nga halimbawa para sa mga bana, pero wala sini ginapatuhuyan ang iya pagtratar sa isa ka literal nga asawa. Sa baylo, nagsiling ini: “Mga bana, padayon nga higugmaa ang inyo asawa, subong nga si Cristo naghigugma man sang kongregasyon kag nagtugyan sang iya kaugalingon tungod sa sini.” (Efeso 5:​25) Kon may asawa si Jesus sang ari sia sa duta, indi ayhan nga ang iya perpekto nga halimbawa subong literal nga bana amo ang gingamit sa sina nga bersikulo?

 Huo, mahimo may anom ka utod si Jesus. Nalakip sa ila amo sanday Santiago, Jose, Simon, kag Judas, kag mahimo may duha pa sia ka utod nga babayi. (Mateo 13:54-​56; Marcos 6:3) Ang iya mga manghod mga anak sang iya iloy nga si Maria, kag sang iya bana nga si Jose. (Mateo 1:​25) Si Jesus ginatawag sang Biblia nga “ang panganay” ni Maria, nga nagapahangop nga may iban pa sia nga bata.​—Lucas 2:7.

 Para suportahan ang pagpati nga si Maria nagpabilin nga birhen sa bilog niya nga kabuhi, ginahatagan sang iban sing lain nga kahulugan ang termino nga “mga utod.” Halimbawa, nagapati ang iban nga ang mga utod ni Jesus, mga anak ni Jose sa iya una nga asawa. Pero, ginapakita sang Biblia nga ginpanubli ni Jesus ang legal nga kinamatarong sa pagkahari nga ginpromisa kay David. (2 Samuel 7:​12, 13; Lucas 1:​32) Kon may mas magulang nga mga anak nga lalaki si Jose, ang kamagulangan sa ila amo kuntani ang legal nga manunubli ni Jose.

 Mahimo ayhan nga ang ginapatuhuyan sini nga termino amo ang mga disipulo ni Jesus, ukon espirituwal nga mga utod? Ini nga ideya nagasumpakil sa Kasulatan, kay ang Biblia nagasiling nga may tion nga “ang iya mga utod wala nagatuo sa iya.” (Juan 7:5) Sa Biblia, ang mga utod ni Jesus tuhay sa iya mga disipulo.​—Juan 2:​12.

 Suno sa isa pa ka teoriya, ang mga utod ni Jesus mga pakaisa kuno niya. Pero, sa Griego nga Kasulatan magkatuhay ang mga tinaga para sa “utod nga lalaki,” “paryente,” kag “pakaisa.” (Lucas 21:16; Colosas 4:​10) Madamo nga iskolar sa Biblia ang nagbaton nga ang mga utod ni Jesus matuod gid nga mga manghod niya. Halimbawa, ang libro nga The Expositor’s Bible Commentary nagsiling: “Ang kinaandan nga paghangop sa ‘mga utod’ . . . amo nga nagapatuhoy ini sa mga anak nanday Maria kag Jose kag gani sa mga utod ni Jesus sa iloy.” b