Halin sang 1990 asta 2015, nagdoble ang kadamuon sang mga nagaedad 50 pataas nga nag-divorce sa United States, kag nagtriple pa gid ini sa mga nagaedad 65 pataas. Ining pagdamo sang mga tigulang nga mag-asawa nga naga-divorce gintawag sang mga researcher nga “gray divorce.” Ano ang rason sang pag-divorce sang mga tigulang? Ano ang himuon mo para indi ini matabo sa inyo pag-asawahay?

Sa sini nga artikulo

•  Ano ang rason sang pag-divorce sang mga tigulang?

•  Ang puede mo himuon

•  Bulig kon mag-istoryahanay kamo

•    Sa masami, antes maglab-ot sa pag-divorce, amat-amat lang nga naglayuay ang buot sining mag-asawa. Sa pagligad sang tion, indi na pareho ang nanamian himuon sang pila ka bana kag asawa kag diutay na lang ang mga butang nga nanamian nila himuon sing magkaupod. Ukon kon wala na sa ila poder ang ila mga bata, marealisar nila nga malawig nga tion nga nagpokus sila sa ila responsibilidad bilang nanay kag tatay gani daw nalipatan na nila kon paano mangin bana kag asawa.

•    Sa nagligad nga mga tinuig, ang mga tawo nga eksperto kuno sa pag-asawahay nagtudlo sa mga mag-asawa nga magpokus sa ila kaugalingon. Ginalaygayan nila ang mga bana kag asawa nga pamangkuton ang ila kaugalingon: ‘Nalipay bala ako sa amon pag-asawahay?’ ‘Nakabulig bala ini sa akon nga mangin mas maayo nga tawo?’ ‘Ginapabatyag bala sang akon bana ukon asawa nga palangga niya ako kag importante ako sa iya?’ Kon indi, nagapati ang mga tawo subong nga kinahanglan mo himuon kon ano ang pinakamaayo para sa imo, kag ina amo ang pag-divorce kag pagsugod sang bag-o nga kabuhi.

•    Para sa mga tawo subong, indi na malain ang pag-divorce. Siling sang sociologist nga si Eric Klinenberg, “Pila ka tuig lang ang nagligad, kon ang isa indi malipayon sa iya bana ukon asawa kag gusto mag-divorce, dapat mabakod gid ang iya rason sa iya desisyon. Subong baliskad na ang nagakatabo: Kon wala ka na nalipay sa inyo pag-asawahay, dapat mahatag ka sang mabakod nga rason kon ngaa indi ka magbulag. Kay man, madamo nga tawo subong ang nagapati nga ang pinakaimportante amo nga unahon mo ang pinakamaayo para sa imo kaugalingon.” a

 Siempre kon mag-divorce, madula ang pila ka problema, pero may bag-o naman. Halimbawa, nakita sa isa ka pagtuon nga “ang pag-divorce sang mga tigulang masami nga nagaresulta sa kapigaduhon, ilabi na sa mga babayi.”

 May ara pa sang dapat pamensaron. “Puede ka magsugod sang bag-o nga kabuhi, pero amo ka man gihapon nga tawo,” siling sang libro nga Don’t Divorce. “Ano bala ang imo ginbag-o sa kon paano ka nagapakigkomunikar nga wala mo nahimo sa imo asawa ukon bana sang una? Ano bala ang imo ginbag-o sa kon paano mo ginaatubang ang indi pag-intiendihanay?” b

•   Batuna ang kamatuoran nga magabag-o ang inyo relasyon. Ang tanan nga relasyon nagabag-o. Ang inyo relasyon sang imo asawa ukon bana mahimo nagbag-o bangod wala na sa inyo poder ang inyo mga bata ukon bangod indi na pareho ang gusto ninyo himuon. Imbes nga pensaron nga tani wala sang magbag-o, pamensara kon paano ninyo mapanami ang inyo sitwasyon subong.

   Prinsipio sa Biblia: “Indi ka magsiling, ‘Ngaa mas maayo sang una sangsa subong?’ kay indi ina maalamon nga pamangkot.”—Manugwali 7:10.

•   Tinguhai nga mangin mas suod nga abyan sa imo asawa ukon bana. Puede bala nga tun-an mo ang mga butang nga nanamian sang imo asawa ukon bana, ukon puede mo bala sia maagda nga updan ka man sa nanamian mo himuon? May puede bala kamo testingan nga bag-o nga hilimuon nga manamian ninyo nga duha? Dapat ang inyo goal amo nga makaupdanay kamo nga duha, para magbatyag ang imo asawa ukon bana nga mag-asawa gid kamo kag indi lang nagaupdanay sa isa ka balay.

   Prinsipio sa Biblia: “Ang tagsatagsa indi dapat maghunahuna sang iya kaugalingon nga kaayuhan, kundi sang kaayuhan sang iban.”—1 Corinto 10:24.

•   Padayon nga ipakita ang maayo nga batasan sa isa kag isa. Indi mag-untat sa pagpakita sang maayo nga pamatasan bisan pa malawig na kamo nga nagaupdanay. Magpakita sing respeto kon nagaistorya sa imo bana ukon asawa, kag tinguhai nga ipakita ang maayo nga pamatasan nga ginpakita mo sadto sang naga-date pa lang kamo. Maghambal sing “palihug” kag “salamat.” Pirme ipabatyag sa imo bana ukon asawa nga palangga mo sia, kag pasalamati sia sa mga ginahimo niya para sa imo.

   Prinsipio sa Biblia: “Mangin mainayuhon kamo sa isa kag isa, mangin maluluy-on.”—Efeso 4:32.

•   Dumduma ang malipayon ninyo nga pag-updanay sang una. Tan-awa ninyo sing magkaupod ang inyo album sa kasal, ukon ang inyo mga piktyur sa mga okasyon nga magkaupod kamo. Makabulig ini para indi mag-ugdaw ang pagpalangga kag pagrespeto sa inyo pag-asawahay kundi magabakod pa gid ini.

   Prinsipio sa Biblia: “Ang kada isa sa inyo dapat maghigugma sang iya asawa kaangay sang paghigugma niya sang iya kaugalingon. Subong man, ang asawa dapat may tudok nga pagtahod sa iya bana.”—Efeso 5:33.