“Nagtesting man ’ko basa sing Biblia, pero natak-an ’ko kay tama sini kalaba!”—Briana, 15.

 Amo man bala sina ang ginabatyag mo? Ini nga artikulo makabulig sa imo!

•  Ngaa dapat basahon ang Biblia?

•  Ano ang mga paagi sa pagbasa sing Biblia?

•  Ang ginasiling sang iban

 Para sa imo, daw ka-boring bala sang pagbasa sing Biblia? Kon huo, natural lang ina. Mahimo para sa imo ang Biblia madamol nga libro, gamay ang mga letra, kag wala sing mga piktyur. Gani mas gusto mo na lang nga magtan-aw sing TV!

 Pero pamensara ini: Kon nakakita ka sing dumaan kag daku nga treasure chest, indi bala nga ma-curious ka kon ano ang sa sulod sina?

 Ang Biblia pareho sa isa ka treasure chest. Madamo ini sing unod nga mga hiyas ukon kaalam nga makabulig sa imo nga

•   Makahimo sing maayo nga mga desisyon

•   Mangin maayo ang inyo relasyon sang imo mga ginikanan

•   Makakita sing maayo gid nga mga abyan

•   Maatubang ang stress

 Ngaa praktikal gihapon subong ang isa ka libro nga tama na ka daan? Kay “ang pagsulat sa bug-os nga Kasulatan gintuytuyan sang Dios.” (2 Timoteo 3:16) Ginapakita sini nga ang mga laygay sa Biblia naghalin sa pinakamaayo nga Manuglaygay.

 Ang isa ka paagi amo ang pagbasa sini halin sa umpisa asta sa katapusan. Makabulig ini sa imo nga mahibaluan ang mensahe sang bilog nga Biblia. May iban pa nga paagi sa pagbasa sing Biblia. Ari ang duha ka paagi:

•    Puede mo basahon ang 66 ka libro sang Biblia sing pasunod, halin sa Genesis asta sa Bugna.

•    Puede mo man basahon ang Biblia sing pasunod base sa mga hitabo.

 Tip: Makita sa Apendise A7 sang Bag-ong Kalibutan nga Badbad ang pasunod nga mga hitabo sa kabuhi ni Jesus diri sa duta.

 Ang ikaduha nga paagi sa pagbasa sing Biblia amo ang pagpili sing mga bersikulo nga may koneksion sa imo mga problema. Halimbawa:

•   Gusto mo bala makakita sing masaligan nga mga abyan? Basaha ang istorya ni Jonatan kag ni David. (1 Samuel, kapitulo 18-20) Dayon gamita ang worksheet nga “Kon Paano Makakita sing Matutom nga mga Abyan” para makatuon ka sing mga leksion nga makabulig sa imo.

•   Gusto mo bala madugangan ang imo pagpugong kon ginasulay ka? Basaha kon paano ginpalagyuhan ni Jose ang pagsulay. (Genesis, kapitulo 39) Dayon gamita ang worksheet nga “Kon Paano Malikawan ang Tentasyon . . . Jose—Bahin 1” kag “Gin-akusahan! Jose—Bahin 2” para makatuon ka sing mga leksion nga makabulig sa imo.

•   Gusto mo bala mabal-an ko paano ang pangamuyo makabulig sa imo? Basaha ang istorya ni Nehemias. (Nehemias, kapitulo 2) Dayon gamita ang worksheet nga “Ginsabat sang Dios ang Iya Pangamuyo” para makatuon ka sing mga leksion nga makabulig sa imo.

 Tip: Magbasa sing Biblia sa malinong nga lugar para mas makapokus ka.

 Ang ikatlo nga paagi sa pagbasa sing Biblia amo ang pagpili sing isa ka istorya ukon salmo, basaha ini, dayon binagbinaga kon paano ini makabulig sa imo. Pagkatapos mo basa, pamangkuta ang imo kaugalingon sang masunod:

•    Ngaa ginpasulat ini ni Jehova sa Biblia?

•    Ano ang ginapakita sini sa personalidad ni Jehova ukon sa iya paagi sa paghimo sang mga butang?

•    Paano ko masunod ang mga leksion nga natun-an ko diri?

 Tip: Gamita ang study edition sang New World Translation para makita mo ang mga video, mapa, kag iban pa nga feature para makabenepisyo ka sing maayo sa imo pagbasa sing Biblia.