Thaum peb tseem ua neej nyob yeej muaj ntau yam uas peb ua tau thiab ua rau peb zoo siab. Txawm yog thaum peb muaj teeb meem los tseem muaj tej yam hauv peb lub neej uas ua rau peb muaj kev zoo siab vim peb tseem muaj sia nyob. Yog peb ris Yehauvas txiaj ntsig rau txoj sia uas nws muab rau peb ces peb yuav ua li cas? Thiab vim li cas qhov uas peb saib txoj sia muaj nqis thiaj li tseem ceeb tshaj?

1. Vim li cas peb yuav tsum saib txoj sia muaj nqis?

Peb yuav tsum saib txoj sia muaj nqis vim Yehauvas yog tus uas tsim ib puas tsav yam uas muaj sia. (Phau Ntawv Nkauj 36:9) “Vajtswv yog tus uas rau siav rau pa rau neeg.” (Tes Haujlwm 17:25, 28) Tsis tas li ntawd xwb, nws tseem tsim txhua tsav txhua yam los yug peb txoj sia kom peb ua neeg nyob los peb muaj kev zoo siab.​—Nyeem Tes Haujlwm 14:17.

2. Yog peb ris txiaj ntsig rau txoj sia uas Yehauvas muab rau peb ces peb yuav ua li cas?

Thaum nyuam qhuav xeeb peb hauv plab xwb los peb yeej muaj nqis rau Yehauvas lawm. Hauv phau Vajlugkub, ib tug uas pe hawm Yehauvas hu ua Daviv hais li no, “Thaum kuv tseem tsis tau yug los, koj twb pom kuv lawm.” (Phau Ntawv Nkauj 139:16) Yehauvas saib peb txoj sia muaj nqis heev. (Nyeem Mathais 10:29-31.) Yog li ntawd, yuav mob Yehauvas siab yog hais tias muaj ib tug txhob txwm ua kom lwm tus tuag los sis nws rov tua nws tus kheej. a (Khiav Dim 20:13) Kuj yuav mob Yehauvas siab thiab, yog hais tias peb tsis txuag peb txoj sia los sis tsis pab txuag lwm tus txoj sia. Yog peb ris txiaj ntsig rau txoj sia uas Yehauvas muab rau peb ces peb yuav saib peb txoj sia thiab lwm tus txoj sia muaj nqis.

 KAWM NTXIV

3. Saib xyuas koj tus kheej kom noj qab nyob zoo

Cov Khixatias uas muab lawv tus kheej cob rau Yehauvas lawm cog lus tias lawv yuav muab tag nrho lawv lub neej los teev tiam nws. Cuag li lawv muab lawv lub neej thiab lub cev ua khoom fij rau Vajtswv lawm. Nyeem Loos 12:1, 2 thiab tham txog ob lo lus no:

• Vim li cas peb yuav tsum saib xyuas peb tus kheej kom noj qab nyob zoo?

• Koj yuav saib xyuas koj tus kheej li cas?

 5. Tus me nyuam uas tseem nyob hauv plab los nws txoj sia yeej muaj nqis

Hauv Daviv ib zaj nkauj, nws piav tias Yehauvas yog tus tsim peb. Ces thaum peb tseem loj hlob hauv peb niam lub plab xwb los Yehauvas twb pom peb lawm. Nyeem Phau Ntawv Nkauj 139:13-15, 17 thiab tham txog lo lus no:

• Rau Yehauvas, tus me nyuam txoj sia pib thaum twg los, thaum nyuam qhuav xeeb nws hauv nws niam plab los yog thaum yug tau nws lawm?

Yehauvas tej kev cai rau cov Ixayees thaum ub tiv thaiv cov poj niam uas suab me nyuam thiab lawv tus me nyuam hauv plab. Khiav Dim 21:22, 23 hais tias: ‘Yog muaj tej txiv neej sib ntaus raug ib tug poj niam uas suab me nyuam hauv plab es ua rau tus poj niam yug me nyuam ntxov tiam sis nkawd ob niam tub tsis tuag ces tus uas ntaus raug tus poj niam ntawd yuav tsum tau them raws li tus txiv nplua nws. Tiam sis yog tus poj niam los sis tus me nyuam tuag, yuav tsum muab siav pauj siav.’ Tham txog cov lus no:

• Yog muaj ib tug neeg phoom ib tug poj niam uas suab me nyuam es ua rau nws nchuav me nyuam lawm tiam sis tsis yog txhob txwm, Yehauvas xav li cas xwb?

• Yog hais tias nws txhob txwm ua, Yehauvas ho yuav xav li cas? b

• Koj puas xav ib yam li Vajtswv xav no thiab?

Saib zaj YEEB YAJ KIAB.

Tus poj niam uas yeej saib txoj sia muaj nqis los muaj tej thaud nws yuav xav tias nws yuav tau rho nws tus me nyuam. Nyeem Yaxayas 41:10 thiab tham txog lo lus no:

• Yog muaj neeg pheej yuam kom tus poj niam yuav tsum rho nws tus me nyuam xwb, nws yuav mus cuag leej twg pab thiab yog vim li cas?

 KOJ KAWM TAU DAB TSI

Phau Vajlugkub qhia tias peb yuav tsum saib txoj sia muaj nqis es txuag thiab tiv thaiv txoj sia uas Yehauvas muab rau peb.

Rov Tham Dua

• Vim li cas tib neeg txoj sia thiaj li muaj nqis rau Yehauvas?

• Yehauvas xav li cas rau tus uas txhob txwm ua kom lwm tus tuag los sis nws rov txo nws txoj sia?

• Vim li cas koj thiaj saib txoj sia muaj nqis?