Thaum muaj teeb meem yus yeej vam khom tej phoojywg kwvluag. Ib txhia thiaj yws tias ua cas peb raug ntau yam teeb meem ho tsis pom Vajtswv pab peb li? Qhov tseeb tiag, Vajtswv twb ua ntau yam los pab noob neej lawm. Yav tom hauv ntej, nws tseem yuav ua ntau yam ntxiv thiab. Vajtswv yuav ua dabtsi?

Vajtswv yuav rhuav tshem tus uas rhawv txojkev limhiam. Phau Vajlugkub hais tias, “lub ntiajteb huvsi nyob hauv tus uas Phem qab hwjchim.” (1 Yauhas 5:19) Tus uas “Phem” ntawd yog leejtwg? Yexus hais tias yog Xatas Ntxwg Nyoog tus uas “kav lub ntiajteb.” (Yauhas 12:31) Niaj hnub no lub qab ntuj muaj kev txom nyem loj heev yog tim Xatas Ntxwg Nyoog xwb. Vajtswv yuav ua li cas?

Tshuav tsis ntev lawm xwb, Vajtswv Yehauvas tus Tub Yexus Khetos yuav “rhuav tau Ntxwg Nyoog, tus uas muaj hwjchim ua rau neeg tuag.” (Henplais 2:14; 1 Yauhas 3:8) Phau Vajlugkub hais tias Ntxwg Nyoog kuj paub nws “lub sijhawm tshuav tsis ntev lawm.” (Qhia Tshwm 12:12) Thaum kawg, Vajtswv yuav muab cov neeg limhiam rhuav tshem mus thiab.​—Ntawv Nkauj 37:9; Paj Lug 2:22.

Thaum Vajtswv muab txojkev limhiam rhuav tshem lawd, nws yuav muab lub ntiajteb kho ua ib lub vaj kaj siab rau tibneeg nyob mus ib txhis. Yeej yuav muaj tiav raws li nws lub ntsiab thaum chiv thawj. Thaum ntawd yuav zoo li cas xwb?

Yuav muaj kev thaj yeeb mus li. “Cov uas txo hwjchim yuav tau lub tebchaws [ntiajteb] ua lawv teej lawv tug, thiab lawv yuav zoo siab xyiv fab rau qhov uas lawv vam meej nplua mias.”​—Ntawv Nkauj 37:11.

Yuav muaj noj nplua mias. “Muaj qoob loo nplua mias hauv lub tebchaws [ntiajteb], cia txhua lub roob muaj qoob loo zoo rawv [nrwb] nri.”​—Ntawv Nkauj 72:16.

Yuav muaj vaj muaj tsev zoo thiab sawvdaws yuav txaus siab rau lawv tej haujlwm. “Lawv yuav ua vaj tse thiab tau nyob rau hauv, lawv yuav cog vaj txiv hmab thiab tau noj tej txiv ntawd . . . , thiab cov uas kuv xaiv cia lawd yuav tau siv tej uas lawv txhais tes ua ntev kawg li.”​—Yaxaya 65:21, 22.

Koj puas ntshaw ib lub ntiajteb zoo npaum li no? Tshuav tsis ntev lawm xwb peb yuav pom tej no muaj tiav.

Niaj hnub no tibneeg muaj mob muaj nkeeg, muaj ploj muaj tuag. Tshuav tsis ntev lawm xwb, Vajtswv yuav muab tej ntawd rhuav tshem mus. Yexus twb tuag txhiv noob neej lawm. Phau Vajlugkub hais tias “txhua tus uas ntseeg leej Tub ntawd thiaj tsis puam tsuaj tiamsis yuav tau txojsia ib txhis tsis kawg.” (Yauhas 3:16) Noob neej yuav tau txais tej koob hmoov twg?

Tsis muaj kev mob kev nkeeg lawm. “Tsis muaj ib tug uas nyob hauv lub tebchaws yuav hais tias, ‘Kuv mob lawm.’ Cov neeg uas nyob qhov ntawd yuav tau txais kev zam txim.”​—Yaxaya 33:24.

Tsis muaj kev ploj kev tuag lawm. “Nws yuav muab txojkev tuag nqos kiag mus ib txhis, Vajtswv [Yehauvas] yuav so ib tsoom neeg tej kua muag ntawm lawv lub plhu.”​—Yaxaya 25:8.

Tibneeg yuav tau txojsia ib txhis tsis kawg. “Yam uas Vajtswv pub dawb yog txojsia ib txhis tsis kawg hauv Yexus Khetos uas yog peb tus Tswv.”​—Loos 6:23.

Vajtswv yuav tsa cov tuag sawv rov los. “Cov ncaj ncees thiab cov tsis ncaj puavleej yuav sawv hauv qhov tuag rov los.” (Tubtxib Tes Haujlwm 24:15) Vim muaj tus nqe txhiv, Vajtswv thiaj yuav tsa cov tuag sawv rov los.

Vajtswv yuav ua kom tej no muaj tiav li cas?

Vajtswv tau tsa ib lub tseem fwv lossis Nceeg Vaj uas kav saum ntuj ceeb tsheej. Lub Nceeg Vaj ntawd yuav kho kom nws lub ntsiab rau lub ntiajteb thiab noob neej muaj tiav. Yexus Khetos yog tus Vajntxwv uas kav lub Nceeg Vaj no. (Ntawv Nkauj 110:1, 2) Thaum Yexus los hauv ntiajteb, nws twb qhia kom nws cov thwjtim thov Vajtswv tias: “Peb leej Txiv uas nyob saum ntuj . . . Thov cia koj lub tebchaws [Nceeg Vaj] los.”​—Mathai 6:9, 10.

Vajtswv lub Nceeg Vaj yuav kav thoob plaws lub ntiajteb. Thaum ntawd yuav tsis muaj kev txom nyem, kev nyuaj siab ntxhov plawv li lawm. Yeej tsis tau muaj ib lub tseem fwv twg uas yuav zoo npaum li Vajtswv lub! Thaum Yexus los hauv ntiajteb, nws thiaj kub siab lug mus tshaj tawm “txoj xov zoo uas hais txog Vajtswv lub tebchaws [Nceeg Vaj].” (Mathai 4:23) Nws kuj sam hwm kom nws cov thwjtim kub siab lug mus tshaj tawm thiab.​—Mathai 24:14.

Vajtswv Yehauvas hlub peb kawg nkaus li, nws thiaj npaj tej no rau noob neej. Tej lus cog tseg no puas ua rau koj xav paub txog Yehauvas ntxiv? Koj puas zoo siab nrog nws sib raug zoo thiab? Kawm ntxiv seb yog peb nrog Vajtswv sib raug zoo yuav pab tau peb lub neej li cas.