Kuv yug xyoo 1927 hauv ib lub zos me me ze lub nroog Sikhankaus (Chicago) lub xeev Ilinos (Illinois) teb chaws U.S.A. Kuv niam kuv txiv yug tau peb tsib leeg, Yethas (Jetha), Daus (Don), kuv, Khauj (Karl), thiab Tshua (Joy). Peb sawv daws kub siab lug teev tiam Yehauvas. Kuv tus muam Yethas tau mus kawm tiav Kile-a xyoo 1943. Daus, Khauj, thiab Tshua lawv puav leej mus nyob Npe-ee hauv lub nroog Npluavlees (Brooklyn) xeev Nus Yauj (New York). Daus mus xyoo 1944, Khauj mus xyoo 1947, thiab Tshua mus xyoo 1951. Kuv niam kuv txiv thiab lawv sawv daws tso tau qauv zoo heev rau kuv xyaum.

Kuv niam kuv txiv nkawd nyiam nyeem Vajlugkub kawg li. Nkawd hlub Vajtswv thiab cob qhia kom peb cov me nyuam hlub Vajtswv ib yam nkaus. Tiam sis thaum muaj Ntsuj Rog Thoob Qab Ntuj Zaum 1 kuv txiv tau mus ua tub rog rau sab Yus Luv. Thaum nws rov los txog kuv niam ua Vajtswv tsaug tias nws tsis raug xwm dab tsi. Kuv niam thiaj hais tias, “Wb rov mus koom cov ntseeg.” Kuv txiv teb tias, “Kuv mam coj koj mus, tiam sis kuv yuav tsis mus.” Kuv niam thiaj nug tias yog vim li cas. Kuv txiv teb kuv niam tias, “Thaum peb ua rog, cov thawj coj kev ntseeg puav leej ntseeg tib yam xwb, tiam sis lawv nyias nyob nyias ib lub teb chaws thov Vajtswv foom koob hmoov rau cov tub rog thiab tej cuab yeej ua rog kom tua yeej tog tod. Es puas yog Vajtswv tuaj ob tog tib si maj?” Nws thiaj tsis xav koom tej kev ntseeg li lawm.

Muaj ib hnub thaum kuv niam tseem mus koom cov ntseeg lawm, Yehauvas ob tug tim khawv tuaj txog ntawm peb tsev. Nkawd muab tau ob phau ntawv rau kuv txiv kawm Vajlugkub. Ob phau ntawd hu ua Lub Teeb (Light) uas piav txog phau ntawv Tshwm Sim. Kuv txiv kuj xav paub ntxiv nws thiaj txais kiag. Thaum kuv niam pom ob phau ntawv ntawd nws kuj muab nyeem thiab. Muaj ib hnub nws txawm pom luag tshaj tawm hauv ntawv xov xwm tias muaj kev kawm Vajlugkub thiab yuav siv ob phau ntawv hu ua Lub Teeb los kawm. Nws thiaj mus koom lawv. Thaum nws mus txog, ib tug poj niam laus ntxhawv qhib qhov rooj. Kuv niam  thiaj muab ib phau rau tus poj niam ntawd saib thiab nug tias, “Nej puas kawm phau ntawv no?” Tus poj niam teb ntua tias, “Me ntxhais’e los tsev, peb kawm kawg.” Lub lim tiam tom qab xwb kuv niam coj peb cov me nyuam nrog nws mus koom ces peb txawm mus koom los li lawm.

Muaj ib zaug tom kev sib txoos, tus coj kom kuv nyeem Phau Ntawv Nkauj 144:15 uas hais tias cov uas teev tiam Yehauvas muaj kev zoo siab. Kuv nyiam nqe ntawd kawg li. Kuj muaj ib nqes hauv 1 Timautes 1:11 uas hais tias Yehauvas yog tus Vajtswv uas muaj kev xyiv fab. Efexus 5:1 kuj hais tias peb “yuav tsum xyaum ua [peb] lub neej raws li Vajtswv tus yam ntxwv.” Kuv thiaj xav tias txhua yam kuv ua rau tus uas Tsim kuv mas kuv yuav tsum xyiv fab hlo ua thiab ua nws tsaug. Ob yam no yog ob yam uas nyob rawv hauv kuv lub neej.

Thaum ntawd lub koom txoos uas nyob ze peb tshaj, nyob hauv Sikhankaus, deb li 32 kilumev (20 mais kev). Txawm li ntawd los peb yeej mus koom li. Kuv thiaj paub phau Vajlugkub zoo zuj zus ntxiv. Kuv tseem nco tias muaj ib zaug tus coj hu Yethas teb. Thaum nws tab tom teb kuv xav twj ywm tias, ‘Kuv twb paub thiab sav ua cas kuv ho tsis tsa tes teb.’ Kuv thiaj npaj kom kuv txawj teb. Tiam sis qhov tseem ceeb tshaj, kuv txoj kev sib raug zoo nrog Yehauvas loj hlob sib nrawg nroos nrog peb cov me nyuam. Kuv thiaj ua kev cai raus dej xyoo 1941.

Kuv tseem nco ntsoov lub rooj sib txoos loj xyoo 1942 hauv Khalivees (Cleveland) xeev Auhaiyaum (Ohio). Kuj muaj cov kwv tij nkauj muam nyob thoob teb chaws Yunathim Xatej (United States) hauv 50 thaj tsam hu xov tooj tuaj mloog thiab. Peb tsev neeg txhos tsev ntaub rau ntawm ib qho chaw uas cov kwv tij tau npaj tseg rau sawv daws tuaj so. Thaum ntawd tseem tab tom muaj Ntsuj Rog Thoob Qab Ntuj Zaum 2 thiab Yehauvas Cov Tim Khawv pib raug tsim txom heev zuj zus. Thaum yuav tsaus ntuj kuv pom cov kwv tij muab lawv tej tsheb nres tig taub hau rau tim ntug. Lawv npaj tias txhua lub tsheb yuav tsum muaj ib tug kwv tij zaum hauv zov. Yog nws pom neeg phem tuaj nws yuav tsum nyem kes thiab qhib teeb tsom tus ntawd kom fam nws qhov muag. Lwm cov kwv tij mam dhia los pab. Kuv xav tias ua cas Yehauvas cov tib neeg yuav muaj tswv yim ua luaj! Kuv thiaj tau zoo pw tsaug zog. Peb kuj tsis raug teeb meem dab tsi li.

Puag tom qab no kuv mam xav tias ua cas kuv niam tsis ntshai hlo li. Nws tso siab plhuav rau Yehauvas thiab lub koom haum. Kuv yeej yuav nco ntsoov nws tus qauv mus li.

Kuv niam nyuam qhuav rau npe ua ib tug tho kev ua ntej lub rooj sib txoos ntawd. Thaum cov kwv tij qhia txog cov tho kev nws ua tib zoo mloog. Thaum peb los tsev nws hais rau peb tias nws xav tho kev mus ntxiv tiam sis nws tsis muaj sij hawm tu tsev. Nws thiaj nug seb peb puas kam pab nws tu. Peb teb tias peb mam pab. Nws thiaj npaj kom peb ib leeg tu ib ob chav ua ntej noj tshais. Tom qab peb mus kawm ntawv lawd nws mus saib ib lwm seb puas huv ces nws mam mus tshaj tawm. Nws muaj hauj lwm ntau heev los nws yeej tu ntshis peb cov me nyuam. Thaum peb los noj sus thiab thaum peb kawm ntawv los txog tsev, nws yeej nyob tsev tos peb. Muaj tej hnub peb  mus kawm ntawv los txog peb kuj nrog nws mus tshaj tawm thiab. Peb ua li no peb thiaj paub txog tus tho kev tes hauj lwm.

Kuv pib tho kev thaum kuv muaj 16 xyoo. Txawm kuv txiv tsis tau yog ib tug Tim Khawv los nws xav paub tias kuv mus tshaj tawm zoo li cas. Muaj ib hmos kuv hais rau nws tias kuv siv zog npaum li cas los nrhiav tsis tau ib tug los kawm Vajlugkub li. Kuv tos ib pliag ces kuv nug kuv txiv tias, “Koj puas kam nrog kuv kawm Vajlugkub?” Nws xav ib pliag ces nws teb tias nws mam nrog kuv kawm. Kuv txiv yog thawj tug uas kuv qhia Vajlugkub rau. Ua rau kuv zoo siab kawg li!

Wb kawm phau “Qhov Tseeb Yuav Tso Koj Dim.” Ntev mus ntev tuaj kuv pom tias kuv txiv pab tau kuv haj yam txawj qhia thiab tshawb nrhiav. Muaj ib hmos tom qab wb nyeem tas ib nqes nws hais rau kuv tias, “Kuv pom tias phau ntawv hais li no. Tiam sis ua li cas koj ho paub tias phau ntawv qhia yog lawm?” Kuv tsis paub teb lawm, kuv thiaj hais tias, “Kuv teb tsis tau tam tim no, thaum wb rov qab kawm, kuv mam teb koj.” Kuv txawm mus tshawb nrhiav tau cov nqe Vajlugkub uas txhawb lub ntsiab wb kawm. Txij thaum ntawd los, ua ntej wb yuav kawm kuv ua tib zoo npaj thiab tshawb nrhiav tso. Qhov ntawd pab tau kuv thiab kuv txiv wb txoj kev ntseeg loj hlob. Nws coj raws li nws tau kawm thiab ua kev cai raus dej xyoo 1952.

Kuv tawm tsev thaum kuv muaj 17 xyoo. Yethas raug txib mus ua ib tug tshaj tawm txawv teb chaws thiab Daus ua hauj lwm hauv Npe-ee. Nkawd ob leeg puav leej nyiam nkawd tes hauj lwm heev. Qhov ntawd txhawb tau kuv kawg li. Kuv thiaj rau npe mus ua hauj lwm hauv Npe-ee thiab mus kawm Kile-a tib si. Kuv mam tos seb Yehauvas yuav txib kuv mus ua yam twg. Xyoo 1946 kuv thiaj raug caw mus ua hauj lwm hauv Npe-ee.

Kuv twb ua hauj lwm hauv Npe-ee tau 75 lub xyoos lawm. Kuv tau ua ntau yam hauj lwm hauv Npe-ee thiab tau kawm ntau yam tshiab. Lawv qhia kom kuv paub ua tej phau ntawv, paub teev tej nyiaj txiag, paub yuav khoom los siv hauv Npe-ee thiab xa tawm. Tiam sis qhov kev cob qhia uas kuv nyiam tshaj hauv Npe-ee yog tej uas lawv cob qhia txog phau Vajlugkub xws li kev pe hawm txhua tag kis thiab lwm yam lus qhuab qhia.

Kuv tus kwv Khauj kuj muab tau tswv yim rau kuv thiab. Nws tuaj ua hauj lwm hauv Npe-ee xyoo 1947. Nws txawj qhia Vajlugkub heev. Muaj ib zaug kuv thov nws pab kuv rau qhov kuv muaj ib zaj lus qhuab qhia. Kuv hais rau nws tias kuv mus tshawb nrhiav tau ntau yam, tiam sis ntau dhau lawm kuv tsis paub xyov yuav siv qhov twg. Nws txawm nug kuv tias, “Yau-ees koj lub ntsiab yog li cas maj?” Kuv khaws kiag tau nws lub tswv yim. Siv qhov uas txhawb lub ntsiab xwb tsis tas mus tham tag nrho  tej uas kuv tshawb tau. Kuv nco ntsoov qhov uas nws qhia kuv ntawd.

Thaum peb nyob Npe-ee yuav kom peb muaj kev zoo siab peb yuav tsum mus tshaj tawm thiab. Yog peb ua li ntawd peb yuav tau txais kev txhawb zog heev. Muaj ib zaug thaum peb tseem nyob hauv lub nroog Nus Yauj (New York City) kuv thiab ib tug kwv tij mus xyuas ib tug poj niam uas tau txais Phau Tsom Faj thiab phau Tsim Dheev! Wb hais rau nws tias “Hmo no wb muaj xov zoo hauv phau Vajlugkub xav qhia rau tib neeg.” Nws teb ntua tias, “Yog neb tuaj tham Vajlugkub ces cia li los tsev.” Peb nyeem thiab tham txog ntau nqe Vajlugkub. Peb kuj tham txog Vajtswv lub Nceeg Vaj thiab lub ntiaj teb tshiab. Nws nyiam heev, lub lim tiam tom qab ntawd nws txawm caw nws cov phooj ywg ib pab tuaj nrog peb kawm ua ke. Tom qab no nws thiab nws tus txiv kuj los teev tiam Yehauvas lawm thiab.

Kuv twb nrhiav txij nkawm tau 10 lub xyoos lawm kuv mam ntsib kuv tus poj niam. Ua cas kuv thiaj nrhiav tau ib tug niam tsev zoo? Kuv thov Yehauvas thiab ua tib zoo xav tias tom qab wb sib yuav tas wb yuav ua dab tsi.

Nyob rau xyoo 1953 tau muaj ib lub rooj sib txoos loj hauv lub tsev Yeev Kim (Yankee Stadium). Tom qab ntawd kuv ntsib ib tug muam hu ua Maivliag Anyos (Mary Aniol). Nws kawm tiav Kile-a nrog kuv tus muam. Nkawd raug txib mus tshaj tawm rau tib lub teb chaws. Maivliag kub siab lug piav rau kuv txog thaum nkawd mus tshaj tawm ntawm tej koog pov txwv Kalinpi-ees (Caribbean), thiab txog cov uas nws tau qhia Vajlugkub rau. Wb kuj sib raug zoo thiab pom tias wb muaj tib lub hom phiaj xav ua hauj lwm puv ntoob rau Yehauvas. Wb thiaj sib tham thiab sib yuav rau lub 4 Hlis xyoo 1955. Kuv xav mas Yehauvas yog tus pub nws rau kuv. Nws tso tau ib tug qauv zoo kawg li. Nws ua txoj hauj lwm twg los nws zoo siab hlo ua. Nws rau siab khwv, nws hlub tib neeg. Maivliag muab Yehauvas thiab Nws txoj kev kav tso ua ntej. (Mathais 6:33) Wb raug txib mus ncig xyuas tej thaj tsam tau 3 lub xyoos ces xyoo 1958 wb raug caw mus ua hauj lwm hauv Npe-ee.

Kuv kawm tau ntau yam los ntawm Maivliag. Thaum wb nyuam qhuav sib yuav tsis ntev wb teem sij hawm los nyeem phau Vajlugkub ua ke. Ib zaug twg wb nyeem li 15 nqes. Wb nyeem tas ib ntus ces wb tham txog cov nqe Vajlugkub ntawd thiab seb yuav siv tej nqe ntawd hauv wb lub neej li cas. Maivliag kheev piav tej uas nws tau kawm hauv Kile-a los sis tej uas nws tau ntsib thaum nws nyob txawv teb chaws. Tej uas nws qhia kuv pab tau kuv heev thaum kuv cev lus qhuab qhia thiab thaum mus txhawb cov muam.​—Pajlug 25:11.

Kuv tus me Maivliag tau tas sim neej xyoo 2013. Kuv tos tsis tau hnub uas yuav rov pom nws hauv lub qab ntuj tshiab! Kuv yuav niaj hnub ua siab ntev cia Yehauvas cob qhia kuv. Thiab kuv yuav tso siab plhuav rau Yehauvas. (Pajlug 3:5, 6) Thaum kuv xav txog tej uas Yehauvas cov tib neeg yuav ua hauv lub qab ntuj tshiab, nplig tau kuv siab thiab ua rau kuv kaj siab kawg li. Thaum ntawd tus Xib Hwb uas txawj cob qhia tshaj plaws yuav qhia peb txog ntau yam tshiab! Kuv ua Nws tsaug tsis txawj tag vim nws cob qhia kuv ib sim neej. Nws txoj kev hlub nplua mias piav tsis paub tag li.