Cov Levis uas tsis ua cov pov thawj ib txhia ua tub ceev xwm zov lub Tuamtsev. Muaj ib tug thawj ua tus coj lawv. Tus neeg sau ntaub ntawv txog cov Yudais hu ua Failaus (Philo) piav li no txog cov tub ceev xwm: “Cov Levis no ib txhia zov tej rooj loog nkag los rau lub Tuamtsev. Ib txhia zov kom tsis txhob lam muaj neeg nkag tau mus rau hauv lub Tuamtsev. Ho muaj ib txhia sib hloo ncig mus ncig los zov lub Tuamtsev nruab hnub hmo ntuj.”

Cov Yudais tej nom tswv xav txib cov tub ceev xwm no thaum twg los tau. Nom tswv Loos tsis tso cai rau cov neeg Yudais nqa ntaj nqa riam, lawv tsuas tso cai rau cov tub ceev xwm zov lub Tuamtsev nqa xwb.

Tus neeg tshawb fawb phau Vajlugkub hu ua Yau-akis Yelemias (Joachim Jeremias) hais tias thaum cov tub ceev xwm tuaj ntes Yexus, nws nug lawv tias ua cas lawv ho tsis ntes nws thaum nws tseem nyob hauv lub Tuamtsev. Yexus yuav tsis nug lawv li no yog hais tias lawv tsis yog cov tub ceev xwm zov lub Tuamtsev. (Mathais 26:55) Yau-akis kuj xav tias cov tub ceev xwm uas xav ntes Yexus ua ntej ntawd kuj yog cov tub ceev xwm zov lub Tuamtsev thiab. (Yauhas 7:32, 45, 46) Tom qab ntawd cov Yudais tej nom tswv kuj xa cov tub ceev xwm no thiab lawv tus thawj mus ntes 2 tug tubtxib coj los rau lawv. Tej zaum cov tub ceev xwm no kuj yog cov uas cab tus tubtxib Paulus tawm hauv lub Tuamtsev mus thiab.​—Tes Haujlwm 4:1-3; 5:17-27; 21:27-30.