“Yehauvas Cov Tim Khawv tsis yog ua zoo rau tib neeg xwb tiam sis tej tsiaj txhu los lawv yeej ua zoo rau. Muaj ib hnub, ib tug npe hu ua Elees (Elaine) sawv ntawm nws lub laub ib sab thiab txawm cev tau ib nyuag qho khoom txom ncauj rau kuv ob tug dev noj. Tom qab no thaum peb rov mus taug kev dua, kuv ob tug dev txawm rub kuv mus rau ntawm cov Tim Khawv kom nkawv thiaj tau noj khoom txom ncauj.

“Ib hlis tag ib hlis tuaj, kuv ob tug dev nyiam qhov uas nkawv tau khoom txom ncauj noj hos kuv los yeej txaus siab kawg li uas tau nrog Yehauvas Cov Tim Khawv tsham. Tiam sis kuv tsuas nrog lawv tham tsawg tsuag ob peb nyuag lo xwb. Kuv muaj hnub nyoog li 70 tawm xyoo lawm los kuv twb tsis paub hais tias Yehauvas Cov Tim Khawv txoj kev ntseeg yog li cas tiag. Kuv yeej ntseeg vajtswv thiab tiam sis peb pawg ntseeg coj tsis raws li Vajtswv Txoj Lus ces kuv thiaj li xav hais tias cia kuv mam li kawm Vajlugkub tom tsev xwb.

“Kuv taug kev rau ub rau no, kuv yeej pom Yehauvas Cov Tim Khawv sawv ntsug teeb lawv tej laub. Lawv ncauj lus yeej zoo kawg li. Yog kuv nug lawv ib yam dab tsi mas lawv yeej nthuav kiag Vajlugkub los qhia rau kuv. Thaum kuv pom lawv coj li no, kuv thiaj li qhib siab zuj zus rau lawv.

“Muaj ib hnub Elees txawm nug kuv hais tias, ‘Koj puas ntseeg hais tias tej tsiaj txhu yog Vajtswv muab pub rau peb tib neeg?’ Kuv txawm teb ntua tias, ‘Yog, yeej yog Vajtswv muab.’ Ces Elees txawm nthuav hlo nws phau Vajlugkub mus rau Yaxayas 11:6-9 qhia rau kuv. Txij hnub ntawd los kuv lub siab txawm tawg plho xav kawm Vajlugkub tiam sis kuv haj tseem tsis tau kam nqa Yehauvas Cov Tim Khawv tej ntaub ntawv coj mus nyeem.

“Tau ob peb hnub tom qab ntawd, kuv rov tau nrog Elees thiab nws tus txiv Npleej (Brent) nkawv tham txog Vajlugkub. Nkawv txhawb kom kuv mus nyeem phau Mathais mus txog phau Tes Haujlwm xwv kuv thiaj paub hais tias ib tug uas xyaum coj raws li Yexus yuav tau coj li cas tiag. Kuv thiaj li pib mus nyeem thiab tsis ntev tom qab ntawd thaum xyoo 2016, kuv thiaj kawm Vajlugkub nrog Npleej thiab Elees nkawv.

“Kuv tos tsis hnyu yuav maj kawm Vajlugkub nrog nkawv thiab mus tej kev sib txoos. Kuv nkag siab Vajtswv Txoj Lus mas ua rau kuv zoo siab kawg li. Tau ib xyoos tom qab ntawd, kuv txawm ua kev cai raus dej lawm. Kuv twb muaj 79 xyoos lawm los kuv zoo siab kawg nkaus li tias Yehauvas tseem rub kuv los paub txog nws thiab nrog nws cov tib neeg nyob thooj siab koom ntsws ua ke.”