COV neeg Henplais uas nyob rau hauv lub teb chaws uas Vajtswv cog tseg pib xam lawv tej xyoo thaum lawv ncaws teb thiab cog qoob uas niaj hnub niam no ces yog lub 9 Hlis mus rau lub 10 Hli.

Tib neeg suav lawv tej hli raws lub hli uas ntev li 29 mus rau 30 hnub. Hos lawv xam xyoo raws lub hnub. Yog lawv muab qhov xyoo suav raws lub hli ces luv dhau lawm ces lawv thiaj suav raws lub hnub. Yog li ntawd, lawv thiaj nrhiav ib txoj hau kev los mus suav kom sib sib raws. Lawv txhab ob peb hnub los sis ib lub hlis thaum pib xyoo tshiab. Thaum lawv xam cov hli li no thiaj li dhos rau lub caij cog thiab sau qoob loo.

Nyob rau Mauxes tiam, Vajtswv hais rau nws cov tib neeg tias thawj lub hli ntawm thawj xyoo yog lub hli Anpis los sis Nixam uas poob rau lub caij nplooj ntoos hlav. (Khiav Dim 12:2; 13:4) Lub caij ntawd poob rau lub 3 Hlis los sis 4 Hlis ntawd. Nyob rau lub hli Nixam, cov Ixayees ua ib lub koob tsheej thiab lub hli ntawd yog lub hli sau qeb.​—Khiav Dim 23:15, 16.

Muaj ib tug neeg tshawb fawb npe hu ua Amias Su-aws (Emil Schürer) tau hais tias: “Muab ib lub hli txhab rau ib xyoos twg mas yooj yim kawg li. Qhov ua Kev Cai Hla Dhau yuav tsum ua rau lub hli Nixam thaum lub hli nra nra thiab yuav tsum poob tom qab lub caij nplooj ntoos hlav uas yog nruab hnub thiab hmo ntuj ntev tib yam nkaus. Thaum ib xyoos twg yuav xaus, yog lawv paub hais tias txoj Kev Cai Hla Dhau yuav poob tom qab nruab hnub thiab hmo ntuj ntev tib yam nkaus ces cov Yudais txhab ib lub hlis ua ntej lub hli Nixam.”

Yehauvas Cov Tim Khawv siv tib yam nkaus li tau hais tas los no, lawv thiaj xam tau hnub twg yuav ua kev cai nco txog Yexus. Lawv ua txoj kev nco txog no rau lub caij nplooj ntoos hlav thiab yog cov neeg Henplais suav tias hnub Nixam 14. Tsis tas li ntawd, lawv tau muab hnub ntawd qhia rau cov ntseeg nyob hauv txhua lub koom txoos thoob ntiaj teb no paub.

Vim li cas cov neeg Henplais ho paub tias thaum twg lub hli xiab, thaum twg lub hli nqeg? Niaj hnub niam no ces peb cia li saib kiag daim ntawv qhia caij qhia nyoog los sis mus saib peb lub twj ntawm tes qhia caij qhia nyoog. Tiam sis nyob puag txheej thaub ub, tsis yooj yim npaum li tam sim no.

Lub caij thaum dej dag nyab ntiaj teb, txhua lub hlis yeej muaj 30 hnub. (Chivkeeb 7:11, 24; 8:3, 4) Tom qab no, cov neeg Henplais tej hli tsis yog 30 hnub lawm. Lawv pib xam cov hli thaum pom lub hli tshwm tuaj.

Muaj ib zaug, Daviv thiab Yaunathas nkawv tau hais txog ib lub hlis tias: “Tagkis yog hnub ua rooj noj rooj haus Hli Xiab.” (1 Xamuyees 20:5, 18) Yog li ntawd, zoo yam nkaus li thaum nyob rau nkawv lub caij lub nyoog, lawv twb xam cov hli tas lawm. Tiam sis ua li cas cov Ixayees ho paub hais tias thaum twg yog hli xiab? Muaj ib phau ntawv sau cov Yudais tej kev cai hu ua Mishnah txhais tej no kom peb thiaj nkag siab zoo. Phau ntawv no qhia hais tias tom qab cov Yudais rov qab tim lub teb chaws Npanpiloos los, pab Xahenrees yog cov txiav txim seb yuav siv li cas rau li cas. Xya lub hlis twg uas yog tim 30 ces pab Xahenrees mus sib ntsib ua ke es tham seb lub hli tom ntej yuav pib li cas. Ua cas pab Xahenrees ho txawj xam tej hli?

Thaum tsaus ntuj, lawv tso neeg mus nyob tej qhov chaw siab siab los sis tej roob siab uas nyob puag ncig lub nroog Yeluxalees kom thiaj pom thaum lub hli tshwm tuaj. Thaum lub hli tshwm ces lawv maj nroos mus qhia rau pab Xahenrees paub. Thaum pab Xahenrees hnov txhua tus tej lus hais tau sib dhos pes daws ces lawv mam li txiav txim tias hnub twg yog lub hli xiab. Ua li yog hais tias ho muaj huab los laum ua rau cov txiv neej mus tshuaj ntsuas tsis pom lub hli ho muaj li cas? Lub hli nqeg ntawd muaj 30 hnub ces lub hli tom ntej mam li pib.

 Yuav kom txhua leej txhua tus paub hais tias lub hli tshiab pib lawm ces lawv mus hlawv ib teg tsau cig lam lug saum lub Roob Txiv Aulib uas nyob ze lub nroog Yeluxalees. Nyob rau lwm thaj chaw siab hauv teb chaws Ixayees, lawv mus rauv cub tawg qhia rau ib zej tsoom paub lub hli tshiab. Dhau ntawd lawm, lawv mam li tso neeg mus fij xo ntxiv. Txawm leej twg yuav nyob rau qhov twg los xij peem, yeej yuav paub txog lub hli tshiab, tsis hais cov neeg Yudais nyob rau hauv lub nroog Yeluxalees mus thoob plaws Ixayees teb chaws thiab lwm tej zej zog huv tib si. Zaum no, txhua leej txhua tus tib txhij ua tau koob tsheej lawm.

Muaj ib daim ntawv kos tseg kom peb thiaj li nkag siab tias cov neeg Henplais xam lawv tej hli, tej koob tsheej thiab tej caij nyoog sib txuas pes daws li cas.