Hauv zaj ntawd, peb kawm tau tias tsuas muaj tib qho uas tseem ceeb tshaj plaws rau tib neeg thiab cov tub txib saum ntuj xwb. Qhov ntawd yog hwm Yehauvas lub npe uas zoo kawg nkaus. Qhov uas Yehauvas txoj kev kav puas yog txoj uas zoo tshaj plaws los tsis yog ntawd tsuas yog ib qho ntawm qhov uas hwm Yehauvas lub npe xwb. Ib yam li ntawd, qhov uas tib neeg yuav npuab siab los sis tsis npuab siab rau Yehauvas los kuj yog ib qho seb lawv puas hwm Yehauvas lub npe thiab xwb.

Tam sim no peb yuav tham txog peb qho seb yog vim li cas Yehauvas lub npe thiab qhov uas sawv daws yuav tsum hwm nws lub npe thiaj yog qhov uas tseem ceeb dua ntais.

Thawj qho, yog thaum uas Xatas xyav Yehauvas lub koob lub npe hauv lub vaj Edees. Lo lus uas Xatas nug Evas iab liam tias Yehauvas yog ib tug Vajtswv uas cuaj khaum heev thiab tej uas Yehauvas hais kom Adas thiab Evas nkawd ua mas nruj heev thiab tsis ncaj ncees li. Tsis tas li ntawd, Xatas tseem ntxeev lus tias Yehauvas dag Adas thiab Evas nkawd lawm. Xatas dag thiab xyav Yehauvas lub koob lub npe, nws thiaj tau lub npe “dab Ntxwgnyoog” uas txhais tias nws yog ib tug uas “dag.” (Yauhas 8:44) Vim Evas ntseeg Xatas tej lus dag, nws thiaj li tsis mloog Yehauvas lus thiab tawm tsam Yehauvas txoj kev kav. (Chivkeeb 3:1-6) Los txog niaj hnub no los Xatas yeej tseem xyav Yehauvas lub koob lub npe quj qees thiab dag tias Yehauvas mas niam phem li ub li no. Cov uas ntseeg nws tej lus dag tej zaum yuav tsis kam mloog Yehauvas lus. Tiam sis rau Yehauvas cov neeg, qhov uas Xatas dag txog Yehauvas lub npe dawb huv yog qhov uas tsis ncaj ncees tshaj plaws. Thiab yog qhov uas ua rau sawv daws raug kev txom nyem thiab muaj kev phem kev qias hauv ntiaj teb no.

Qhov ob, yuav kom pab tau tib neeg thiab cov tub txib saum ntuj, Yehauvas yuav ua kom sawv daws paub tias nws lub npe yeej dawb huv thiab tsis muaj kev thuam li. Qhov no yog qhov uas tseem ceeb tshaj plaws rau Yehauvas. Yehauvas thiaj hais tias kuv yuav “qhia kuv lub npe uas dawbhuv rau lwm haivneeg.” (Exekees 36:23) Thiab Yexus hais qhia meej meej rau Yehauvas cov neeg tias qhov uas tseem ceeb tshaj plaws thaum lawv thov Yehauvas yog “thov kom sawv daws hwm [Yehauvas] lub npe.” (Mathais 6:9) Phau Vajlugkub hais tag los hais dua tias kom sawv daws qhuas Yehauvas lub npe. Xws li hais hauv cov nqe Vajlugkub no: “Qhuas [Yehauvas] uas muaj tshwjchim loj kawg nkaus lub npe.” (1 Xwmtxheej Vajntxwv 16:29; Phau Ntawv Nkauj 96:8) “Hu nkauj qhuas nws lub npe thiab nws lub tshwjchim.” (Phau Ntawv Nkauj 66:2) “Kuv yuav qhuas koj lub npe kawg siab kawg ntsws; thiab kuv yuav tshaj tawm koj lub npe kom nrov ncha mus ibtxhis.” (Phau Ntawv Nkauj 86:12) Muaj ib zaug, thaum Yehauvas hais lus saum ntuj tuaj rau Yexus ntawm lub tuam tsev hauv Yeluxalees tag, Yexus hais tias: “Txiv, thov kom koj lub npe tau koob meej!” Ces Yehauvas teb saum ntuj tuaj hais tias: “Kuv twb ua rau kuv lub npe tau koob meej lawm, thiab kuv yuav rov ua dua.”​—Yauhas 12:28. a

Qhov peb, Yehauvas lub hom phiaj yog kom sawv daws hwm nws lub npe mus ib txhis. Muab xav li no:  Thaum dhau kev sim siab zaum kawg tom qab Yexus kav 1,000 xyoo yuav zoo li cas? Thiab thaum ntawd, cov tub txib saum ntuj thiab tib neeg yuav xav li cas txog Yehauvas lub npe? Lub sij hawm ntawd tib neeg yuav tsis muaj teeb meem npuab siab rau Yehauvas. Rau qhov lawv txhua leej txhua tus twb zoo tiav log lawm, twb raug sim tag lawm, thiab lawv twb tau txoj sia nyob mus ib txhis lawm. Tsis tas li ntawd xwb, thaum ntawd yuav tsis muaj leej twg nug ntxiv lawm tias Yehauvas txoj kev kav puas yog txoj uas zoo tshaj plaws. Rau qhov thaum ntawd tag nrho cov tub txib saum ntuj thiab tib neeg hauv ntiaj teb no yuav lees yuav Yehauvas txoj kev kav mus tas ib txhis. Tiam sis thaum ntawd Yehauvas lub npe puas tseem yog qhov uas tseem ceeb dua ntais?

Thaum ntawd txhua leej txhua tus yuav paub qhov tseeb txog Yehauvas lub npe thiab yuav tsis muaj leej twg thuam tau Yehauvas lub npe ntxiv lawm. Txawm li ntawd los, Yehauvas lub npe yeej tseem yog qhov uas tseem ceeb tshaj plaws rau Yehauvas cov tub qhe saum ntuj thiab hauv ntiaj teb no. Rau qhov lawv yuav pom Yehauvas ua ntau yam uas zoo kawg nkaus. Xws li, lawv yuav pom Yexus muab ib puas tsav yam rov rau Yehauvas thiab Yehauvas “yuav kav tagnrho ib puas tsav yam ntawd huv tibsi.” (1 Kauleethaus 15:28) Tom qab ntawd, tib neeg hauv ntiaj teb no yuav zoo siab heev vim lawv “yuav tau nyob ywj pheej ua Vajtswv cov me nyuam.” (Loos 8:21) Thiab Yehauvas yuav coj tag nrho nws cov tub ki saum ntuj thiab hauv ntiaj teb no los nyob ua ke ua ib tse neeg.​—Efexus 1:10.

Thaum ib puas tsav yam muaj tiav li Yehauvas lub hom phiaj lawm, nws cov tub txib saum ntuj thiab nws cov neeg hauv ntiaj teb yuav xav li cas? Thaum ntawd los lawv yeej tseem yuav qhuas Yehauvas lub npe. Daviv sau hauv Phau Ntawv Nkauj tias: “Cia li qhuas [Yehauvas] . . . Thov kom nws lub tshwjchim nyob puv nkaus hauv lub ntiajteb no.” (Phau Ntawv Nkauj 72:18, 19) Ces yeej yuav muaj ntau yam tshiab uas zoo heev tsis txawj tag li rau peb qhuas Yehauvas lub npe mus ib txhiab ib txhis.

Yehauvas lub npe qhia ib puas tsav txog nws. Qhov tseem ceeb tshaj yog qhov uas nws hlub peb. (1 Yauhas 4:8) Peb yuav nco ntsoov Yehauvas txoj kev hlub uas nws tsim peb thiab muab nws tus Tub los tuag txhiv peb. Thiab nws ua txhua yam los qhia rau peb tias nws txoj kev kav yog txoj uas ncaj ncees tshaj plaws vim nws hlub peb. Peb yuav pom Yehauvas hlub peb tas mus li tsis txawj kawg. Peb yuav nyob ze rau peb Leej Txi thiab muaj kev sib raug zoo nrog nws. Thiab peb yuav qhuas nws lub npe mus tag ib txhiab ib txhis.​—Phau Ntawv Nkauj 73:28.