COOB TUS HAIS TIAS YIM HUAB MUAJ NYIAJ TXIAG YIM HUAB KAJ SIAB. Vim lawv ntseeg li no thiaj muaj qas txhiab qas vam leej siv zog khwv noj khwv haus kom nplua nuj. Ua li, kev muaj txiag nplua nuj puas ua rau yus kaj siab tiag, los yog zoo siab ib vuag xwb? Cov neeg tshawb txujci ho pom li cas?

Muaj ib phau ntawv tshawb fawb txog kev kaj siab hais tias, yog yus muaj noj muaj hnav, muaj vag muaj tse nyob lawm, txawm yus khwv tau nyiaj ntau ntxiv los pab tsis tau kom yus zoo siab tshaj ntawd. (Journal of Happiness Studies) Ua li, puas yog nyiaj txiag tsim kev ntxhov siab rau peb xwb? Tsis yog. Muaj dua ib phau ntawv tshawb fawb hais li no: “Twb yog tibneeg khwv dhau lawm lawv thiaj tsis kaj siab xwb.” (Monitor on Psychology) Cov lus ntawd hais raws li nqe Vajlugkub no uas sau 2,000 xyoo dhau los lawm: “Qhov uas nyiam nyiaj txiag yog txhua yam kev phem tus cag. Qhov uas ntshaw nyiaj txiag no ua rau . . . lawv lub siab raug ntau yam kev txom nyem chob.” (1 Timaute 6:9, 10) Es chob siab li cas?

PW TSIS TSAUG ZOG VIM TXHAWJ XEEB TXOG POB NYIAJ. “Tej tub zog tau noj ntau thiab tsawg los kuj pw tsaug zog zoo, siab tus yees, tiamsis qhov uas tus nplua nuj muaj nplua mias kuj tsis ua rau nws tsaug zog zoo.”​—Laj Lim Tswvyim 5:12.

TSIS KAJ SIAB VIM LUB NEEJ TSIS MUS LI YUS XAV. Cov uas ntshaw nyiaj txiag xav tias thaum lawv khwv tau ib pob nyiaj ces lawv yuav zoo siab. Tiamsis tsis muaj tseeb li lawv xav ntawd vim tias tsis muaj ib yam yuav txaus lawv lub siab ntshaw. “Tus uas nyiam nyiaj muaj npaum twg yeej tsis txaus nws lub siab, tus uas nyiam nyiaj txiag kuj tsis txaus siab rau tej uas tau lawm.” (Laj Lim Tswvyim 5:10) Yog peb ntshaw plias lub neej nplua nuj ces peb yuav muab tej yam tseem ceeb uas yog peb tsev neeg, peb cov phoojywg, thiab peb txojkev pe hawm Vajtswv tso ua qab.

KEV NYUAJ SIAB NTXHOV PLAWV THAUM POOB NYIAJ POOB TXIAJ. “Tsis txhob khwv dhau huas nyiaj txiag xwb, yuav tsum ntse tsis txhob huas li ntawd. Thaum koj lub qhov muag ntsia ntsoov tej ntawd, kuj ploj ntais lawm. Tamsim ntawd tej nyiaj txiag ntawd yeej muaj kooj tis ya mus rau saum nruab ntug yam nkaus li dav npoj.”​—Paj Lug 23:4, 5.

TXAUS SIAB RAU TEJ UAS YUS MUAJ. “Vim peb tsis tau coj ib yam dabtsi los rau hauv lub ntiajteb, thiab peb yuav coj tsis tau ib yam dabtsi tawm hauv lub ntiajteb mus li thiab. Tiamsis yog peb muaj noj muaj hnav peb yuav txaus siab rau tej ntawd.” (1 Timaute 6:7, 8) Cov uas txaus siab rau tej yam uas lawv muaj tsis yws taus thiab tsis khib luag li. Lawv tsis luab nuj luab nqe mus lob tej khoom ub khoom no. Lawv thiaj tsis ntxhov siab li luag lwm tus.

MUAJ LUB SIAB DAWB PUB RAU LUAG. “Qhov uas pub rau luag ua rau yus kaj siab dua li txais luag li los.” (Tubtxib Tes Haujlwm 20:35) Cov uas muaj lub siab dawb pub rau luag kaj siab vim lawv xav ua rau lwm tus zoo siab. Tej zaum lawv tsis muaj ntau, tiamsis lawv ua siab dav pub. Lawv zoo siab qee sijhawm mus pab lwm tus. Vim li no, lawv thiaj muaj tej phoojywg kwvluag uas tig rov los hlub lawv thiab pub rau lawv. Nyiaj txiag yeej pauv tsis tau tej no.​—Luka 6:38.

MUAB TIBNEEG SAIB HLOB DUA NYIAJ TXIAG. “Noj zaub tsuag nyob sib hlub zoo dua noj nyuj rog nyob sib ntxub.” (Paj Lug 15:17) Nqe no txhais li cas? Txhais tias tej phoojywg uas sib hlub sib pab tseem ceeb dua tej uas yus muaj. Peb yuav tsum muaj kev hlub peb thiaj muaj kev kaj siab.

Ib tug pojniam nyob Amelikas qab teb (South America) hu ua Xanpina (Sabina) tau pom tias tej hauv paus ntsiab lus hauv phau Vajlugkub pab tau nws heev. Tom qab nws tus txiv tso nws tseg lawd, nws khwv ciaj khwv tuag los yug lawv cov niam tub. Nws sawv thaum 4 teev txhua tagkis thiab nws ua 2 txog haujlwm. Txawm nws khwv li ntawd los nws tseem lauj sijhawm kawm Vajlugkub thiab. Thaum kawg zoo li cas?

Xanpina tseem niaj hnub khwv li qub. Tiamsis nws kaj siab lawm ntau. Vim li cas? Vim nws pib kawm Vajlugkub. Qhov uas nws kawm Vajlugkub yug tau nws txojkev ntseeg, nws lub neej thiaj kaj siab. (Luka 11:28) Nws tseem nrhiav tau tej phoojywg zoo nyob hauv lub koom txoos thiab. Nws kuj zoo siab kawg li uas nws tau mus qhia Vajlugkub rau lwm tus.

Yog peb xyaum raws li tej hauv paus ntsiab lus hauv phau Vajlugkub es txaus siab rau peb lub neej, ua lub siab dav pub rau luag, thiab muab tibneeg saib hlob dua nyiaj txiag thiab tej qhov txhia chaw ces peb lub neej yuav kaj siab dua. Yeej tsim nyog peb xyaum li no, puas yog?