Tswvyim Pab Lub Cuab Lub Yig
Txojkev txij nkawm thiab kev muaj tub muaj ki yog ib qho koob hmoov zoo kawg nkaus uas los ntawm tus Tswv Tsim los. Nws xav kom txhua tsev neeg muaj kev zoo siab, yog li nws thiaj muab ib phau ntawv los cob qhia peb. Cia peb kawm seb nws qhia li cas.
Cov Txiv Tsev, Hlub Koj Tus Pojniam
‛Cov txiv yuav tsum hlub lawv cov pojniam ib yam li lawv hlub lawv lub cev. Yeej tsis muaj leejtwg yuav ntxub nws lub cev.’—EFEXUS 5:28, 29.
Tus txiv yog lub taubhau ntawm lub cuab lub yig. (Efexus 5:23) Ib tug txiv tsev zoo saib nws tus pojniam rau nqi thiab yuav tsis ua nruj ua tsiv. Nws hlub nws pojniam thiab khwv kom nws pojniam tau noj tau haus. Nws tsis ua raws li nws lub siab nyiam txhua zaus tiamsis yuav xam pom nws tus pojniam thiab. (Filipis 2:4) Yog muaj dabtsi los nws tsis zais siab thiab yeej sab laj nrog nws tus pojniam. Thaum nws pojniam tham nws ua tib zoo mloog. Tus txiv yuav tsis ua npau taws vog, ntaus lossis cem nws pojniam ua lwj ua liam.—Kaulauxais 3:19, NN.
Cov Pojniam, Hwm Koj Tus Txiv
“Txhua tus pojniam nyias yuav tsum hwm nyias tus txiv.”—EFEXUS 5:33.
Yog cov pojniam hwm thiab txhawb nqa lawv tus txiv yuav pab tau tsev neeg muaj kev sib haum xeeb. Txawm tus txiv ua yuam kev los tus pojniam yuav tsum tsis txhob maj thuam, tiamsis yuav tau ua lub siab mos siab muag saib taus tus txiv. (1 Petus 3:4) Yog tus pojniam muaj dabtsi hais los nws yuav tsum tos zoo caij zoo nyoog tso mam ua tib zoo hais.—Tej Lus Qhia 3:7.
Npuab Siab Rau Koj Tus Txij Nkawm
‘Tus txivneej . . . thiab tus pojniam yuav koom ua ib lub cev.’—CHIVKEEB 2:24.
Thaum ib tug pojniam thiab ib tug txivneej sib sau los ua txij ua nkawm, nkawd koom ua ib lub cev lawm. Yuav kom nkawd lub neej nyob ruaj khov nkawd yuav tsum sib tham kom sib nkag siab thiab koom tes nroos sib pab, tsis hais rau yam loj yam me. Tsis tag li ntawd, ib leeg yuav tsum npuab siab rau ib leeg. Tsis txhob mus deev lwm tus thiaj tsis muaj kev puas siab puas ntsws thiab kev tsis sib ntseeg siab.—Henplais 13:4.
Cob Qhia Nej Tej Menyuam
“Qhia menyuam kom paub ua nws lub neej, nws yuav nco ntsoov tej lus ntawd mus tas nws sim neej.”—PAJLUG 22:6.
Vajtswv tau muab lub luag haujlwm cob qhia menyuam rau cov niam cov txiv. Yog li, cov niam txiv yuav tau coj zoo menyuam thiaj yuav ua neeg tsim txiaj. (2 Kevcai 6:6, 7) Thaum menyuam tsis mloog lus, ib leej niam leej txiv uas muaj tswvyim yuav tsis maj chim tiamsis yuav ua tib zoo mloog menyuam hais tso. (Yakaunpaus 1:19) Yog thaum tsim nyog qhuab ntuas lawm, qhuab ntuas raws kev hlub tsis yog raws kev chim.
Mloog Niam Mloog Txiv Lus
“Cov menyuam, nej yuav tsum mloog nej niam nej txiv lus . . . ‘Nej yuav tsum hwm nej niam nej txiv.’”—EFEXUS 6:1, 2.
Cov menyuam yuav tsum mloog lus thiab saib taus niam thiab txiv, tsev neeg thiaj muaj kev kaj siab. Txawm cov uas tiav niam tiav txim lawm los yuav tau pab saib xyuas niam thiab txiv rau yav laus. Tej yam uas nej ua tau yog pab tu vaj tu tsev lossis muab nyiaj pab niam pab txiv.—1 Timautes 5:3, 4.
Tej Yam No Yuav Pab Tau Koj Thiab
KOJ TSEV NEEG YEEJ NRHIAV TAU KEV ZOO SIAB
Cia Vajtswv Pab Kom Koj Txojkev Txij Nkawm Muaj Kev Zoo Siab
Yog tias koj xav txog 2 lo lus nug no xwb yuav pab tau koj txojkev txij nkawm.
NTSIG TXOG PEB
Rau Npe Kawm Vajlugkub
Kav tsij rau npe yog koj muaj dab tsi xav nug Yehauvas Cov Tim Khawv los sis xav paub seb Yehauvas Cov Tim Khawv ntseeg li cas.
