Sau Rau Cov Filipis 2:1-30
2 Nej sawv daws nrog Khetos koom siab. Yog li ntawd, nej ib leeg yuav tsum hlub ib leeg, ib leeg nplig ib leeg, ib leeg mob siab ib leeg, ib leeg hmov tshua ib leeg, thiab ib leeg yuav tsum txhawb ib leeg tiag tiag.
2 Yog nej ua li no ces yuav ua rau kuv yim huab kaj siab. Thov kom nej nyob sib haum xeeb, txawj sib hlub, thiab koom tau ib lub siab ua tib txog hauj lwm.
3 Tsis txhob xam khib, tsab ua loj, sib tw ua tus loj tus siab. Tiam sis yuav tsum txo hwj chim muab lwm tus saib hlob dua yus.
4 Tsis txhob ua kom haum yus siab xwb tiam sis yuav tsum ua kom haum lwm tus siab thiab.
5 Cia peb xyaum coj li Yexus Khetos.*
6 Txawm nws zoo ib yam li Vajtswv* los, nws yeej tsis xav tias nws yuav txeeb meej mom nrog Vajtswv sib txig sib luag.
7 Nws tso ib puas tsav yam tseg, yeem ua ib tug qhev thiab los yug ua tib neeg.
8 Tsis tas li ntawd xwb, thaum nws yug los ua neeg, nws txo hwj chim thiab mloog Vajtswv lus mus txog hnub nws tuag kiag saum tus ncej ntoo.*
9 Twb yog vim li ntawd, Vajtswv thiaj pub nws tau lub meej mom siab tshaj thiab tau lub npe zoo tshaj txhua lub npe tib si.
10 Vajtswv ua li ntawd kom txhua leej txhua tus, tsis hais cov uas nyob saum ntuj, cov uas nyob hauv ntiaj teb, thiab cov uas nyob hauv nruab a* hwm Yexus lub npe.
11 Txhua tus* yuav tsum lees yuav Yexus Khetos ua tus Tswv kom Vajtswv uas yog peb Leej Txiv tau koob meej.
12 Cov kwv tij nkauj muam, kuv hlub nej kawg li. Nej ib txwm mloog lus. Txawm kuv ncaim nej lawm los, nej tseem mloog lus tshaj thaum kuv nrog nej nyob lawm thiab. Yeej meem rau siab ua li no es paub ntshai paub hwm Vajtswv, thiaj yuav cawm tau nej txoj sia.
13 Vajtswv yog tus pub dag pub zog rau nej kom nej thiaj ua tau haum nws siab. Nws ua kom nej muaj lub siab kub lug thiab muaj zog npho ua raws li nws siab nyiam.
14 Txhua yam uas nej ua, nej tsis txhob yws, tsis txhob sib cav sib ceg.
15 Nej thiaj yog Vajtswv cov me nyuam uas dawb huv tsis muaj chaw thuam li. Yog nej ua neeg dawb huv ces nej yuav ci ntsa iab rau tiam neeg siab phem siab nkhaus no.
16 Cia li tuav rawv Vajtswv txoj lus uas pub txoj sia. Thaum txog Khetos hnub, kuv thiaj muaj chaw khav txog nej, vim kuv tes hauj lwm khwv khwv tsis tas dawb tas do.
17 Kuv yeej ua kawg kuv lub dag lub zog los txhawb nej ib yam li khob cawv fij rau Vajtswv uas muab hliv huv si rau saum tej khoom uas nej muab fij rau Vajtswv. Txawm li ntawd los, kuv yeej nrog nej zoo siab rau qhov twb yog nej ntseeg nej thiaj ua Vajtswv tes hauj lwm li no.
18 Tsim nyog nej nrog kuv zoo siab thiab.
19 Kuv vam tias tsis ntev saum no yog tus Tswv Yexus pom zoo, kuv yuav txib Timautes tuaj xyuas nej. Thaum kuv hnov nej moo yuav txhawb tau kuv lub zog heev.
20 Tsis muaj leej twg yuav mob siab txog nej li Timautes.
21 Dua li lwm cov, lawv tsuas txhawj txog lawv tus kheej xwb, lawv tsis quav ntsej txog Yexus Khetos.
22 Tiam sis yeej tsim nyog qhuas Timautes rau qhov nws nrog nraim kuv tshaj tawm txoj xov zoo kawg nws lub dag lub zog, ib yam li wb yog ob txiv tub.
23 Timautes yog tus uas kuv xav txib tuaj xyuas nej. Cia seb luag puas tso kuv tawm hauv tsev loj cuj, thaum kuv paub li cas kuv mam txib nws tuaj.
24 Kuv vam tias yog tus Tswv pom zoo ces kuv yuav tau tuaj xyuas nej sai sai no.
25 Nim no kuv yuav xa Epafauditas rov los rau nej. Nws yog kuv tus kwv tij uas nrog kuv ua hauj lwm thiab nrog kuv ua Khetos ib tug tub rog. Nws yog tus uas nej txib tuaj tu kuv.
26 Nws xav pom nej txhua tus. Nws nyuaj siab kawg li rau qhov nej hnov tias nws muaj mob.
27 Nws yeej mob hnyav tiag twb yuav luag tuag. Tiam sis Vajtswv hlub* nws es nws thiaj nquag lawm. Kuj yog Vajtswv hlub* kuv thiab, xwv thiaj tsis tsav kev nyuaj siab rau kuv ntxiv.
28 Kuv yuav xa nws los rau nej sai sai no mas thaum nej pom nws nej yuav zoo siab heev. Thaum ntawd kuv yuav tsis txhawj txog nej lawm.
29 Cia li zoo siab hlo tos txais nws li nej ib txwm tos txais cov ntseeg tus Tswv. Tsim nyog peb hlub tshua cov kwv tij uas zoo li ntawd.
30 Nws twb yuav luag tuag vim nws ua Khetos tes hauj lwm. Nws yeej tsis khuv xim nws txoj sia thiab nws zoo siab hlo nyob nej chaw pab kuv vim nej tuaj tsis tau.
Cov taw ntawv
^ Lus Kilis txhais tias “Khetos Yexus.” Lawv hais “Khetos” ua ntej kom sawv daws xam pom Yexus lub meej mom ua tus xaiv tseg.
^ Uas yog nws muaj lub cev plig ib yam li Vajtswv.
^ Mus saib Cov Lus Txhais.
^ Uas yog cov uas Vajtswv yuav tsa sawv hauv qhov tuag rov qab los.
^ Lus Kilis yog “txhua tus nplaig.”
^ Los sis “khuv leej.”
^ Los sis “khuv leej.”
