Lukas Sau 16:1-31
16 Yexus kuj hais rau nws cov thwj tim tias, “Muaj ib tug yawg nplua nuj uas muaj ib tug tub txib saib xyuas nws tej cuab txhiaj cuab tam. Luag liam tias tus tub txib muab tus los pav tej qhov txhia chaw siv phum lam ntsuav.
2 Tus yawg nplua nuj thiaj hu nws los thiab hais tias, ‘Kuv twb hnov txog tej uas koj ua tsis ncaj lawm. Muab tej ntaub ntawv teev nyiaj uas koj tuav los rau kuv saib. Txij no mus koj yuav tsis tau saib xyuas kuv lub cuab tam lawm.’
3 Tus tub txib thiaj xav twj ywm tias, ‘Zaum no kuv tus los pav yuav tsis pub kuv ua hauj lwm lawm. Kuv mus ua tsis taus zog, kuv kuj txaj muag mus thov khawv thiab. Kuv yuav ua li cas lau?
4 Ab! Cia kuv ua li no xwv thaum kuv poob hauj lwm, luag thiaj tos txais kuv mus hauv luag tej tsev.’
5 Nws thiaj hu cov uas tshuav tus los pav nqi, ib tug zuj zus. Nws hais rau thawj tug tias, ‘Koj tshuav kuv tus los pav nqi npaum li cas?’
6 Tus ntawd teb tias, ‘Kuv tshuav tus los pav 100 thoob* roj txiv aulib.’ Tus tub txib thiaj hais tias, ‘Nov yog daim ntawv tshuav nqi. Kav tsij los zaum es muab kho ua 50 thoob xwb.’
7 Tus tub txib ho nug dua ib tug tias, ‘Koj ne, koj tshuav tus los pav nqi li cas?’ Tus ntawd teb tias, ‘Kuv tshuav nws 100 hnab* mog.’* Tus tub txib thiaj teb tias, ‘Nov yog daim ntawv tshuav nqi. Cia li muab kho ua 80 hnab.’
8 Txawm tus tub txib ua tsis ncaj los, tus los pav qhuas tias nws muaj tswv yim. Rau qhov lub qab ntuj neeg txawj siv tswv yim ua hauj lwm dua Vajtswv cov tub qhe.*
9 “Tsis tas li ntawd xwb, kuv qhia rau nej tias cia li muab tej nyiaj txiag uas nej khwv tau hauv lub qab ntuj no coj mus zeem phooj ywg. Thaum tej nyiaj txiag ntawd tsis muaj nqis lawm, tej zaum cov phooj ywg ntawd yuav tos txais nej mus rau qhov chaw uas nyob mus ib txhis.
10 Tus uas coj ncaj rau tej yam me yuav coj ncaj rau tej yam loj, thiab tus uas coj tsis ncaj rau tej yam me kuj yuav coj tsis ncaj rau tej yam loj.
11 Yog nej twb tsis txawj siv tej nyiaj txiag hauv qab ntuj no ces leej twg yuav muab yam uas muaj nqis tiag tiag tso rau nej saib xyuas?
12 Yog nej twb tsis txawj txuag luag tej cuab txhiaj cuab tam, leej twg yuav pub tej cuab txhiaj cuab tam ua nej tug thiab?
13 Tsis muaj leej twg yuav ua qhev tau rau ob tug los pav. Yog nws ua li ntawd, nws yuav nyiam ib tug ntxub ib tug los sis nws yuav muab siab npuab ib tug saib tsis taus ib tug. Nej yuav ua qhev rau Vajtswv thiab nyiaj txiag yeej tsis tau.”
14 Thaum cov Falixais hnov Yexus qhia li ntawd, lawv txawm zij ncaug rau Yexus rau qhov lawv yog neeg ntshaw nyiaj txiag heev.
15 Nws thiaj hais rau lawv tias, “Nej yog cov neeg ua txuj coj ncaj ncees rau sawv daws qhuas, tiam sis Vajtswv paub nej lub siab. Yam uas tib neeg qhuas tias tseem ceeb tsis muaj nqis rau Vajtswv.
16 “Tau muab Mauxes Txoj Kev Cai thiab cov cev Vajtswv lus tej lus qhia tshaj tawm los txog ntua Yauhas. Txij ntawd mus, yuav muab txoj xov zoo txog Vajtswv lub Nceeg Vaj* tshaj tawm rau txhua qhov mas txhua hom neeg yuav peem mus kom txog lub Nceeg Vaj* ntawd.
17 Txawm lub ntuj lub teb yuav dua mus los, teev nyuag ntawv me me hauv txoj Kev Cai yeej yuav tsis poob li.
18 “Tus uas nrauj nws tus poj niam thiab mus yuav dua lwm tus, twb yog nws ua txhaum kev nkauj kev nraug* ntag. Thiab tus uas yuav ib tug poj nrauj zoo li no ces twb yog nws deev luag poj luag sev lawm.
19 “Muaj ib tug yawg nplua nuj uas hnav ntaub tsam xem thiab ntaub mag. Ib hnub dhau ib hnub nws noj seem noj so, ua neej kaj siab lug tsis tshaib tsis nqhis.
20 Kuj muaj ib tug yawg thov khawv npe hu ua Laxalaus uas mob kiav txhab ua paug vias thoob plaws ib ce. Luag pheej coj nws tuaj tso ntawm tus nplua nuj lub rooj loog.
21 Nws niaj hnub tos ntsoov seb puas muaj ib yam dab tsi poob saum tus yawg nplua nuj lub rooj los rau nws khaws noj. Txom nyem npaum li ntawd los, tej dev tseem muab nws tej kiav txhab yaim tib si.
22 Tau ib ntus tom qab ntawd, tus yawg thov khawv tuag lawm. Cov tub txib saum ntuj coj nws mus nyob ntawm Anplahas ib sab.*
“Tus yawg nplua nuj los kuj tuag lawm thiab ces luag coj nws mus faus.
23 Thaum tus yawg nplua nuj nyob txom nyem ntsuav hauv qhov tuag,* nws tsa muag ntsia pom Anplahas nyob deb deb thiab Laxalaus nyob ntawm nws ib sab.*
24 Nws thiaj tsa suab hlo hu tias, ‘Yawg Anplahas aw, thov hlub* kuv thiab lauj. Thov Laxalaus muab nws tus ntiv tes tub dej tuaj rau kuv tus nplaig kom laj me ntsis. Nyob hauv no mas hluav taws kub heev, txom nyem kawg li.’
25 Tiam sis Anplahas teb tias, ‘Tub’e koj tsis nco lawm lod? Thaum koj tseem ua neej nyob koj muaj ib puas tsav yam zoo, tiam sis Laxalaus txom nyem ntsuav. Nim no nws tau zoo lawm, koj ho txom nyem.
26 Tsis tas li ntawd xwb, muaj ib tug niag kwj tob tob quas peb lawm. Txawm leej twg xav hla tuaj tim ko los tsis tau, thiab yog leej twg xav hla tuaj tim no los kuj tsis tau.’
27 Tus yawg nplua nuj thiaj hais tias, ‘Yawg, yog zoo li kod ces kuv thov koj txib Laxalaus mus rau hauv kuv txiv tsev.
28 Kuv tseem tshuav tsib tug kwv tij. Thov Laxalaus mus ua tib zoo qhia lawv kom lawv thiaj tsis los rau qhov chaw txom nyem no.’
29 Tiam sis Anplahas teb tias, ‘Lawv twb muaj tej lus uas Mauxes sau cia thiab cov cev Vajtswv lus tej lus qhia lawm. Cia lawv mloog tej ntawd xwb.’
30 Tus nplua nuj teb tias, ‘Yawg Anplahas, lawv yeej yuav tsis mloog li. Yuav tsum yog ib tug uas sawv hauv qhov tuag rov mus qhia lawv mas lawv thiaj hloov dua siab tshiab.’
31 Anplahas thiaj hais rau tus nplua nuj tias, ‘Yog lawv twb tsis mloog tej uas Mauxes sau cia thiab cov cev Vajtswv lus tej lus qhia, txawm ib tug sawv kiag hauv qhov tuag mus qhia lawv los, lawv yeej yuav tsis mloog thiab.’”
Cov taw ntawv
^ Ib thoob yog 22 lib.
^ Ib hnab kwv lam 170 kilus.
^ Mog los sis qeb yog ib hom qoob uas cov neeg nyob teb chaws Ixayees muab ua ncuav noj.
^ Los sis “cov uas taug txoj kev kaj.”
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Lo lus Kilis hais txog tus uas muaj txij nkawm tiam sis mus deev lwm tus. Mus saib Cov Lus Txhais.
^ Lus Kilis yog “ntawm Anplahas xub ntiag.”
^ Lus Kilis yog “Hedis.” Mus saib Cov Lus Txhais.
^ Lus Kilis yog “ntawm nws xub ntiag.”
^ Los sis “khuv leej.”
