Lukas Sau 20:1-47
20 Muaj ib hnub thaum Yexus tab tom qhia cov tib neeg ntawm lub tuam tsev thiab tshaj tawm txoj xov zoo, cov pov thawj hlob, cov xib hwb,* thiab cov txwj laus txawm tuaj txog ntawd.
2 Lawv nug Yexus tias, “Qhia seb, koj puas muaj cai ua li no? Thiab leej twg tso cai rau koj ua tej no?”
3 Yexus teb lawv tias, “Kuv yuav nug nej ib los thiab, seb nej teb puas tau,
4 leej twg tso cai rau Yauhas muab neeg ua kev cai raus dej? Yog Vajtswv los yog tib neeg?”
5 Lawv txawm sab laj tias, “Yog peb teb tias yog Vajtswv ces nws yuav nug peb tias vim li cas peb ho tsis ntseeg Yauhas.
6 Tiam sis yog peb teb tias yog tib neeg, nyob tsam pab neeg no yuav sau nthwv xuas pob zeb ntaus peb, vim cov tib neeg yeej ntseeg tias Yauhas yog ib tug cev Vajtswv lus.”
7 Lawv thiaj teb tias lawv tsis paub xyov leej twg tso cai.
8 Yexus thiaj hais rau lawv tias, “Ces kuv yuav tsis qhia nej tias leej twg tso cai rau kuv ua tej no thiab.”
9 Ces Yexus txawm qhia ib zaj lus piv txwv rau cov tib neeg tias, “Muaj ib tug yawg cog tau ib daim teb txiv hmab. Nws cia ib co neeg tu* daim teb ntawd ces nws txawm mus ncig teb ncig chaw ntev loo.
10 Thaum txog caij sau txiv hmab, nws txib ib tug tub qhe mus sau nws feem txiv hmab ntawm cov neeg uas tu daim teb. Tiam sis cov neeg tu teb cia li muab tus tub qhe ntawd ntaus thiab tso nws rov los tes dawb tes npliag.
11 Nws ho txib dua ib tug tub qhe mus. Cov neeg tu teb kuj ua saib tsis taus tus ntawd thiab. Lawv muab nws ntaus thiab tso nws rov los tes dawb tes npliag ib yam nkaus.
12 Ces nws ho tso tus peb mus, tiam sis lawv kuj muab tus no ntaus thiab muab nws ntiab tawm mus lawm.
13 Thaum kawg tus tswv teb hais tias, ‘Zaum no kuv yuav ua li cas? Tshuav kuv tus tub uas kuv hlub. Kuv mam li txib nws mus. Lawv yeej yuav hwm kuv tus tub.’
14 Thaum cov neeg tu teb pom dheev tus tub, lawv ntxhi tias, ‘Tus no yog tus uas yuav tau daim teb los ua qub txeeg qub teg ntag. Peb cia li muab nws tua kiag pov tseg, peb thiaj tau nws daim teb* los ua peb tug.’
15 Lawv thiaj muab nws ntes kiag coj mus tua sab nraum daim teb txiv hmab. Thaum tus tswv teb rov los, nej xav nws yuav ua li cas rau cov neeg ntawd?
16 Tus tswv teb yeej yuav muab lawv tua pov tseg thiab muab daim teb txiv hmab cob rau lwm cov tu.”
Thaum cov tib neeg hnov zaj lus piv txwv no, lawv hais tias, “Thov kom txhob muaj li ntawd lauj!”
17 Tiam sis Yexus ntsia ntsoov lawv thiab hais tias, “Vajtswv Txoj Lus twb hais tias, ‘Lub pob zeb uas cov kws ua tsev muab xyeeb tseg lawd, twb muab teeb rau saum kaum tsev uas siab tshaj lawm.’ Ua li, nqe no txhais li cas?
18 Txhua tus uas dawm lub pob zeb no yuav ntog tsoo nws sab heev. Yog lub pob zeb poob los ntaus leej twg, tus ntawd yuav tawg ntsoog ntxaws.”
19 Cov xib hwb thiab cov pov thawj hlob paub tias Yexus hais lus piv txwv txog lawv ntag, lawv thiaj nrhiav kev ntes Yexus tam sid. Tiam sis lawv kuj ntshai cov tib neeg thiab.
20 Lawv thiaj tos lub caij zoo los ntes Yexus. Lawv ua twj ywm ntiav ib co neeg mus thom Yexus, cov neeg ntawd ua txuj coj li xav paub tiag tiag. Lawv thom seb Yexus puas hais lus yuam kev, lawv thiaj tau zoo ntes nws mus cob rau cov nom tswv thiab tus tswv xeev.
21 Lawv cov ntawd nug Yexus tias, “Xib Hwb, peb paub tias koj tsis xaiv leej twg ntsej muag thiab koj tsuas qhia qhov ncaj qhov yog xwb. Koj yeej qhia qhov tseeb txog Vajtswv.
22 Ua li puas tsim nyog peb them se rau Xixas los tsis tsim nyog?”
23 Tiam sis Yexus paub tias twb yog lawv thom nws xwb. Nws thiaj teb lawv tias,
24 “Muab ib lub nyiaj denalias* los. Lub ntsej muag thiab lub npe txaug rau lub nyiaj no yog leej twg li?” Lawv teb tias, “Yog Xixas.”
25 Yexus thiaj hais rau lawv tias, “Yog li ntawd, them Xixas li rau Xixas thiab them Vajtswv li rau Vajtswv.”
26 Thaum kawg, lawv ntxias tsis tau kom Yexus hais lus yuam kev tab meeg sawv daws. Tiam sis tej uas Yexus teb tseem ua rau lawv xav tsis thoob, lawv thiaj ntsiag tas.
27 Cov Xadukais txawm los thom Yexus. Lawv yog cov uas tsis ntseeg tias cov tuag yuav ciaj sawv rov los. Lawv nug Yexus tias,
28 “Xib Hwb, Mauxes sau tias, ‘Yog ib tug txiv neej uas muaj poj niam tuag lawd es tsis tau muaj tub ces yuav tsum muab nws tus poj niam txis rau ib tug kwv tij kom tus tuag muaj xeeb ntxwv cia.’
29 Thaud muaj xya leej kwv tij. Tus tij laug yuav poj niam tiam sis tsis tau muaj tub ces txawm tuag lawm.
30 Lawv thiaj muab tus niam tij txis rau tus kwv tiam sis nws kuj tuag lawm thiab.
31 Tau muaj li no rau tus kwv ob thiab. Lawv xya leej kwv tij puav leej tau yuav tus poj niam no tiam sis lawv tuag tas tsis muaj ib tug tub ki li.
32 Thaum kawg tus poj niam kuj tuag lawm thiab.
33 Yog li ntawd, lawv xya kwv tij tau yuav tus poj niam ntawd lawm. Ua li, thaum lawv ciaj sawv rov los, tus poj niam ntawd yuav yog leej twg tus?”
34 Yexus teb lawv tias, “Cov neeg nyob tiam* no nrhiav poj nrhiav sev, qua tub qua ntxhais,
35 tiam sis cov uas tsim nyog tau txoj sia rau tiam* tom ntej thiab sawv hauv qhov tuag rov los, tsis nrhiav poj nrhiav sev, qua tub qua ntxhais lawm.
36 Thaum ntawd ces lawv tsis txawj tuag lawm. Lawv yuav nyob li cov tub txib saum ntuj. Thiab Vajtswv tsa lawv sawv hauv qhov tuag rov los, lawv thiaj yog Vajtswv cov me nyuam.
37 Thaum Mauxes sau txog tsob ntoo pos, nws kuj hais txog cov tuag ciaj sawv rov los. Nws hais tias Vajtswv Yehauvas* yog ‘Anplahas tus Vajtswv, yog Ixaj tus Vajtswv, thiab yog Yakhauj tus Vajtswv.’
38 Yog li, nws yog cov neeg ciaj tus Vajtswv tsis yog cov neeg tuag tus Vajtswv, rau qhov Vajtswv yeej suav tias lawv tseem ciaj.”
39 Cov xib hwb ib txhia thiaj teb Yexus tias, “Xib Hwb, koj hais yog kawg.”
40 Lawv tsis kav nug Yexus txog ib yam dab tsi ntxiv lawm.
41 Yexus ho nug lawv tias, “Ua cas luag ho qhia tias tus Khetos yog Daviv xeeb ntxwv?
42 Hauv phau Ntawv Nkauj, Daviv twb yog tus hais tias, ‘Vajtswv Yehauvas* hais rau kuv tus Tswv tias, “Cia li los zaum ntawm kuv sab xis
43 mus txog thaum kuv muab koj cov yeeb ncuab ua koj lub rooj tiag taw.”’
44 Yog Daviv twb muab tus Khetos hu ua nws tus Tswv, yuav ua li cas hais tau tias Khetos yog Daviv xeeb ntxwv?”
45 Thaum cov tib neeg tab tom mloog Yexus qhia, nws hais rau nws cov thwj tim tias,
46 “Ceev faj cov xib hwb uas hnav tsho tsuj tseeb, nyiam ncig yuj yeev thiab xav kom tib neeg hawm lawv tom tej tshav puam. Hauv tej tsev pe hawm los lawv nyiam zaum tom hauv ntej* xwb, thiab muaj noj muaj haus los lawv nyiam zaum tej rooj zoo tshaj.
47 Lawv txeeb cov poj ntsuam tej vaj tse, thiab lawv ua txuj thov Vajtswv ntev ntev tab meeg sawv daws. Cov neeg no yuav raug txim hnyav dua lwm cov.”
Cov taw ntawv
^ Los sis “xib hwb qhia Vajtswv kev cai.” Mus saib Cov Lus Txhais.
^ Tus tswv teb cia luag ua nws daim teb. Thaum txog caij sau, cov neeg ua teb mam li sau txiv los them tus tswv.
^ Lus Kilis yog “tau nws tej qub txeeg qub teg.”
^ Mus saib Cov Lus Txhais.
^ Los sis “cov me nyuam hauv lub sim ceeb no.” Mus saib lo lus “Sim ceeb” hauv Cov Lus Txhais.
^ Los sis “lub sim ceeb.” Mus saib Cov Lus Txhais.
^ Mus saib Cov Lus Txhais.
^ Mus saib Cov Lus Txhais.
^ Los sis “zaum cov rooj zoo tshaj.”
