Mathais Sau 25:1-46
25 “Vajtswv txoj kev kav* piv ib yam li kaum tus hluas nkauj* uas taws teeb mus tos tus nraug vauv.
2 Tsib tug muaj tswv yim, tsib tug tsis muaj.
3 Tsib tug uas tsis muaj tswv yim taws teeb mus tiam sis tsis npaj roj.
4 Hos tsib tug uas muaj tswv yim taws teeb mus thiab ib leeg npaj ib hwj roj nrog lawv.
5 Lawv nyob tos tsis pom tus nraug vauv tuaj li, lawv txawm tsaug zog ncaws nruj nris.
6 Thaum ib tag hmo, muaj neeg hu tias, ‘Tus nraug vauv tuaj txog lawm lauj! Cia li tawm mus tos nws.’
7 Cov hluas nkauj thiaj sawv pes tsees los txhab roj rau lawv tej teeb.
8 Cov tsis muaj tswv yim txawm thov cov uas muaj tias, ‘Peb cov teeb yuav tuag, qee me ntsis roj rau peb thiab.’
9 Cov muaj tswv yim thiaj teb lawv tias, ‘Roj tsis txaus peb sawv daws. Nej mam mus yuav tom khw rau nej.’
10 Thaum cov tsis muaj tswv yim mus yuav roj lawm, tus nraug vauv txawm tuaj txog. Cov uas npaj txhij lawd thiaj tau nrog tus nraug vauv mus rau hauv tsev mus noj tshoob. Tom qab ntawd, luag txawm muab lub qhov rooj kaw kiag lawm.
11 Thaum cov tsis muaj tswv yim los txog lawv hu tias, ‘Yawg hlob, yawg hlob, thov qhib qhov rooj rau peb!’
12 Tus nraug vauv teb lawv tias, ‘Kuv hais ncaj rau nej tias, kuv yeej tsis paub nej.’
13 “Yog li ntawd, ceev faj zov tos rau qhov nej tsis paub tias neeg Leej Tub yuav los rau hnub twg thiab teev twg.
14 “Vajtswv txoj kev kav* kuj zoo ib yam li tus yawg uas yuav mus ncig teb chaws. Nws thiaj txib nws cov tub qhe saib xyuas nws tej cuab txhiaj cuab tam.
15 Nws muab tsib talas* rau ib tug, muab ob talas rau ib tug, thiab muab ib talas rau ib tug. Nws muab rau lawv raws li lawv lub peev xwm ces nws mam li sawv kev.
16 Tus uas tau tsib talas txawm coj mus ua luam tam sid, nws thiaj tsam tsib talas ntxiv.
17 Tus uas tau ob talas kuj coj mus ua luam thiab, nws thiaj tsam ob talas ntxiv.
18 Tiam sis tus tub qhe uas tau ib talas txawm coj nws tus los pav talas nyiaj mus faus cia xwb.
19 “Tau ntev loo, tus los pav mam rov los txheeb seb nws cov tub qhe ib leeg tsam pes tsawg.
20 Tus uas tau tsib talas thiaj nqa tsib talas uas nws tsam mus cuag nws tus los pav thiab hais tias, ‘Yawg hlob, koj muab tsib talas rau kuv coj mus ua luam. Saib, kuv tsam tsib talas ntxiv.’
21 Tus los pav thiaj hais rau nws tias, ‘Zoo heev, tus qhev siab zoo! Koj ua ncaj rau tej yam me. Yog li ntawd, kuv yuav tsa koj saib xyuas ntau yam. Cia li nrog koj tus los pav zoo siab xyiv fab.’
22 Tus uas tau ob talas thiaj mus cuag nws tus los pav thiab hais tias, ‘Yawg hlob, koj muab ob talas rau kuv coj mus ua luam. Saib, kuv tsam ob talas ntxiv.’
23 Tus los pav thiaj hais rau nws tias, ‘Zoo heev, tus qhev siab zoo! Koj ua ncaj rau tej yam me. Yog li ntawd, kuv yuav tsa koj saib xyuas ntau yam. Cia li nrog koj tus los pav zoo siab xyiv fab.’
24 “Thaum kawg, tus tub qhe uas tau ib talas los cuag nws tus los pav thiab hais tias, ‘Yawg hlob, kuv paub tias koj yog ib tug neeg tsiv tsaim. Koj hlais tej uas tsis yog koj cog thiab koj sau tej uas tsis yog koj tseb.
25 Kuv ntshai koj, kuv thiaj coj koj talas nyiaj mus faus cia. Koj talas nyiaj nyob ntawm no.’
26 Tus los pav thiaj teb nws tias, ‘Niag qhev tub nkeeg tsis tsim txiaj.* Koj paub tias kuv hlais tej uas tsis yog kuv cog thiab sau tej uas tsis yog kuv tseb lod?
27 Ua cas koj ho tsis muab kuv talas nyiaj coj mus tso hauv txhab kom kuv ho tau paj?
28 “‘Yog li ntawd, cia li muab nws talas nyiaj coj mus pub rau tus tub qhe uas muaj kaum talas.
29 Rau qhov txhua tus uas muaj yim huab yuav pub rau nws ntxiv kom nws muaj nplua mias. Tiam sis tus uas tsis muaj, txawm nws muaj me ntsis xwb los yuav muab rho ntawm nws mus.
30 Cia li muab tus niag qhev tsis tsim txiaj ntawd pov rhees nraum zoov uas tsaus ntuj nti kom nws quaj tom hniav qawv sab nraud.’
31 “Thaum neeg Leej Tub nrog nws cov tub txib saum ntuj los, nws yuav muaj hwj chim ci ntsa iab zaum saum nws lub rooj vaj ntxwv.
32 Txhua haiv neeg yuav los sawv ntawm nws xub ntiag. Nws yuav muab cov tib neeg cais ib yam li tus tswv yug yaj cais cov yaj ntawm cov tshis.
33 Nws yuav muab cov yaj tso ntawm nws sab xis, muab cov tshis tso ntawm nws sab laug.
34 “Thaum ntawd, vaj ntxwv yuav hais rau cov uas nyob ntawm nws sab xis tias, ‘Cia li los, nej yog cov uas kuv Txiv twb foom koob hmoov rau lawm. Txij thaum ntuj tsim teb raug* los, kuv Txiv twb npaj lub Nceeg Vaj* rau nej lawm.
35 Thaum kuv tshaib, nej pub rau kuv noj. Thaum kuv nqhis, nej pub rau kuv haus. Thaum kuv ua qhua, nej zoo siab tos txais kuv.
36 Thaum kuv tsis muaj hnav, nej muab rau kuv hnav. Thaum kuv mob, nej tu kuv. Thaum kuv raug kaw, nej tuaj xyuas kuv.’
37 Cov ncaj ncees yuav teb nws tias, ‘Tus Tswv, thaum twg peb pom koj tshaib es pub rau koj noj, los sis pom koj nqhis es pub rau koj haus?
38 Thaum twg peb pom koj ua qhua es peb tos txais koj, los sis pom koj tsis muaj hnav es muab rau koj hnav?
39 Thaum twg peb pom koj mob los sis raug kaw es peb tuaj xyuas koj?’
40 Ces vaj ntxwv yuav teb lawv tias, ‘Kuv hais ncaj qha rau nej tias, thaum nej ua rau kuv cov kwv tij ib tug, txawm yog tus uas qis tshaj, twb yog nej ua rau kuv lawm ntag.’
41 “Thaum ntawd, vaj ntxwv yuav hais rau cov uas nyob ntawm nws sab laug tias, ‘Cia li khiav mus! Nej yog cov uas raug Vajtswv foom tsis zoo. Cia li mus rau hauv lub cub tawg uas cig tsis txawj tuag uas twb npaj tseg rau Ntxwg Nyoog thiab nws cov tub txib lawm.
42 Thaum kuv tshaib los nej tsis pub rau kuv noj. Thaum kuv nqhis los nej tsis pub rau kuv haus.
43 Thaum kuv ua qhua los nej tsis tos txais kuv. Thaum kuv tsis muaj hnav los nej tsis muab rau kuv hnav. Thaum kuv mob thiab raug kaw los nej tsis tuaj tu kuv.’
44 Ces lawv kuj yuav teb vaj ntxwv tias, ‘Tus Tswv, thaum twg peb pom koj tshaib nqhis, pom koj ua qhua, pom koj tsis muaj hnav, pom koj muaj mob, thiab pom koj raug kaw es peb tsis tu koj?’
45 Ces nws yuav teb lawv tias, ‘Kuv hais ncaj qha rau nej tias, qhov uas nej tsis ua rau kuv cov kwv tij ib tug, txawm yog tus uas qis tshaj, twb yog nej tsis ua rau kuv lawm thiab ntag.’
46 Cov no yog cov uas yuav raug rhuav tshem mus ib txhis tiam sis cov ncaj ncees yuav tau txoj sia ib txhis tsis kawg.”
Cov taw ntawv
^ Lus Kilis yog “Lub Nceeg Vaj saum ntuj.” Mus saib Cov Lus Txhais.
^ Lus Kilis yog “nkauj xwb.”
^ Los sis “lub Nceeg Vaj.” Mus saib Cov Lus Txhais.
^ Cov Kilis suav ib talas hnyav 20.4 kilus. Mus saib Cov Lus Txhais.
^ Lus Kilis yog “lim hiam.”
^ Yog thaum Adas thiab Evas pib muaj tub muaj ki.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
