Mathais Sau 5:1-48
-
YEXUS ZAJ LUS QHIA SAUM ROOB (1-48)
-
Yexus pib qhia saum roob (1-2)
-
Cov uas zoo siab (3-12)
-
Cov ntsev thiab qhov kaj (13-16)
-
Yexus los ua kom Mauxes Txoj Kev Cai tiav (17-20)
-
Ntuas cov uas chim (21-26), cov muaj txij nkawm uas deev lwm tus (27-30), cov uas sib nrauj (31-32), cov uas cog lus twv (33-37), cov ua phem pauj phem (38-42), ntuas kom hlub yeeb ncuab (43-48)
-
5 Thaum Yexus pom muaj tib neeg coob heev, nws thiaj mus zaum saum roob ces nws cov thwj tim txawm los cuag nws.
2 Nws pib qhia lawv tias,
3 “Cov uas pom tias lawv yuav tsum vam khom Vajtswv* yog cov uas zoo siab rau qhov lawv yuav tau lub Nceeg Vaj* saum ntuj ua lawv tug.
4 “Cov uas nyuaj siab ntxhov plawv yog cov uas zoo siab rau qhov lwm tus* yuav nplig lawv.
5 “Cov uas txo hwj chim yog cov uas zoo siab rau qhov lawv yuav tau lub ntiaj teb ua lawv tug.
6 “Cov uas ntshaw kev ncaj ncees* yog cov uas zoo siab rau qhov lawv yuav tau raws li lawv lub siab ntshaw.
7 “Cov uas hlub* lwm tus yog cov uas zoo siab rau qhov lwm tus* yuav hlub* lawv.
8 “Cov uas muaj siab dawb siab zoo yog cov uas zoo siab rau qhov lawv yuav pom* Vajtswv.
9 “Cov uas txhawb kom muaj kev sib haum xeeb yog cov uas zoo siab rau qhov lawv yuav yog Vajtswv cov me nyuam.*
10 “Cov uas raug tsim txom vim ua ncaj ua ncees yog cov uas zoo siab rau qhov lawv yuav tau lub Nceeg Vaj* saum ntuj ua lawv tug.
11 “Cov uas raug thuam, raug tsim txom, thiab raug iab hiam ntau yam vim lawv yog kuv cov thwj tim, yog cov uas zoo siab.
12 Txij thaum ub los luag twb tsim txom cov cev Vajtswv lus ib yam li ntawd lawm thiab. Cia li zoo siab xyiv fab rau qhov Vajtswv yuav foom koob hmoov nplua mias rau nej.*
13 “Nej zoo li cov ntsev hauv ntiaj teb. Yog ntsev tsuag lawm, yuav rov daw tau li cas? Yeej tsis tau li, tsuas yuav muab pov nraum zoov rau neeg tsuj xwb.
14 “Nej zoo li qhov kaj uas ci rau neeg ntiaj teb* pom kev. Ib yam li lub nroog nyob saum roob uas txhua leej txhua tus pom, tsis muaj dab tsi yuav thaiv tau.
15 Yeej tsis muaj leej twg taws teeb es muab tawb* khwb rau, tsuas muab tso rau saum tus ncej txawb teeb kom ci lam lug rau txhua tus hauv tsev pom kev xwb.
16 Yog li ntawd, nej cia li ci rau sawv daws pom. Tib neeg thiaj pom nej tes hauj lwm zoo thiab qhuas nej Leej Txiv uas nyob saum ntuj ceeb tsheej.
17 “Txhob xav tias kuv los rhuav Mauxes Txoj Kev Cai thiab cov cev Vajtswv lus tej lus qhia. Kuv tsis yog los rhuav tiam sis yog los ua kom tiav xwb.
18 Kuv hais ncaj qha rau nej tias, yog lub ntuj lub teb tseem muaj nyob ces yeej yuav muaj tiav raws li txoj Kev Cai txhua lo. Txawm tus tsiaj ntawv thiab teev nyuag ntawv me dua ntais los yeej yuav tsis poob li.
19 Yog leej twg hla ib txoj kev cai twg, tsis hais txoj uas neeg xav tias tsis tseem ceeb, thiab tseem txw kom lwm tus hla ces tus ntawd tsis tsim nyog nkag rau hauv lub Nceeg Vaj* saum ntuj. Tiam sis tus uas coj raws li Vajtswv tej kev cai thiab qhia kom lwm tus coj tej kev cai ntawd, yuav nkag tau rau hauv lub Nceeg Vaj* saum ntuj.
20 Kuv qhia tseeb rau nej tias yog nej tsuas coj ncaj li cov xib hwb* thiab cov Falixais xwb ces nej yeej yuav nkag tsis tau rau hauv lub Nceeg Vaj* saum ntuj.
21 “Nej twb hnov luag qhia rau nej tej poj koob yawm txwv lawm tias, ‘Tsis txhob tua neeg. Yog leej twg tua neeg ces yuav coj nws mus cuag lub rooj txiav txim.’
22 Tiam sis kuv qhia tseeb rau nej tias yog leej twg pheej chim rau nws tus kwv tij, nws kuj yuav raug coj mus hais ntawm lub rooj txiav txim thiab. Hos tus uas hais lus ntsw nws tus kwv tij los yuav raug coj mus hais ntawm lub rooj txiav txim qib siab. Dua li ntawd, yog leej twg lam foom nws tus kwv tij tias, ‘Niag ruam ntxim ntxub!’* ces tus ntawd yuav raug puas tsuaj.”*
23 “Yog koj tab tom yuav muab khoom fij rau Vajtswv ntawm lub thaj es koj nco dheev tias koj tus kwv tij muaj chaw tu siab rau koj lawm,
24 cia li muab koj qhov khoom fij tso plhuav rau ib cag. Mus nrhiav koj tus kwv tij es kho kom neb sib haum xeeb tso, koj mam rov los muab fij rau Vajtswv.
25 “Yog koj tshuav ib tug twg nqi es nws yuav coj koj mus kom tom tsev tu plaub, kav tsij nrog nws hais kom sib haum ua ntej neb mus txog tod. Nws thiaj tsis muab koj cob rau tus txiav txim, tsam tus txiav txim ho muab koj cob rau tus ceev xwm coj mus kaw.
26 Kuv hais ncaj rau koj tias koj yuav tsis tau tawm hauv tsev loj cuj mus txog thaum koj khee hlo koj lub nyuag nyiaj qab nas* los them.
27 “Nej twb hnov lawm tias, ‘Nej cov uas muaj txij nkawm lawd, tsis txhob mus deev lwm tus.’
28 Tiam sis kuv qhia rau nej tias tus uas ntsia ib tug poj niam twg thiab xav deev tus poj niam ntawd twb ua txhaum hauv nws lub siab lawm.*
29 Yog koj sab qhov muag xis coj koj mus ua txhaum,* cia li muab kaus pov tseg. Txawm tsis muaj ib sab qhov muag los zoo dua li tag nrho lub cev raug puas tsuaj.*
30 Yog koj sab tes xis coj koj mus ua txhaum,* cia li muab txiav pov tseg. Txawm tsis muaj sab tes xis los zoo dua li tag nrho lub cev raug puas tsuaj.*
31 “Tsis tas li ntawd xwb, nej twb hnov lawm tias, ‘Yog leej twg yuav nrauj nws tus poj niam, nws yuav tsum ua ntawv nrauj tso.’
32 Tiam sis kuv qhia rau nej tias yog leej twg tus poj niam tsis tau mus ua plees ua yi* es nws cia li muab nrauj ces twb yog nws qhib kev rau nws tus poj niam mus ua txhaum kev nkauj kev nraug* ntag. Tsis tas li ntawd, yog leej twg yuav ib tug poj nrauj zoo li no ces twb yog nws deev luag poj luag sev lawm.
33 “Nej twb hnov luag qhia rau nej tej poj koob yawm txwv lawm tias, ‘Nej twv li cas lawm nej yuav tsum ua li ntawd. Nej yuav tsum ua raws li nej tau cog lus rau Vajtswv Yehauvas.’*
34 Tiam sis kuv qhia rau nej tias, tsis txhob lam tau lam twv li ub li no. Tsis txhob twv ntuj, rau qhov lub ntuj yog Vajtswv lub rooj zaum.
35 Tsis txhob twv teb, rau qhov lub ntiaj teb yog Vajtswv lub rooj tiag taw. Tsis txhob twv lub nroog Yeluxalees, rau qhov Yeluxalees yog tus Vaj Ntxwv* uas loj kawg lub nroog.
36 Tsis txhob twv txog koj lub taub hau,* rau qhov koj twb ua tsis tau kom koj ib txoj plaub hau dawb los sis dub li.
37 Yog koj hais tias koj yuav ua yam twg ces cia li ua xwb. Yog koj hais tias koj tsis ua ces txhob ua li. Tus uas hais tshaj no yog ua raws li Ntxwg Nyoog* lub tswv yim xwb.
38 “Nej twb hnov lawm tias, ‘Qhov muag pauj qhov muag, hniav pauj hniav.’
39 Tiam sis kuv qhia rau nej tias, tsis txhob tawm tsam tus neeg lim hiam. Yog nws ntaus koj sab plhu xis,* cia li tig sab laug rau nws ntaus thiab.
40 Yog muaj leej twg coj koj mus kom hauv tsev tu plaub es txeeb koj lub tsho sab hauv,* cia li hle lub sab nraud rau nws thiab.
41 Yog leej twg muaj hwj chim quab koj ev nra mus ib kilumev,* cia li ev mus ob kilumev.
42 Yog leej twg thov koj ib yam dab tsi, cia li muab rau nws. Yog leej twg thov txais* koj ib yam dab tsi, tsis txhob fee plhu rau nws.
43 “Nej twb hnov lawm tias, ‘Koj yuav tsum hlub kwv tij zej zog es ntxub koj tus yeeb ncuab.’
44 Tiam sis kuv qhia rau nej tias, cia li hlub nej cov yeeb ncuab, thiab thov Vajtswv rau cov uas tsim txom nej.
45 Yog nej ua li no nej thiaj yog Leej Txiv saum ntuj cov me nyuam, vim nws ua lub hnub ci rau cov neeg zoo cov neeg phem huv si. Thiab nws tso nag los rau cov neeg ncaj cov neeg nkhaus huv si.
46 Yog nej tsuas hlub cov uas hlub nej xwb, nej xav tias nej yuav tau koob hmoov no lod? Txawm cov neeg sau se los kuj txawj ua li ntawd thiab.
47 Yog nej tsuas hu nej cov kwv tij xwb, nej ho zoo npaum li cas? Lwm haiv neeg kuj txawj ua li ntawd thiab.
48 Yog li, nej yuav tsum hlub lwm tus tiag tiag* ib yam li nej Leej Txiv saum ntuj uas zoo kawg nkaus.
Cov taw ntawv
^ Los sis “Cov uas taij thov kom tau lub hwj huam dawb huv.”
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Uas yog lwm tus thiab Vajtswv.
^ Los sis “Cov uas xav ua raws li Vajtswv lub siab nyiam thiab coj raws li nws tej lus sam hwm.”
^ Lus Kilis yog “khuv leej.”
^ Uas yog lwm tus thiab Vajtswv.
^ Lus Kilis yog “khuv leej.”
^ Qhov uas pom Vajtswv txhais tau tias yuav pom Vajtswv tiag tiag thiab kuj txhais tau tias nkag siab zoo txog Vajtswv. Muab piv rau Yauhas 14:9.
^ Lus Kilis yog “cov tub.”
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Lus Kilis yog “Cia li zoo siab xyiv fab rau qhov nej yuav tau koob hmoov nplua mias saum ntuj ceeb tsheej.”
^ Lus Kilis yog “ci rau lub qab ntuj.”
^ Los sis “tawb luj khoom ub khoom no.”
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Los sis “cov xib hwb qhia Vajtswv kev cai.” Mus saib Cov Lus Txhais.
^ Vajtswv lub Nceeg Vaj yog Vajtswv txoj kev kav los sis lub tseem fwv. Mus saib Cov Lus Txhais.
^ Cov lus Kilis tias “niag ruam ntxim ntxub” tej zaum yog hais txog tus uas tuam mom Vajtswv uas tsis tsim txiaj dab tsi.
^ Lus Kilis yog “pov rau hauv Kehenas uas muaj hluav taws kub.” Mus saib Cov Lus Txhais.
^ Uas yog khee hlo koj cov nyiaj los them. Lus Kilis yog “nyiaj khadalautes.” Yuav tsum khwv li kaum feeb thiaj tau lub nyiaj khadalautes.
^ Lus Kilis yog “twb ntxeev siab rau nws tus txij nkawm mus deev lwm tus lawm.”
^ Lus Kilis yog “ua rau koj dawm.”
^ Lus Kilis yog “raug pov rau hauv Kehenas.” Mus saib Cov Lus Txhais.
^ Lus Kilis yog “ua rau koj dawm.”
^ Lus Kilis yog “raug pov rau hauv Kehenas.” Mus saib Cov Lus Txhais.
^ Lus Kilis yog “phauni-as.” Mus saib Cov Lus Txhais.
^ Lo lus Kilis hais txog tus uas muaj txij nkawm tiam sis mus deev lwm tus.
^ Mus saib Cov Lus Txhais.
^ Tus Vaj Ntxwv ntawd yog Vajtswv.
^ Los sis “twv txog koj txoj sia.”
^ Lus Kilis yog “tus Lim Hiam.”
^ Qhov uas ntaus sab plhu li no yog ua saib tsis taus tus neeg thiab zes kom sib ntaus.
^ Mus saib Cov Lus Txhais.
^ Lus Kilis yog “mais.” Mus saib Cov Lus Txhais.
^ Uas yog txais tsis tsub paj.
^ Lus Kilis yog “ua zoo kawg nkaus.”
