Txhua lub lim tiam, Yehauvas Cov Timkhawv muaj kev sib txoos 2 zaug. Lawv qhov chaw pe hawm hu ua lub Tsev Nceeg Vaj. Lawv ua dabtsi tom Tsev Nceeg Vaj? Yog koj nrog lawv mus kev sib txoos yuav pab tau koj li cas?

•  Mus ua dabtsi tom Tsev Nceeg Vaj?

•  Vim li cas ho tsim nyog koj mus koom thiab?

•  Koj tej npoj xav li cas?

 Lub Tsev Nceeg Vaj yog qhov chaw kawm Vajlugkub. Yog mus koom kev sib txoos yuav pab tau koj li no:

•   Kawm qhov tseeb txog Vajtswv.

•   To taub txog tej xwm txheej uas muaj tshwm sim nim no.

•   Ua tau ib tug neeg zoo dua.

•    Zeem tau cov phoojywg zoo tshaj.

 Koj puas tau paub? Vim li cas Yehauvas Cov Timkhawv ho muab lub tsev koom txoos hu ua lub Tsev Nceeg Vaj? Vim Vajtswv lub Nceeg Vaj yog lub tseem ntsiab uas peb kawm heev tshaj.​—Mathai 6:9, 10; 24:14; Luka 4:43.

 Tej lus qhuab qhia yuav pab tau koj. Tom Yehauvas Cov Timkhawv tej kev sib txoos, lawv tham txog tej ntsiab lus hauv phau Vajlugkub uas yuav pab koj “nrhiav kom tau tswvyim.” (Paj Lug 4:5) Yuav tsav tswvyim rau koj kom paub txiav txim siab zoo. Tsis tas li ntawd xwb, koj yuav kawm txog cov lus nug tseem ceeb no:

•   Lub ntsiab rau noob neej yog dabtsi?

•   Puas yog Vajtswv tsim kev txom nyem?

•   Ua li cas rau cov uas tuag lawm?

 Txhua lub lim tiam yuav muaj tej zaj lus qhuab qhia zoo li no:

•   Ua Cas Ho Tsim Nyog Coj Raws Li Phau Vajlugkub Qhia?

•   Thaum Muaj Kev Ntxhov Siab Koj Yuav Nrhiav Kev Pab Qhovtwg?

•   Vajtswv Lub Nceeg Vaj Tabtom Pab Peb Li Cas?

 Ib tug ntxhais hu ua Npleedam (Brenda) hais tias: “Muaj ib zaug ib tug tub tom tsev kawm ntawv tuaj kev sib txoos. Nws nrog kuv tsev neeg zaum thiab nrog peb saib ntawv Vajlugkub ua ke. Tom qab ntawd, nws hais rau kuv tias thaum sawvdaws tsa tes teb, lawv hais raug nws siab heev. Nws hais ntxiv tias tom nws lub tsev teev ntuj twb tsis muaj tej ntaub ntawv Vajlugkub zoo li peb.”

 Koj puas tau paub? Tom kev sib txoos sawvdaws mus dawb xwb, peb tsis sau nyiaj.

 Koj yuav tau kev txhawb zog. Phau Vajlugkub sam hwm kom cov Khixatia mus sib txoos ua ke “ib leeg thiaj txhawb tau ib leeg lub zog.” (Henplais 10:24, 25) Niaj hnub nimno tibneeg tsuas xam pom lawv tus kheej nkaus xwb. Tiamsis tom kev sib txoos, tibneeg hlub Vajtswv thiab xam pom lwm tus ua ntej. Yog koj zeem lawv ua phoojywg, yuav txhawb tau koj lub zog heev.

 Ib tug ntxhais hu ua Elixa (Elisa) hais tias: “Thaum kuv mus kawm ntawv ib hnub los txog tsev, sab kawg li. Tej thaud kuv kuj ntxhov siab ntau yam. Tiamsis cov neeg tom lub Tsev Nceeg Vaj ua rau kuv qab kaj siab tuaj. Thaum sib txoos tas, kuv los tsev xyiv fab lug thiab rov muaj zog rau hnub tom qab.”

 Koj puas tau paub? Thoob qab ntuj Yehauvas Cov Timkhawv muaj tshaj li 120,000 lub koom txoos. Lawv muaj ntau tshaj li 60,000 qhov chaw sib txoos. Ib xyoo twg Yehauvas Cov Timkhawv tsa tau li 1,500 lub Tsev Nceeg Vaj. Cov tsev no muaj rooj txaus rau cov tuaj tshiab zaum tibsi. a