Vajtswv Muaj Pes Tsawg Lub Npe?

TSO

Phau Vajlugkub qhia li no

Vajtswv tsuas muaj tib lub npe xwb. Lus Henplais muab Vajtswv lub npe sau ua plaub tug tsiaj ntawv loj יהוה tiam sis peb muab hu ua “Yehauvas.” a Yehauvas hais rau Yaxayas tus uas cev nws lus tias, ‘Kuv yog Yehauvas, no yog kuv lub npe.’ (Yaxaya 42:8) Lub npe no tshwm 7,000 zaus hauv Vajtswv txoj lus, thiab tshwm ntau tshaj tej npe meej mom rau Vajtswv. Ntxiv ntawd lub npe no tseem tshwm ntau tshaj lwm tus lub npe thiab.

Yehauvas Puas Muaj Lwm Lub Npe Thiab?

Phau Vajlugkub qhia tias Vajtswv tsuas muaj tib lub npe xwb, tiam sis kuj siv ntau lub npe meej mom los qhia txog nws. Cov npe meej mom hauv qab no qhia tias Yehauvas muaj tus cwj pwm zoo li cas.

Npe Meej Mom	Nqe Vajlugkub	Txhais Li No
Allah	(Tsis muaj)	“Allah” yog ib lub npe meej mom rau “Vajtswv” uas siv los ntawm cov neeg hais lus Alas. Cov Vajlugkub uas txhais ua lus Alas thiab lwm yam lus kuj siv lub npe “Allah” rau “Vajtswv.”
Tus Muaj Hwj Chim Loj Kawg Nkaus	Chivkeeb 17:1	Vajtswv muaj hwj chim loj tshaj plaws, nws ua tau txhua yam. Lo lus Henplais uas hais tias ʼEl Shad·daiʹ, uas txhais tias “Vajtswv yog tus muaj hwj chim loj kawg nkaus,” tshwm xya zaus hauv phau Vajlugkub.
Alafas Thiab Aumenkas	Tshwmsim 1:8; 21:6; 22:13	Kuv “yog lub hauv paus thiab yog lub ntsis” los sis “yog chiv keeb thiab qhov kawg.” Qhov no txhais tias tsis muaj ib tug Vajtswv uas muaj hwj chim nyob ua ntej los sis tom qab Yehauvas. (Yaxayas 43:10) Hauv lus Kilis alafas yog thawj thawj tus npe ntawv ho aumenkas yog tus npe ntawv kawg.
Tus Uas Ib Txwm Muaj Nyob Los	Daniyees 7:9, 13, 22	Tsis muaj qhov pib; yeej ib txwm muaj nyob los ua ntej muaj txhua tsav yam thiab yuav nyob mus ib txhis.—Phau Ntawv Nkauj 90:2.
Tus Tswv Tsim	Yaxayas 40:28	Tus uas tsim ib puas tsav yam.
Leej Txiv	Mathais 6:9	Tus uas pub txoj sia.
Vajtswv	Chivkeeb 1:1	Tus uas muaj hwj chim uas tsim nyog teev tiam. Lo lus Henplais ʼElo·himʹ qhia txog ob peb tug yam ntxwv uas Yehauvas muaj, xws li muaj hwj chim loj kawg nkaus, muaj meej mom, thiab tus uas zoo tshaj plaws.
Tus Vajtswv Uas Loj Dua Tej Vajtswv	2 Kevcai 10:17	Tus Vajtswv uas siab tshaj plaws, tsis zoo li tej “mlom” uas tib neeg teev tiam.—Yaxayas 2:8.
Tus Txawj Cob Qhia Tshaj Plaws	Yaxayas 30:20, 21	Txawj qhuab qhia thiab taw kev ua neej.—Yaxayas 48:17, 18.
Tus Tsim Ib Puas Tsav Yam	Phau Ntawv Nkauj 149:2	Tus tsim kom muaj txhua tsav txhua yam.—Tshwmsim 4:11.
Tus Vajtswv Uas Muaj Kev Zoo Siab	1 Timautes 1:11	Muaj kev zoo siab xyiv fab.—Phau Ntawv Nkauj 104:31.
Tus Uas Hnov Peb Tej Lus Thov	Phau Ntawv Nkauj 65:2	Nws mloog tus uas muaj lub siab xib rau nws tej lus thov.
Kuv Yeej Yog Kuv	Khiav Dim 3:14, phau Vajlugkub Askiv King James Version	Yehauvas yeej ua kom tau muaj tiav raws li nws lub ntsiab. Lo lus Kuv Yeej Yog Kuv txhais tias ‘Yam uas kuv pom zoo lawd kuv yuav ua kom muaj tiav’ los sis ‘Kuv ua kom muaj tiav raws li kuv hom tseg.’ (phau Vajlugkub Askiv Emphasised Bible, uas yog J. B. Rotherham phau thiab phau Askiv New World Translation) Cov lus no qhia kom peb to taub tias Yehauvas lub npe yog txhais li cas tiag.—Khiav Dim 3:15.
Tus Uas Khib Xeeb	Khiav Dim 34:14, phau Vajlugkub Askiv King James Version	Vajtswv tsis pub peb pe dab pe mlom los sis pe lwm tus vajtswv. Nws tsuas xav kom peb teev tiam nws tib leeg xwb.
Tus Vajntxwv Uas Nyob Mus Ib Txhis	Tshwmsim 15:3	Nws txoj kev kav tsis muaj qhov pib thiab qhov xaus.
Tus Tswv	Phau Ntawv Nkauj 135:5	Lo lus Henplais ʼA·dhohnʹ thiab ʼAdho·nimʹ yog txhais tias tus tswv los sis tus los pav.
Tus Tswv Uas Muaj Hwj Chim Loj Kawg Nkaus	Yaxayas 1:9; Loos 9:29	“Tus tswv uas muaj hwj chim loj kawg nkaus” txhais tias Yehauvas yog tus thawj coj ntawm tag nhro cov tub txib saum ntuj.—Loos 9:29
Tus Loj Dua Ntais	Phau Ntawv Nkauj 47:2	Nws yog tus kav ib puas tsav yam.
Tus Uas Dawb Huv	Pajlug 9:10	Yehauvas yog tus uas dawb huv tshaj plaws.
Tus Kws Puab	Yaxayas 64:8	Nws yeej muaj cai kav txhua leej txhua tus thiab txhua haiv neeg. Zoo li tus kws puab lauj kaub, nws yeej muaj cai siv thooj av puab raws li nws lub siab nyiam.—Loos 9:20, 21.
Tus Uas Txhiv, Tus Uas Cawm Dim	Yaxayas 41:14; phau Vajlugkub Askiv King James Version	Yog tus uas txhiv thiab cawm tib neeg dim txoj kev txhaum thiab txoj kev tuag los ntawm qhov uas xa Yexus Khetos los tuag theej noob neej lub txhoj.—Yauhas 3:16.
Txhib Zeb	Phau Ntawv Nkauj 18:2, 46	Nws yog qhov chaw nkaum ruaj khov thiab cawm siav.
Cawm Seej	Yaxayas 45:21	Yog tus cawm dim ntawm kev puas ntsoog los sis kev puas tsuaj.
Tus Tswv Yug Yaj	Phau Ntawv Nkauj 23:1	Tus uas hlub tshua thiab saib xyuas cov uas teev tiam nws.
Tus Tswv Uas Kav Ib Puas Tsav Yam	Chivkeeb 15:2	Lo lus Henplais ʼAdho·naiʹ yog txhais tias Vajtswv muaj hwj chim loj tshaj plaws kav ib puas tsav yam.
Tus Uas Siab Tshaj Plaws	Daniyees 7:18, 27	Tus uas kav ib puas tsav yam.

Cov npe tis rau tej thaj chaw hauv phau Vajlugkub Henplais

Muaj tej thaj chaw hauv phau Vajlugkub uas muab hu raws li Vajtswv lub npe, tiam sis tsis yog cov npe siv rau Vajtswv.

Thaj Chaw Npe	Nqe Vajlugkub	Txhais Li No
Yehauvas Npaj Thiab Pub	Chivkeeb 22:13, 14	Yehauvas yog tus npaj thiab pub.
Yehauvas Yog Kuv Tus Chij	Khiav Dim 17:15	Yehauvas yog ‘tus Ncej,’ los sis “tus Chij.” (phau Vajlugkub Askiv Today’s New International Version) Yog leej twg tso siab rau nws lawv yuav tau kev pab thiab kev tiv thaiv.—Khiav Dim 17:13-16.
Yehauvas Yog Tus Muaj Kev Kaj Siab	Cov Thawjtswj 6:23, 24	Yehauvas yog tus muab tau kev kaj siab.
Yehauvas Nyob Ntawm No	Exekees 48:35	Yehauvas nyob nrog nraim tus uas npuab siab rawv rau nws.

Vim li cas peb yuav tsum paub thiab siv Vajtswv lub npe

Vajtswv lub npe Yehauvas yeej tseem ceeb heev, nws thiaj kom muab sau txhiab txhiab zaus rau hauv phau Vajlugkub.—Malakis 1:11.
Vajtswv tus tub Yexus qhia tag los qhia dua tias, Vajtswv lub npe tseem ceeb npaum li cas diam. Nws thiaj thov rau Yehauvas tias, “Thov kom sawv daws hwm koj lub npe.”—Mathais 6:9; Yauhas 17:6.
Cov uas paub thiab siv Vajtswv lub npe ces twb yog lawv ntaus ib txoj kev phooj ywg nrog Yehauvas. (Phau Ntawv Nkauj 9:10; Malakis 3:16) Txoj kev sib raug zoo no pab kom lawv txais tau tej koob hmoov uas Vajtswv cog lus tseg. Yehauvas hais tias, ‘Kuv yuav cawm cov neeg uas hlub kuv thiab yuav tiv thaiv cov neeg uas lees yuav kuv lub npe.’—Phau Ntawv Nkauj 91:14.
Phau Vajlugkub qhia tias, yeej muaj ntau tus vajtswv los sis ntau tus tswv. (1 Kauleethaus 8:5,6) Txawm li ntawd los tsuas muaj tib tug tseem Vajtswv uas npe hu ua Yehauvas.—Phau Ntawv Nkauj 83:18.