Kev Cai Hla Dhau yog kev cai uas cov Ixayees ua los nco txog hnub uas Vajtswv cawm lawv dim cev qhev ntawm cov Iyiv xyoo 1513 ua ntej Yexus yug. Vajtswv sam hwm kom cov Ixayees ua txoj kev cai no txhua xyoo thaum txog lub hlis Anpis los sis Nixam tim 14.​—Khiav Dim 12:42; Levis Kevcai 23:5.

Ua cas ho muab hnub cawm cov Ixayees dim hu ua Kev Cai Hla Dhau?

 Vim hnub ntawd Vajtswv hla cov Ixayees mus tua Iyiv cov tub hlob. (Khiav Dim 12:27; 13:15) Ua ntej Vajtswv yuav mus tua Iyiv cov tub hlob, Vajtswv hais kom cov Ixayees muab ib tug me nyuam yaj los sis me nyuam tshis tej ntshav los pleev rau saum hau rooj thiab ob tug ncej qhov rooj. (Khiav Dim 12:21, 22) Thaum tus tub txib saum ntuj pom lub tsev twg pleev ntshav ces nws yuav hla lub tsev ntawd mus, tsis tua lawv cov tub hlob.​—Khiav Dim 12:7, 13.

Yav thaud lawv ua Kev Cai Hla Dhau li cas?

 Thawj zaug thaum cov Ixayees ua Kev Cai Hla Dhau Vajtswv qhia seb lawv yuav ua li cas rau li cas. a Phau Vajlugkub sau tseg li no.

•   Muab khoom fij rau Vajtswv: Lub hlis Anpis (Nixam) tim 10, ib tse neeg Ixayees twg yuav tsum npaj ib tug me nyuam txiv yaj los sis tshis uas muaj 1 xyoos los tua rau hnub tim 14. Thawj zaug ua Kev Cai Hla Dhau, cov Yudais muab ntshav coj los pleev saum lub hau rooj thiab ob tug ncej qhov rooj, tom qab ntawd mam muab tus tsiaj ci kheej noj.​—Khiav Dim 12:3-9.

•   Pluag mov: Cov Ixayees kuj noj cov ncuav tsis xyaw keeb thiab zaub iab ntxuag cov nqaij thiab.​—Khiav Dim 12:8.

•   Noj ncuav tsis xyaw keeb: Tom qab cov Ixayees ua Kev Cai Hla Dhau tas, lawv ua kev cai noj ncuav tsis xyaw keeb 7 hnub.​—Khiav Dim 12:17-20; 2 Xwmtxheej Vajtxwv 30:21.

•   Cob qhia me nyuam: Cov niam txiv Ixayees yuav siv lub sij hawm ua kev cai no los qhia lawv cov me tub me nyuam paub txog Yehauvas.​—Khiav Dim 12:25-27.

•   Mus ua kev cai hla dhau: Tom qab no thaum cov Ixayees ua Kev Cai Hla Dhau lawv yuav tsum mus hauv lub nroog Yeluxalees.​—2 Kevcai 16:5-7; Lukas 2:41.

•   Lwm yam ntxiv: Nyob rau Yexus tiam thaum lawv ua Kev Cai Hla Dhau lawv kuj hu nkauj thiab haus cawv txiv hmab thiab.​—Mathais 26:19, 30; Lukas 22:15-18.

Ib txhia nkag siab yuam kev li cas txog Kev Cai Hla Dhau

 Ib txhia nkag siab tias: Cov ntseeg yuav tsum ua Kev Cai Hla Dhau.

 Qhov tseeb: Xyoo 33, Yexus tau tsa ib txoj kev cai tshiab los hloov txoj Kev Cai Hla Dhau lawm. Txoj kev cai ntawd yog tus Tswv Pluas Hmo. (Lukas 22:19, 20; 1 Kauleethaus 11:20) Rooj mov no ua los nco txog “Khetos tus uas yog tus menyuam yaj uas yog luag muab tua ua Kevcai Hla Dhau.” (1 Kauleethaus 5:7) Yexus tus nqe txhiv muaj nuj nqes tshaj tej tsiaj uas muab tua fij, rau qhov nws cawm tau tib neeg dim kev txhaum thiab kev tuag.​—Mathais 20:28; Henplais 9:15.