Txhua txoj kev ntseeg tsis zoo ib yam nkaus. Phau Vajlugkub hais txog ntau txoj kev ntseeg uas tsis haum Vajtswv siab. Cov kev ntseeg no muaj raws li ob yam hauv qab no.

Yam 1: Teev tiam tej vajtswv cuav

 Phau Vajlugkub qhia hais tias cov uas teev tiam tej vajtswv cuav lawv raug “dag ntxias xwb” thiab lawv muaj tej uas “tsis muaj nuj nqes dabtsi li.” (Yelemi 16:19, 20) Yehauvas a tau sam hwm li no rau haiv neeg Ixayees: “Tsis txhob pe lwm tus vajtswv, tiamsis pe kuv tib leeg xwb.” (Khiav Dim 20:3, 23; 23:24) Thaum lawv mus teev tiam tej vajtswv cuav lawm, “[Yehauvas] thiaj chim heev rau cov Yixalayees.”​—Teev Npe 25:3; Levis Kevcai 20:2; Cov Thawjtswj 2:13, 14.

 Vajtswv Yehauvas yeej tseem xav li no rau cov neeg uas pe hawm lwm tus ib yam li ib tug “vajtswv.” (1 Kauleethaus 8:5, 6; Kalatias 4:8) Yehauvas sam hwm kom cov uas xav teev tiam nws tsis txhob mus poo cov uas koom nrog kev ntseeg cuav. Vajtswv thiaj hais tias: “Nej cia li tso plhuav lawv cov ntawd tseg mus nyob rau ibcag.” (2 Kauleethaus 6:14-17) Yog tias txhua txoj kev ntseeg zoo ib yam nkaus thiab coj tau neeg los paub txog Vajtswv, ces vim li cas Vajtswv ho sam hwm li no?

Yam 2: Teev tiam Vajtswv rau tej uas nws tsis pom zoo

 Muaj qee zaus, cov Ixayees tau muab tej kev ntseeg cuav tej kab lig kev cai uas lawv siv los teev tiam tej vajtswv cuav los txuam nrog txoj kev ntseeg tseeb uas yog pe hawm Vajtswv Yehauvas, tiam sis Vajtswv tsis txaus siab rau tej uas lawv ua ntawd. (Khiav Dim 32:8; 2 Kevcai 12:2-4) Yexus los kuj tsis txaus siab rau cov xib hwb uas nyob rau nws tiam thiab rau qhov lawv ua txuj coj li tus neeg muaj kev ntseeg tiam sis lawv lub siab tsis coj li ntawd. Yexus thiaj hais tias lawv “tsis quav ntsej tej yam tseem ceeb hauv Mauxes Txoj Kev Cai kom ua siab ncaj, muaj siab hlub, thiab muab siab npuab Vajtswv.”​—Mathais 23:23.

 Zoo li niaj hnub niam no, tsuas yog txoj kev ntseeg uas qhia raws li qhov tseeb thiaj coj tau tib neeg los paub Vajtswv xwb. Qhov tseeb uas hais no yog nyob hauv phau Vajlugkub. (Yauhas 4:24; 17:17; 2 Timautes 3:16, 17) Tej kev ntseeg uas tsis qhia raws li Vajtswv Txoj Lus tsuas ua rau neeg txav deb ntawm Vajtswv mus xwb. Ntau txoj kev ntseeg qhia tej yam uas tib neeg xav tias yog rho hauv phau Vajlugkub los, xws li Vaj Peb Leeg, tus plig uas tsis txawj tuag, thiab kev tsim txom hauv ntuj tawg. Tej kev ntseeg ntawd yog muab los ntawm cov uas pe hawm tej vajtswv cuav tsis yog muab los ntawm phau Vajlugkub. Cov kev ntseeg uas qhia li no “tsis muaj qab hau” li rau qhov lawv muab neeg tej kab lig kev cai los hloov Vajtswv txoj xwb.​—Malakaus 7:7, 8.

 Vajtswv ntxub cov neeg uas ua txuj ua li muaj kev ntseeg tiam sis siab phem. (Titus 1:16) Yuav kom pab tau tib neeg txav ze rau Vajtswv, txoj kev ntseeg ntawd yuav tsum pab tau lawv lub neej txhua hnub tsis yog hais tias lawv tsuas ua neej raws li tib neeg tej kab lig kev cai los sis tej kev coj noj coj ua xwb. Piv txwv li no, phau Vajlugkub hais tias: “Tus uas xav hais tias nws yog tus uas coj Vajtswv txoj kevcai nruj lawm, tiamsis yog nws tsis ceev nws tus nplaig, ces qhov uas nws coj Vajtswv txoj kevcai nruj li ntawd yeej tsis muaj nqis rau nws li. Qhov uas nws ua li ntawd yog nws rov dag nws xwb. Txoj kevcai uas Vajtswv tus uas yog peb Leej Txiv suav hais tias yog txoj uas zoo thiab tseeb, txoj ntawd yog nej yuav tsum pab cov pojntsuam thiab cov menyuam ntsuag uas raug kev txomnyem quaj ntsuag. Thiab nej tsis txhob mus nrog neeg ntiajteb ua phem ua qias.” (Yakaunpaus 1:26, 27)