Phau Vajlugkub qhia tias Vajtswv tsis tau tsim Ntxwg Nyoog. Tiamsis Vajtswv tsim tus tubtxib saum ntuj uas tom qab no hloov los ua Ntxwg Nyoog. Phau Vajlugkub hais tias: “Vajtswv yog tus uas zoo kawg nkaus, tej uas nws ua yeej ncaj ncees; nej tus Vajtswv yog tus ncaj thiab tseeb; nws ua qhov yog thiab qhov tseeb xwb.” (2 Kevcai 32:3-5) Raws li nqe no peb hais tau tias Xatas txeev ua Vajtswv ib tug tub lossis ib tug tubtxib saum ntuj uas zoo kawg nkaus thiab ncaj ncees.

 Hauv Exekees 28:15, piav txog Vajtswv tus tub uas hloov mus ua Xatas tias: “Koj yeej muaj tus cwjpwm zoo txij thaum kuv tsim koj los txog hnub uas koj mus ua kev phem kev qias.” Qhov no qhia tias thaum xub thawj Xatas yeej nyiam qhov tseeb thiab coj ncaj.

 Tiamsis, ib yam li cov tubtxib saum ntuj thiab noob neej uas Yehauvas tau tsim, tus tubtxib uas hloov mus ua dab Ntxwg Nyoog muaj kev ywj pheej txiav txim seb nws yuav ua qhov zoo los qhov phem. Vim nws txiav txim siab tawm tsam Vajtswv thiab dag ntxias Adas thiab Evas tuaj nws tog, nws thiaj tau lub npe, “Xatas” uas txhais tau tias “tus tiv txheem.”​—Chivkeeb 3:1-5; Tshwmsim 12:9.