Xov tooj muaj qhov zoo thiab qhov phem tib si, nyob ntawm peb seb peb siv li cas. Ua li, yuav ua li cas me nyuam thiaj paub siv xov tooj? Xws li, me nyuam yuav siv xov tooj ib hnub no ntev npaum li cas? a

•  Koj yuav tsum nkag siab

•  Koj yuav ua li cas

•  “Cov niam txiv uas hlub lawv cov me nyuam tsa kev cai”

•   Yog tsis ceev faj xov tooj yuav tsim tau teeb meem. Nyob rau zaj “Me Nyuam Thiab Tej Xov Tooj Ntawm Tes—Ntu 1: Puas Tsim Nyog Rau Kuv Tus Me Nyuam Muaj Xov Tooj?” peb pom tias xov tooj qhib kev rau cov me nyuam mus saib tau txhua yam hauv Is Taws Nej tsis hais yam zoo yam phem huv tib si.

   Npleedam (Brenda) hais tias: “Cov niam txiv tsis xav hais tias xov tooj yuav ua rau lawv cov me nyuam ntsib cov neeg phem thiab xyaum tau tej tswv yim tsis zoo.”

•   Me nyuam yuav tsum muaj ib tug los cob qhia lawv. Rau qhov lawv yug rau phaum uas siv siv xov tooj, tsis zoo li cov laus ib txhia uas nyuam qhuav paub siv tsis ntev no xwb. Txawm li ntawd los, tsis tau txhais tias me nyuam yuav paub luj lawv lub sij hawm siv xov tooj dua niam txiv.

   Muaj cov me nyuam ib txhia yeej paub kov xov tooj thiab kawm tau yooj yim dua lawv niam lawv txiv, tiam sis lawv tsuas yog me nyuam yaus xwb tsis tau paub qab hau txaus. Txawm lawv txawj siv npaum li cas los, cov niam cov txiv yuav tau saib xyuas thiab cob qhia lawv.

   Xeb (Seth) hais tias: “Yog koj tus me nyuam twb tsis paub siv xov tooj es koj cia li muab xov tooj cev rau nws, ces zoo ib yam li koj cev tus yuam sij tsheb rau koj tus me nyuam thiab hais rau nws tias ‘Ua zoo tsav tsheb nawb,’ tiam sis koj twb tsis tau qhia nws tsav tsheb dua li.”

•   Kawm kom paub siv koj tus me nyuam lub xov tooj. Koj yuav tsum paub seb me nyuam lub xov tooj zoo li cas thiab ua tau dab tsi xwb, yog ua li no koj thiaj paub nkag mus kho me nyuam lub xov tooj. Xws li:

   Koj puas txawj kho lub xov tooj kom me nyuam txhob siv dhau lawm?

   Koj puas paub kho lub xov tooj kom me nyuam txhob saib tej yam tsis tsim nyog rau me nyuam saib?

   Yog koj haj yam paub siv me nyuam lub xov tooj ces koj yuav haj yam pab tau koj tus me nyuam xwb.

   Vajlugkub tej hauv paus ntsiab lus: “Tus neeg muaj tswvyim khaws tej kev txawj ntse cia.”—Pajlug 10:14.

•   Tsa kev cai rau me nyuam coj. Hais rau koj tus me nyuam paub tias koj tsuas pub nws siv xov tooj thaum twg thiab ua dab tsi xwb. Xws li:

   Koj puas cia me nyuam saib xov tooj thaum noj mov los sis thaum muaj qhua los yog thaum mus tsham luag?

   Thaum txog caij pw koj puas txwv tsis pub nws nqa xov tooj mus hauv txaj?

   Koj tsuas pub nws siv tej app twg xwb?

   Ib hnub no koj tsuas pub nws siv xov tooj ntau npaum li cas?

   Koj puas kho lub twj kom tsis pub nws siv ntau dhau lawm?

   Qhia koj tej kev cai rau me nyuam paub, yog nws tsis mloog lus nws yuav raug li cas.

   Vajlugkub tej hauv paus ntsiab lus: “Tsis txhob muab kev qhuab qhia menyuam tso tseg.”—Pajlug 23:13.

•   Ib sij tshuaj me nyuam lub xov tooj ib zaug. Koj yuav tsum paub cov lej uas qhib me nyuam lub xov tooj, thiab saib seb nws siv xov tooj ua dab tsi, los sis saib tej lus uas nws xa rau luag, tej app uas nws siv, tej duab thiab tej vej xaij uas nws nyiam nkag mus saib.

   Lolees (Lorraine) hais tias: “Kuv hais rau kuv tus ntxhais paub tias kuv yuav mus saib nws lub xov tooj tiam sis kuv tsis qhia tias yuav saib thaum twg. Yog kuv pom tej yam tsis zoo kuv yuav tsis pub nws siv xov tooj ib ntus.”

   Cov niam txiv, nej muaj cai tshuaj nej tus me nyuam lub xov tooj seb lawv siv xov tooj ua dab tsi.

   Vajlugkub tej hauv paus ntsiab lus: “Txawm yog ib tug menyuam los nws yeej ua nws tus yamntxwv rau koj paub hais tias nws nyiam li cas. Koj yuav paub hais tias nws ua ncaj thiab ua zoo.”—Pajlug 20:11.

•   Cob me nyuam kom txawj xav. Txhawb kom me nyuam xav ua qhov zoo qhov yog. Ua cas ho tseem ceeb? Yog me nyuam xav ua qhov zoo lawv yuav ua raws li niam txiv hais tiam sis yog lawv tsis xav ua lawv yuav nrhiav kev los npog lawv niam lawv txiv. b

   Yog li ntawd, koj yuav tsum cob koj tus me nyuam kom muaj tus cwj pwm zoo, coj ncaj ncees, paub tswj nws tus kheej, muaj lub siab zoo. Ib tug me nyuam uas xyaum ua zoo nws yeej yuav siv xov tooj mus rau qhov zoo thiab xwb.

   Vajlugkub tej hauv paus ntsiab lus: “Cov laus . . . twb xyaum los lawm lawv thiaj paub hais tias yam twg phem yam twg zoo.”—Henplais 5:14.