MEMERO KEKENI EDIA HENANADAI
Lau Bapatiso Murinai Dahaka Do Lau Karaia be Namo?—Kahana 2: Dirava Oi Badinaia Noho
Baibel ia gwau “Iehova be ia idia badinaia taudia dekenai gau namodia ia henia noho.” (Salamo 84:11) Inai hereva “badinaia” ena anina be dahaka? Ena anina be emu mauri lalonai oi hahedinaraia oi bapatiso neganai Iehova dekenai oi karaia gwauhamata oi badinaia noho. (Hadibaia Tauna 5:4, 5) Edena dala ai oi bapatiso murinai Dirava oi badinaia noho diba?
Inai atikol ai
Hekwakwanai idauidau oi haheaukalaia noho
Siri badana: “Dirava ena Basileia lalonai ita vareai totona, hisihisi idauidau do ita davaria.”—Kara 14:22.
Ena anina: Momokani, Keristani taudia ibounai be mauri ai hekwakwanai idauidau do idia davaria. Unai hekwakwanai haida be, hegeregere Keristani ta ai oi lao dainai oi do idia kirikirilaia o dagedage henia. Eiava, moni ena hekwakwanai o gorere, ese taunimanima ibounai ia hahisia diba.
Do idia vara gaudia: Nega haida, emu mauri ai gau haida do idia idau, bona haida be oi ura henia lasi dalanai do idia vara. Baibel ia gwau taunimanima ibounai dekenai dika ia vara diba—Keristani taudia bona Keristani lasi taudia dekenai danu.—Hadibaia Tauna 9:11.
Oi karaia diba gauna: Oi diba hekwakwanai do oi davaria diba, unai dainai oi hegaegae oi haheaukalaidia totona. Namona be oi laloa idia vara hekwakwanai be emu abidadama idia hagoadaia totona bona oi ia durua Iehova dekenai oi tabekau totona. (Iamesi 1:2, 3) Gabeai, aposetolo Paulo bamona do oi mamia, ia gwau: “Badina lau dekenai siahu ia henia tauna amo goada lau abia gau ibounai lau karaia totona.”—Filipi 4:13.
SIVARAI MOMOKANI. “Lau bapatiso bona daudau lasi murinai, egu kakana memerodia be hereva momokani idia rakatania, egu tama sina idia gorere, bona lau danu lau gorere. Unai negai lau hesiku diba—Dirava dekenai lau gwauhamata egu mauri lalonai ia do lau tomadiho henia karana lau laloaboio totona. To, lau karaia gwauhamata ese lau ia durua dainai unai hekwakwanai idauidau lau haheaukalaia.”—Karen.
Dala ta: Iosepa ena sivarai oi dibaia totona, Genese karoa 37 bona 39 ia lao 41 oi duahia diba. Inai oi laloa: Iosepa dekenai dahaka hekwakwanai idia vara, bona edena bamona ia haheaukalaidia? Iehova ese edena dala ai Iosepa ia durua?
Heduru ma haida oi ura?
Hahetoho oi dadaraia noho
Siri badana: “Ta be sibona ena ura ese ia tohoa, unai ura ese ena lalona ia veria bona ia koia.”—Iamesi 1:14.
Ena anina: Nega haida, iseda ura gaudia ese ita idia tohoa diba. Bema unai gaudia ita biagua lasi kerere do ita karaia.
Do idia vara gaudia: Oi bapatiso murinai, do oi mamia “tauanina ena ura dikadia” be idia do noho. (2 Petero 2:18) Reana oi do headava lasi lalonai mahuta hebou urana do abia.
Oi karaia diba gauna: Hari emu lalona oi hadaia—hahetoho oi do davaria lasi lalonai—tauanina ena ura gaudia ese oi idia biagua lasi disisen dikadia oi karaia totona. Laloatao, Iesu ia gwau: “Tau ta be biaguna rua edia hesiai gaukara ia karaia diba lasi.” (Mataio 6:24) Daika be emu biaguna ai do ia lao oi abia hidi diba. Namona be Iehova oi abia hidi. Ena be ura dikana ta oi badinaia urana ia goada, to abia hidi oi karaia diba unai oi badinaia lasi totona.—Galatia 5:16.
Dala ta: Namona be emu goada bona manoka gaudia oi dibaia. Kara namodia hahedinaraia totona oi do idia durua turadia oi abia hidi. Kara maoromaoro karaia totona, oi idia durua lasi taudia, gabudia, bona karadia oi dadaraia.—Salamo 26:4, 5.
Heduru ma haida oi ura?
Emu ura oi habadaia noho
Siri badana: “Matamanai umui karaia bamona umui gaukara goadagoada noho . . . ela bona dokona, vadaeni do umui hesiku lasi.”—Heberu 6:11, 12.
Ena anina: Ena gaukara ia goadalaia lasi tauna be ia manoka diba bona do ia hesiku.
Do idia vara gaudia: Reana oi bapatiso murinai oi moale bada bona emu hesiai gaukara karaia urana ia bada. Bona Iehova oi lalokau henia bada. To daudau lasi murinai, reana oi hekwarahi gau ibounai lalonai Iehova oi badinaia dainai, oi lalomanoka bona matamanai oi abia urana ia ore lao.—Galatia 5:7.
Oi karaia diba gauna: Kara maorona oi karaia noho, ena be nega haida oi mamia do ia auka. (1 Korinto 9:27) Emu guba Tamana kahirakahira oi noho totona ia oi diba namonamo bona nega momo guriguri amo ia oi hereva henia. Danu, Iehova ena hesiai gaukara idia moalelaia taudia oi bamoa noho.
Dala ta: Laloatao Iehova be oi ia lalokau henia bada bona ia noho hegaegae oi ia durua totona. Namo lasi oi laloa oi dekenai ia lalohisihisi bema ia hesiai henia urana ia ore lao noho. Baibel ia gwau: “Ia ese hesiku tauna dekenai goada ia henia bona manoka taudia dekenai goada bada ia henia.” (Isaia 40:29) Daudau lasi, ia ese emu hekwarahi do ia hanamoa emu ura habadaia totona.
Heduru ma haida oi ura?
Duahia:
“Matamata Taudia—Mauri Abia Totona Umui Hekwarahi”
“Edena Dala Ai Dirava Tomadiho Henia Karana Lau Moalelaia Diba?”
Vidio itaia:
Ena namo: Bema Dirava oi badinaia noho, Iena kudouna do oi hamoalea! (Aonega Herevadia 27:11) Do ia moale bema abia hidi oi karaia ia oi badinaia noho, bona oi do ia durua Satani ena hahetoho idauidau oi dadaraia totona.
Reana Inai Danu Oi Ura
MATAMATA TAUDIA EDIA HENANADAI
Lau Bapatiso Murinai Dahaka Do Lau Karaia be Namo?—Kahana 1: Emu Gaukara Habadaia Noho
Oi bapatiso murinai, Dirava ida emu hetura karana oi hagoadaia noho. Baibel oi stadilaia noho, oi guriguri, oi abia dae gaudia oi gwauraia hedinarai, bona Keristani heboudia dekenai oi lao.
MATAMATA TAUDIA EDIA HENANADAI
Bapatiso Lau Abia Be Namo, A?—Dahaka ese Lau ia Koua?
Bema emu mauri be Iehova dekenai oi gwauhamatalaia bona oi bapatiso lalohadaina ese oi ia hagaria, inai atikol ese oi do ia durua unai gari oi hanaia totona.
