Hari teknoloji dainai emu bosi, gaukara turadia, o ma haida idia laloa oi be dina bona hora ibounai lalonai oi gaukara diba, unai dainai ia auka emu gaukara bona gau ma haida, emu headava danu, oi laloa maoromaoro totona.

•  Inai oi diba be namo

•  Moni gaukara bona gau ma haida sikelea

•  Headava taudia edia hereva

•  Herevalaia hebou

•   Teknoloji dainai reana nega bada be gaukara dekenai oi atoa diba, to emu headava dekenai be lasi. Unai dainai, gaukara horana murinai ta ia rini, e-mail o teks ia siaia neganai, oi haere haraga.

   “Guna gaukara murinai oi be mai emu nega ruma bese ida oi moale totona, to hari ia auka, badina gaukara ta totona e-mail ta oi abia o ta ia rini neganai, karaharaga oi karaia bona emu adavana oi laloa lasi.”​—Jeanette.

•   Emu gaukara bona famili oi sikelea namonamo totona, gau haida oi karaia be namo. Bema oi palani namonamo lasi, emu adavana totona oi atoa nega be emu gaukara ese ia abia diba.

   “Nega momo emu adavana ena ura do oi dadaraia, badina oi laloa, ‘O, do ia laloparara. Lau do ia gwauatao. Gabeai ia lau bamoa diba.’”​—Holly.

•   Emu headava oi atoa guna. Baibel ia gwau: “Dirava ese ia hakapua taudia be ta ese do ia hapararaia lasi be namo.” (Mataio 19:6) Bema ta ese oi bona emu adavana ia “hapararaia” diba lasi, dahaka dainai emu moni gaukara be unai ia karaia diba?

   “Haida idia laloa oi idia pei dainai, idia ura negana ai oi idia rini henia diba. To lau diba egu headava lau atoa guna be namo, unai dainai idia lau hamaoroa egu of dinadia ai lau gaukara lasi, to gabeai idia do lau rini.”​—Mark.

   Sibona oi nanadaia, ‘Egu kara amo lau hahedinaraia egu moni gaukara amo egu headava be mai anina, a? Egu adavana be dahaka do ia gwau?’

•   Lasi oi gwauraia diba. Baibel ia gwau: “Manau taudia be aonega idia abia noho.” (Aonega Herevadia 11:2) Bema oi manau do oi laloparara emu gaukara haida oi dadaraia be namo o ma ta dekenai oi henia.

   “Lau be plama gaukara lau diba dainai, bema ta be egu heduru ia ura dikadika, do ia lalohekwarahi bada. Bema ia makaia negana ai ena gaukara lau haorea diba lasi, ma ta dekenai ia lau siaia.”​—Christopher.

   Sibona oi nanadaia: ‘Bema lau abia dae gaukaradia dainai egu adavana totona lau be nega lasi, unai gaukara lau dadaraia, a? Egu adavana be dahaka do ia gwau?’

•   Adavana totona nega atoa. Baibel ia gwau: “Gau ibounai be mai edia nega korikori.” (Hadibaia Tauna 3:1) Emu gaukara be momo neganai, unai be nega namona emu adavana totona nega korikori oi makaia.

   “Ai bisi momokani neganai, nega ai makaia, ai aniani hebou o kone dekenai ai raka totona.”​—Deborah.

   Sibona oi nanadaia: ‘Egu adavana totona nega korikori lau makaia, a? Egu adavana be dahaka do ia gwau?’

•   Fon oi of. Baibel ia gwau: “Mai anina bada gaudia do umui diba.” (Filipi 1:10) Gaukara totona oi idia rini o teks lasi totona, nega ta ta emu fon oi of, a?

   “Lau hekwarahi hora maorona ai gaukara lau rakatania totona. Unai hora murinai, egu fon ena notification lau koua.”​—Jeremy.

   Sibona oi nanadaia: ‘Dika egu bosi o gaukara tauna ese lau ia rini o teks henia dainai egu fon lau of lasi, a? Egu adavana be dahaka do ia gwau?’

•    Oi laloa maoromaoro. Baibel ia gwau: “Namona be taunimanima ibounai ese emui laloa maoromaoro karana idia itaia.” (Filipi 4:5) Momokani, nega haida emu nega bada be emu gaukara dekenai oi haorea. Hegeregere, reana emu adavana ena gaukara dainai nega haida gaukara murinai ia idia rini o teks henia. Unai bamona negadiai, laloa maoromaoro karana be mai anina bada.

   “Egu adavana be mai ena bisinesi maragina, bona nega momo gaukara horadia murinai, do ia gaukara noho. Nega haida, lau lalohisihisi, to unai be gau badana lasi, badina nega bada ai atoa gau haida ai karaia hebou totona.”​—Beverly.

   Sibona oi nanadaia: ‘Egu adavana ena gaukara lau laloa dainai, ia lau hahekwarahia lasi, a? Egu adavana be dahaka do ia gwau?’

 Gau ginigunana be, umui ta ta ese inai henanadai umui lalodia. Bena, emui haere umui herevalaia hebou.

•   Emu adavana ia maumau, badina emu gaukara be ruma dekenai oi mailaia, a? Bema oibe, ia ida oi lalotamona, a?

•   Emu gaukara bona gau ma haida oi sikelea neganai, edena gaudia oi hanamoa diba?

•   Emu adavana ese ena gaukara be “gaukara gabunai” ia rakatania diba lasi, a? Bema oibe, edena bamona negadia unai ia vara?

•   Moni gaukara bona gau ma haida oi sikelea neganai, oi ura emu adavana ese dahaka gau haida ia haidaua?