Revareva Ginigunana Korinto Taudia Dekenai 1:1-31
1 Lau Paulo, be Dirava ese ena ura hegeregerena lau ia boiria, Keriso Iesu ena aposetolo tauna ai lau lao totona.+ Lau be iseda tadikaka Sositene ida lau noho.
2 Korinto ai,+ Dirava ena kongrigeisen taudia dekenai inai revareva lau torea. Dirava ese umui ia hahelagaia bona umui be Keriso Iesu ida umui hakapua.+ Dirava ese umui bona iseda Lohiabada Iesu Keriso ena ladanai idia boiboi taudia ibounai ia abia hidi, helaga taudia ai umui lao totona.+ Iesu Keriso be edia Lohiabada bona iseda danu.
3 Namona be Dirava iseda Tamana, bona Lohiabada Iesu Keriso amo hebogahisi hereadaena bona maino umui abia.
4 Dirava ese Keriso Iesu amo umui dekenai ia henia hebogahisi hereadaena dainai, hanaihanai umui totona egu Dirava lau tanikiu henia.
5 Umui be Keriso ida umui hakapua dainai, Dirava ese gau ibounai dekenai umui ia hanamoa momokani, hegeregere umui be Dirava ena hereva umui harorolaia diba bona unai hereva dekenai emui diba ia habadaia.+
6 Unai ese ia hahedinaraia, Keriso+ ena sivarai ese umui ia hagoadaia.
7 Vadaeni mai emui ura bada ida iseda Lohiabada Iesu Keriso ia hedinarai negana umui naria noho lalonai, harihari gauna ta dekenai do umui dabu lasi.+
8 Dirava ese umui do ia hagoadaia danu ela bona dokona, unai amo Lohiabada Iesu Keriso ena dina ai, samania herevana ta be umui dekenai do idia gwauraia lasi.+
9 Dirava ese ena hereva ia badinaia,+ ia ese umui ia boiria ena Natuna Iesu Keriso, iseda Lohiabada ida umui lalotamona totona.
10 Tadikaka e, iseda Lohiabada Iesu Keriso ena ladanai umui lau hagoadaia, namona be umui ibounai be mai lalotamona ida umui hereva, bona namo lasi umui parara,+ to umui lalotamona momokani bona emui ura danu ia tamona be namo.+
11 Lauegu tadikaka e, Kiloe ena ruma taudia haida ese lau dekenai emui sivarai idia gwauraia, idia gwau umui be umui lalotamona lasi.
12 Lauegu hereva ena anina be inai, umui haida umui gwau: “Lau be Paulo ena,” bona ma haida umui gwau, “Lau be Apolo ena,”+ ma haida umui gwau, “Lau be Kepa* ena,” bona ma haida umui gwau, “Lau be Keriso ena.”
13 Keriso ena kongrigeisen be ia parara vadaeni, a? Paulo be umui dainai au dekenai idia kokoa kau, a? Eiava umui be Paulo ena ladanai bapatiso umui abia, a?
14 Lau ese Dirava lau tanikiu henia, badina umui ta lau bapatisoa lasi, to Krisipo+ bona Gaio sibona.+
15 Unai dainai ta do ia gwau lasi, umui be egu ladana ai bapatiso umui abia.
16 Momokani, lau be Stepana ena ruma taudia lau bapatisoa danu.+ To umui ta lau bapatisoa eiava lasi be lau laloatao diba lasi.
17 Badina be Keriso ese lau ia siaia taunimanima bapatisoa totona lasi, to sivarai namona harorolaia totona.+ Bona aonega herevadia lau gaukaralaia lasi, badina bema unai bamona lau karaia, Keriso ena hisihisi auna* be anina lasi gauna ai ia lao.
18 Dika do idia davaria taudia dekenai, hisihisi auna* ena hereva be hereva kavakavana,+ to hahemauri ita abia taudia dekenai, unai be Dirava ena siahu ia hahedinaraia.+
19 Toretore Helagadia ia gwau: “Lau ese aonega taudia edia aonega do lau haorea, bona diba bada taudia edia diba do lau dadaraia.”*+
20 Aonega tauna be edeseni? Taravatu hadibaia tauna* be edeseni? Inai nega oromana* ai ia hepapahuahu momo tauna be edeseni? Dirava ese inai tanobada ena aonega be kavakava gauna ai ia halaoa, ani?
21 Dirava ena aonega be inai dala ai ia hedinarai: Inai tanobada taudia be edia aonega amo Dirava idia diba lasi.+ Idia dekenai, ita harorolaia herevana be kavakava, to Dirava ese unai kavakava gauna+ amo idia abidadama taudia ia hamauria.
22 Iuda taudia idia ura toa karadia idia itaia,+ bona Grik taudia idia ura aonega idia tahua.
23 To ita ese Keriso be au dekenai idia kokoa kau ena sivarai ita harorolaia. Iuda taudia dekenai unai idia abia dae be auka,* bona idau bese taudia dekenai unai be kavakava gauna.+
24 To Dirava ese ia boiria Iuda bona Grik taudia dekenai, Keriso be Dirava ena siahu bona Dirava ena aonega.+
25 Badina Dirava amo ia mai kavakava gauna ese taunimanima edia aonega ia hereaia bona Dirava amo ia mai manoka gauna ese taunimanima edia goada ia hereaia.+
26 Tadikaka e, umui dekenai ia vara gauna umui diba, Dirava ese taunimanima edia matanai idia aonega taudia momo ia boiria lasi,+ eiava siahu taudia momo eiava ladana bada taudia momo ia boiria lasi.+
27 To Dirava ese tanobada ena kavakava gaudia ia abia hidi, aonega taudia ia hahemaraia totona. Bona Dirava ese tanobada ena manoka gaudia ia abia hidi, goada gaudia ia hahemaraia totona.+
28 Bona Dirava ese tanobada ena anina lasi gaudia bona taunimanima ese idia laloa maragi gaudia ia abia hidi, taunimanima ese idia laloa bada gaudia ia haorea totona,+
29 unai amo tau ta be Dirava ena vairanai do ia hekokoroku lasi.
30 To Dirava dainai umui be Keriso Iesu ida umui hakapua. Ia ese Dirava ena aonega bona ena kara maoromaoro ia hahedinaraia.+ Iesu amo taunimanima be helaga taudia ai idia lao diba,+ bona mauri davana amo idia be ura kwalimu taudia ai idia lao diba.+
31 Toretore Helagadia ia gwau bamona: “Bema ta ia heagi, namona be Iehova* dainai ia heagi.”+
Futnout
^ Ladana ma ta be Petero.
^ Eiava “atoa siri.”
^ Unai be, Taravatu diba namonamo tauna.
^ Gr., “unai be hahekwakwanaia gauna.”
