Samuela Ginigunana 9:1-27
-
Samuela bona Saulo idia hedavari (1-27)
9 Beniamina iduhuna amo tau ta ena ladana be Kisa,+ ia be Abiele ena bese amo, Abiele be Seroro ena natuna, bona Seroro be Bekorata ena natuna, bona Bekorata be Afia ena bese amo. Inai Beniamina iduhu tauna,+ Kisa, be taga bada tauna.
2 Iena natuna ena ladana be Saulo.+ Ia be mero matamata bona mai hairaina, Israela taudia huanai ia be hairai momokani, bona taunimanima ibounai amo ia be lata herea.
3 Saulo ena tamana, Kisa, ena doniki idia boio neganai, Kisa be ena natuna Saulo dekenai ia gwau: “Mani emu hesiai taudia ta oi abia bona umui lao doniki umui tahudia.”
4 Idia ese Eparaima ena ororo gabudia idia raka hanaia bona Sahalima tanona idia raka hanaia danu, to doniki idia davaridia lasi. Bena idia lao Salisa tanona dekenai, to doniki be unuseniai idia noho lasi. Unai murinai Beniamina iduhu ena tano ibounai lalonai idia loaloa, to doniki idia davaridia lasi.
5 Vadaeni idia be Supu tanona dekenai idia lao, bona Saulo be ia ida ia lao hesiai tauna dekenai ia gwau: “Oi mai bona ita giroa lou, dika egu tamana be ita dainai ia lalohekwarahi matamaia, bena doniki totona do ia laloa momo lasi.”+
6 To ena hesiai tauna ia gwau: “Inai siti lalonai Dirava ena hesiai tauna ta ia noho, ia be taunimanima ese idia matauraia. Bona ia gwauraia hereva ibounai be idia vara momokani.+ Harihari unuseni ita lao be namo. Reana ita ia hadibaia diba edena dala dekenai do ita lao.”
7 Unai neganai Saulo be ena hesiai tauna dekenai ia gwau: “Bema ita lao, unai tauna dekenai dahaka do ita abia lao? Iseda puse lalonai paraoa be lasi, bona harihari gauna ta ia noho lasi Dirava momokani ena hesiai tauna dekenai ita henia totona. Dahaka do ita karaia?”
8 Unai dainai hesiai tauna be Saulo dekenai ma ia gwau: “Lau dekenai siliva koini maragina ia noho, bona unai be Dirava momokanina ena hesiai tauna dekenai do lau henia, bona ita do ia hadibaia edena dala dekenai do ita lao.”
9 (Gunaguna Israela ai, tau ta be Dirava ena hakaua dalana diba totona ia lao neganai, ia be do ia gwau: “Oi mai, bona matahanai itaia tauna dekenai ita lao.”+ Hari ita gwauraia peroveta tauna be guna idia gwauraia, matahanai itaia tauna.)
10 Bena Saulo be ena hesiai tauna dekenai ia gwau: “Emu hereva be maoro, namona be ita lao.” Unai dainai, Dirava momokanina ena hesiai tauna ia noho siti dekenai idia lao.
11 Vadaeni idia be siti ena dala ai idia daekau lao neganai, kekeni haida idia hedavari henidia, idia be ranu utua totona idia mai. Vadaeni idia dekenai idia gwau: “Matahanai itaia tauna+ be inai gabu dekenai ia noho, a?”
12 Idia haere, idia gwau: “Oibe, ia be umui vairanai ia lao noho. Umui lao haraga, hari dina ia be inai siti dekenai ia mai, badina taunimanima be hari dina tomadiho gabu helagana+ ai boubou gauna do idia henia.+
13 Siti dekenai umui ginidae neganai, tomadiho gabu helagana ai aniani totona ia do daekau lasi lalonai, ia do umui davaria. Taunimanima be do idia aniani lasi ela bona ia mai, badina ia ese boubou gauna do ia hanamoa. Unai ia karaia murinai, ia boiria taudia idia aniani diba. Vadaeni harihari umui lao bona ia do umui davaria.”
14 Bena idia be siti dekenai idia daekau lao. Bona siti lalonai idia vareai neganai, Samuela be idia ia hedavari henia totona ia mai, unai amo tomadiho gabu helagana dekenai idia lao hebou diba.
15 Dina ta gunanai, Saulo ia do mai lasi neganai, Iehova be Samuela dekenai ia gwau:
16 “Kerukeru inai bamona nega ai, lau be oi dekenai tau ta do lau siaia, ia be Beniamina tanona amo do ia mai.+ Namona be ia oi horoa egu taunimanima, Israela taudia unai, edia hakaua tauna ai ia lao totona,+ bona ia ese Filistia taudia edia imana amo egu taunimanima do ia hamauria. Badina lau ese egu taunimanima edia hisihisi lau itaia bona edia taitai lau kamonai vadaeni.”+
17 Samuela ese Saulo ia itaia neganai, Iehova be ia dekenai ia gwau: “Oi dekenai lau gwauraia tauna be inai, ia ese egu taunimanima do ia lohiaia.”+
18 Bena Saulo be geiti ai Samuela dekenai ia lao bona ia gwau: “Mani lau oi hamaoroa, matahanai itaia tauna ena ruma be edeseni?”
19 Samuela ese Saulo ia haere henia, ia gwau: “Lau be matahanai itaia tauna. Oi raka guna bona tomadiho gabu helagana dekenai ita lao, bona hari dina lau ida do oi aniani.+ Bena daba ai oi do lau siaia lao, bona oi ura diba hereva ibounai be oi dekenai do lau gwauraia.
20 To dina toi gunanai idia boio doniki totona oi laloa momo lasi,+ badina unai doniki idia davaridia vadaeni. Israela taudia ese idia ura henia kohu ibounai be daika ena? Unai be oi bona emu tamana ena ruma bese taudia ibounai totona, ani?”+
21 Unai neganai Saulo ia haere, ia gwau: “Lau be Beniamina tauna bona Israela ena iduhu ibounai amo lauegu iduhu be maragi herea,+ bona Beniamina iduhuna ena famili ibounai amo, egu famili be ladana lasi taudia, ani? Dahaka dainai lau dekenai unai bamona oi hereva?”
22 Bena Samuela ese Saulo bona ena hesiai tauna be aniani daiutuna dekenai ia hakaudia lao, bona ia boiria taudia huanai idia dekenai gabu namo hereana ia henia, unuseniai taunimanima 30 bamona idia noho.
23 Bena Samuela be nanadu tauna dekenai ia gwau: “Oi dekenai lau henia vadaeni vamu ena kahana oi mailaia, guna oi lau hamaoroa do oi atoa siri kahana unai.”
24 Unai neganai nanadu tauna ese unai vamu ena aena ia abia isi bona Saulo ena vairanai ia atoa. Bena Samuela ia gwau: “Idia atoa siri gauna be oiemu vairanai idia atoa. Oi ania, badina inai vamu be oi totona idia atoa siri, inai nega totona. Badina idia lau hamaoroa vadaeni, ‘Lau be haida lau boiridia.’” Vadaeni Saulo be unai dina ai Samuela ida ia aniani.
25 Bena idia be tomadiho gabu helagana amo idia diho+ bona siti lalonai idia vareai, bona Samuela be Saulo ida ruma ena ataiai dekenai idia lao bona unuseniai idia herevahereva noho.
26 Idia be daba momokani idia toreisi, bona gabu ia diari ia lao neganai, Samuela be Saulo ia boiboi henia ataiai daiutuna dekenai, ia gwau: “Oi hegaegae, unai amo oi do lau siaia lao.” Vadaeni Saulo ia hegaegae bena ia bona Samuela be murimuri dekenai idia lao.
27 Bena siti idia rakatania bona ororo maragina amo idia diho noho lalonai, Samuela be Saulo dekenai ia gwau: “Emu hesiai tauna oi hamaoroa+ do ia raka guna,” vadaeni hesiai tauna ia lao, bena Samuela ma ia gwau: “To oi gini, unai amo oi dekenai Dirava ena hereva lau gwauraia diba.”
