Revareva ta Filipi Taudia Dekenai 3:1-21
3 Vadaeni, egu tadikaka e, Lohiabada dainai do umui moale noho.+ Umui dekenai inai hereva tamona lau torea lou be metau lasi lau dekenai, bona unai be emui namo totona.
2 Namona be sisia* dainai do umui naria namonamo, haida idia haberoa taudia dainai do umui naria namonamo, bona kopina idia utua taudia dainai do umui naria namonamo.+
3 Badina ita be kopina utua kara korikorina ita badinaia taudia,+ bona Dirava ena lauma amo hesiai gaukara helagana ita karaia noho, Keriso Iesu dainai ita heagi+ bona taunimanima ese idia laloa bada gaudia dekenai iseda abidadama ita atoa lasi.
4 Bema lau be taunimanima ese idia laloa bada gaudia dainai lau heagi, gau momo dainai lau heagi diba.
Oibe, egu heagi karana ese ma haida edia ia hereaia:
5 Dina namba 8 ai egu kopina idia utua.+ Lau be Israela bese tauna, Beniamina iduhu amo, lau be Heberu tauna bona egu tama sina be Heberu taudia,+ taravatu badinaia karana dekenai lau be Farisea tauna.+
6 Mai ura bada ida kongrigeisen lau dagedage henia,+ bona taravatu ena hereva ibounai lau badinaia goevagoeva.
7 To guna lau laloa bada gaudia be Keriso dainai mai moale* ida lau rakatanidia momokani.+
8 Ma danu, lau laloa egu Lohiabada Keriso Iesu ena diba hereadaena dainai, gau ibounai be anina lasi. Oibe, ia dainai lau ese gau ibounai lau rakatania bona lau laloa idia be momoru sibona, unai amo Keriso ena lalonamo lau abia* diba
9 bona lau hahedinaraia lau be ia ida lau hakapua. Egu kara maoromaoro be Taravatu* badinaia karana amo lasi, to Keriso abidadama henia karana amo ia vara.+ Oibe, egu abidadama dainai Dirava ese lau ia gwauraia maoromaoro.+
10 Lau ura ia bona iena toreisi lou siahuna lau diba.+ Bona lau ura ia abia hisihisina lau mamia+ bona ena mase dalana hegeregerena lau mase,+
11 bona do lau itaia bema lau hegeregere mase amo toreisi lou ginigunana lau abia totona.+
12 Lau gwau lasi unai ahuna lau abia vadaeni, eiava lau be lau goevadae vadaeni, to lau hekwarahi noho+ unai ahuna lau abia totona, badina lau diba Keriso Iesu ese unai totona lau ia abia hidi.*+
13 Tadikaka e, lau laloa lasi unai ahuna lau abia vadaeni, to lau karaia gauna tamona be inai: Lau rakatania gaudia lau laloaboio+ bona vaira gaudia abia totona lau heau noho.+
14 Oibe, lau gaukara goada noho egu tahua gauna lau abia totona,+ unai be guba lao boiboina ena ahuna,+ Dirava ese Keriso Iesu amo ia henia.
15 Unai dainai namona be ita lo taudia+ ibounai ese unai lalohadai ita abia, bona bema umui be mai emui lalohadai idauna, Dirava ese umui dekenai lalohadai maorona do ia hahedinaraia.
16 To hari ita goada hegeregerena, unai dala tamona ai do ita raka namonamo noho.
17 Tadikaka e, umui ibounai ese egu kara umui tohotohoa be namo,+ bona ai hahedinaraia haheitalai idia badinaia taudia edia kara do umui itaia namonamo.
18 Guna, umui dekenai hanaihanai taunimanima momo lau herevalaia, to hari, mai taitai ida idia lau gwauraia, badina idia be Keriso ena hisihisi auna* ena inai taudia bamona idia noho.
19 Edia dokona be dika do idia davaria, bona tauanina ena ura gaudia be edia dirava, bona idia hemarailaia be namo gaudia idia heagilaia, bona tanobada gaudia sibona idia laloa.+
20 To iseda hanua be guba,+ bona mai ura bada ida unai gabu amo iseda hamauria tauna ita naria noho, Lohiabada Iesu Keriso unai.+
21 Ia ese ena siahu bada do ia gaukaralaia iseda goada lasi tauanina do ia haidaua bona ena tauanina hairaina hegeregerena ai do ia halaoa,+ bona gau ibounai danu be ia henunai do ia atoa.+
Futnout
^ Unai be, edia hahediba herevadia dainai Dirava vairanai idia miro taudia.
^ Eiava reana, “mai ura.”
^ Gr., “Keriso lau abia,” unai be, Keriso ia badinaia dainai hahenamo ia abia.
^ Unai be, Mose Ena Taravatu.
^ Gr., “lau ia abia vadaeni.”
