Revareva ta Tito Dekenai 3:1-15
3 Tadikaka oi hadibaia noho gavamani bona siahu taudia henunai do idia noho bona do idia kamonai henia,+ bona idia noho hegaegae gaukara namodia ibounai idia karaia totona,
2 ta do idia gwauraia dika lasi, idia hepapahuahu momo lasi, to idia laloa maoromaoro,+ bona taunimanima ibounai dekenai manau karana do idia hahedinaraia.+
3 Badina ita danu be guna ita kavakava, Dirava ita kamonai henia lasi, taunimanima ese ita idia koia, ura idauidau bona moale karadia ese ita idia biagua, ita kara dika bona ita mama, ita be taunimanima dikadia, bona ita inai heheni.
4 To, iseda Hamauria Tauna, Dirava, ese ena hebogahisi+ bona lalokau be taunimanima dekenai ia hahedinaraia neganai,
5 ranu* amo ita ia hamauria+ bona unai ese mauri dekenai ita ia hakaua lao bona lauma helaga amo ita ia hamatamataia.+ Unai be ita kara maoromaoro dainai lasi,+ to ena hebogahisi dainai ia karaia.+
6 Iseda Hamauria Tauna, Iesu Keriso, amo ita latanai lauma helaga ia bubua diho noho.+
7 Unai dainai, iena hebogahisi hereadaena amo ita ia gwauraia maoromaoro murinai,+ mauri hanaihanai helarona ena ahuna abia taudia ai ita lao diba.+
8 Unai be hereva momokanidia, bona lau ura oi ese unai gaudia do oi hadibaia noho, unai amo Dirava idia abidadama henia taudia ese kara namodia do idia laloa bada. Unai gaudia be namo bona taunimanima idia durua.
9 To hepapahuahu kavakavadia bona sene taudia edia ladana hepapahuahulaia karana, bona Taravatu* totona heai karana oi dadaraia, badina unai gaudia be anina lasi bona namo ta idia havaraia lasi.+
10 To hahediba hereva idauna ia hadibaia tauna+ dekenai sisiba* ginigunana bona iharuana oi henia murinai,+ bema ia kamonai lasi, ia oi dadaraia,+
11 badina oi diba unai bamona tauna ese dala maorona ia rakatania vadaeni, ia kara dika noho, bona sibona ena kara ese ia hahemaoro henia.
12 Aretema eiava Tukiko+ be oi dekenai lau siaia neganai, namona be oi hekwarahi Nikapoli dekenai lau oi vadivadi henia totona, badina egu lalona lau hadaia vadaeni keru negana ai unuseniai do lau noho.
13 Taravatu diba momo tauna, Sena, bona Apolo edia laolao totona gau haida do oi hegaegaelaia, unai amo gau ta dekenai do idia dabu lasi.+
14 To iseda taunimanima ese kara namodia karaia noho dalana do idia dibaia danu be namo, unai amo edia dabu gaudia idia abia diba,+ bona huahua momo do idia havaraia.+
15 Lau ida idia noho taudia ibounai ese oi dekenai edia hanamoa hereva idia siaia. Egu hanamoa hereva be ai idia lalokau henia abidadama taudia dekenai oi henia.
Mani hebogahisi hereadaena be umui ibounai dekenai ia noho.
