Guna, ta ese oi dekenai hunia herevana ta ia gwauraia, a?— * Baibel ese hunia herevana ta ia gwauraia, ena ladana be “hunia hereva helagana.” Ia be helaga badina Dirava amo ia mai. Bona ia be hunia herevana badina ta ia diba lasi. Aneru danu idia ura unai hunia herevana idia diba. Oi ura unai hunia herevana oi diba, a?—

Idaunegai, Dirava ese tau bona hahine ginigunana ia havaraia. Edia ladadia be Adamu bona Heva. Dirava ese uma mai hairaina ta ladana Eden lalonai ia atodia. Bema Dirava idia kamonai henia, idia bona edia natudia ese tanobada be paradaiso ai do idia halaoa, Eden umana bamona. Bona Paradaiso ai do idia noho ela bona hanaihanai. To, oi laloatao Adamu bona Heva be dahaka idia karaia?—

Adamu bona Heva ese Dirava idia gwau-edeede henia dainai, hari paradaiso ai ita noho lasi. To, Dirava ia gwau ia ese tanobada ibounai be gabu hairaina ai do ia halaoa, bona taunimanima ibounai do idia mauri hanaihanai bona moale. Edena bamona unai do ia karaia? Nega daudau lalonai taunimanima be unai idia diba lasi. Ia be hunia gauna.

Iesu be tanobada ia mai neganai, taunimanima dekenai unai hunia herevana ia hadibaia. Ia gwau unai hunia herevana be Dirava ena Basileia. Iesu ese taunimanima ia hamaoroa Basileia ia mai totona do idia guriguri. Unai Basileia ese tanobada be paradaiso ai do ia halaoa.

Unai hunia herevana oi diba dainai oi moale, a?— Laloatao, Iehova idia kamonai henia taudia sibona be Paradaiso ai do idia noho. Baibel ese Iehova idia kamonai henia tatau bona hahine momo edia sivarai ia herevalaia. Oi ura edia sivarai oi diba, a?— Mani ita itaia idia haida be daidia bona edena dala ai idia do ita tohotohoa.