Rebeka be Iehova ia lalokau henia hahinena. Iena adavana be Isako. Ia danu be Iehova ia lalokau henia. Edena dala ai Rebeka ese Isako ia davaria? Edena dala ai Rebeka ia hahedinaraia ia ura Iehova ia hamoalea? Mani ena sivarai ita herevalaia.

Isako ena tama sina be Aberahamo bona Sara. Idia be Kanana ai idia noho, unai gabu taudia be Iehova idia tomadiho henia lasi. To, Aberahamo ia ura ena natuna be Iehova ia tomadiho henia kekenina ta do ia adavaia. Unai dainai ena hesiai tauna, reana Eliesere, ia siaia gabu ta ladana Harana ai Isako ena adavana do ia tahua. Aberahamo ena varavara haida be unuseniai idia noho.

Eliesere be hesiai taudia ma haida ese idia bamoa. Idia ese aniani bona harihari gaudia be kamelo 10 latanai idia atoa bona gabu daudau idia lao. Eliesere be edena dala ai Isako do ia adavaia kekenina ia abia hidi? Eliesere bona hesiai taudia be Harana ai idia ginidae neganai, ranu guri ta dekenai idia lao, badina Eliesere ia diba kahirakahira taunimanima be ranu abia totona unuseni do idia lao. Iehova dekenai ia guriguri ia gwau: ‘Bema lau ese kekeni ta lau noia lau dekenai ranu ia henia, bona ia ese lau bona egu kamelo dekenai ranu ia henia,  do lau diba ia be oi ese oi abia hidi kekenina.’

Bena kekeni matamata ladana Rebeka be ranu guri dekenai ia lao. Baibel ia gwau ia be hairai dikadika. Eliesere ese ia noia ranu ia henia totona neganai, Rebeka ia gwau: ‘Oibe. Oi dekenai ranu do lau henia bona do lau lao emu kamelo totona ranu haida do lau henia.’ Mani oi laloa! Kamelo be ranu idia inua momo dainai, Rebeka be ranu abia totona ranu guri dekenai ia lao loulou. Laulau ai oi itaia bamona, Rebeka be ia gaukara goada noho, ani?— Eliesere be Iehova ese ena guriguri ia haerelaia dalana dekenai ia hoa bada.

Eliesere ese Rebeka dekenai harihari gaudia namodia momo ia henia. Rebeka ese Eliesere bona hesiai taudia ma haida be tamana ena ruma dekenai ia hakaudia lao. Bena Eliesere be Aberahamo ese Harana dekenai ia siaia ena badina, bona Iehova ese iena guriguri ia haerelaia dalana ia herevalaia. Rebeka ena famili idia ura Rebeka ese Isako do ia adavaia.

To oi laloa Rebeka ia ura Isako do ia adavaia, a?— Rebeka ia diba Eliesere be Iehova ese unuseni ia siaia lao. Unai dainai ena famili ese idia nanadaia, bema ia ura Kanana ia lao bona Isako ia adavaia neganai, ia gwau: ‘Oibe, lau ura lau lao.’ Bena maoromaoro Eliesere ida ia lao. Kanana ai idia ginidae neganai, Isako ia adavaia.

Rebeka be Iehova ena ura ia badinaia dainai, Iehova ese ia hanamoa. Lagani momo murinai, Iesu be iena bese amo ia vara! Bema Rebeka oi tohotohoa bona Iehova oi hamoalea, Ia ese oi do ia hanamoa danu.