Lau be Santo Domingo, Dominican Republic ai lau vara, natudia 4 amo lau be ginigabena. Egu tama sina be diba bada taudia bona idia ura edia natudia be kara namo taudia bona kara momokani taudia huanai do idia tubu. Lau do vara lasi bona lagani 4 gunanai, egu tama sina be Mormon misinari taudia ida idia hedavari. Tama sina be unai matamata taudia edia hegoeva toana bona kara namo dainai edia lalona idia hadaia, unai motumotu ai idia be taunimanima ginigunana Mormon taudia ai idia lao totona.

Lau tubu daekau neganai, dubu ena moale karadia lalonai lau vareai bona Mormon dubu ese famili bona kara namo laloa bada karana lau matauraia. Lau be Mormon tauna dainai lau moale bona lau ura misinari gaukara do lau karaia.

Egu mauri lagani be 18 neganai, egu edukeisen habadaia totona egu famili be United States dekenai idia lao. Lagani ta murinai, Florida ai egu anti bona vavana be ai idia vadivadi henia, idia be Iehova ena Witnes taudia. Ai idia invait Baibel hebouhebou ta dekenai ai lao totona. Lau hoa badina lau badinai idia noho taudia ibounai be Baibel siri idia itaia bona nouti idia abia. Unai dainai peni bona pepa totona lau noinoi bona idia hegeregerena lau karaia matamaia.

Hebouhebou murinai anti bona vavana be lau idia hamaoroa, lau be misinari gaukara lau ura henia dainai idia ese lau do idia durua Baibel amo gau haida lau dibaia totona. Lau laloa unai be namo herea badina unai nega ai lau be Mormon ena Buka lau dibaia namonamo to Baibel be lasi.

Fon amo egu anti bona vavana ida Baibel stadi ai karaia neganai, nega momo lau idia hagoadaia lau abia dae gaudia be Baibel ena hereva ida lau hahegeregerea totona. Idia ura lau sibona ese hereva momokani do lau hamomokania.

Mormon ena hahediba hereva momo lau abia dae, to lau diba lasi edena dala ai unai hahediba hereva be Baibel ida idia hegeregere. Egu anti be Iehova ena Witnes taudia ese idia karaia magasin, November 8, 1995, ena Awake!, be lau dekenai ia siaia mai, unai magasin ese Mormon ena hahediba herevadia ia herevalaia. Lau hoa badina Mormon ena hahediba hereva momo lau diba lasi. Unai dainai Mormon ena websait dekenai lau ura hamomokania bema Awake! ena hereva be momokani. Bona Utah ai Mormon ena miusiam lau vadivadi neganai unai gaudia lau hamomokania.

Nega momo lau laloa Mormon ena Buka bona Baibel edia hereva be hegeregere. To Baibel lau duahia namonamo neganai, lau itaia Mormon ena hahediba hereva bona Baibel ena hereva be idia hegeregere lasi.

Mormon ena hahediba hereva sibona lasi, to Mormon taudia ese bese abia isi karana idia hadibaia dainai lau daradara. Hegeregere, Mormon taudia idia gwau Eden Umana be Jackson County, Missouri, U.S.A. dekenai ia noho. Bona dubu ena gunalaia taudia idia gwau dina ta Dirava ese United States ena gavamani amo tanobada ibounai do ia lohiaia.

Lau laloa edena dala ai tano ma haida bona lau vara tanona dekenai unai do ia vara. Hanuaboi ta ai misinari ai do ia lao mero matamata ta ese lau ia rini henia neganai, ia ida unai topik ai herevalaia. Ia lau nanadaia do ia ura Mormon tadikaka ia tuari henia bema iena tano bona edia tano taudia idia tuari. Bena lau hoa badina ia gwau, oibe! Lau abia dae gaudia lau tahua namonamo bona Mormon dubu ena gunalaia taudia lau nanadaia. Lau idia hadibaia egu henanadai ena haere be ta ia diba lasi, to gabeai diari ia bada neganai, haere do oi abia.

Edia haere dekenai lau moale lasi dainai, sibona lau tahua bona Mormon misinari ai do lau lao ena badina lau laloa namonamo. Lau laloparara misinari ai lau ura lao ena badina ta be lau ura taunimanima lau durua. Bona badina ma ta be taunimanima be lau do idia matauraia. To lau be Dirava lau diba namonamo lasi. Ena be guna lau be nega momo Baibel lau duahia, to unai lau laloa bada lasi. Dirava ena ura tanobada bona taunimanima totona be lau diba lasi.

Iehova ena Witnes taudia ida Baibel lau stadilaia negana amo, Dirava ena ladana, mase taudia dekenai dahaka ia vara, bona Dirava ena ura hagugurua totona Iesu ena gaukara be dahaka lau dibaia. Hari lau be inai buka namona lau dibaia noho, bona lau moale lau dibaia hereva momokani be ma haida ida lau herevalaia. Guna lau diba Dirava ia noho, to hari guriguri amo ia lau hereva henia diba, egu turana korikori bamona. July 12, 2004 ai lau bapatiso, bona hua 6 murinai Keristani hesiai gaukara lalonai ful-taim hesiai gaukara lau matamaia.

Lagani 5 lalonai, Iehova ena Witnes taudia edia hedikwota, Brooklyn, New York ai lau gaukara. Lau moale bada Baibel bona Baibel pablikeisen karaia gabuna ai lau gaukara totona, unai amo taunimanima milioni momo tanobada ibounai lalonai be unai pablikeisen idia abia diba, bona ma haida lau durua Dirava idia dibaia totona.