1, 2. Paulo be edena bamona laolaona do ia karaia? Bona dahaka gaudia haida ia lalohadailaia?

 PAULO be Festo ese ia gwauraia hereva ia laloa loulou, badina ena vaira nega ai do idia vara gaudia dekenai unai be mai anina bada. Gavana Festo be ia dekenai ia gwau, “Kaisara dekenai do oi lao.” Paulo be lagani rua dibura rumana ai ia noho, unai dainai Roma dekenai laolao daudauna ia karaia neganai, gabu ma haida do ia itaia. (Kara 25:12) Paulo be guna bouti ai ia loaloa negadia ia laloa neganai, idia be nega namodia lasi. Paulo be inai laolao ia karaia ena badina be Kaisara vairanai do ia gini, bona ia dekenai do ia henia henanadai haida ia lalohadailaia.

² Paulo be nega momo “davara dekenai kahirakahira [ia] mase,” nega toi bouti ia dika, bona hanuaboi bona dina ta gadobada dekenai ia hure kava. (2 Kor. 11:25, 26) Danu, inai laolao be guna ia karaia misinari laolaodia amo ia idau, unai negadiai ia be dibura ruma ai ia noho lasi. To hari, ia be dibura tauna ta bamona unai laolao do ia karaia bona Kaisarea amo Roma dekenai kilomita 3,000 bamona do ia lao, unai be daudau herea. Unai laolao lalonai, herevana dika do ia davaria o lasi, to Roma ai ia ginidae neganai, hahemaoro aukana do ia abia, a? Laloatao, unai negai ia lohia siahu bada gavamanina ese Paulo do ia hahemaoro henia.

3. Paulo ena lalona ia hadaia dahaka do ia karaia, bona inai karoa ai dahaka do ita herevalaia?

³ Paulo ena sivarai oi duahia murinai, oi laloa ia dekenai do ia vara gauna dainai, do ia laloa heduru dalana be lasi bona ia lalometau, a? Lasi vaitani! Ia diba metau idauidau do ia davaria, to ia diba lasi edena bamona metau do ia davaria. Unai gaudia dainai Paulo ese ena hesiai gaukara ena moale do ia haboioa be namo, a? (Mat. 6:27, 34) Paulo ia diba Iehova ena ura ia totona be, dala idauidau ai Dirava ena Basileia sivarai namona do ia harorolaia, lohia taudia dekenai danu. (Kara 9:15) Herevana Paulo be metau idauidau do ia davaria, to ena lalona ia hadaia sivarai namona do ia harorolaia guguru. Ita danu ese eda lalona ita hadaia unai bamona ita karaia totona, a? Namona be Paulo ena laolao bona ena haheitalai amo namo ita davaria dalana mani ita itaia.

4. Paulo be edena bamona bouti dekenai ia guia, bona daidia ese ia idia bamoa?

⁴ Paulo bona dibura taudia ma haida be Roma ena ofesa, Iulio, ena henari henunai idia noho, bona ia ese dala ia karaia Kaisarea ai kago udaia boutina dekenai idia guia totona. Unai bouti be Adaramuteno—ia be Asia Minor ena west kahanai ia noho bouti atoa gabuna—amo ia mai, bona ena kahanai Mitulene hanuana ia noho, ia be Lesbos motumotuna ai. Inai bouti be not kahanai do ia lao, unai murinai west kahanai do ia lao, bona gabu ta ta ai do ia stopu bena kago do idia kokia bona matamatadia do idia udaia. Unai bouti be taunimanima guia totona idia karaia lasi. (Inai maua, “ Davara ai Bouti Edia Loaloa Dalana” itaia.) Unai dibura taudia huanai Paulo be tadikaka rua—Arisitako bona Luka—ese idia bamoa. To unai sivarai be Luka ese ia torea. Ita diba lasi bema unai tadikaka rua be sibona edia laolao davana idia karaia eiava idia be Paulo ena hesiai taudia bamona idia lao.​—Kara 27:1, 2.

5. Sidono ai, Paulo be dahaka hebamo namona ia moalelaia, bona unai amo dahaka ita dibaia?

⁵ Dina ta lalonai, bouti amo kilomita 110 bamona davara amo idia laolao murinai, bouti be Suria ena kone kahanai ia noho hanuana, Sidono, dekenai ia stopu. Toana be Iulio ese Paulo be dibura taudia ma haida bamona ia kara henia lasi, badina reana ia diba Paulo be Roma tauna bona ia dekenai kerere ta idia do davaria lasi. (Kara 22:27, 28; 26:31, 32) Iulio ese Paulo dekenai maoro ia henia, tadikaka taihu ia itaia totona. Paulo be lagani momo dibura ruma ai ia noho neganai, unai tadikaka taihu ese ia idia naria, unai dainai ia idia itaia neganai idia moale bada! Momokani, emu tadikaka taihu dekenai mai lalokau ida heabidae karana oi hahedinaraia amo, goada oi abia diba. Unai bamona do oi karaia negadia haida oi laloa diba, a?​—Kara 27:3.

6-8. Paulo ena laolao Sidono amo ela bona Kenido be edena bamona? Bona unai ese edena bamona dala ia kehoa sivarai namona ia harorolaia totona?

⁶ Bouti be Sidono ia rakatania bona kone kahana amo ia lao bona Kilikia ia hanaia, unai hanua be Paulo ia tubu daekau taoni, Taso, kahirakahira ia noho. Luka ese bouti  be gabu ma haida dekenai ia stopu negadia ia gwauraia lasi, to ia gwau “lai be emai vaira kahana amo ia toa.” (Kara 27:4, 5) Ena be Paulo be nega dikadia ia davaria, to nega idauidau ia gaukaralaia sivarai namona ia harorolaia totona. Ia ese dibura taudia ma haida bona bouti ai idia guia taudia, hegeregere bouti ena kru bona tuari taudia, bona bouti vareai gabudia dekenai taunimanima ia haroro henidia. Hari inai negai, ita danu be nega idauidau ita gaukaralaia ita haroro totona, a?

⁷ Gabeai, bouti be Mura dekenai ia ginidae, ia be Asia Minor ena saut kone kahanai ia noho bouti vareai gabuna ta. Unuseniai, Paulo bona ma haida be bouti ma ta dekenai do idia guia, bona Roma dekenai do idia lao. (Kara 27:6) Unai negadiai, Roma taudia ese Aigupito taudia amo witi idia abia, bona Aigupito amo unai witi idia mailaia bouti be Mura ena bouti atoa gabunai ia kamokau. Iulio ese unai bamona bouti ta ia davaria bona tuari taudia bona dibura taudia ia hamaoroa unai bouti dekenai idia guia totona. Inai bouti be reana guna idia guia bouti ena bada ia hereaia. Unai bouti ai witi idia udaia bona taunimanima 276—kru taudia, tuari taudia, dibura taudia, bona Roma dekenai idia lao taudia ma haida—idia guia. Oibe, bouti ma ta ai idia guia neganai, unai ese dala ia kehoa Paulo be momo ia haroro henia, bona unai nega ia gaukaralaia namonamo.

⁸ Gabeai Kenido dekenai idia ginidae, unai be Asia Minor ena sautwest kahanai. Lai ia goada neganai, bouti ta be dina tamona lalonai unai laolao ia karaia diba. To, Luka ia gwau idia be ‘dina haida lalonai, metairametaira mai hekwarahi ida idia heau lao bona Kenido dekenai idia ginidae.’ (Kara 27:7a) Badina unai negai davara ia dika. (Inai maua, “ Meditereinien Ena Lai Toa Daladia” itaia.) Unai bouti be lai goadana bona hurehure bada negana ai ia heau lalonai, mani idia guia taudia oi laloa.

9, 10. Kerete kahirakahira ai, dahaka ia vara?

⁹ Bouti ena kapten ia ura Kenido amo west kahanai do idia lao, to Luka ia gwau, “lai be ia toa goadagoada.” (Kara 27:7b) Unai dainai, bouti be kone ia rakatania neganai, notwest amo ia mai lai dikana ese bouti be saut kahana dekenai mai goada bada ida ia odaia lao. Guna Kupro motumotuna ese lai ia koua dainai, kone kahana amo idia heau bouti ia gimaia, to hari Kerete motumotu ese lai ia koua. Bouti be Salamone ia hanaia bona Kerete ena ist kahana idia lao neganai, gau ibounai ia namo. Dahaka dainai? Badina unai bouti be motumotu ena saut kahanai ia heau, unuseniai lai bada ia toa lasi. Unai dainai, bouti ai idia guia taudia idia moale! To bema unai bouti be davara ai ia noho daudau, keru bada negana do ia ginidae. Unai dainai idia laloa momo.

¹⁰ Luka ia gwau: “Mai hekwarahi ida [Kerete] ena kone kahana ai badinaia ela bona gabu ta ladana Haba Namona dekenai ai ginidae.” Ena be Kerete ena lai bada lasi gabunai idia heau, to bouti haheaua totona be mai ena hekwarahi. Dokonai, bay maragina ta dekenai dogo idia atoa, inai bay idia hanaia murinai, not kahana idia heau henia diba. Unai bay dekenai idia noho ena daudau be edena bamona? Luka ia gwau, “dina haida” unuseni idia noho, to unai be nega namona lasi. September bona October be nega namona lasi davara dekenai idia laolao totona.​—Kara 27:8, 9.

11. Paulo ese bouti ai idia guia taudia dekenai dahaka ia gwau, to dahaka abia hidi idia karaia?

 ¹¹ Paulo be guna Meditereinien ai ia loaloa dainai, bouti ai idia guia taudia haida be Paulo ena heduru idia tahua. Idia ia hamaoroa gabu ta dekenai idia stopu be namo. Badina bema idia lao noho, dika bada do idia davaria bona ‘gau momo do idia haboioa,’ edia mauri danu. To, bouti ena kapten bona biaguna idia ura idia lao noho, badina idia laloa gabu namona ta do idia davaria. Idia ese Iulio bona momo edia lalona idia veria Poinike dekenai idia lao totona, unai be kone kahanai ia noho bouti vareai gabuna ta. Ia be gabu badana bona namona dainai, keru neganai unuseni idia noho diba. Unai dainai saut kahana amo lai namona ia toa neganai, idia laloa unai be nega namona bouti ia heau totona.​—Kara 27:10-13.

12. Kerete idia rakatania murinai, bouti be dahaka dika ia davaria, bona kru taudia be dahaka idia karaia dika idia davaria lasi totona?

¹² Bena dika badana ta ia vara, “lai badana ta” be notist kahana amo ia toa. Nega sisina lalonai, idia be “motumotu maragina ta ladana Kauda” ena lai bada lasi gabunai idia heau, ia be kilomita 65 bamona Haba Namona amo. To, unai bouti be lai ese saut kahanai ia odaia lao bona Africa ena boe (sandbanks) dekenai ia bampa diba. To bouti ena kru taudia idia ura lasi unai do ia vara, unai dainai bouti maragina idia veria daekau, do idia guia totona. Idia hekwarahi unai idia karaia totona, badina ranu ese bouti maragina ia hahonua. Bena idia ese seini bona kwanau amo bouti badana ena huana kahana idia kwatua, unai amo do ia goada noho. Bona bouti ena palai varodia idia ruhaia, bona idia hekwarahi bouti be lai dikana lalonai do ia heau hanaia. Mani unai ia vara nega dika hereana oi laloa! Ena be unai dala idauidau idia gaukaralaia, to unai be hegeregere lasi, badina “lai be mai dagedage bada ida sisima ia botaia.” Dina ihatoina ai, idia ese bouti ena varo be davara dekenai idia negea, reana unai dala amo bouti do idia hametaua lasi.​—Kara 27:14-19.

13. Paulo ia guia boutina ai, lai gubana ia vara neganai, edia noho be edena bamona?

¹³ Unai dika dainai reana bouti ai idia noho taudia idia gari bada. To Paulo bona ena bamodia idia gari lasi. Guna Lohiabada ese Paulo ia hamaoroa Roma dekenai sivarai namona do ia harorolaia, bona gabeai aneru ta ese unai gwauhamata ia hamomokania. (Kara 19:21; 23:11) To wiki rua lalonai, dina bona hanuaboi ai lai gubana ia doko lasi. Medu bada bona ori ese dina bona hisiu edia diari ia koua dainai, kapten be bouti ia lao henia gabuna ia itaia lasi. Unai negai keru be bada, medu ia diho, haida idia gorere, bona idia gari dainai, edena bamona idia aniani diba?

14, 15. (a) Paulo be bouti ai idia noho taudia ia hereva henia neganai, dahaka dainai guna ia gwauraia herevana ia gwauraia lou? (b) Paulo ia gwauraia sivaraina amo dahaka ita dibaia?

¹⁴ Paulo ia gini tore bona guna ia gwauraia herevana ia gwauraia lou, to idia ia gwau henia dalanai ia hereva lasi. Oibe, idia vara gaudia ese idia hamomokania Paulo ena hereva idia kamonai be mai anina bada. Paulo ia gwau: “Hari umui lau hamaoroa emui lalona ia goada be namo, badina umui ta ena mauri do ia boio lasi, to sisima sibona do ia boio.” (Kara 27:21, 22) Unai hereva ese ena kamonai taudia edia lalona ia hagoadaia! Paulo danu ia moale bada, badina Iehova ese ia dekenai unai sivarai namona ia henia, bouti ai idia noho taudia dekenai ia gwauraia totona. Gau badana be ita laloatao, Iehova ese taunimanima ibounai edia mauri ia  laloa bada. Aposetolo Petero ia gwau: “Iehova . . . ia ura lasi tau ta ia mase, to ia ura taunimanima ibounai be do idia helalo-kerehai.” (2 Pet. 3:9) Unai dainai, namona be Iehova amo ia mai sivarai namona be taunimanima ibounai dekenai ita harorolaia! Taunimanima edia mauri be mai anina bada, to do idia haboioa diba.

¹⁵ Paulo be bouti ai idia noho taudia momo dekenai “Dirava ese . . . ia gwauraia gwauhamata” ia harorolaia. (Kara 26:6; Kol. 1:5) To, toana be bouti do ia dika dainai, Paulo ese bouti ai idia noho taudia ia hamaoroa, idia be unai dika amo do idia roho mauri. Ia gwau: “Hanuaboi ai [Dirava] ena aneru ta be lau badinai ia gini, bona ia gwau, ‘Paulo e, oi gari lasi, oi be Kaisara vairanai do oi gini. Bona Dirava ese oi ida sisima ai idia noho taudia ibounai do ia hamauria.’” Paulo ese idia ia hagoadaia: “Unai dainai tatau e, emui lalona ia goada be namo, lau be Dirava lau abidadama henia, bona lau dekenai ia gwauraia hegeregerena do ia vara momokani. To ita be motumotu ta ena kone dekenai do ita hure daekau.”​—Kara 27:23-26.

16, 17. (a) Paulo be edena negai ia guriguri, bona dahaka namo ia vara? (b) Paulo ia gwauraia herevana be edena dala ai ia guguru?

¹⁶ Idia be mai gari ida wiki rua bouti ai idia noho, unai nega lalonai bouti  be kilomita 870 bamona lai ese ia odaia lao, to kru taudia ese hurehure be kone ai ia makohia ena regena idia kamonai neganai, idia laloa do idia namo. Bona bouti ia hure oho lasi totona, ena murina kahanai dogo idia negea diho, unai amo bouti ena vaira kahana be kone dekenai ia kamokau diba. Unai neganai, idia ura bouti idia rakatania, to tuari taudia ese idia koua. Paulo ese ami ofesa bona tuari taudia dekenai ia gwau: “Unai tatau be sisima lalonai idia noho be namo, bema lasi, do umui mauri lasi.” Bouti ia noho namonamo dainai, Paulo ese idia ibounai ia hamaoroa idia aniani hebou, bona ia hadibaia lou do idia mauri. Bena “idia ibounai vairanai Dirava ia tanikiu henia.” (Kara 27:31, 35) Oibe, unai guriguri amo ia ese Luka, Arisitako, bona hari Keristani taudia dekenai haheitalai namona ia hahedinaraia. Haida edia vairanai oi gwauraia guriguridia ese idia ia durua bona hagoadaia, a?

¹⁷ Paulo ena guriguri murinai, “idia ibounai edia lalona ia goada bona idia danu idia aniani matamaia.” (Kara 27:36) Bena idia ese witi baege haida be davara dekenai idia negea, unai amo bouti ia metau lasi bona kone dekenai ia heau lao diba. Daba ia rere neganai, bouti ena kru taudia ese dogo edia varo idia utua, bouti ena murina kahanai idia noho taria gaudia idia ruhaia, bona bouti ena vairana kahanai ia noho palai maragina idia abia isi, unai amo bouti be kone dekenai ia lao diba. To ena vairana kahana be reana miri dekenai ia kamokau, bona ena murina kahana be hurehure badadia ese ia hamakohia matamaia. Tuari taudia haida idia ura dibura taudia idia alaia, unai amo ta do ia heau mauri lasi, to Iulio ese unai ia koua. Ia ese idia ia hamaoroa do idia nahu eiava idia hure lao kone dekenai. Paulo ena hereva be ia momokani, idia ibounai 276 idia mauri. Oibe, “idia ibounai be kone dekenai idia ginidae, dika idia davaria lasi.” To edeseniai idia ginidae?​—Kara 27:44.

18-20. Edena dala ai Melita ai idia noho taudia ese “hebogahisi bada idia hahedinaraia,” bona Dirava ena siahu amo Paulo dekenai dahaka hoa karana ia vara?

¹⁸ Unai dika amo idia roho mauri taudia be Melita motumotuna ai idia ginidae,  ia be Sicily ena saut kahanai. (Maua ladana, “ Melita—Unai Gabu be Edeseniai?” itaia.) Unai motumotu taudia be gado ma ta idia herevalaia, to Paulo bona unai bouti taudia dekenai “hebogahisi bada idia hahedinaraia.” (Kara 28:2) Idia paripari bona heudeheude dainai, unai motumotu taudia ese idia totona lahi idia karaia. Ena be medu bona keru be bada, to lahi amo edia tauanina idia hasiahua. Bona hoa karana ta ia vara danu.

¹⁹ Edia kara namo dainai Paulo ese ia durudia danu. Ia ese lahi au ia gogoa bona lahi dekenai ia atoa. Unai neganai poisini gaigaina ese ia koria bona ena imana dekenai ia tauadae. Bona Melita taudia idia laloa, edia dirava ese Paulo idia panisia. a

²⁰ Unai motumotu taudia idia itaia Paulo be gaigai ese ia koria neganai, idia laloa “iena imana do ia gudu.” Buka ta ia gwau, unai siri ai ia gaukaralaia Grik herevana be “doketa taudia ese idia gaukaralaia herevana ta.” Unai dainai ita hoa lasi, unai bamona hereva be “idia lalokau henia doketa tauna Luka” ese ia gwauraia. (Kara 28:6; Kol. 4:14) Paulo ese unai poisini gaigaina be ena imana amo ia kokia, bona dika ia davaria lasi.

21. (a) Luka ia torea sivaraina lalonai, edena bamona hereva maorodia ia gaukaralaia? (b) Paulo be dahaka hoa karadia ia karaia, bona Melita taudia dekenai dahaka namo ia havaraia?

²¹ Unai motumotu ai, mai ena taga bona tano momo ia biagua tauna ta, Pobelio, ia noho. Ia be reana Melita ai ia noho Roma ena ofesa ta. Luka ia gwau unai tau be ‘motumotu ena dagi bada tauna’ bona unai siri ai ia gaukaralaia dagi ladana be Melita ai idia davaria toretore rua ai idia noho ladana hegeregerena. Ia ese Paulo bona ena bamodia ia abia dae bona ia ida dina toi idia noho. To, Pobelio ena tamana ia gorere. Luka ese unai gorere ia herevalaia namonamo lou. Ia gwau, unai tau be “ia fiva bona ia rara kukuri,” oibe Luka ese unai gorere be medikol dalanai ia herevalaia maoromaoro. Paulo ia guriguri bona ena imana be unai tau latanai ia atoa, bona ia namo. Unai motumotu taudia be unai kara dainai idia hoa bada, bona gorere taudia ma haida idia mailaia Paulo ese ia hanamoa totona, bona Paulo bona ena bamodia durua totona harihari gaudia idia mailaia danu.​—Kara 28:7-10.

22. (a) Profesa ta ese Luka ia torea sivaraina—Roma dekenai idia lao sivaraina unai—be edena bamona ia herevalaia? (b) Karoa gabena ai dahaka do ita herevalaia?

²² Paulo be davara dekenai ia loaloa sivaraina ita tahua murinai, ita itaia unai sivarai be maoromaoro bona momokani. Profesa ta ia gwau: “Baibel bukana ai idia noho sivarai ibounai amo, Luka ia torea sivaraina . . . be idia vara gaudia edia kahana ta ta ibounai ia sivarailaia namo herea. Ia ese unai negai bouti haheaua dalana ia herevalaia namonamo bona Meditereinien ena ist kahanai nega ena toana ia herevalaia dalana danu be maoro momokani,” unai dainai toana be ta ese ia torea nouti amo unai sivarai idia abia. Reana Luka be Paulo ida ia loaloa neganai, idia vara gaudia be sibona ena buka dekenai ia toredia. Bema oibe, vadaeni edia laolao idia hamatamaia lou neganai, gau momo do ia torea danu. Roma dekenai do idia ginidae neganai, Paulo dekenai dahaka do ia vara? Mani ita itaia.