1-3. (a) Dahaka dainai aposetolo Paulo Atena dekenai ia lalohekwarahi bada? (b) Paulo ena haheitalai ita stadilaia karana amo dahaka ita dibaia?

 PAULO ia lalohekwarahi bada. Ia be Grik ena taoni, Atena, ena sikuli badana ia noho gabuna dekenai ia lao, guna unuseniai Socrates, Plato, bona Aristotle idia hahediba. Atena dekenai idia noho taudia be tomadiho idia laloa bada. Unai taoni ena gabu ibounai—dubu helagadia, ariara gabudia, bona dala—dekenai Paulo ese kaivakuku momo ia itaia, unai be Atena taudia ese idia tomadiho henia diravadia. Paulo ese Dirava momokanina, Iehova, ena laloa dalana kaivakuku dekenai ia diba. (Eso. 20:4, 5) Inai abidadama aposetolo tauna be Iehova ena lalohadai ia abia—kaivakuku ia dadaraia!

² Paulo be unai taoni ena maketi gabuna ia raka vareai neganai, ia itaia gaudia dainai ia hoa. Kopina kavakava Hereme diravadia edia kaivakuku momo herea be maketi gabuna ena raka vareai kahanai idia atodia. Maketi gabuna dekenai dubu momo idia haginidia. Inai aposetolo tauna be edena dala ai kaivakuku idia laloa bada taudia do ia haroro henia? Paulo be ena badu do ia biagua bona ena kamonai taudia idia laloa bada gaudia do ia herevalaia, a? Ia ese haida do ia durua Dirava momokani idia tahua bona davaria totona, a?

³ Kara 17:22-31 ai, Paulo ese Atena ena diba bada taudia ia hereva henia sivaraina ia noho, ia be mai aonega bona laloa kehoa dalanai ia hereva namonamo. Paulo ena haheitalai ita stadilaia karana amo, kamonai taudia idia laloa bada gaudia do ita dibaia, unai amo idia ita durua ita herevalaia gaudia idia lalohadailaia.

4, 5. Atena ai Paulo be edeseni ia haroro, bona ena haroro herevana idia kamonai, a?

⁴ Lagani 50 C.E. bamona ai, Paulo ena misinari laolao iharuana ai Atena ia vadivadi henia. a Sila bona Timoteo be Berea amo do idia lao Atena dekenai, bona Paulo be unuseniai idia ia naria noho lalonai, vaia ia karaia bamona, “sinagoga ai Iuda taudia . . . ida ia herevahereva.” Danu, unuseniai idia  noho Iuda lasi taudia haroro henidia totona, “maketi gabunai” ia lao. (Kara 17:17) Unai gabu be Acropolis ena notwest kahanai ia noho, ena bada be hekta 5 bamona. Unuseniai kohu idia hoia bona hoihoilaia sibona lasi, to ia be taoni ena ariara gabuna danu. Buka ta ia gwau unai gabu ai “moni, politikol bona kastom karadia idauidau idia herevalaia.” Atena taudia be unuseni idia haboua bona mai aonega ida gau idauidau idia kikilaia.

⁵ Paulo be maketi gabunai ia haroro neganai, momo idia ura lasi idia kamonai. Ena kamonai taudia huanai, Epikuro bona Stoa taudia idia noho, idia be sikuli idaudia rua dekenai idia lao. b Epikuro taudia idia abia dae mauri be ia vara kava. Unai orea taudia edia lalohadai mauri dekenai be inai bamona: “Dirava gari henia be anina lasi; mase neganai hisihisi be lasi; kara namo karaia; bona dika haheaukalaia.” Stoa taudia ese hereva ena anina idia laloa namonamo, bona idia abia dae lasi Dirava be Taunimanima ta bamona. Unai orea rua—Epikuro bona Stoa—be Keriso ena hahediba taudia ese idia hahedibalaia toreisi lou herevana idia abia dae lasi. Oibe, edia lalohadai be Paulo ese ia harorolaia hereva momokanidia amo ia idau.

6, 7. Grik aonega taudia haida ese Paulo ena haroro herevadia be edena bamona idia laloa? Bona hari taunimanima ese ita be edena bamona idia laloa?

⁶ Grik aonega taudia ese Paulo ena hadibaia herevadia be edena bamona idia laloa? Haida idia gwau ia be “herevahereva momo kavakava tauna” (Grik gado ai be “uhe gogoa” tauna). (Kara 17:18) Diba bada tauna ta ese unai Grik herevana be inai bamona ia gwauraia: “Unai hereva be guna manu maragina totona idia gaukaralaia, ia be ia roho loaloa bona aniani momoru ia tahua, bona gabeai unai hereva be maketi gabunai aniani bona gau ma haida edia momoru ia gogoa tauna totona idia gaukaralaia. To gabeai unai hereva be laulau dalanai idia gaukaralaia ta ena kara herevalaia totona, ia ese ta ta amo hereva idauidau ia kamonai, to ia hakapudia namonamo lasi.” Unai be hegeregere, unai diba taudia idia gwau, Paulo be kavakava, badina haida amo ia kamonai gaudia ia herevalaia kava sibona. To, do ita itaia, Paulo ese edia hereva dainai ia badu lasi.

⁷ Hari inai negai danu unai bamona ia vara. Ita be Iehova ena Witnes taudia bona Baibel ena hadibaia herevadia ita hahedinaraia dainai, nega momo hadikaia herevadia ita kamonai. Hegeregere, diba bada taudia haida ese evolusen herevana idia hahedibalaia bona idia gwau bema ta ese ia abia dae, ia be aonega tauna. To, idia gwau unai idia abia dae lasi taudia be kavakava taudia. Ita ese Baibel amo ita hamomokania Dirava be gau ibounai ia havaraia dainai, unai bamona diba bada taudia idia ura ma haida do idia laloa, ita be “uhe gogoa” taudia bamona. To edia hereva dainai ita badu lasi. Oibe, ita be mai gari lasi ida eda abidadama ita herevalaia, ita gwau tanobada ai mauri ia vara badina aonega Tauna, Iehova Dirava, ese unai ia havaraia.​—Apok. 4:11.

8. (a) Paulo ena haroro herevana idia kamonai taudia haida be dahaka idia laloa? (b) Dahaka dainai Paulo be Areo ororona dekenai idia hakaua lao? (Futnout itaia.)

⁸ Maketi gabunai Paulo ena haroro herevana idia kamonai taudia haida be lalohadai idauna idia abia. Idia gwau, “toana be ia be idau diravadia ia harorolaia  tauna.” (Kara 17:18) Paulo be Atena taudia dekenai dirava matamatadia ma haida ia herevalaia, a? Unai ese dika bada ia havaraia diba, badina lagani handred haida gunanai Socrates be unai bamona ia karaia dainai, ia idia kota henia bona idia hamasea. Paulo be Areo Ororona dekenai idia hakaua lao bona idia nanadaia, idia dekenai ia hahedibalaia herevadia edia anina ia gwauraia hedinarai totona. c Paulo ese Toretore Helagadia idia diba namonamo lasi taudia dekenai, edena bamona ena hereva ia naria namonamo diba?

9-11. (a) Edena dala ai Paulo ese kamonai taudia idia diba gaudia ia herevalaia? (b) Iseda haroro gaukara lalonai, Paulo ena haheitalai be edena bamona ita tohotohoa diba?

⁹ Paulo ese Atena ai kaivakuku tomadiho karadia idauidau ia itaia dainai, ia lalohisihisi bada. Ena be unai kaivakuku tomadiho henia taudia ia gwau henia diba, to ia manau. Mai aonega ida ena kamonai taudia edia lalona ia veria totona, idia diba gaudia ia herevalaia. Ia gwau: “Atena taudia e, lau itaia gau ibounai lalonai  toana be umui ese dirava idauidau umui badinaia goadagoada, ma haida be unai bamona idia karaia lasi.” (Kara 17:22) Unai be hegeregere Paulo ia gwau, ‘Lau itaia, umui be tomadiho umui laloa bada taudia.’ Oibe, Paulo ese idia ia hanamoa badina tomadiho idia laloa bada. Ia laloparara, hahediba hereva koikoi ese idia hakaua kerere taudia haida be reana kudou namo taudia. Badina guna Paulo danu be ‘ia diba lasi bona mai abidadama lasi ida ia kara.’​—1 Tim. 1:13.

¹⁰ Paulo be idia diba gaudia ia herevalaia, badina ia itaia edia hanua ai boubou patana ta idia haginia, ia latanai inai hereva ia noho, “Ita Diba Lasi Diravana Ena.” Buka ta ia gwau, “Vaia, Grik taudia bona ma haida ese edia boubou patadia be ‘idia diba lasi diravadia’ dekenai idia henia, badina idia gari, dika edia tomadiho karana lalonai dirava haida idia reaia bona unai dirava do idia badu.” Unai bamona boubou patadia amo, Atena taudia idia diba Dirava ta ia noho, to Ia idia diba lasi. Paulo ese unai boubou patana ia herevalaia karana amo dala ia kehoa, sivarai namona ia harorolaia totona. Ia gwau: “Umui diba lasi to umui tomadiho henia noho Diravana, ena sivarai be hari umui dekenai do lau harorolaia.” (Kara 17:23) Paulo be mai aonega bona siahu ida ia hereva. Ia ese dirava matamatana eiava idauna ta ia harorolaia lasi, haida idia hereva bamona. To, idia diba lasi Diravana—Dirava momokanina unai—be idia dekenai ia gwauraia hedinarai.

¹¹ Iseda haroro gaukara lalonai, edena bamona Paulo ena haheitalai ita tohotohoa diba? Bema ita be ruma tauna ena noho gabuna ita itaia namonamo, reana do ita diba ia be tomadiho ia laloa bada, hegeregere ia karaia dabua eiava ruma lalonai o badinai be tomadiho gaudia haida idia noho. Reana do ita gwau: ‘Lau itaia, oi be tomadiho oi laloa bada tauna. Lau ura tomadiho ia laloa bada tauna lau hereva henia.’ Unai amo ia diba gaudia amo iseda hereva ita hamatamaia diba. Laloatao, haida be edia tomadiho karadia dekenai abidadama goada idia hahedinaraia, to unai bamona taudia ita hahemaoro henia haraga lasi. Badina iseda tadikaka taihu huanai, idia momo be guna tomadiho koikoi ena hahediba hereva idia badinaia goadagoada.

12. Edena dala ai Paulo ese kamonai taudia edia noho dalana hegeregerena ena hereva ia haidaua?

¹² Paulo ese kamonai taudia idia diba gaudia ia herevalaia vadaeni, to ena haroro lalonai unai do ia herevalaia noho, a? Ia diba ena kamonai taudia be Grik aonegana idia abia bona Toretore Helagadia idia diba lasi, unai dainai edia noho dalana hegeregerena ena hereva daladia ia haidaua. Ginigunana be, ia ese Baibel ena hahediba herevadia ia gwauraia, to maoromaoro siri ia duahidia lasi. Iharuana be, inai hereva “ai” bona “ita” ia gaukaralaia, unai amo ia ura kamonai taudia idia mamia, ia be idia diba gaudia ia diba danu. Ihatoina be, Grik bukadia edia hereva haida ia gaukaralaia, unai amo ia hahedinaraia ia hadibaia gaudia haida be edia buka lalodiai idia noho. Mani Paulo ena hereva mai siahuna ita laloa. Atena taudia idia diba lasi Diravana ia herevalaia totona, dahaka mai anina bada hereva momokanidia ia gwauraia?

13. Paulo ese iunives be edena bamona ia herevalaia, bona ena hereva ena anina be dahaka?

¹³ Dirava ese iunives ia havaraia. Paulo ia gwau: “Tanobada bona ia lalonai idia  noho gaudia ibounai ia karaia Diravana be guba bona tanobada edia Lohiabada, bona ia be taunimanima edia imana amo idia karaia dubu lalodiai ia noho lasi.” d (Kara 17:24) Iunives be ia vara kava lasi. Dirava momokanina be gau ibounai Havaraia Tauna. (Sal. 146:6) Oibe, Atena eiava dirava ma haida edia hairai be dubu helagadia bona boubou patadia dekenai idia hedinarai, to guba bona tanobada edia Atai Momokani Lohiabadana be taunimanima idia karaia dubu lalodiai ia noho lasi. (1 Kin. 8:27) Paulo ia gwauraia herevadia edia anina be inai: Taunimanima idia karaia dubu lalodiai idia noho kaivakukudia be Dirava momokanina ese ia hereaia.​—Isa. 40:18-26.

14. Edena dala ai Paulo ia hahedinaraia, Dirava ese taunimanima amo gau ta ia abia be anina lasi?

¹⁴ Dirava ese taunimanima amo gau ta ia abia be anina lasi. Kaivakuku tomadiho henia taudia ese edia kaivakuku dekenai dabua mai hairaidia idia hahedokilaia, dava bada harihari gaudia idia henia, eiava idia dekenai aniani bona inuinu gaudia idia abia lao—hegeregere kaivakuku ese unai gaudia idia ura henia bamona! To, Paulo ena kamonai taudia huanai Grik aonega taudia haida idia noho, reana idia laloa dirava ta be taunimanima amo gau ta ia abia be anina lasi. Bema unai bamona, anina be Paulo ena hereva dekenai idia lalotamona, ia hahedinaraia “taunimanima ese [Dirava] idia durua be anina lasi, badina ia be gau ta dekenai ia dabu lasi.” Momokani, taunimanima ese Havaraia Tauna dekenai tauanina durua gaudia idia henia be anina lasi! To, Ia ese taunimanima dekenai “mauri, laga bona gau ibounai” hegeregere dina, medu, bona tano namona ia henia. (Kara 17:25; Gen. 2:7) Unai dainai gau ibounai henia Diravana, be taunimanima amo gau ta ia abia be anina lasi.

15. Atena taudia idia laloa idia ese Grik taudia idia hereaia, to Paulo ese edena dala ai idia ia durua? Bona ena haheitalai amo dahaka mai anina bada gauna ita dibaia?

¹⁵ Dirava ese taunimanima ia karaia. Atena taudia idia laloa idia ese Grik lasi  taudia idia hereaia. To tano eiava bese abia isi karana be Baibel ena hereva momokani hegeregerena lasi. (Deu. 10:17) Paulo ia diba unai hereva ese badu ia havaraia diba dainai, mai laloa namonamo ida ia hereva. Paulo be inai hereva, “[Dirava] ese tau tamona amo bese ibounai taudia ia karaia,” ia gwauraia neganai, reana ena kamonai taudia ese unai idia lalohadailaia. (Kara 17:26) Oibe, Paulo ese Genese bukana amo bese ibounai edia tubuna, Adamu, ia herevalaia. (Gen. 1:26-28) Bese ibounai taudia edia tubuna be tamona dainai, bese o tano ta ese ma ta ia hereaia lasi. Paulo ena kamonai taudia ese unai hereva ena anina idia lalopararalaia, ani? Iena haheitalai amo mai anina bada gauna ita dibaia. Ena be ita ura mai aonega bona laloa maoromaoro ida haroro gaukara ita karaia, to namo lasi Baibel ena hereva haida ita hunia bona idia ura kamonai gaudia sibona ita gwauraia.

16. Havaraia Tauna ena ura taunimanima totona be dahaka?

¹⁶ Dirava ia ura taunimanima be Ia kahirakahira idia lao. Paulo ena kamonai taudia huanai, diba bada taudia haida idia noho, bona idia ese taunimanima idia mauri ena badina idia hepapahuahulaia, to unai ena anina idia hahedinaraia namonamo lasi. To Paulo ese Havaraia Tauna ena ura taunimanima totona ia hahedinaraia namonamo, ia gwau: “Dirava do idia tahua, bema ia idia tahua goadagoada, ia do idia davaria diba. To momokani, ia be ita ta ta amo ia daudau lasi.” (Kara 17:27) Atena taudia idia diba lasi Diravana be idia dibaia diba. Oibe, bema idia ura momokani Ia idia davaria bona idia dibaia, Ia be idia amo ia noho daudau lasi. (Sal. 145:18) Paulo ese inai hereva “ita” ia gaukaralaia neganai, ia ese ia sibona be Dirava idia “tahua” taudia ida ia gwauraia hebou.

17, 18. Dahaka dainai taunimanima ese Dirava idia tura henia be namo? Bona Paulo ese ena kamonai taudia ia hereva henia dalana amo dahaka ita dibaia?

¹⁷ Taunimanima ese Dirava kahirakahira idia lao be namo. Paulo ia gwau: “Badina  [Dirava] dainai ita mauri, ita raka loaloa bona ita noho.” Diba bada taudia haida idia gwau, Paulo ese lagani 600 B.C.E. murinai ia noho toretore tauna, Epimenides—“Atena tomadihona lalonai, ladana bada tauna”—ena hereva ia gwauraia lou. Paulo ese taunimanima be Dirava kahirakahira idia lao ena badina ma ta ia gwauraia: “Emui toretore taudia haida idia hereva bamona, idia gwau, ‘Ita danu be iena natudia.’” (Kara 17:28) Taunimanima be Dirava ena turadia ai idia lao be namo, badina Ia be tau ginigunana ia havaraia, bona unai tau ginigunana amo taunimanima ibounai idia vara. Paulo be ena kamonai taudia edia lalona veria totona, mai aonega ida Grik toretoredia ia gaukaralaia, badina idia momo ese unai toretore idia matauraia. e Paulo ena haheitalai hegeregerena, reana nega haida histori sivaraidia, ensaiklopidia bona momo ese idia abia dae bukadia edia hereva haida ita gwauraia diba. Hegeregere, Witnes lasi tauna ta dekenai tomadiho koikoi karadia ta ia vara dalana hahedinaraia totona, taunimanima ese idia matauraia bukana ta ena hereva be ia dekenai ita hahedinaraia diba.

¹⁸ Paulo ena herevahereva lalonai, Dirava ena sivarai momokanidia ia hahedinaraia, mai aonega ida kamonai taudia edia noho dalana hegeregerena ena haroro herevana ia haidaua. Paulo ese ia gwauraia mai anina bada herevadia dainai, ia ura ena hereva idia kamonai Atena taudia be dahaka idia karaia? Idia ia hamaoroa kara haida idia karaia be namo.

19, 20. (a) Edena dala ai Paulo be mai aonega ida, kaivakuku tomadiho henia karana ena dika ia gwauraia hedinarai? (b) Paulo ena kamonai taudia ese dahaka idia karaia be namo?

¹⁹ Paulo ia noho hegaegae ena kamonai taudia ia durua, kara ta idia karaia totona. Grik toretoredia lalonai idia noho herevadia ia gwauraia lou, ia gwau: “Unai hegeregerena, ita be Dirava ena natudia dainai, namo lasi ita laloa Dirava be golo, siliva eiava nadi bamona, eiava taunimanima edia lalohadai hegeregerena edia imana amo idia koroa gauna bamona.” (Kara 17:29) Oibe, bema Dirava ese taunimanima ia karaia, vadaeni taunimanima ese idia karaia kaivakuku be edena dala ai Dirava ai idia lao diba? Paulo be mai aonega ida ia hereva karana amo, kaivakuku tomadiho henia karana ena dika ia hahedinaraia. (Sal. 115:4-8; Isa. 44:9-20) Paulo ese inai hereva, “namo lasi ita laloa” ia gaukaralaia dainai, ena haroro herevana idia kamonai taudia idia mamia unai sisiba herevana be idia sibona totona lasi.

²⁰ Aposetolo Paulo ia hahedinaraia, kara ta idia karaia be namo. Ia gwau: “Gunaguna taunimanima be unai idia diba lasi bona Dirava ese unai ia laloa lasi. [idia laloa Dirava ese kaivakuku tomadiho henia karana ia abia dae]; to hari ia ese taunimanima ibounai ia hadibaia noho idia helalo-kerehai be namo.” (Kara 17:30) Reana Paulo ena hereva idia kamonai taudia haida idia hoa, badina Paulo ena hereva amo ia hahedinaraia, idia helalo-kerehai be namo. To iena hereva mai siahuna ese ia hahedinaraia, Dirava dainai idia mauri, unai dainai Ia dekenai edia kara ena anina idia gwauraia hedinarai. Namona be Dirava idia tahua, Ia idia dibaia, bona  edia mauri ibounai lalonai unai hereva momokani idia badinaia. Atena taudia ese unai idia karaia totona, gau badana be idia laloparara kaivakuku tomadiho henia karana be dika, bona unai idia dadaraia be namo.

21, 22. Paulo ena hereva dokonai, dahaka hereva mai siahuna ia gwauraia, bona unai hereva ena anina ita dekenai be dahaka?

²¹ Paulo be ena hereva dokonai, hereva mai siahuna ia gwauraia: “[Dirava] ese dina ta ia makaia vadaeni, ia abia hidi vadaeni tauna ese mai kara maoromaoro ida tanobada ibounai do ia hahemaoro henia. Bona Dirava ese mase amo unai tauna ia hatorea isi lou karana amo, taunimanima dekenai ia hamomokania, unai be do ia karaia momokani.” (Kara 17:31) Hahemaoro Dinana ia mai noho dainai, ta ese Dirava momokanina ia tahua be gau badana! Paulo ese unai Hahemaoro Tauna ena ladana ia gwauraia lasi. To, ia ese unai tauna be inai bamona ia herevalaia: Ia be taunimanima ta bamona ia noho, ia mase, bona Dirava ese mase amo ia hatorea isi lou!

²² Unai hereva dokona be mai anina bada ita dekenai. Ita diba Dirava ese ia abia hidi Hahemaoro Tauna be mase amo ia toreisi lou tauna, Iesu Keriso. (Ioa. 5:22) Danu ita diba, Hahemaoro Dinana be lagani 1,000 lalonai do ia vara bona ia mai haraga noho. (Apok. 20:4, 6) Ita be Hahemaoro Dinana totona ita gari lasi, badina ita laloparara unai dina ese abidadama taudia dekenai hahenamo momo herea do ia mailaia. Vaira nega ena helaro hereadaena be do ia vara momokani, badina Iesu Keriso be mase amo ia toreisi lou!

23. Paulo ena hereva dekenai, taunimanima edia kara be edena bamona?

²³ Haida ese Paulo ena hereva idia abia dae, to haida ese idia abia dae lasi. Bona ma haida ese toreisi lou herevana idia kamonai neganai, “unai idia kirikirilaia.” Haida idia kamonai, to idia helalo-kerehai lasi, idia gwau: “Nega ma ta ai emu hereva do ai kamonai lou.” (Kara 17:32) To haida idia kamonai, badina Baibel ia gwau: “Tatau haida be ia idia bamoa bona abidadama taudia ai idia lao. Idia huanai ta be Dionusio, ia be Areopagu ena kota diadi tauna ta, bona hahine ta ladana Damari, bona ma haida danu.” (Kara 17:34) Hari iseda haroro gaukara lalonai, unai bamona taudia ita davaria. Haida ese ita idia hevasehalaia, bona ma haida idia kamonai lasi. To bema haida ese Basileia sivaraina idia kamonai bona abidadama taudia ai idia lao, vadaeni ita moale bada.

24. Paulo be Areo ororona ai ia gini neganai, ia henia herevana amo dahaka ita dibaia?

²⁴ Paulo ena hereva ita laloa neganai, hereva gwauraia maoromaoro, hepapahuahu koua herevadia, bona taunimanima edia noho dalana hegeregerena hereva gwauraia dalana ita dibaia. Ma danu, tomadiho koikoi ese ia hakaua kerere taudia ita hereva henidia neganai, ita aonega bona haheauka be gau badana. Ita dibaia mai anina bada gauna ma ta be inai: Namo lasi Baibel ena hereva haida ita hunia bona idia ura kamonai gaudia sibona ita gwauraia. To, aposetolo Paulo ena haheitalai ita tohotohoa amo, haroro gaukara lalonai hadibaia taudia namodia ai ita lao diba. Danu, naria taudia be unai dala amo kongrigeisen lalonai hadibaia taudia namodia ai do idia lao. Bona do ita hegeregere momokani, ma haida ita durua ‘Dirava idia tahua, bona ia do idia davaria diba.’​—Kara 17:27.