“Tanobada ai maino do ia vara bema taunimanima ese ma haida edia kara idia haheaukalaia.”​—UNESCO Declaration of Principles on Tolerance, 1995.

 To, bema haheauka karana be lasi, taunimanima do idia hemataurai lasi bona ta ta do idia inai henia. Unai bamona kara dainai taunimanima be nega momo ma haida inai henia herevadia bona hadikaia herevadia idia gwauraia, bona idia dagedage.

 To taunimanima edia lalohadai unai hereva dekenai be idauidau. Haida idia gwau, ta ena kara idia haheaukalaia taudia ese haida idia karaia karadia idia abia dae diba. To ma haida be Baibel ena hereva hegeregerena idia laloa, ta ena kara idia haheaukalaia taudia be, haida edia maoro idia abia dae gaudia abia hidi karana idia matauraia, ena be unai gaudia dekenai idia lalotamona lasi.

 Inai nega ai Baibel ese taunimanima ia durua diba ma haida edia kara idia haheaukalaia totona, a?

Baibel ese ta ena kara haheaukalaia karana ia herevalaia

 Baibel ia gwau: “Namona be taunimanima ibounai ese emui laloa maoromaoro karana idia itaia.” (Filipi 4:5) Baibel ese ita ia hagoadaia ma haida edia namo do ita laloa, idia ita matauraia bona kara namo henia. Ena be unai sisiba ia badinaia tauna be ma ta ia abia dae gaudia dekenai ia lalotamona lasi, to unai tauna ese ia karaia abia hidi ia matauraia.

 To Baibel ese ia hahedinaraia taunimanima idia karaia gaudia dekenai Dirava be mai ena taravatu. Ia gwau: “Tau e, Iehova ese oi dekenai dahaka be maoro ia hadibaia vadaeni.” (Mika 6:8) Baibel ese Dirava ena hakaua dalana ia hahedinaraia, unai be taunimanima dekenai ia henia, edia mauri idia moalelaia totona.​—Isaia 48:17, 18.

 Dirava ese ita dekenai maoro ia henia lasi taunimanima ita hahemaoro henia totona. Baibel ia gwau bamona: “Taravatu Henia Tauna bona Hahemaoro Tauna be tamona . . . Oi be daika emu dekena tauna oi hahemaoro henia noho?” (Iamesi 4:12) Dirava ese ita ta ta dekenai ura kwalimu ia henia, sibona iseda abia hidi ita karaia totona.​—Deuteronomi 30:19.

Baibel ese hemataurai karana ia herevalaia

 Baibel ia gwau, namona be “taunimanima ibounai ita matauraia.” (1 Petero 2:17, New Jerusalem Bible) Baibel ena taravatu idia ura badinaia taudia ese taunimanima ibounai idia matauraia, ena be idia abia dae gaudia o edia mauri dalana be Baibel ena taravatu hegeregerena lasi. (Luka 6:31) To unai ese ia hahedinaraia lasi Baibel ena hereva idia badinaia taudia be ma haida idia abia dae gaudia o lalohadai ida idia lalotamona, eiava idia karaia abia hidi ibounai do idia abia dae. Do idia kara auka o hemataurai lasi dalanai idia kara henidia lasi, to idia gaukara goada Iesu ese taunimanima ia kara henia dalana do idia tohotohoa.

 Hegeregere nega ta, Iesu be hahine ta ida ia hedavari, unai hahine be Iesu ese ia abia dae lasi tomadiho dalana ia badinaia. Danu unai hahine ida ia noho tauna be iena adavana lasi—Iesu ese unai mauri dalana ia dadaraia. To mai hemataurai ida unai hahine ia hereva henia.​—Ioane 4:9, 17-24.

 Iesu bamona, Keristani taudia be idia noho hegaegae idia abia dae gaudia ena badina be kamonai taudia dekenai idia herevalaia totona, to mai “hemataurai bada” ida unai idia karaia. (1 Petero 3:15) Baibel ese Keristani taudia ia hadibaia, ma haida do idia doria lasi edia lalohadai idia badinaia totona. Baibel ia gwau Keriso murinai ia raka tauna, “ia heai be anina lasi, to gau badana be taunimanima ibounai ia hebogahisi henia,” anina be lalohadai idauidau idia abia dae taudia danu.​—2 Timoteo 2:24.

Baibel ena hereva, ta inai henia karana dekenai

 Baibel ia gwau, “umui gaukara goada taunimanima ibounai ida maino ai umui noho totona.” (Heberu 12:14) Maino ai ia noho tauna be ma ta inai henia karana ia dadaraia. Ia abia dae taravatu ia badinaia noho, bona ia gaukara goada ma haida ida maino ai ia noho totona. (Mataio 5:9) Danu, Baibel ese Keristani taudia ia hagoadaia edia inai taudia idia lalokau henia bona kara namo henia, ena be idia dagedage.​—Mataio 5:44.

 Oibe, Baibel ia gwau, ma haida matauraia lasi karadia o ma haida hahisia karana be Dirava ese ia “inai henia” eiava ia “ura henia lasi momokani.” (Aonega Herevadia 6:16-19) To Baibel ese inai hereva, “inai henia” ia gaukaralaia neganai, ia hahedinaraia kara dikadia ia inai henia momokani. Baibel ia hahedinaraia Dirava ia ura taunimanima edia dika ia gwauatao, bona edia kara idia ura senisia bona iena taravatu idia ura badinaia taudia do ia durudia.​—Isaia 55:7.

Baibel siridia ta ena kara haheaukalaia bona matauraia totona

 Tito 3:2: “Laloa maoromaoro, bona taunimanima ibounai dekenai manau karana do idia hahedinaraia.”

 Mataio 7:12: “Umui ura taunimanima ese umui dekenai do idia karaia gaudia ibounai be idia dekenai do umui karaia danu.”

 Iosua 24:15: “Hari dina umui abia hidi daika do umui hesiai henia.”

 Kara 10:34: “Dirava be taunimanima edia toana ia laloa lasi.”

 Habakuku 1:12, 13: ‘Dirava be kara dika do ia haheaukalaia noho lasi.’

 Roma 12:19: “Dirava sibona ese ia dekenai ena badu do ia hahedinaraia, badina Toretore Helagadia ia gwau: Iehova a ia gwau, ‘Dika ena davana be lauegu, lau ese davana do lau haloua.’”

 Iehova Dirava ese taunimanima dekenai maoro ia henia lasi dika ena davana idia haloua totona. Ia sibona ese ena abia hidi negana ai hahemaoro do ia karaia. Diba ma haida totona, inai atikol “Tanobada ai Kota Maoromaoro Do Ia Vara, A?” oi duahia.