Nega momo disisen ta oi ura karaia neganai, reana do oi laloa, ‘Unai ese edena dala ai lau do ia durua?’ To, bema guriguri karana totona unai bamona henanadai be sibona dekenai ita henia, unai be sibona laloa bada karana, a? Lasi. Badina unai henanadai amo ita ura diba unai kara ese ita dekenai dahaka namo do ia havaraia. Tau namona ta ladana Iobu danu be unai bamona ia henanadai: “Bema ia dekenai lau boiboi, lau do ia haere henia, a?”​—Iobu 9:16; NWT.

Rau 3 ai ita herevalaia gaudia ese idia hahedinaraia guriguri karana be tomadiho karana ta eiava taunimanima edia lalona ia hanamoa karana ta sibona lasi. Dirava be iseda guriguri ia kamonai. Bema dala maorona ai bona gau namodia totona ita guriguri, do ia kamonai. Momokani, ita ia hagoadaia ia kahirakahira ita lao totona. (Iamesi 4:8) Unai dainai, bema iseda mauri lalonai hanaihanai ita guriguri, dahaka namo do ita abia? Mani unai namo haida ita itaia.

Emu mauri lalonai hekwakwanai idia vara neganai, oi laloa momo, a? Unai bamona negadiai, Baibel be ita ia hagoadaia ‘nega ibounai ita guriguri’ bona ‘iseda noinoi herevadia do ita gwauraia hedinarai.’ (1 Tesalonika 5:17; Filipi 4:6) Baibel ese ita ia hadibaia bema Dirava ita guriguri henia, “Dirava ena maino, laloparara ibounai ia hereaia gauna, ese [iseda] kudouna bona lalona do ia gimaia.” (Filipi 4:7) Iseda guba Tamana dekenai iseda lalohekwarahi ibounai ita gwauraia neganai, unai ese eda lalona ai maino do ia havaraia. Danu, Salamo 55:22 ai Dirava ese ita ia hagoadaia, ia gwau: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua.”

 Guriguri karana ese taunimanima momo edia lalona ia hanamoa. South Korea ai, hahine ta Hee Ran ia gwau: “Ena be lau dekenai hekwakwanai badadia idia vara, to lau guriguri neganai, lau mamia unai hekwakwanai be lau amo ia boio bamona bona lau mamia goada lau abia lau haheauka totona.” Philippines ai, hahine ta Cecilia ia gwau: “Lau be sina ta dainai, egu natudia kekeni bona egu sinana totona lau laloa momo, egu sinana be gorere dainai hari ia laloatao lasi lau be daika. To guriguri karana ese lau ia durua unai hekwakwanai lau laloa momo lasi bona egu mauri ai gau idauidau lau karaia diba. Badina lau diba Iehova ese lau do ia durua idia lau naria totona.”

Oi be hekwakwanai o dika badadia haida oi davaria dainai oi lalohekwarahi, a? Heduru bada ita abia diba,  bema “lalogoada ibounai ia henia Diravana” dekenai ita guriguri. Baibel ia gwau “hisihisi ibounai lalonai ia ese ita dekenai lalogoada ia henia noho.” (2 Korinto 1:3, 4) Hegeregere, nega ta Iesu ia lalometau neganai, “ia tui diho bona ia guriguri matamaia.” Dahaka ia vara? “Guba amo aneru ta be ia dekenai ia hedinarai bona ia hagoadaia.” (Luka 22:41, 43) Abidadama tauna ta Nehemia be taunimanima dikadia ese idia dagedage henia bona idia koua Dirava ena gaukara ia karaia lasi totona neganai, ia guriguri: “Dirava e, egu imana oi ha-aukaia.” Gabeai idia vara gaudia ese idia hahedinaraia Dirava ese ia durua dainai, mai gari lasi ida ena gaukara ia karaia guguru. (Nehemia 6:9-16, BHḡ) Ghana ai, tau ta ladana Reginald be ena guriguri karana ia herevalaia neganai, ia gwau: “Lau lalohekwarahi negadia ai lau guriguri neganai, lau mamia lau ia durua diba tauna dekenai egu hekwakwanai lau herevalaia, bona lau ia hadibaia do lau lalohekwarahi lasi.” Oibe, bema Dirava dekenai ita guriguri, ita do ia hagoadaia.

Nega haida ita bona iseda lalokau taudia totona disisen badadia haida ita karaia be namo. Unai bamona negadia ai, edena dala ai disisen maorodia ita karaia diba? Baibel ia gwau: “Bema umui ta ena aonega be hegeregere lasi, namona be Dirava dekenai ia noinoi noho, bona Dirava ese ia dekenai do ia henia, badina ia be mai hariharibada ida taunimanima ibounai dekenai ia henia, bona ia gwau henidia lasi.” (Iamesi 1:5) Bema aonega totona ita guriguri, Dirava ese ena lauma helaga ia henia diba disisen maorodia ita karaia totona. Momokani, lauma helaga totona ita noinoi diba, badina Iesu be ita ia hadibaia iseda “Tamana, guba ai ese lauma helaga be idia noinoi taudia dekenai do ia henia.”​—Luka 11:13.

Iesu danu be mai anina bada disisen ia karaia totona, ena guba Tamana ena heduru ia noia. Baibel ese ita ia hadibaia Iesu be aposetolo taudia 12 ia ura abia hidi neganai, “hanuaboi ibounai lalonai Dirava ia guriguri henia.”​—Luka 6:12.

Iesu bamona, hari momo idia diba bema Dirava dekenai heduru totona idia noinoi, idia do ia durua disisen maorodia idia karaia totona. Philippines ai ia noho hahine Regina be hekwakwanai haida ia davaria, hegeregere ena tau ia mase murinai ia sibona ese ena ruma bese ia naria, ena moni gaukara ia haboioa, bona natudia naria totona ia hekwarahi. Disisen maorodia ia karaia totona, dahaka ese ia durua? Ia gwau: “Guriguri amo Iehova ena heduru lau tahua.” Ghana ai tau ta ladana Kwabena be Dirava ena heduru ia noia ena badina ia herevalaia, ia gwau, “Konstraksen gaukara ta dekenai pei namona gaukara ta lau haboioa.” Moni gaukara ma haida ia ura tahua neganai, ia gwau: “Hanaihanai Iehova dekenai lau guriguri lau ia durua disisen maorona lau karaia totona.” Ma ia gwau: “Lau diba momokani Iehova ese lau do ia durua moni gaukara namona ta lau abia, unai amo nega ia noho Dirava lau hesiai henia bona mauri durua gaudia lau abia.” Dirava ia ura henia gaudia totona oi guriguri neganai, ia ese oi do ia durua danu emu hetura karana ia ida oi hanamoa totona.

Guriguri karana ese ita ia durua diba daladia haida ita herevalaia vadaeni. (Heduru hereva ma haida be maua ladana “Guriguri Karana Ena Namo” ai oi itaia.) To guriguri karana amo heduru oi abia totona, namona be Dirava bona ena ura oi dibaia guna. Bema oi ura unai bamona oi karaia, oi ai hagoadaia Iehova ena Witnes tauna ta oi noia Baibel oi stadilaia totona. * Unai ese oi do ia durua ‘guriguri ia kamonai’ Diravana kahirakahira oi lao.​—⁠Salamo 65:2.