Maoro Bona Kerere: Ita Idia Durua Diba Hakaua Herevadia
Taunimanima milioni momo idia davaria, Baibel ese mauri lalonai idia vara gaudia foa dekenai idia ia durua diba.
1. Headava
Taunimanima be headava bona headava lalonai idia moale totona idia karaia gaudia dekenai edia lalohadai be idauidau.
BAIBEL IA GWAU: “Namona be umui ibounai ese emui hahine do umui lalokau henia, sibona umui lalokau henia hegeregerena. Hahine danu ese iena tau do ia matauraia bada be namo.”—Efeso 5:33.
ANINA: Dirava ese headava ia hamatamaia, unai dainai ia diba headava taudia be dahaka idia karaia be namo idia moale totona. (Mareko 10:6-9) Headava taudia be ta ta ena namo idia laloa neganai, idia ruaosi idia moale diba. Tau ese mai hebogahisi ida ena adavana ia kara henia amo ia hahedinaraia ena adavana ia lalokau henia. Headava hahine be ena hereva bona kara amo ia hahedinaraia ena tau ia matauraia.
BAIBEL ENA HAKAUA HEREVADIA ESE IA DURUDIA: Quang bona Thi be Vietnam dekenai idia noho, bona idia laloa edia headava mauri be ia dika. Quang be nega momo ia kara auka. Ia gwau: “Lau be Thi ena hemami lau laloa lasi bona nega momo ia lau hahisia.” Thi ia ura divos. Thi ia gwau: “Lau mamia egu adavana lau trast henia eiava matauraia diba lasi.”
To, Quang bona Thi be Baibel ena hahediba herevadia bona edia headava maurina lalonai Efeso 5:33 badinaia dalana idia dibaia. Quang ia gwau: “Inai siri ese lau ia durua hebogahisi lau hahedinaraia totona bona tauanina bona hemami dalanai Thi lau naria karana amo do ia mamia ia lau lalokau henia. Unai lau karaia neganai, lau ia lalokau henia bona matauraia.” Bona Thi ia gwau: “Efeso 5:33 lau badinaia bona egu adavana lau matauraia neganai, ia ese lau ia lalokau henia, lau ia gimaia, bona maino lau abia.”
Headava totona diba ma haida oi abia totona, jw.org ai Noga! No. 2 2018, ladana “Ruma Bese Ia Moale Daladia 12” duahia.
2. Haida Kara Henia Dalana
Nega momo taunimanima be ma haida idia kara namo henia lasi, badina edia kopina kala, bese, toana, tomadiho, eiava edia lalohadai mahuta hebou karadia dekenai be idau.
BAIBEL IA GWAU: “Taunimanima idauidau ibounai umui matauraia.” —1 Petero 2:17.
ANINA: Baibel ese ita ia hadibaia lasi, kopina idau taudia, idau bese taudia eiava homosexual taudia ita inai henia totona. To, ita ia hagoadaia taunimanima idauidau ita matauraia totona, ena be idia be bese idau taudia eiava taga o ogogami taudia. (Kara 10:34) Ena be ma haida idia abia dae gaudia eiava edia kara dekenai ita lalotamona lasi, to idia ita kara namo henia bona matauraia be namo.—Mataio 7:12.
BAIBEL ENA HAKAUA HEREVADIA ESE IA DURUDIA: Daniel idia hadibaia Asia taudia be ena tano dekenai dika idia havaraia diba. Unai dainai Asia taudia ia inai henia bona nega momo taunimanima vairanai ia gwau henidia. Daniel ia gwau: “Lau laloa lau be egu tano lau durua noho. Bona lau laloa lau karaia karadia be kerere lasi.”
Gabeai Daniel be Baibel amo diba ia abia. Ia gwau: “Egu lalohadai lau haidaua be namo. Taunimanima be Dirava ese ia laloa hegeregerena idia lau kara henia be namo. Ena be ita be gabu idauidau amo, to ita ibounai be hegeregere.” Hari Daniel ese taunimanima ia kara henia dalana ia gwauraia. Ia gwau: “Idia be edena gabu amo be gau badana lasi. Hari taunimanima ibounai lau lalokau henia bona egu turadia be tanobada idauidau amo.”
Diba ma haida abia totona, jw.org ai Noga! No. 3 2020, ladana “Inai Heheni Karana Do Ia Ore, A?” duahia.
3. Moni
Taunimanima momo idia hekwarahi taga maurina idia abia totona, unai amo idia moale bona nega vaira ai edia mauri ia namo.
BAIBEL IA GWAU: “Aonega ese oi ia gimaia diba, moni ese oi ia gimaia hegeregerena, to diba bona aonega edia namo be edia biaguna idia hamauria diba.”—Hadibaia Tauna 7:12.
ANINA: Moni be ita ia durua, to unai sibona ese ita dekenai moale bona vaira nega namona do ia henia lasi. (Aonega Herevadia 18:11; 23:4, 5) Moale korikori bona vaira nega namona ita abia totona, Baibel ai Dirava ena aonega ita badinaia be namo.—1 Timoteo 6:17-19.
BAIBEL ENA HAKAUA HEREVADIA ESE IA DURUDIA: Cardo be Indonesia ai ia noho, bona taga maurina ia abia totona ia hekwarahi. Ia gwau: “Taunimanima momo ese idia ura abia gaudia be lau dekenai idia noho, hegeregere lau travel, dava bada kohu, motuka, bona ruma lau hoia diba.” To, unai gaudia be idia noho daudau lasi. Ia gwau: “Lau idia koia bona lagani momo lalonai egu hekwarahi amo lau abia moni ibounai be ia ore haraga. Egu mauri lalonai lau hekwarahi lau taga totona, to unai ese lalometau bada ia havaraia.”
Cardo ese Baibel ena sisiba moni dekenai ia badinaia matamaia. Hari ia be taga maurina totona ia hekwarahi lasi, to kohu momo lasi maurina ia ura noholaia. Ia gwau: “Hari lau mamia Dirava vairanai lau taga, badina Dirava ida lau tura namona. Lau be hanuaboi ta ta ai, lau mahuta namonamo, bona lau moale bada.”
Diba ma haida Baibel ena lalohadai moni dekenai oi abia totona, jw.org ai inai atikol Gima Kohorona No. 3 2021, “Edukeisen Bona Moni ese Vaira Nega Namona Ia Henia, A?” duahia.
4. Mahuta Hebou Karana
Taunimanima edia lalohadai mahuta hebou karana dekenai be idauidau.
BAIBEL IA GWAU: “Matabodaga karadia umui dadaraia. Bona umui ta ta ese helaga bona hemataurai dalanai, sibona emui tauanina biagua dalana umui diba be namo, to namo lasi mai mataganigani ida matabodaga karadia umui ura henia, Dirava idia diba lasi besedia idia karaia bamona.”—1 Tesalonika 4:3-5.
ANINA: Mahuta hebou karadia dekenai Baibel ena taravatu ita badinaia be namo. Inai hereva “matabodaga karadia” be heudahanai, prostitute karadia, headava lasi taudia idia mahuta hebou karadia, homosexual karadia, bona animal sihari henia ia herevalaia. (1 Korinto 6:9, 10) Mahuta hebou karana be Dirava ena harihari gauna headava tau bona hahine sibona totona.—Aonega Herevadia 5:18, 19.
BAIBEL ENA HAKAUA HEREVADIA ESE IA DURUDIA: Australia hahine ta Kylie ia gwau: “Lau be singul dainai, lau laloa lau mahuta hebou neganai, haida ese lau do idia lalokau henia bona egu hemami do ia namo. To unai ia vara lasi. Lau lalohekwarahi bona lau lalohisihisi.”
Gabeai, Kylie ese Baibel ena sisiba mahuta hebou karana dekenai ia dibaia bona badinaia. Ia gwau: “Lau diba Dirava ena taravatu ese hisihisi amo ita ia gimaia. Hari Iehova ena ura lau badinaia dainai lau mamia lau ia lalokau henia bona gimaia. Baibel ena hakaua hereva lau badinaia dainai lau lalohisihisi lasi!”
Diba ma haida abia totona jw.org ai, inai atikol “Headava Lasi To Noho Hebou Karana Dekenai Baibel be Dahaka Ia Gwau?” duahia.
Iseda Havaraia Tauna ese ita ia durua maoro bona kerere ena idau ita diba totona. Ena be nega haida ena hakaua hereva ita badinaia be auka, to ita badinaia be mai ena namo. Ita trast henia diba unai ese noho daudau moale do ia havaraia.
