ATIKOL ginigunadia ese idia hahedinaraia hekwakwanai badadia idia vara neganai, do ia auka mauri ita haheaukalaia totona. Emu hekwakwanai idauidau oi haheaukalaia lalonai, reana do oi laloa, ‘Mauri be mai anina bada, a?’ eiava ‘Ta ese lau ia laloa, a?’ Namona be oi diba Iehova ese emu hisihisi ia laloa. Ia dekenai oi be mai anina bada.

Salamo 86 ia torea tauna ese Dirava dekenai ena abidadama ia gwauraia hedinarai, ia gwau: “Egu [“hisihisi,” NWT] neganai, lau ese oi dekenai lau tai henia noho, badina oi ese lau dekenai oi haere henia noho.” (Salamo 86:7) Reana do oi laloa, ‘Edena dala ai Dirava ese lau do ia haere henia egu hisihisi neganai”?’

Ena be Dirava ese emu hekwakwanai ibounai do ia hamaoromaoroa haraga lasi, to iena Hereva, Baibel, ese oi dekenai lalomaino ia henia diba oi haheauka totona. Ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai. Bona Dirava ena maino, laloparara ibounai ia hereaia gauna, ese emui kudouna bona lalona do ia gimaia.” (Filipi 4:6, 7) Mani henunai idia noho Baibel siridia amo Dirava ese ita ia laloa dalana ita herevalaia.

“Idia ta [manu maragidia] be Dirava ese ia laloaboio lasi. . . . “Umui ese manu maragidia ibounai umui hereaia.” ​—⁠Luka 12:6, 7.

MANI OI LALOA: Taunimanima dekenai manu maragidia be anina lasi. To Dirava ese manu maragidia ibounai ia laloa bada bona Ia dekenai idia ibounai be mai anina bada. Dirava vairanai taunimanima ese manu maragidia idia hereaia. Dirava ena havaraia gaudia ibounai amo taunimanima be ena “toana” bamona ia karaia, bona idia hegeregere iena kara namodia idia hahedinaraia totona.​—⁠Genese 1:26, 27.

“Lohiabada e, oi ese egu lalona oi tahua vadaeni, lau oi diba momokani vadaeni. . . . Egu laloa ibounai oi diba. . . . Egu lalona danu do oi tohoa, bona egu laloa gaudia do oi davaria.”​—⁠Salamo 139:1, 2, 23.

MANI OI LALOA: Dirava be oi ia diba namonamo. Emu lalohadai bona hemami ia diba. Haida be emu hekwakwanai bona oi lalohisihisilaia gaudia do idia lalopararalaia lasi, to Dirava be oi ia laloa bada bona ia ura oi ia durua. Unai dainai, emu mauri be mai anina bada.

“Lohiabada e, egu guriguri do oi kamonai. Lau do oi durua totona, egu noinoi mani do oi kamonai henia. . . . Egu hereva mani do oi kamonai, bona lau boiboi neganai, mani emu kara lau dekenai do oi haere haraga. . . . Ia ese iena bese ena ogogami taudia edia guriguri, be do ia kamonai.”​—⁠Salamo 102:1, 2, 17.

MANI OI LALOA: Matamana negana amo ema bona hari taunimanima be idia davaria hisihisi dainai idia taitai neganai, Iehova be unai ia diba. (Salamo 56:8) Emu mata ranu ia itaia danu. Dirava ese oi davaria hahetoho bona emu mata ranu ia laloatao badina Ia dekenai oi be mai anina bada.

“Lau be umui emui Dirava, gau ta ese umui do ia hagaria lasi. Lau ese umui do lau hagoadaia, bona umui do lau durua. . . . Lau be [Iehova], emui Dirava. . . . lau gwau, ‘Do umui gari lasi, lau ese umui do lau durua.’”​—⁠Isaia 41:10, 13.

MANI OI LALOA: Dirava be ia noho hegaegae oi ia durua totona. Bema oi moru, oi do ia abia isi.

“Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.”​—Ioane 3:16.

MANI OI LALOA: Dirava ese oi ia lalokau henia dainai mai ura bada ida ena natuna be boubou gauna bamona oi totona ia henia. Unai boubou gauna ese dala ia kehoa vaira negai mauri namona oi moalelaia bona mauri hanaihanai oi abia totona. *