TUARI taudia be idia heau giroa neganai Davida idia bampaia. Tuari gabuna amo idia heau siri neganai edia toana be idia gari dikadika. Dahaka dainai idia gari? Reana idia be mai gari ida idia gwauraia loulou herevana be Davida ese ia kamonaia. Unai be tau ta ena ladana. Unai tauna be taora ai ia gini, Davida ese unai bamona tau lata hereana be nega ta ia itaia lasi.

Unai be Goliata! Hari Davida ia diba dahaka dainai tuari taudia idia gari bada​—badina ia be tau bada hereana, lata herea momokani. Reana bema tuari kohudia ia atoa lasi, iena metau be tatau badadia rua edia metau bamona. To ia be tuari kohudia ibounai ia hahedokilaia, goada herea tauna bona ia be tuari. Goliata be tuari totona ia boiboi noho. Mani oi laloa, ia boiboi neganai iena gado regena be bada herea bona ororo edia huana amo ia lao, ia ese Israela tuari taudia bona edia king, Saulo, ia kirikirilaia. Ia boiboi ia gwau namona be tuari tauna ta do ia lao bona danu do idia heatu bena unai tuari do ia haorea!​—1 Samuela 17:4-10.

Israela taudia be idia gari bada. King Saulo danu ia gari bada. Davida ia itaia unai be hua ta mai kahana lalonai ia vara! Pilistia tuari taudia bona Israela tuari taudia be idia tuari lasi, to idia gini sibona bona dina ta ta ai Goliata ena hevaseha herevadia idia kamonai noho. Davida ia lalohisihisi. Ia hemarai bada badina ia itaia Israela edia king bona ena tuari taudia, iena kakana badadia rua danu, be idia gari bada! Davida ena matanai, unai tomadiho koikoi tauna Goliata be Israela tuari taudia ia hadikaia sibona lasi, to Israela edia Dirava, Iehova ia gwauraia dika danu! To Davida, mero matamata sibona, be dahaka do ia karaia? Bona hari Davida ena abidadama karana amo dahaka ita dibaia?​—1 Samuela 17:11-14.

Mani hua haida gunanai idia vara gaudia ita laloa lou. Adorahi ta ai, Davida be Betelehema ena ororo badinai ena tamana ena mamoe ia naria noho. Ia be mai ena hairai, reana ena mauri lagani be 13 ia lao 19 bamona, ia goada, bona ena toana be namo herea, bona ia be mai ena aonega. Regerege lasi negadiai ia ese ena gita ia gadaralaia. Dirava ese ia havaraia gaudia hairaidia ia laloa bada bona hora momo lalonai ia praktis dainai ena diba miusiki gadaralaia dekenai ia bada. To unai hanuaboi ai, Davida be ena tamana ese ia boiria. Badina ia ura Davida do ia itaia.​—1 Samuela 16:12.

Ia itaia iena tamana, Iese be tau burukana ta danu idia herevahereva noho. Ia be abidadama peroveta tauna Samuela. Iehova ese ia siaia Iese ena natuna ta do ia horoa Israela edia king ai ia lao totona! Samuela ese Davida ena kakana seven ia itaia vadaeni, to Iehova ese ia hamaoroa idia ta Ia abia hidi lasi. To, Davida ia ginidae neganai, Iehova ese Samuela ia hamaoroa, ia gwau: “Ia dekenai olive dehoro do oi bubua, lau ura henia tauna be inai.” Davida ena kakadia edia vairanai, Samuela ese olive dehorona ia abia, bona Davida ena kwarana dekenai ia bubua. Unai nega amo Davida ena mauri ia idau. Baibel ia gwau: “Unai dina dekena amo Lohiabada ena Lauma be Davida danu ia noho.”​—1 Samuela 16:1, 5-11, 13.

Unai negai Davida be ia ura  king dagina abia, a? Lasi, to ia naria Iehova ena lauma ese do ia hakaua bona do ia hadibaia edena negai unai maduna badana do ia huaia diba. Unai ia do vara lasi neganai, ia be mai manau ida mamoe naria gaukarana ia karaia noho. Unai gaukara be mai ena ura bada bona goada ida ia karaia. Nega ta iena tamana ena mamoe be kahirakahira laiona ese ia ania, bona ma nega ta ai bea ta ese kahirakahira ia ania. Davida be daudau amo idia ia luludia sibona lasi. To, idia amo ena tamana ena mamoe ia hamauria. Unai nega rua ai, ia ese unai dagedage animal ia aladia mase!​—1 Samuela 17:34-36; Isaia 31:4.

Gabeai, Davida be ma idia boiria lou. Iena sivarai be King Saulo ese ia kamonai. Ena be Saulo be tuari tauna goadana, to ia ese Dirava ena hakaua dalana ia badinaia lasi dainai, Iehova ena lalonamo ia haboioa. Iehova ena lauma be Saulo dekenai amo ia kokia dainai, ia be lauma dikadia ese ia biagua dainai​—ia badu dikadika, ia laloa kerere, bona ia dagedage. Unai lauma dikadia ese Saulo ia biagua neganai, iena lalona ia hanamoa gauna ta be miusiki. Saulo ena tatau haida idia kamonai Davida be miusiki ia gadaralaia diba bona ia tuari diba. Unai dinai Davida idia boiria bona ia be Saulo totona miusiki ia gadaralaia bona iena tuari kohudia ia abia.​—1 Samuela 15:26-29; 16:14-23.

Matamata taudia be Davida ena abidadama karana amo diba bada idia abia diba. Ia bisi neganai ena hetura karana Iehova ida ia hagoadaia diba gaudia ia karaia. Danu, mai haheauka ida gaukara namodia ia dibaia, ia dekenai gaukara momo idia henia diba. To gau badana be, ia be Iehova ena lauma ese ia hakaua. Ita ibounai dekenai unai be haheitalai namona!​—Hadibaia Tauna 12:1.

Davida be Saulo ia hesiai henia neganai, nega haida iena hanua dekenai ia giroa bona mamoe naria gaukarana ia karaia, bona nega haida nega daudau lalonai unai ia karaia. Iese ese unai nega lalonai Davida ia siaia ena kakana toi do ia sekea totona, idia be Saulo ena tuari taudia ai idia lao. Davida be ia kamonai bona ena kakadia totona aniani bona gau ma haida ia haboua bena Elaha ena koura dekenai ia lao. Ia ginidae neganai, ia moale lasi badina ia itaia unai tuari orea rua be idia tuari lasi matamanai ita herevalaia bamona. Idia be koura ena kahana kahana dekenai idia gini noho.​—1 Samuela 17:1-3, 15-19.

To Davida, be unai kara dekenai ia moale lasi. Dahaka dainai mauri Diravana, Iehova, ena tuari taudia be unai tomadiho koikoi tauna dekenai idia gari bona idia heau? Davida ia itaia Goliata be Iehova ia kirikirilaia. Unai dainai mai ura bada ida tuari taudia ia hamaoroa Goliata do ia halusia. Gabeai, Davida ena kakana Eliaba, be Davida ena hereva ia kamonai. Ia ese ena tadina Davida ia gwau henia, ia gwau ia be tuari ai ala-ala karana itaia totona ia lao. To, Davida ese ia haere henia, ia gwau: “Dahaka kerere lau karaia, a? Lau hereva sibona, ani?” Bena mai gari lasi ida tuari taudia ia hamaoroa ia ese Goliata do ia halusia, bona ta ese iena hereva be Saulo ia hadibaia. King ese oda ia henia Davida idia abia mai totona.—1 Samuela 17:23-31.

Davida ese king ia hamaoroa, ia gwau: “Tau ta ese unai Pilistia do ia gari henia lasi be namo.” Momokani Saulo bona ena tuari taudia be Goliata dekenai idia gari dikadika. Reana badina idia sibona  be Goliata danu idia hahegeregerea neganai, idia be maragi herea dainai idia gari. Idia laloa unai tuari tauna ese idia do ia hamasea haraga. To Davida be unai bamona ia laloa lasi. Do ita itaia, ia ese unai hekwakwanai ia laloa dalana be edia laloa dalana amo ia idau. Unai dainai, ia gwau ia ese Goliata do ia tuari henia.​—1 Samuela 17:32.

Saulo ia ura lasi, ia gwau: “Oi be hegeregere lasi inai Pilistia tauna do oi tuari henia, badina oi be uhau sibona, to ia be uhau negana dekena amo tuari tauna korikori.” Davida be mero maragina ta sibona, a? Lasi, ia be mero matamata dainai tuari lalonai do ia vareai lasi. To momo idia diba Davida be ia heatu diba bona reana ena mauri lagani be 20 bamona.​—1 Samuela 16:18; 17:33.

Davida ese Saulo ena lalona hagoadaia totona laiona bona bea ia alaia ena sivarai ia gwauraia. Davida be ia hekokoroku, a? Lasi. Davida ia diba dahaka dainai laiona bona bea ia alaia diba. Ia gwau: “Lohiabada ese laiona bona bea dekena amo lau ia hamauria vadaeni. Lau diba momokani, Lohiabada ese inai Pilistia tauna danu, iena imana dekena amo lau do ia hamauria.” Unai dainai Saulo ia haere ia gwau: “Vadaeni, oi lao, bona Lohiabada ese oi dekenai do ia noho.”​—1 Samuela 17:37.

Oi ura emu abidadama be Davida ena bamona, a? Laloatao, Davida be ena lalona dekenai ia abidadama kava lasi. Ia be mai ena abidadama badina ena Dirava ia diba bona ena mauri ai Dirava ese ia durua dainai. Ia diba Iehova be lalokau Gimaia Tauna bona gwauhamata Hagugurua Tauna. Bema ita ura unai bamona abidadama karana ita hahedinaraia, namona be hanaihanai Baibel ese ia herevalaia Diravana ita dibaia. Ita dibaia gaudia ita badinaia neganai, do ita itaia ita dekenai idia vara gau namodia ese iseda abidadama ia hagoadaia diba.​—Heberu 11:1.

Matamanai, Saulo ese ena tuari dabua be Davida dekenai ia atoa. Ia be Goliata ena bamona, kopa amo idia karaia gauna bona ena kemena bona ena aena koua gauna be seini maragidia amo idia karaia bona unai seini ta be ma ta latanai idia turia kau. To, Davida be unai tuari dabua badana ia hahedokilaia bona tuari kohudia ma haida ia abia neganai ia marere be auka dainai ia laloa unai ia karaia be hegeregere lasi. Ia be tuari taudia edia treinini ia abia lasi, unai dainai tuari dabua, Saulo ese ia hahedokilaia gauna, be ia manadalaia lasi bona Israela taudia huanai Saulo be tau latana! (1 Samuela 9:2) Ia ese unai tuari dabua ia kokia bona ena dabua korikori ia atoa, unai be mamoe naria tauna ese mamoe ia naria neganai ia hahedokilaia dabuana.​—1 Samuela 17:38-40.

Davida ese mamoe naria gaukara ai ia gaukaralaia auna ia abia, ena baege ia huaia bona vilipopo ta ia abia. Toana be vilipopo be anina lasi gauna, to ia be tuari gauna namona ta. Ia be paosi maragina ta mai ena varo rua, mamoe naria tauna ese unai ia gaukaralaia momo. Unai paosi ai nadi ia atoa, ia davea mai goada ida, bena varo ta ia rakatania neganai nadi be maoromaoro ia lao bona ia makaia gauna ia botaia. Unai be tuari gauna namona dainai, nega haida tuari oreadia ese vilipopo idia diba taudia idia gaukaralaia.

Davida ia hegaegae murinai, karaharaga ena inai tauna dekena ia lao. Ita diba Davida be koura ai sinavai kaukauna ena huanai ia gini bona nadi faiv ia gogoa neganai Iehova ia guriguri henia goadagoada. Bena tuari gabuna ia lao​—ia be ia raka lasi, to ia heau!

Goliata ese do ia tuari henia tauna ia itaia neganai, dahaka ia laloa? Baibel ia gwau: “Vadaeni ia badu, ia ura lasi uhau sibona danu do ia heatu, badina be Davida be toana namo merona, iena vairana danu be mero sibona ena vairana toana bamona.” Goliata ese Davida ia gwau henia, ia gwau: “Lau be sisia a, unai dainai oi be mai au danu lau dekenai oi raka mai?” Ia ese Davida ena itotohi ia itaia, to iena vilipopo ia itaia lasi. Goliata ese Pilistia dirava edia ladanai Davida ia hereva dika henia bona ia gwau, ena inai tauna ena mase tauanina be ataiai manudia bona uda boroma dekenai do ia henia idia ania totona.​—1 Samuela 17:41-44.

Ema bona hari Davida ena haere karana ese abidadama goadana ia hahedinaraia. Mani oi laloa unai matamata tauna be Goliata dekenai ia boiboi, ia gwau: “Oi be mai oiemu tuari kaia, bona mai oiemu io, bona mai oiemu auri labora io ta danu lau dekenai oi mai, to lau be Lohiabada Dirava ena ladana dainai oi dekenai lau raka mai inai. Ia be Israela tuari orea, oi ese oi boiboi dika henia taudia edia Dirava.” Davida ia diba taunimanima edia goada bona edia tuari gaudia be anina lasi. Goliata be Iehova Dirava ia matauraia lasi bona Iehova ese ena dika davana do ia henia. Davida ia hereva bamona “tuari be [Iehova] ena.”​—1 Samuela 17:45-47.

Davida be Goliata ena bada bona ena tuari gaudia ia itaia. To unai gaudia dainai ia gari lasi. Ia be Saulo  bona ena tuari taudia bamona lasi. Davida be Goliata ida sibona ia hahegeregerea lasi. To, ia ese Goliata be Iehova ia hahegeregerea. Ena be taunimanima haida amo Goliata ena lata be mita 2.9 bamona, to ia ese Atai Momokani Diravana ia hereaia lasi. Ia be taunimanima ibounai bamona, Iehova matanai ia be dimairi ta bamona​—bona do ia hamasea!

Davida be ena inai tauna kahirakahira ia heau lao, bona ena baege amo nadi ta ia kokia. Ena vilipopo dekenai ia atoa bona ena kwarana ataiai ia davea. Goliata be, reana iena kesi tauna badinai ia raka, bona Davida dekenai ia lao. Goliata be lata herea dainai iena kesi ia huaia tauna ese iena kwarana ia koua diba lasi. Bona Davida be unai ia makaia.​—1 Samuela 17:41.

Davida ese ena nadi ia negea. Mani oi piksaia ia makaia gabuna dekenai ia lao. Iehova be ena siahu ia gaukaralaia dainai, Davida ese nadi ma ta ia negea be anina lasi. Davida ia negea nadi ese Goliata ena baguna ia hodoa, bona kwarana lalonai ia vareai. Vadaeni Goliata be tano dekenai ia moru diho! Kesi huaia tauna be mai gari bada danu ia heau. Vadaeni Davida ia heau lao Goliata ena tuari kaia ia abia bona Goliata ena kwarana ia utua oho.​—1 Samuela 17:48-51.

Unai ia vara neganai, Saulo bona ena tuari taudia be goada idia abia. Mai boiboi bada ida bona Pilistia taudia idia lulua lao. Unai tuari be Davida ese Goliata ia hamaoroa hegeregerena ia vara, ia gwau: “[Iehova] ese aiemai imana dekenai umui do ia atoa.”​—1 Samuela 17:47, 52, 53.

Hari, Dirava ena hesiai taudia be tuari lalonai idia vareai lasi. Unai nega be ia ore vadaeni. (Mataio 26:52) To, namona be Davida ena abidadama karana ita tohotohoa. Ia hegeregerena, namona be ita abia dae momokani Dirava be ia mauri noho​—ia sibona do ita hesiai henia bona gari henia. Nega haida ita mamia ita be hegeregere lasi eda hekwakwanai ita hanaia totona, to Iehova ena siahu ese ita davaria hekwakwanai ia hereaia. Davida bamona, bema Iehova be iseda Dirava ai ita halaoa bona ita abidadama henia, hahetoho bona hekwakwanai ta lasi ese ita do ia hagaria. Iehova ena siahu be gau ta ese ia hereaia diba lasi!