LAU be lagani 1926 ai lau vara, ai natudia ibounai be 8 bona lau be namba 7. Emai tama sina be Karítsa hanuana amo, unai be Greece ai, bona idia be gaukara goadagoada taudia.

Lagani ta gunanai, egu tama sina be John Papparizos ida idia hedavari, ia be herevahereva momo Bible Student tauna ta, unai be Iehova ena Witnes taudia edia ladana ginigunana. John ese Baibel ia gaukaralaia namonamo dainai, Baibel Student taudia ese emai hanua ai idia karaia heboudia dekenai idia lao matamaia. Lauegu sinana be Iehova Dirava ia abidadama henia momokani, bona ena be duahiduahi o toretore ia diba lasi, to nega idauidau ai ma haida dekenai Baibel ia herevalaia. To egu tamana be taunimanima edia kara kereredia sibona ia laloa dainai, metairametaira Keristani heboudia lao henia karana ia rakatania.

Lau bona egu kakadia be Baibel ai matauraia, to matamata taudia edia moale karadia ese emai lalona idia veria. Bena lagani 1939 ai, Europe dekenai Tanobada Tuari Iharuana ia matamaia. Emai dekena tauna bona kasin, Nicolas Psarras, idia doria Greek edia ami ia bamoa totona, unai nega ai ia be bapatiso matamata tadikakana. Nicolas, ena mauri lagani be 20, be mai gari lasi ida ami taudia ia hamaoroa, “Do lau tuari lasi, badina lau be Keriso ena tuari tauna.” Unai dainai ami edia kota vairanai ia gini bona idia siaia lagani 10 dibura ruma ai do ia noho. Ai hoa bada!

To lagani 1941 ai, tano ma ta ena ami taudia be Greece dekenai idia mai bona Nicolas be dibura ruma amo idia ruhaia. Nicolas be Karítsa dekenai ia giroa lou neganai, egu kakana, Ilias, ese Baibel ena hahediba herevadia dainai henanadai momo ia henia. Mai ura bada ida edia herevahereva lau kamonai. Gabeai, lau, Ilias, bona emai taihuna, Efmorfia, be Baibel ai stadilaia matamaia, bona Iehova ena Witnes taudia edia heboudia dekenai ai  lao. Murina laganina ai, emai mauri be Iehova dekenai ai gwauhamatalaia bona ai bapatiso. Gabeai, egu kakadia 4 danu be Witnes taudia ai idia lao.

Lagani 1942 ai, Karítsa Kongrigeisen dekenai matamata taudia be 9 sibona, edia mauri laganidia be 15 bona 25 padanai. Ai ibounai ai diba vaira negai hahetoho badadia do ai davaria. Unai dainai ta ta hagoadaia totona, nega idauidau dekenai ai hebou bona Baibel ai stadilaia, Basileia anedia ai abia, bona ai guriguri. Unai ese emai abidadama ia hagoadaia.

Tanobada Tuarina Iharuana ia ore gwauraia neganai, Greek taudia haida be gavamani idia gwau-edeede henia, bona unai ese tuari ia hamatamaia. Unai gwau-edeede taudia be hanua ibounai lalonai idia loaloa bona hanua taudia idia doria edia orea idia bamoa totona. Emai hanua dekenai idia mai neganai, Witnes matamata taudia toi idia dogoatao—lau, Antonio Tsoukaris, bona Ilias. Idia ai hamaoroa ai be Keristani taudia bona tuari lalonai do ai vareai lasi, to ai idia doria Mount Olympus dekenai do ai raka lao, emai hanua amo unai be hora 12 bamona.

Daudau lasi murinai, komiunis ofesa ta ese ai ia oda henia dagedage oreana ai bamoa totona. To ofesa tauna ai hamaoroa Keristani taudia momokanidia be edia tadikaka idia tuari henia lasi, unai dainai ia badu dikadika bona edia biaguna dekenai ai ia hakaua lao. Edia biaguna dekenai emai sivarai ai gwauraia neganai, ia gwau, “Doniki ta umui abia bona tuari lalonai bero idia abia taudia be hospital dekenai do umui abia lao.”

Ia dekenai ai gwau: “To bema gavamani ena tuari taudia ese ai idia dogoatao be edena bamona? Do idia laloa ai be tuari totona ai lao.” Bena ia gwau: “Vadaeni idia tuari noho taudia dekenai aniani umui henia.” To ai gwau: “To bema ofesa tauna ta ese doniki ida ai ia itaia, ai do ia oda henia tuari taudia dekenai tuari kohudia ai abia lao totona.” Bena tuari biaguna be nega sisina daudau lalonai ia laloa. Dokonai ia gwau: “Toana be umui be mamoe do umui naria! Ororo dekenai umui noho bona mamoe umui naria!”

Tuari ia vara noho lalonai, ai toi be ororo ai mamoe ai naridia. Lagani ta murinai, maoro idia henia Ilias do ia giroa bona emai sinana do ia naria. Antonio be ia gorere dainai ia idia ruhaia danu. To lau idia dogoatao.

Daudau lasi Greek ena ami be komiunis oreana kahirakahira idia mai. Unai dainai lau idia dogoatao taudia be ororo dekenai idia heau lao bona Albania dekenai idia hanaia. Boda kahirakahira ai ginidae neganai, Greek ami taudia ese ai idia koua. Unai gwau-edeede tuari taudia be gari dainai idia heau boio. To lau be tano dekenai ia noho au ta murinai lau hunia, unuseniai matamanai lau herevalaia gauna ia vara.

Greek ami taudia lau hamaoroa lau be komiunis taudia ese idia dogoatao neganai, Véroia kahirakahira ia noho ami kamepa dekenai lau idia abia lao, Baibel negadia unai hanua idia gwauraia Berea. Unuseniai lau idia oda henia tuari taudia edia  hunia gabudia do lau geia. Unai gaukara lau dadaraia dainai, ofesa ese oda ia henia Makrónisos (Makronisi) motumotu dekenai lau idia hadiburaia totona.

Makrónisos be ranu lasi gabuna bona ia kaukau momokani, ia be Attica ena davara kahirakahira ia noho, bona Athens amo ia be kilomita 50 bamona. Unai motumotu ena lata be kilomita 13 bona ena lababa be kilomita 2 mai kahana. To lagani 1947 ia lao 1958 lalonai, unuseniai idia noho dibura taudia ibounai be 100,000—komiunis taudia bona idia hadiburaia kava taudia, tuari lalonai idia vareai lasi taudia, bona Iehova ena Witnes taudia momo herea danu.

Lau be lagani 1949 ai unai motumotu dekenai lau ginidae, unai nega ai dibura taudia be kamepa maragimaragi dekenai idia noho. Lau bona tatau ma haida be gadi ia loaloa momo lasi kamepa dekenai ai noho. Ai ibounai 40 bamona be palai ruma ta dekenai ai mahuta, herevana unai palai ruma be taunimanima 10 sibona totona. Ai inua ranuna be ia miro bona nega momo bini bona eggplant ai ania. Lai bona kahu danu be bada dainai, emai mauri ia auka. To unai ai laloa lasi, badina ai be nadi ai huaia lao mai lasi, unai dagedage bada karana ese dibura taudia momo edia tauanina bona laloa dalana ia hadikaia.

Dina ta kone dekenai lau raka noho lalonai, kamepa idauna dekenai idia noho Witnes taudia ma haida lau hedavari henia. Unai nega dekenai ai moale bada! Ai ura lasi ta ese ai ia davaria dainai, dala ia kehoa negana sibona dekenai ai hedavari. Dibura taudia ma haida ai haroro henia danu, bona idia haida be gabeai Iehova ena Witnes taudia ai idia lao. Haroro bona guriguri karana ese emai abidadama ia hagoadaia.

Hua ten dibura ruma ai lau noho murinai, lau idia hamaoroa ami dabua do lau hahedokilaia. Lau ura lasi dainai, ami ofesa badana dekenai lau idia hakaua lao. Bena lau torea revarevana be ia dekenai lau henia, lau gwau: “Lau be Keriso ena tuari tauna, unai sibona lau ura.” Lau ia hagaria murinai, unai ofesa ese ena durua tauna dekenai lau ia henia hanai, ia be Greek Otodoks ena bisop badana bona tomadiho dabuana ia hahedokilaia. Mai gari lasi ida Baibel amo iena henanadai lau haerelaidia neganai, mai badu ida ia gwau: “Ia umui abia lao. Ia be ena lalona do ia haidaua lasi!”

Murina dinana ai, ami taudia ese lau idia oda henia lou ami dabua do lau hahedokilaia. Lau ura lasi dainai, imana bona au ta amo lau idia dadabaia. Bena kamepa ena kliniki dekenai lau idia abia lao, badina idia ura diba bema egu turia ta ia makohia eiava lasi, bena lau idia abia giroa. Hua rua lalonai unai bamona idia karaia.

Egu abidadama lau dogoatao auka dainai, ami taudia be dala idauna idia gaukaralaia. Egu imana rua be doruna murinai idia kwatua, bena varo amo egu aena palapala idia kwadia. Ena be hisihisi bada lau mamia, to Iesu ena hereva lau laloa, ia gwau: “Taunimanima ese umui idia gwauraia dika, idia dagedage henia . . . neganai, do umui moale. Do umui moale bada badina emui davana guba dekenai be bada. Guna idia noho peroveta taudia be unai bamona idia dagedage henidia danu.” (Mt 5:11, 12) Dokonai, nega daudau lau idia kwadia murinai, lau maserea.

Lau noga neganai, lau keru bada, bona paraoa, ranu, eiava blanketi be lasi. Ena be unai ia vara, to lau moale. Baibel ena gwauhamata hegeregerena, “Dirava ena maino” ese egu ‘kudouna bona lalona ia gimaia.’ (Fili. 4:7) Murina dinana ai, ami tauna ta ese lau dekenai paraoa, ranu, bona kouti ia henia. Bena ami tauna ma ta ese lau dekenai iena aniani sisina ia henia. Lau mamia Iehova ese unai bamona daladia ai lau ia naria.

Ami taudia idia laloa lau be unai gwau-edeede oreana lau bamoa dainai, Athens dekenai lau idia hakaua lao idia kota henia totona. Bena lau idia siaia Yíaros (Gyaros) ena dibura ruma ai lagani toi do lau noho, Makrónisos ena ist kahana amo unai motumotu be kilomita 50 bamona.

Yíaros ena dibura ruma ena magu be biriki kakakaka amo idia karaia, unuseniai politikol karadia  dainai idia hadiburaia taudia 5,000 mai kahana idia noho. Iehova ena Witnes taudia 7 danu be edia Keristani gini siri karana dainai unuseniai idia noho. Ena be tomadiho karadia idia taravatua, to ai 7 be hunia dekenai ai hebou bona Baibel ai stadilaia. Hehuni dalanai Gima Kohorona ai abia danu, bena imana amo kopi ai toredia bona stadilaia.

Dina ta ai stadi noho lalonai, gadi tauna ta be ai ia itaia bona emai magasin ia abia. Ofesa tauna dekenai ai ia samania dainai, ai laloa emai noho dibura ruma ai do idia halataia. To, ofesa tauna be ai dekenai ia gwau: “Umui ai diba bona emui abidadama dainai umui ai matauraia. Bona ai diba umui be kara maorona do umui karaia. Emui gaukara dekenai umui giroa lao.” Bona ai haida dekenai gaukara metauna ia henia lasi. Iehova dekenai ai tanikiu, badina ena be dibura ruma dekenai ai noho, to emai abidadama karana ese Iehova ia hanamoa.

Ai gini goada dainai, hahenamo ma haida ai abia. Emai kara namodia dainai, dibura ruma ai ia noho profesa tauna ta be ai abia dae gaudia dainai ia henanadai. Lagani 1951 dekenai ai idia ruhaia neganai, ia danu idia ruhaia. Gabeai ia bapatiso bona ful-taim haroro gaukara ia karaia.

Lau idia ruhaia murinai, egu famili Karítsa dekenai lau giroa lou. Gabeai, egu tano taudia ma haida ida, Melbourne, Australia dekenai ai lao. Unuseniai Keristani taihu namona, Janette lau adavaia, bona Keristani dalana ai natuna mero ta bona kekeni toi ai naria.

Hari egu mauri lagani be 90 ia hanaia vadaeni, to elda maduna lau do huaia noho. Guna lau abia hisihisi dainai, haroro murinai nega momo egu tauanina bona aena idia hisihisi. To egu lalona lau hadaia “Keriso . . . ena tuari tauna” bamona do lau noho.—2 Tim. 2:3.