YOMARA bona ena tadidia Marcelo bona Hiver be Guatemala ena hanua maragina ta ai idia noho. Yomara be Witnes taudia ida Baibel ia stadilaia guna, bena gabeai ena tadidia idia stadi danu. To hekwakwanai ta ia noho. Idia toi be matakepulu bona braille idia duahia diba lasi. Unai dainai, Baibel stadi naria tauna ese idia totona paragraf bona Baibel siridia ia duahia.

Kongrigeisen hebou idia lao totona be ia auka. Kahirakahira ia noho Kingdom Hall dekenai sibodia idia lao diba lasi. To kongrigeisen dekenai tadikaka ese hebou ibounai dekenai idia abidia lao. Bona hebou dekenai idia toi be mai edia tok neganai, tadikaka ese idia durudia edia tok idia laloatao totona.

May 2019 ai, edia hanua dekenai kongrigeisen heboudia idia abia matamaia. Unai nega ai, regula painia tau bona ena adavana be edia hanua dekenai idia lao. Ena be braille gaukaralaia dalana idia diba lasi, to idia ura Yomara, Marcelo bona Hiver idia durudia braille idia duahia bona torea totona. Braille idia dibaia totona laiberi ta dekenai idia lao bona braille gaukaralaia dalana ena buka idia abia bona ma haida idia durua.

Hua haida murinai idia toi be braille idia duahia diba bona unai ese dala ia kehoa edia hetura karana Iehova ida idia hagoadaia. a Hari Yomara, Marcelo bona Hiver be regula painia idia karaia bona Marcelo be hesiai tauna. Wiki ibounai lalonai idia be edia hesiai gaukara dekenai idia bisi bada. Edia haheitalai ese ma haida idia durua edia haroro gaukara idia goadalaia totona.

Idia toi be tadikaka taihu edia heduru idia moalelaia bada. Yomara ia gwau: “Nega ginigunana Witnes taudia ai hedavari henia negana amo, Keristani lalokau korikorina idia hahedinaraia.” Marcelo ia gwau: “Emai kongrigeisen lalonai tura namodia ai davaria bona tanobada hegegemadai tadikaka oreana lalonai mai lalokau ida ruma bese ta bamona ai noho.” Yomara bona ena tadidia be Iehova ese tanobada be paradaiso ai do ia halaoa dinana idia naria noho.​—Sal. 37:10, 11; Isa. 35:5.