Aposetolo Paulo ia diba Satani ena koikoi herevadia ese dika bada ia havaraia diba, to Keristani taudia ma haida be unai idia diba lasi. Hegeregere, Korinto taudia haida idia laloa idia be hereva momokani dekenai idia goada dainai, do idia moru lasi. (1 Kor. 10:12) Unai dainai Paulo ese inai sisiba ia henia: “Lau gari, dika gaigai ese ena koikoi herevadia amo Heva ena lalona ia veria hegeregerena, emui lalona ia hamiroa bona Keriso dekenai umui hahedinaraia kara momokani bona kara goeva umui haboioa.”​—2 Kor. 11:3.

Paulo ena sisiba amo ia hahedinaraia, namo lasi ta ia laloa ia be do ia moru lasi. Bema oi ura emu lalona oi gimaia, namona be lalohadai koikoidia edia dika oi lalopararalaia bona oi dadaraidia.

Taunimanima ese lalohadai koikoidia idia gaukaralaia ma haida idia koia eiava edia lalohadai o kara idia biagua totona. Buka ta (Propaganda and Persuasion) ese unai bamona kara ia herevalaia neganai, ia gwau unai bamona kara be namo lasi bona dika bada ia havaraia diba.

Lalohadai koikoidia ena dika be dahaka? Unai bamona lalohadai ese ita idia hakaua kerere bona iseda lalomamina idia hadikaia diba​—⁠ia be ta ia hamasea diba hodahoda dikana ta bamona. Taunimanima edia kara ia stadilaia tauna ia gwau, lalohadai koikoidia ese “ita momo idia koia bona hakaua kerere vadaeni​—herevana unai ita lalopararalaia lasi.” Diba bada tauna ma ta ia gwau, lalohadai koikoidia dainai taunimanima momo be “ma haida idia alaia mase, tuari dekenai idia lao, bese ma ta idia inai henia, bona tomadiho dainai ma haida idia dagedage henia.”​—Easily Led​—A History of Propaganda.

Bema taunimanima ese edia lalohadai koikoidia amo ita idia hakaua kerere, Satani be  dahaka ia karaia diba? Taunimanima idia vara negana amo ia ese edia kara ia stadilaia. Hari “tanobada ibounai” be ena siahu henunai ia noho. Unai dainai tanobada gaudia ia gaukaralaia diba iena lalohadai koikoidia ia halasia totona. (1 Ioa. 5:19; Ioa. 8:44) Oibe, Satani ese taunimanima edia “lalona ia hadiburaia” dainai, ia ese “tanobada ibounai ia hakaua kerere noho.” (2 Kor. 4:4; Apok. 12:9) Edena dala ai iena lalohadai koikoidia oi dadaraia diba?

Lalohadai koikoidia dadaraia totona, Iesu ese inai taravatu ia henia, ia gwau: “Hereva momokani do umui diba, bona hereva momokani ese umui do ia ruhaia.” (Ioa. 8:31, 32) Tuari lalonai, namona be tuari tauna ia diba edeseni amo hadibaia hereva maorodia do ia abia, badina ena inai tauna ese hereva koikoidia amo ia koia diba. Unai hegeregerena, Iehova ese Baibel lalonai hadibaia hereva maorodia ia henia, unai amo Satani ena lalohadai koikoidia ita dadaraia diba.​—2 Tim. 3:16, 17.

To Satani be unai ia diba. Unai dainai inai nega oromana ia gaukaralaia iseda lalona ia hamanokaia totona, unai amo Baibel duahiduahi bona stadi karana do ita rakatania. To namona be iena “koikoi karadia ibounai” ita dadaraia! (Efe. 6:11) Bona ita gaukara goada hereva momokani ita “lalopararalaia momokani” totona. (Efe. 3:18) To inai oi laloatao, toretore tauna ta, Noam Chomsky, ia gwau: “Ta ese emu kwarana harana lalonai hereva momokani ia atoa diba lasi. Unai be oi sibona ese oi tahua diba.” Unai dainai hereva momokani oi diba totona, “dina ta ta ai Toretore Helagadia [oi] tahua namonamo.”​—Kara 17:11.

Laloatao, Satani ia ura lasi lalohadai maorona oi abia eiava oi kamonai herevadia oi tahua namonamo. Dahaka dainai? Badina buka ta ia gwau lalohadai koikoidia “ese momo ia hakaudia kerere diba,” bema taunimanima be “laloa namonamo karana dainai idia lalometau.” (Media and Society in the Twentieth Century) Unai dainai namo lasi oi kamonai herevadia ibounai oi abia dae haraga. (Aon. 14:15) To emu lalomamina bona darana oi gaukaralaia hereva momokani oi lalopararalaia namonamo totona.​—Aon. 2:10-15; Roma 12:1, 2.

Tuari taudia ese lalohadai koikoidia idia gaukaralaia diba, edia inai taudia idia hagaria  totona, bena do idia ura lasi tuari. Danu, lalohadai koikoidia dainai tuari taudia be sibodia idia tuari heheni eiava tuari oreana idia rakatania diba. German ena ami jeneral ta ia gwau, idia be Tanobada Tuarina Ginigunana ai idia kwalimu lasi, badina taunimanima be “edia inai taudia edia lalohadai koikoidia ese idia hagaria, rabiti be gaigai dekenai ia gari hegeregerena.” Satani danu ese unai bamona koikoi karadia ia gaukaralaia iseda lalotamona karana ia hadikaia totona. Hegeregere, ia ura Keristani tadikaka taihu huanai heiriheiri ia havaraia eiava edia lalona ia veria bena do idia laloa Iehova ena orea be ia kara gageva eiava kara kerere ta ia karaia, unai dainai orea idia rakatania.

Namo lasi Satani ese oi ia koia! Namona be Dirava ena Hereva ese oi ia hakaua. Hegeregere, oi bona emu tadikaka taihu huanai lalotamona ia noho totona, Baibel ese ita ia hagoadaia ita “gwauatao heheni” totona bona bema heiriheiri ia vara, do ita hamaoromaoroa haraga. (Kol. 3:13, 14; Mat. 5:23, 24) Danu, ita ia sisiba henia, namo lasi kongrigeisen ita rakatania bona sibona ita noho. (Aon. 18:1) Namona be oi noho hegaegae Satani ena lalohadai koikoidia oi dadaraia totona. Sibona oi nanadaia: ‘Guna lau dekenai unai ia vara neganai, dahaka ese egu lalohadai ia biagua? Tanobada taudia eiava Dirava ena lauma?’​—Gal. 5:16-26; Efe. 2:2, 3.

Bema tuari tauna ta be ena gunalaia tauna ia badinaia lasi, ia be do ia tuari namonamo lasi. Unai dainai edia inai taudia ese lalohadai koikoidia idia gaukaralaia, unai amo tuari taudia ese edia gunalaia tauna do idia badinaia lasi. Reana do idia gwau: “Emui gunalaia taudia umui abidadama henidia lasi!” bona “Namo lasi idia ese dika dekenai umui idia hakaua lao!” Bona reana unai gunalaia taudia ese idia karaia kerere do idia gwauraia hedinarai. Satani danu be unai bamona. Ia ura lasi ita be Iehova ese ia abia hidi taudia ita badinaia.

Edena bamona sibona oi gimaia diba? Gau badana be Iehova ena orea ida oi gaukara bona ena taunimanima hakaua totona ia abia hidi taudia oi badinaia​—herevana idia be goevadae lasi. (1 Tes. 5:12, 13) Aposteit eiava ita idia ura koia taudia ma haida edia hereva dekenai iseda “laloa namonamo karana [ita] haboioa haraga lasi”​—⁠herevana ita  laloa idia gwauraia herevadia be momokani. (2 Tes. 2:2; Tito 1:10) Paulo ese Timoteo dekenai ia henia sisiba ita badinaia. Ita dibaia hereva momokanina ita badinaia noho, bona namona be ita laloatao daidia amo unai gaudia ita dibaia. (2 Tim. 3:14, 15) Momokani, gau momo ese idia hamomokania, kahirakahira lagani 100 lalonai Iehova ese ia gaukaralaia dalana ita abidadama henia diba, badina unai dala sibona amo ita be hereva momokani ita diba.​—⁠Mat. 24:45-47; Heb. 13:7, 17.

Laloatao, Satani be hehuni dalanai ita ia koia sibona lasi. Nega haida oi ia hagaria diba​—“idaunega amo unai lalohadai koikoina idia gaukaralaia.” (Easily Led​—A History of Propaganda) Britain ena profesa ta, Philip M. Taylor, ia gwau, Asuria taudia ese hagaria herevadia bona lalohadai koikoidia idia gaukaralaia edia inai taudia idia biagua totona. Satani ese taunimanima gari henia karana, dagedage o mase dainai gari karana, bona unai bamona gaudia ma haida ia gaukaralaia ita ia biagua totona, bena Iehova hesiai henia karana do ita rakatania.​—Isa. 8:12; Ier. 42:11; Heb. 2:15.

Namo lasi Satani ese oi ia hagaria dainai emu Dirava badinaia karana oi rakatania. Iesu ia gwau: “Tauanina idia alaia bona unai murinai gau ma ta idia karaia diba lasi taudia do umui gari henia lasi.” (Luka 12:4) Namona be Iehova ena gwauhamata oi abidadama henia, ia gwau ia ese oi do ia naria bona oi dekenai “taunimanima edia siahu ia hereaia gauna” do ia henia, bona oi do ia durua Satani ena koikoi karadia oi dadaraia totona.​—⁠2 Kor. 4:7-9; 1 Pet. 3:14.

Momokani, nega haida oi manoka o gari diba. To Iehova ese Iosua dekenai ia henia hagoadaia herevana ita laloatao be namo, ia gwau: “Do oi goada bona do oi boga auka. Do oi gari lasi, bona oiemu lalona do ia manoka lasi, badina be lau Lohiabada, oiemu Dirava, ese oi loaloa gabudia ibounai dekenai oi do lau bamoa noho.” (Ios. 1:9) Bema gau haida dainai oi lalohekwarahi, maoromaoro Iehova oi guriguri henia, bona ia dekenai emu lalohekwarahi oi gwauraia. Bona oi abia dae momokani “Dirava ena maino, laloparara ibounai ia hereaia gauna, ese [emu] kudouna bona lalona do ia gimaia,” unai amo Satani ena lalohadai koikoidia oi dadaraia diba.​—Fili. 4:6, 7, 13.

Dirava ena taunimanima hagaria totona, Asuria ena gwaukau tauna, Rabesake, ese ia gwauraia lalohadai koikoina oi laloatao, a? Ia gwau, ‘Tau ta ese Asuria taudia amo umui ia gimaia diba lasi. Emui Dirava, Iehova, danu be unai ia karaia diba lasi.’ Mai gari lasi ida ma ia gwau: ‘Iehova sibona ese ai ia hamaoroa inai tano ai hadikaia ore totona.’ To, Iehova be ena taunimanima dekenai dahaka ia gwau? “Do oi gari lasi, Asuria taudia idia gwau Lohiabada ese oi ia hamauria diba lasi dekenai oi gari lasi.” (2 Kin. 18:22-25; 19:6) Bena aneru ta ia siaia bona hanuaboi tamona lalonai Asuria taudia 185,000 ia alaia mase!​—2 Kin. 19:35.

Reana muvi ta oi itaia, bona unai muvi ai ma ta ese ta ia koia, to unai tauna be unai ia lalopararalaia lasi. Reana oi ura boiboi oi gwau: ‘Idia oi kamonai henia lasi! Idia be oi idia koia noho!’ Mani oi laloa, aneru danu be ita dekenai idia boiboi noho, idia gwau: “Namo lasi Satani ena koikoi herevadia ese umui idia koia!”

Vadaeni, Satani ena lalohadai koikoidia dainai emu taiana oi koua. (Aon. 26:24, 25) Iehova oi kamonai henia bona oi karaia gaudia ibounai lalonai ia oi abidadama henia. (Aon. 3:5-7) Iena noinoi herevana oi kamonai henia, ia gwau: “Egu natuna e, do oi aonega, vadaeni do lau moale.” (Aon. 27:11) Bena emu lalona oi gimaia diba!