1, 2. Iehova sibona oi itaia noho ena anina be dahaka?

INAI “dina gabediai nega aukadia” do ita mamia, bona Dirava ese inai tanobada ai maino ia do mailaia lasi neganai, iseda mauri be do ia auka momokani. (2 Tim. 3:1) Unai dainai ita sibona ita nanadaia, ‘Lau be daika amo heduru bona hakaua herevadia lau tahua?’ Reana maoromaoro do oi gwau, “Iehova amo heduru do lau tahua.” Bona unai be haere maorona.

² Iehova sibona oi itaia noho, ena anina be dahaka? Bona edena dala ai ita hahedinaraia hekwakwanai badadia ita davaria noho lalonai, Ia sibona do ita itaia? Salamo torea tauna ese ita ia hagoadaia, mauri ena hekwakwanai negadiai Iehova ita itaia noho be namo. (Salamo. 123:1-4 duahia.) Danu ia ese Iehova ita itaia noho karana be hesiai tauna ese ena biaguna ia itaia karana ida ia hahegeregerea. Salamo torea tauna ena hereva ena anina be dahaka? Hesiai tauna be ena biaguna dekenai aniani bona gimaia karana sibona do ia tahua lasi, to ia be hanaihanai ena biaguna do ia itaia noho, ena ura gaudia ibounai ia badinaia bona ia hesiai henia totona. Unai hegeregerena, dina ta ta ai Iehova ena ura ita lalopararalaia totona, Baibel ita stadilaia namonamo bona ena hakaua herevadia ita badinaia be  namo. Bema unai ita karaia, do ita abia dae momokani hekwakwanai negadiai, Iehova be ita do ia durua.​—Efe. 5:17.

3. Dahaka ese iseda lalona ia veria diba Iehova ita badinaia lasi totona?

³ Herevana, ita diba Iehova badinaia karana be mai anina bada, to gau haida ese iseda lalona ia veria diba. Iesu ena tura namona ta Mareta dekenai, unai ia vara. Mareta be “gaukara momo ia karaia.” (Luka 10:40-42) Bema abidadama goada hahinena, Mareta dekenai unai ia vara, herevana Iesu be unai negai ia noho, vadaeni ita gwau diba, ita dekenai danu unai ia vara diba. Dahaka gau ma haida ese iseda Iehova badinaia karana ia hadikaia diba? Inai atikol ai ita ese edena dala ai haida edia kara ese iseda lalona ia veria diba bona edena dala ai Iehova do ita badinaia noho do ita herevalaia.

4. Dahaka dainai ita hoa diba badina Mose be Gwauhamata Tanona lalonai ia vareai lasi?

⁴ Mose be hanaihanai Iehova ena hakaua herevadia ia badinaia. Oibe, ia be “ia gini goada noho ita itaia diba lasi Tauna ia itaia bamona.” (Heberu 11:24-27 duahia.) Baibel ese ita ia hadibaia, “peroveta tauna ta Mose bamona be Israela dekenai ia hedinarai lou lasi. Mose be Iehova ese ia hereva henia, tau ta be ma ta ia hereva henia bamona.” (Deu. 34:10, NWT) Herevana Mose be Iehova ena turana namona, to ia be Gwauhamata Tanona lalonai ia vareai lasi. (Num. 20:12) Dahaka dainai Mose dekenai unai ia vara?

5-7. Israela taudia be Aigupito idia rakatania murinai, dahaka hekwakwanai ia vara, bona Mose be edena dala ai unai ia hamaoromaoroa?

⁵ Israela taudia be Aigupito idia rakatania bona hua rua murinai​—Sinai Ororona ai idia do ginidae lasi neganai​—hekwakwanai badana ta ia vara. Taunimanima be idia maumau matamaia badina ranu be lasi. Mose dekenai idia maumau bona unai hekwakwanai ia bada dainai Mose ese Iehova dekenai ia noinoi, ia gwau: “Inai taunimanima dekenai dahaka do lau karaia? Idia be lau do idia hodoa mase gwauraia.” (Eso. 17:4) Iehova ese ena noinoi ia abia dae bona Mose dekenai hakaua hereva namodia ia henia. Dirava ese ia hamaoroa, ena itotohi do ia abia bona Sinai Ororo (Horeba) ena nadi badana do ia botaia bena nadi amo ranu do ia raka-lasi. Baibel ia gwau: “Mose be inai bamona ia karaia Israela ena gunalaia taudia edia vairana dekenai.” Vadaeni, Israela taudia be ranu idia inua bona unai hekwakwanai idia hamaoromaoroa.​—Eso. 17:5, 6.

⁶ Baibel ese ma ia hahedinaraia, Mose be “unai gabu ena ladana ia atoa Masa bona Meriba, badina Israela taudia be Mose ida idia hepapahuahu bona inai hereva amo Iehova idia tohoa, idia gwau: ‘Iehova be iseda huanai ia noho eiava lasi?’” (Eso. 17:7 NWT) Unai gabu edia ladana idia atoa “Dibagani” bona “Maumau” be maoro.

⁷ Meriba ai ia vara gauna dainai, Iehova ena hemami be edena bamona? Ia diba Israela taudia be ena Lohia dalana idia maumauraia, to Mose idia maumauraia lasi. (Salamo 95:8, 9 duahia.) Israela taudia ese idia karaia karana be kerere. To, Mose be dala maorona ia badinaia. Iehova dekenai heduru ia tahua bona ena hakaua herevadia ia badinaia.

8. Lagani 40 murinai, Israela taudia be tano gagaena ai idia lao noho lalonai, dahaka hekwakwanai ia vara?

⁸ Lagani 40 murinai, tano gagaena ai idia lao noho lalonai, unai bamona hekwakwanai ia vara lou. To dahaka ia vara? Israela taudia be gabu ta ladana, Meriba  dekenai idia kamepa. Unai gabu be Kadesi ai, ia be Gwauhamata Tanona ena boda kahirakahira ia noho. * Israela taudia be idia maumau lou badina idia kamepa gabuna ai ranu be lasi. (Num. 20:1-5) To unai ia vara neganai, Mose be kerere badana ia karaia.

9. Mose be dahaka hadibaia herevadia ia abia, to dahaka ia karaia? (Laulau ginigunana herevalaia.)

⁹ Israela taudia idia maumau neganai, Mose be dahaka ia karaia? Iehova ena heduru totona ia noinoi lou. Bena Iehova ese ia hamaoroa nadi badana do ia botaia lasi. To Dirava ese Mose ia hamaoroa, ena itotohi do ia abia, nadi badana vairanai taunimanima do ia haboua, bona unai nadi badana do ia hereva henia. (Num. 20:6-8) Mose be unai nadi badana ia hereva henia lasi. To ia badu dikadika dainai idia haboua taudia ibounai dekenai ia boiboi, ia gwau: “Kamonai lasi taudia e, umui kamonai, inai nadi dekena amo emui ranu do ai haheaua mai, a?” Bena ena itotohi ia abia bona nega rua nadi ia botaia.​—Num. 20:10, 11.

10. Mose ena kara dainai, Iehova ena hemami be edena bamona?

¹⁰ Iehova be Mose dekenai ia badu. (Deu. 1:37; 3:26) Dahaka dainai Iehova ia badu? Reana ena badina be momo. Ataiai ita herevalaia bamona, Iehova ia badu badina Mose be hakaua hereva matamatadia ia abia, to ia badinaia lasi.

11. Mose ese nadi ia botaia karana amo, dahaka dainai Israela taudia idia laloa unai hoa karana be Iehova amo ia mai lasi?

¹¹ Iehova ia badu ena badina ma ta be inai: Meriba ginigunana ai idia noho nadi be granite nadidia eiava idia be nadi aukadia. Herevana ta be granite nadina ia botaia, to ranu do ia raka-lasi diba lasi. To, Meriba iharuana ena ororo gabudiai idia noho nadi be idau, badina unai gabu ai be limestone nadi o nadi manokamanoka idia noho. Limestone nadi be manoka dainai, unai bamona gabudiai ranu be tano lalonai ia haboua diba. Unai dainai, Mose be nadi ia hereva henia lasi to nega rua ia botaia neganai, reana Israela taudia do idia laloa ranu be nadi manokana amo ia mai, to unai be Iehova ena hoa karana amo lasi, a? * Ita diba momokani lasi.

12. Dahaka badina ma ta dainai Iehova be Mose bona Arona dekenai ia badu?

¹² Iehova be Mose bona Arona dekenai ia badu ena badina ma ta ia noho. Mose be Israela taudia dekenai ia gwau: “Inai nadi dekena amo emui ranu do ai haheaua mai, a?” Mose ese inai hereva “ai,” ia gaukaralaia amo ia hahedinaraia reana ia sibona bona Arona, ia herevalaia. Unai hereva ese idia hahedinaraia, Mose be Iehova ia matauraia lasi​—ena be unai hoa karana be Dirava ese ia havaraia. Toana be unai hereva be Salamo 106:32, 33 ese ia hamomokania. Ia gwau: “Meriba ranu gabudia dekenai, Israela taudia ese Lohiabada idia habadua, bona Mose ese hisihisi ia davaria idia dainai. Badina be idia ese Mose ena lauma idia habadua, bona unai dainai ia ese hereva maoromaoro ia gwauraia lasi.” * (Num. 27:14) Oibe, Mose be ena kara amo Iehova ia  matauraia lasi. Iehova be Mose bona Arona dekenai ia gwau: “Umui ese  . . . lauegu hereva umui utua.” (Num. 20:24) Unai be kara dika badana!

13. Dahaka dainai Iehova ese Mose ia hahemaoro henia karana be maoro bona ia idau lasi?

¹³ Mose bona Arona be Iehova ena taunimanima idia gunalaia taudia, bona unai be maduna badana. (Luka 12:48) Matamanai, Israela besena ena uru ta edia gwau-edeede karadia dainai, Iehova ese idia ia koua Kanana tanona lalonai idia vareai lasi totona. (Num. 14:26-30, 34) Iehova ese kamonai lasi Israela taudia ia hahemaoro henia hegeregerena, Mose ia hahemaoro henia be maoro, ena gwau-edeede karana dainai bona unai ia idau lasi. Idia gwau-edeede Israela taudia ma haida bamona, Mose danu be Gwauhamata Tanona lalonai ia vareai lasi.

14, 15. Dahaka dainai Mose ia gwau-edeede?

¹⁴ Dahaka dainai Mose be unai gwau-edeede karana ia hahedinaraia? Salamo 106:32, 33 ena hereva ma ita itaia lou, ia gwau: “Meriba ranu gabudia dekenai, Israela taudia ese Lohiabada idia habadua, bona Mose ese hisihisi ia davaria idia dainai. Badina be idia ese Mose ena lauma idia habadua, bona unai dainai ia ese hereva maoromaoro ia gwauraia lasi.” Herevana Israela taudia be Iehova idia maumauraia, to unai kara ese Mose ena lalona ia habadua. Sibona ena ura ia biagua lasi dainai, hereva maorona ia gwauraia lasi.

¹⁵ Mose be haida ese idia karaia karana ia lalohisihisilaia dainai Iehova ia badinaia lasi. To, hekwakwanai ginigunana ia vara neganai Mose be dala maorona ai unai ia hamaoromaoroa. (Eso. 7:6) Oibe, ia be lagani momo lalonai Israela taudia edia gwau-edeede karana ia haheaukalaia dainai, ia hesiku bona ia lalohisihisi. Unai dainai, do ita gwau Mose be sibona ena hemami ia laloa bada, to Iehova hanamoa daladia ia laloa lasi, a?

16. Dahaka dainai Mose ese ia karaia karana ita laloa be namo?

¹⁶ Bema abidadama peroveta tauna Mose dekenai unai ia vara, vadaeni ita dekenai unai ia vara diba. Mose bamona, ita danu be kahirakahira laulau dalanai gwauhamata tanona o Dirava ese ia gwauhamatalaia tanobada matamata lalonai do ita vareai. (2 Pet. 3:13) Ita ibounai ita ura unai hahenamo badana ita abia, ani? Iseda tahua gaudia ita hagugurua totona, Iehova sibona ita itaia noho be namo, anina be hanaihanai ia ita badinaia bona ena ura ita karaia. (1 Ioa. 2:17) Mose ena kara amo dahaka ita dibaia?

17. Dahaka ese ita ia durua diba ita lalohisihisi lasi totona?

¹⁷ Oi lalohisihisi lasi. Herevana, iseda mauri ai, ita davaria hekwakwanai be idia idau lasi, namona be “ita hesiku lasi kara namodia ita karaia totona, badina bema ita hesiku lasi, nega korikori ai ita ese huahua do ita abia.” (Gal. 6:9; 2 Tes. 3:13) Bema hekwakwanai idia vara o ta ena kara dainai oi lalohisihisi, emu hereva bona badu oi biagua diba, a? (Aon. 10:19; 17:27; Mat. 5:22) Bema haida ese iseda lalona idia habadua, namona be ita badu lasi to Iehova dekenai ita rakatania. (Roma 12:17-21 duahia.) Bema Iehova ita badinaia, ita hahedinaraia ia ita matauraia, ia vara hekwakwanai be ia dekenai ita rakatania, bona mai haheauka ida ia ita naria, badina nega korikori ai unai do ia hamaoromaoroa. To bema, ma haida edia dika davana ita haloua, unai ese ia hahedinaraia Iehova ita matauraia lasi.

18. Hakaua herevadia ita badinaia neganai, dahaka ita laloa be gau badana?

 ¹⁸ Hakaua hereva matamatadia badinaia namonamo. Iehova ese ita dekenai ia henia hakaua hereva matamatadia be mai momokani ida ita badinaia, a? Bema oibe, anina be hakaua hereva gunadia be hari idia idau dainai ita badinadia lasi. To, ita be Iehova ese ena orea amo ia henia hakaua hereva matamatadia ita badinaia noho. (Heb. 13:17) Bona danu, mai anina bada gauna be inai: “Namona be Toretore Helagadia lalonai idia torea gaudia sibona do umui badinaia.” (1 Kor. 4:6) Unai ita karaia neganai, ita be Iehova sibona ita itaia noho.

19. Dahaka ita karaia be namo unai amo iseda hetura karana Iehova ida do ia dika lasi?

¹⁹ Namo lasi ma haida edia kara ese emu hetura karana Iehova ida ia hadikaia. Bema Iehova ita badinaia, ma haida edia kara kereredia do ita laloa bada lasi bona danu iseda hetura karana Ia ida do ia hadikaia lasi. Unai be mai anina bada, badina Mose bamona, Dirava ena orea lalonai ita be mai iseda maduna. Momokani, namona be ita ta ta be ‘mauri abia totona ita hekwarahi lalonai, mai gari bona mai heudeheude ida do ita noho, unai amo Dirava ese ita do ia hamauria.’ Danu namona be ita laloatao, Iehova be ita dekenai taravatu aukadia ia atoa lasi, ita ia hahemaoro henia totona. (Fili. 2:12) To, bema mai kudouna ibounai ida Iehova ita lalokau henia, gau ta ese ena lalokau amo ita ia hapararaia diba lasi.​—Sal. 119:165; Roma 8:37-39.

20. Iseda lalona ita hadaia dahaka ita karaia totona?

²⁰ Inai nega aukadia lalonai, namona be ‘guba dekenai ia helai noho’ Diravana ena ura sibona ita badinaia. Namo lasi ma haida edia kara ese iseda hetura karana Iehova ida ia hadikaia. Mose dekenai ia vara gauna ese ita dekenai mai anina bada gauna ia hadibaia. Namo lasi haida edia kara kereredia dainai ita lalohisihisi. To, namona be eda lalona ita hadaia iseda Dirava, Iehova sibona ita itaia o badinaia noho ela bona ia ese ita dekenai ia hebogahisi henia.​—Sal. 123:1, 2.