“Taunimanima Idauidau” Dekenai Hebogahisi Hahedinaraia
IESU be ena hahediba taudia dekenai sivarai namona harorolaia dalana ia hadibaia neganai, ia diba momo ese Basileia sivaraina do idia abia dae lasi. (Luka 10:3, 5, 6) Iseda haroro gaukara ai, haida be ita idia gwau henia eiava ita idia dagedage henia diba. Momokani, unai bamona karadia dainai, do ia auka ita haroro henia taudia dekenai hebogahisi ita hahedinaraia totona.
Hebogahisi tauna be haida edia ura gaudia bona hekwakwanai ia itaia, bona ia ura idia ia durua. To, bema haroro gaukara ai ita davaria taudia dekenai hebogahisi ita hahedinaraia lasi, reana iseda haroro gaukara do ita moalelaia lasi bona momo do ita durua lasi. To, hebogahisi ita hahedinaraia neganai, ia be hegeregere lahi dekenai au momo ita atoa bamona—unai ese iseda haroro gaukara urana ia habadaia!—1 Tes. 5:19.
Ena be nega haida ia auka hebogahisi ita hahedinaraia totona, to dahaka ita karaia diba? Ita tohotohoa diba haheitalai toi mani ita herevalaia—Iehova, Iesu, bona aposetolo Paulo edia haheitalai.
IEHOVA ENA HEBOGAHISI KARANA TOHOTOHO
Lagani tausen momo gunanai, Iehova be iena ladana idia gwauraia dika karana ia haheaukalaia. To, ia ese “tanikiu lasi taudia bona kara dika taudia ia hebogahisi henidia” noho. (Luka 6:35) Iena hebogahisi be ena haheauka karana amo ia hahedinaraia. Iehova ia ura “taunimanima idauidau” ia hamauria. (1 Tim. 2:3, 4) Ena be Dirava ese kara dika ia inai henia, to taunimanima ia lalodia bada bona ia ura lasi ta ia mase.—2 Pet. 3:9.
Iehova ia diba Satani ese ena koikoi karadia amo taunimanima edia lalona ia hadiburaia noho. (2 Kor. 4:3, 4) Momo be idia maragi negana amo idia dekenai hadibaia hereva koikoidia bona kara gagevadia idia hadibaia dainai, ia auka hereva momokani idia abia dae totona. Iehova ia ura bada unai bamona taudia ia durua. Edena bamona ita diba?
Iehova ese Nineva taudia ia laloa dalana mani ita itaia. Ena be dagedage karadia idia karaia, to Iehova be Iona dekenai ia gwau: “Lau danu be Nineva siti badana totona do lau hebogahisi lasi, a? Unuseniai, maoro bona kerere edia idau idia diba lasi taunimanima 120,000 mai kahana idia noho.” (Iona 4:11 NWT) Iehova ia diba Nineva taudia be hereva momokani idia diba lasi dainai, mai hebogahisi ida Iona ia siaia idia dekenai hadibaia herevana ia gwauraia totona.
Iehova bamona, taunimanima edia mauri ita laloa bada be namo. Ia ita tohotohoa diba bema mai ura bada ida kamonai taudia ita durua, ena be hereva momokani idia abia dae lasi.
IESU ENA HEBOGAHISI KARANA TOHOTOHOA
Iesu be ena Tamana bamona, “hutuma ia itaia neganai ia hebogahisi henidia, badina idia be mamoe naria tauna ese ia naria lasi mamoe bamona, haida ese idia haberoa bona idia dadaraia.” ( Mat. 9:36) Iesu ia laloparara; iena hereva kamonai totona idia mai taudia be edia dubu gunalaia taudia ese hereva koikoidia idia hadibaia bona idia kara auka henidia. Ena be ia diba momo be koua gaudia haida dainai iena hereva do idia abia dae lasi, to Iesu ia hesiku lasi “gau momo ia hadibadia” totona.—Mar. 4:1-9.
Bema ta ia ura lasi kamonai ita badu lasi
Mauri ai gau haida idia idau hegeregerena, ta be hereva momokani dekenai lalohadai maorona ia abia diba
Bema taunimanima idia ura lasi ita harorolaia sivaraina idia kamonai, namona be unai bamona idia karaia ena badina ita lalopararalaia. Reana haida be Baibel ena hereva o Keristani taudia dekenai lalohadai kererena idia abia, badina idia itaia sibodia idia gwauraia Keristani taudia be kara kerere haida idia karaia. Sedira haida ese idia dekenai ita abia dae gaudia idia gwauraia koikoi. To haida be reana sivarai namona idia abia dae dainai, edia gabu ai idia noho taudia eiava ruma bese taudia ese idia inai henidia.
Haroro gaukara ai ita davaria taudia haida be idia ura lasi kamonai, badina reana edia mauri ai ia vara hekwakwanai ta dainai idia lalohisihisi. Misinari taihu ta ladana Kim, ia gwau: “Emai teritori ena kahana ta ai idia noho taudia momo be tuari lalonai edia bese bona edia kohu ibounai idia haboioa. Idia laloa idia be helaro lasi vaira nega totona. Idia lalohisihisi bona idia ura lasi ta idia kamonai henia. Inai teritori ai, nega momo ai davaria taudia be idia ura lasi ai harorolaia sivaraina idia kamonai. Nega ta, lau haroro noho lalonai ta ese lau ia botaia.”
Edena dala ai Kim be hebogahisi karana ia hahedinaraia noho herevana unai bamona dika ia davaria? Kim ia gwau: “Lau idia dagedage henia neganai, Aonega herevadia 19:11 ena hereva lau laloatao, ia gwau: ‘Tau ta ena aonega ese haheauka ia henia noho vadaeni ia badu haraga lasi.’ Emai teritori ai idia noho taudia edia mauri ai idia vara gaudia lau laloa neganai, unai ese lau ia durua idia dekenai hebogahisi lau hahedinaraia totona. Badina haroro gaukara ai kamonai taudia haida ita davaria danu. Unai teritori ai, lou henia namodia haida ai davaria.”
Reana sibona ita nanadaia, ‘Bema egu mauri be ita haroro henia taudia edia bamona, Basileia sivaraina do lau abia dae, a?’ Hegeregere, bema nega momo ita kamonai haida ese Iehova ena Witnes taudia idia gwauraia koikoi, be edena bamona? Bema iseda noho dalana be idia bamona, reana ita danu be do ita kamonai lasi bona hebogahisi do ita hahedinaraia lasi. Namona be Iesu ena hahegani ita laloa; Taunimanima ese ita dekenai idia karaia hegeregerena, idia dekenai danu unai bamona do ita karaia. Oibe, unai ese ita do ia hagoadaia ita kamonai namonamo totona ena be unai ita karaia be auka.—Mat. 7:12.
PAULO ENA HEBOGAHISI KARANA TOHOTOHOA
Aposetolo Paulo be dagedage taudia dekenai hebogahisi ia hahedinaraia danu. Dahaka dainai? Badina guna ia danu be dagedage tauna. Paulo ia gwau: “Guna Dirava ena ladana lau hadikaia, iena taunimanima lau dagedage henia, bona hemataurai karana lau hahedinaraia lasi. To ia ese lau ia hebogahisi henia, badina lau diba lasi bona mai abidadama lasi ida lau kara.” (1 Tim. 1:13.) Paulo ia laloparara Iehova bona Iesu be ia dekenai hebogahisi idia hahedinaraia. Danu, ia itaia ia haroro henia taudia haida edia kara be guna ia karaia karadia bamona.
Nega haida, Paulo be hahediba hereva koikoidia idia goadalaia taudia ia davaridia. Ena hemami be edena bamona? Kara 17:16 ia gwau, Paulo be Atena ai ia noho neganai, “ia itaia unai taoni be kaivakuku amo ia honu, unai dainai ena lalona ia hisihisi.” To, Paulo be idia ia haroro henia totona, ia ese kaivakuku tomadiho henia lasi karana ia herevalaia goadagoada. (Kara 17:22, 23) Paulo be taunimanima idauidau edia mauri dalana hegeregerena ena haroro daladia ia haidaua, unai amo “dala idauidau ibounai amo haida [ia] hamauria diba.”—1 Kor. 9:20-23.
Namona be Paulo bamona haida edia lalohadai kereredia o hadibaia hereva koikoidia ita dibaia, bena mai aonega ida ‘maino ena sivarai ita gwauraia.’ (Isa. 52:7) Taihu ta ladana Dorothy ia gwau: “Emai teritori ai, momo idia laloa Dirava be ia kara auka bona ia hahemaoro haraga. Unai bamona taudia be Dirava idia abidadama henia dainai idia lau tanikiu henidia bena Baibel amo Iehova ena lalokau karana bona gwauhamata vaira nega totona be idia dekenai lau hadibaia.”
“KARA NAMO AMO DIKA OI HALUSIA NOHO”
Ita be inai nega dokodia lalonai ita noho dainai, ita laloparara ita haroro henia taudia haida edia “kara dika do idia habadaia momokani.” (2 Tim. 3:1, 13) To namo lasi unai ese iseda hebogahisi hahedinaraia karana o iseda moale ia hadikaia. Iehova ese ita dekenai goada ia henia diba “kara namo amo dika [ita] halusia” totona. (Roma 12:21) Painia ta ladana Jessica, ia gwau: “Nega momo haroro gaukara ai, ita bona ita harorolaia sivaraina idia laloa maragi bona idia hekokoroku taudia lau davaria. Unai ese ita ia habadua diba. Unai dainai, egu hereva lau do matamaia lasi neganai, egu kudouna ai Iehova lau guriguri henia lau ia durua, ia ese taunimanima ia itaia dalana lau tohotohoa totona. Unai amo lalohadai maorona lau abia bona ruma tauna do lau durua daladia lau lalohadailaia.”
Mauri hanaihanai idia ura abia kudou-maoro taudia ita tahua noho
Iseda haheauka karana ese haida ia durua hereva momokani idia kamonai totona
Namona be iseda tadikaka taihu hagoadaia daladia ita laloa danu. Jessica ma ia gwau: “Bema egu tadikaka ta be kerere ta ia karaia, lau hekwarahi iena kerere lau laloa lasi totona. To, gau namodia, hegeregere iseda haroro gaukara ese ia havaraia anina namodia lau herevalaia ena be haida idia ura lasi kamonai.”
Iehova be haroro gaukara ai ita davaria hekwakwanai idauidau ia diba namonamo. Iena hebogahisi karana ita tohotohoa neganai ia moale bada! (Luka 6:36) Oibe, Iehova ena hebogahisi karana be ia doko diba lasi. Ita abia dae momokani Iehova be nega korikori ai, inai nega oromana ena dokona do ia haorea vaitani. Unai dainai, hari iseda haroro gaukara ita goadalaia. (2 Tim. 4:2) Namona be mai ura bada ida iseda haroro gaukara ita hagugurua bona “taunimanima idauidau” dekenai hebogahisi ita hahedinaraia noho.
