Iesu be taunimanima ia hadibaia maino ai idia noho totona. To iena aposetolo taudia ia hamaoroa, ia gwau: “Umui laloa lasi tanobada dekenai maino lau mailaia, maino lasi, to tuari kaia lau mailaia. Badina ruma bese hapararaia totona lau mai: Mero ese ena tamana do ia badu henia, kekeni ese ena sinana do ia badu henia, bona ravana kekeni ese ena ravana hahine do ia badu henia.” (Mat. 10:34, 35) Iesu ena hereva anina be dahaka?

Iesu ia ura lasi famili idia parara, to ia diba iena hahediba herevadia ese famili do ia hapararaia. Unai dainai, bema haida idia ura Keriso ena hahediba taudia ai idia lao bona bapatiso idia abia, namona be idia diba idia karaia disisen dainai edia famili do idia moale lasi. Bema edia Witnes lasi adavana eiava famili lalonai ma haida ese idia dagedage henia, reana do ia auka Keriso ena hahediba herevadia idia badinaia noho totona.

Baibel ese Keristani taudia ia hagoadaia ‘taunimanima ibounai ida maino ai do idia noho’ totona. (Roma 12:18) To famili haida lalonai Iesu ena hahediba herevadia be “tuari kaia” bamona. Unai ia vara diba bema famili lalonai ta be Iesu ena hahediba herevadia ia abia dae, to ma haida be unai gaudia idia dadaraia. Unai bamona negadiai, hereva momokani ia dibaia noho tauna be ena famili edia ‘inai tauna’ ai ia lao.​—Mat. 10:36.

Keriso ena hahediba taudia idia noho ruma besena lalonai ma haida edia tomadiho be idau. Unai dainai, nega haida disisen do idia karaia Iehova bona Iesu idia hamoalea eiava edia varavara idia hamoalea. Hegeregere, reana Witnes lasi varavara ese do idia doria dina badadia idia moalelaia totona. Unai bamona hahetoho negadiai, daika do idia hamoalea? Iesu ia gwau: “Ena tamana bona sinana ia ura henia bada, to lau ia ura henia maragi tauna be egu hahediba tauna ai ia lao diba lasi.” (Mat. 10:37) Oibe, Iesu ia gwau lasi ta be iena hahediba tauna ai ia lao neganai, iena tama sina lalokau henia karana do ia hamaragia. To, ia hahedinaraia edia mauri lalonai mai anina bada gaudia idia atoa guna be namo. Bema Witnes lasi varavara ese Iehova tomadiho henia karana idia koua, namona be idia ita lalokau henia noho, to ita laloatao Dirava lalokau henia karana ita atoa guna be mai anina bada.

Famili edia dagedage karadia ese ita ia hahisia bada. To, Iesu ena hahediba taudia ese ena hereva idia laloatao, ia gwau: “[Egu] hisihisi auna ia ura lasi huaia bona lau murinai ia raka tauna be egu hahediba tauna ai ia lao diba lasi.” (Mat. 10:38) Danu, Keristani taudia be edia famili ese idia dagedage henia neganai, idia laloparara Keriso ena hahediba taudia be hisihisi do idia davaria. To, idia ura kara namodia idia hahedinaraia noho, unai amo edia famili edia lalona idia veria hereva momokani idia abia dae totona.​—1 Pet. 3:1, 2.