1. Dahaka dainai disasta totona ita hegaegae be aonega karana?

 HEGAEGAE karana ese ita do ia hamauria. Hegeregere, disasta ia vara neganai, idia hegaegae taudia be idia roho mauri bona ma haida idia durua diba. Europe ai taunimanima ia durua orea ta, ia gwau: “Hegaegae namonamo karana ese taunimanima ia hamauria diba.”

2. Dahaka dainai hisihisi badana totona ita hegaegae be namo? (Mataio 24:44)

² “Hisihisi badana” be karaharaga do ia vara. (Mat. 24:21) To, hisihisi badana be disasta ma haida amo ia idau, badina ita diba do ia mai. Lagani 2,000 bamona gunanai, Iesu ese ia murinai idia raka taudia ia hadibaia unai dina totona do idia noho hegaegae. (Mataio 24:44 duahia.) Bema ita hegaegae, unai nega aukana do ita haheaukalaia bona ma haida do ita durua idia hegaegae totona.​—Luka 21:36.

3. Edena dala ai haheauka, hebogahisi bona lalokau ese ita do ia durua hisihisi badana totona do ita hegaegae?

³ Namona be kara toi do ita goadalaia, bona unai amo do ita hegaegae hisihisi badana ita haheaukalaia totona. Bema ita idia hamaoroa, hahemaoro hereva aukana ita harorolaia bona iseda inai taudia ese ita idia dagedage henia, dahaka do ita karaia? (Apok. 16:21) Iehova ita badinaia totona namona be ita haheauka, badina ita abia dae ia ese ita do ia gimaia. Dahaka do ita karaia bema iseda tadikaka taihu be edia kohu haida eiava ibounai idia haboioa? (Hab. 3:17, 18) Idia ita hebogahisi henia dainai idia dekenai heduru do ita henia. Bema tanobada besedia ese ita idia tuari henia bona nega sisina lalonai tadikaka bona taihu ida gabu tamona ai ita noho, dahaka do ita karaia? (Ese. 38:10-12) Namona be iseda lalokau tadikaka taihu dekenai ia goada, badina unai ese ita do ia durua unai nega aukana ita haheaukalaia totona.

4. Edena dala ai Baibel ese ia hahedinaraia haheauka, hebogahisi bona lalokau ita habadaia noho be namo?

 ⁴ Dirava ena Hereva ese ita ia durua haheauka, hebogahisi bona lalokau ita habadaia noho. Luka 21:19 ia gwau: “Emui haheauka karana dainai emui mauri do umui dogoatao.” Kolose 3:12 ia gwau: “Inai bamona kara be dabua bamona do umui atoa, hebogahisi.” Bona 1 Tesalonika 4:9, 10 ia gwau: “Dirava ese umui ia hadibaia umui lalokau heheni totona. . . . To tadikaka e, umui ai noia, unai do umui karaia noho bona do umui habadaia.” Unai siri be hahediba taudia dekenai idia torea, ena be idia ese haheauka, hebogahisi bona lalokau idia hahedinaraia vadaeni. To, namona be unai kara do idia habadaia noho. Unai ita karaia danu be namo. Ita durua totona, mani Keristani taudia ginigunadia ese unai kara idia hahedinaraia daladia ita herevalaia. Bena do ita itaia edena dala ai unai hahediba taudia ita tohotohoa diba, bona ita hamomokania hisihisi badana totona ita hegaegae.

5. Edena dala ai Keristani taudia ginigunadia ese hahetoho idia haheaukalaia?

⁵ Keristani taudia ginigunadia idia haheauka be namo. (Heb. 10:36) Unai nega ai momo ese idia davaria hekwakwanai idia davaria danu. To, idia be Keristani taudia dainai hahetoho ma haida idia davaria danu. Iuda tomadiho gunalaia taudia bona Roma gavamani sibona ese idia dagedage henidia lasi, to edia famili korikoridia ese idia karaia danu. (Mat. 10:21) Bona idia gaukara goada kongrigeisen lalonai, aposteit taudia edia hahediba hereva koikoidia bona hapararaia karana idia dadaraia totona. (Kara 20:29, 30) To, unai Keristani taudia idia haheauka. (Apok. 2:3) Edena dala ai? Idia ese Baibel ai haheauka karana idia hahedinaraia taudia, hegeregere Iobu ena sivarai idia laloa dobu. (Iam. 5:10, 11) Goada idia abia totona idia guriguri. (Kara 4:29-31) Bona idia laloatao, Iehova ese edia haheauka karana do ia hanamoa.​—Kara 5:41.

6. Merita ese dagedage ia haheaukalaia karana amo dahaka oi dibaia?

⁶ Ita danu ita haheauka diba bema hanaihanai Dirava ena Hereva bona iseda pablikeisen ai, idia haheauka taudia edia haheitalai ita stadilaia bona laloa dobu. Albania ai, taihu ta ladana Merita be unai bamona ia karaia dainai, ena famili edia dagedage karana ia haheaukalaia. Ia gwau: “Baibel ai Iobu ena sivarai lau stadilaia karana ese lau ia hagoadaia bada. Iobu be hisihisi bada ia davaria, bona ena be unai hisihisi ena badina ia diba lasi, to ia gwau: ‘Lau ese egu Dirava do lau badinaia noho ela bona lau mase!’ (Iobu 27:5) Lau laloa Iobu ena hekwakwanai ese lauegu ia hereaia. Iobu be ena hisihisi ia havaraia tauna ia diba lasi, to egu hisihisi ia havaraia tauna be lau diba.”

7. Ena be hekwakwanai badana ta ia do vaa lasi, to hari dahaka ita karaia be namo?

⁷ Hanaihanai Iehova dekenai iseda lalohekwarahi ibounai ita gwauraia neganai, iseda haheauka karana do ia goada. (Fili. 4:6; 1 Tes. 5:17) Reana hari, hekwakwanai badana ta oi davaria lasi. To, oi lalohisihisi, daradara eiava oi diba lasi dahaka do oi karaia neganai, Iehova ena heduru totona oi guriguri, a? Bema dina ta ta ena hekwakwanai maragidia dainai hanaihanai Dirava oi guriguri henia, vaira nega ai hekwakwanai badadia idia vara neganai, do ia auka lasi iena heduru oi tahua totona. Unai amo do oi abia dae momokani, Iehova ia diba edena nega ai bona edena dala ai oi do ia durua.​—Sal. 27:1, 3.

8. Mira ena haheauka karana ese edena dala ai ita ia durua diba vaira nega ai ita haheauka totona? (Iamesi 1:2-4) (Laulau itaia danu.)

⁸ Bema hari iseda hekwakwanai ita haheaukalaia, vaira nega ai hisihisi badana do ita haheaukalaia diba. (Roma 5:3) Dahaka dainai unai  bamona ita hereva? Tadikaka bona taihu momo idia davaria hekwakwanai ta idia haheaukalaia neganai, idia ia durua gabeai hekwakwanai idia haheaukalaia totona. Haheauka karana ese idia ia hagoadaia, bona idia abidadama Iehova ia noho hegaegae bona ia ura idia do ia durua. Oibe, edia abidadama ese idia ia durua gabeai hekwakwanai idia haheaukalaia totona. (Iamesi 1:2-4 duahia.) Albania ai, painia taihu Mira ia itaia guna hekwakwanai ia haheaukalaia karana ese ia durua hari ia haheauka noho totona. Ia gwau nega haida ia mamia ia sibona be hekwakwanai momo ia davaria. To lagani 20 lalonai Iehova ese ia durua karana ia laloa, bona sibona ia hamaoroa: ‘Oi abidadama noho. Iehova ese oi ia durua hekwakwanai momo oi haheaukalaia dainai, ena hesiai gaukara oi hadokoa lasi.’ Namona be oi danu be Iehova ese oi ia durua dalana oi laloa. Namona be oi abidadama, Dirava be oi ia itaia bona oi do ia hanamoa. (Mat. 5:10-12) Bena hisihisi badana ia matamaia neganai, haheauka dalana oi diba vadaeni bona do oi haheauka noho.

9. Edena dala ai Suria tanona ai Antioka kongrigeisen ese hebogahisi karana idia hahedinaraia?

⁹ Iudea ai Keristani taudia dekenai hitolo bada ia vara negana ena sivarai mani ita laloa. Suria tanona ai, Antioka kongrigeisen be unai sivarai idia kamonai murinai, Iudea tadikaka taihu totona idia hebogahisi bada. To edia hebogahisi be kara amo idia hahedinaraia danu. Idia ese “edia lalona idia hadaia, idia ta ta dekenai ia noho gauna hegeregerena, heduru gaudia be Iudea ai idia noho tadikaka dekenai do idia siaia.” (Kara 11:27-30) Ena be hitolo bada idia davaria tadikaka taihu be gabu daudau ai idia noho, to Antioka ai tadikaka taihu be edia lalona idia hadaia heduru do idia siaia.​—1 Ioa. 3:17, 18.

10. Iseda tadikaka taihu be disasta idia davaria neganai, edena dala ai hebogahisi ita hahedinaraia diba? (Laulau itaia danu.)

¹⁰ Hari bema ita kamonai iseda tadikaka taihu be disasta ta dainai hisihisi idia davaria, hebogahisi ita hahedinaraia be namo. Elda taudia ita noia projek ta ai ita heduru, tanobada hegegemadai ena gaukara durua totona kontribiusen ita henia, eiava disasta idia davaria tadikaka taihu totona ita guriguri. b (Aon. 17:17) Hegeregere, lagani 2020 ai, tanobada hegegemadai ena Disaster Relief Committee ibounai 950 mai kahana idia abia hidi COVID-19 pendemik negana ai idia gorere taudia idia durua totona. Disaster Relief Committee ida idia gaukara hebou tadikaka ita tanikiu henia. Tadikaka bona taihu idia hebogahisi henia dainai, aniani bona kohu idia siaia, bona idia durudia Iehova idia tomadiho henia noho, bona gabu haida dekenai edia ruma bona Kingdom Hall idia hanamodia bona haginia lou danu.​—2 Korinto 8:1-4 hahegeregerea.

11. Hebogahisi ita hahedinaraia neganai, edena dala ai iseda guba Tamana ita hanamoa?

¹¹ Disasta ta murinai hebogahisi ita hahedinaraia neganai, haida ese iseda kara namodia idia itaia. Hegeregere, lagani 2019 ai, Hurricane Dorian ese Bahamas ai Kingdom Hall ta ia hadikaia. Iseda tadikaka be Kingdom Hall idia haginia lou lalonai, Witnes lasi kontraka tauna ta idia noia gaukara haida do ia karaia ena davana ia gwauraia totona. To, ia haere: “Lau ura masini, ruma kohudia bona heduru . . . do lau henia davana lasi. . . . Lau ura emui orea totona unai lau karaia. Emui turadia dekenai hebogahisi umui hahedinaraia karana lau ura henia bada.” Tanobada ai taunimanima momo be  Iehova idia diba lasi. To momo be Iehova ena Witnes taudia ese ma haida idia durua karana idia itaia. Ita moale badina hebogahisi karadia ita hahedinaraia neganai, taunimanima ita durua, Iehova, ‘hebogahisi bada herea’ Diravana idia diba totona!​—Efe. 2:4.

12. Edena dala ai hari hebogahisi ita hahedinaraia karana ese hisihisi badana totona ita ia hegaegaelaia? (Apokalupo 13:16, 17)

¹² Dahaka dainai hisihisi badana ai hebogahisi ita hahedinaraia be namo? Baibel ia hahedinaraia, hari bona hisihisi badana lalonai, inai tanobada ena gavamani idia durua lasi taudia be hekwakwanai momo do idia davaria. (Apokalupo 13:16, 17 duahia.) Iseda tadikaka bona taihu idia mauri totona, edia dabu gaudia do ita henia. Iseda King, Keriso Iesu be taunimanima ia hahemaoro henia totona ia mai neganai, ita ura do ia itaia ma haida dekenai hebogahisi ita hahedinaraia noho, bona ita do ia boiria iena ‘Basileia do ita abia.’​—Mat. 25:34-40.

13. Roma 15:7 hegeregerena, edena dala ai Keristani ginigunadia ese ta ta dekenai edia lalokau idia hagoadaia?

¹³ Lalokau be Keristani ginigunadia edia kara badana. To, lalokau idia hahedinaraia be mai ena hekwarahi, a? Mani Roma ai idia noho kongrigeisen idauidau ita laloa. Haida be Iuda taudia, idia be Mose ena Taravatu idia badinaia, to haida be Idau Bese taudia bona edia mauri dalana be idau. Keristani taudia haida be hesiai taudia bona haida be lasi, reana idia be hesiai taudia edia biagudia. Ena be edia noho dalana be idauidau, to edena dala ai unai Keristani taudia ese ta ta dekenai lalokau idia hahedinaraia? Aposetolo Paulo ese idia ia hagoadaia ‘ta ta do idia abia dae.’ (Roma 15:7 duahia.) Unai hereva “abia dae” ena anina be dahaka? Ena anina be ta dekenai heabidae karana hahedinaraia, hegeregere ta oi boiria emu ruma dekenai eiava emu turana ai ia lao totona. Hegeregere, Paulo ese Filemona dekenai ia heauboio hesiai tauna Onesimo do ia abia dae dalana ia hadibaia: “Mai lalokau ida [ia] oi abia dae.” (File. 17) Bona Prisikila bona Akwila ese Apolo idia abia dae, ia be Keriso ena hahediba dalana ia diba lasi tauna, bona “edia ruma dekenai ia idia hakaua lao.” (Kara 18:26) Unai Keristani taudia be edia diba dainai idia parara lasi, to ta ta idia abia dae.

14. Edena dala ai Anna bona ena adavana ese lalokau idia hahedinaraia?

¹⁴ Ita danu be tadikaka bona taihu lalokau henia karana ita hahedinaraia diba bema eda turadia ai ita halaodia. Unai amo, idia ese ita dekenai lalokau do idia hahedinaraia danu. (2 Kor. 6:11-13) Mani misinari taudia Anna bona ena adavana edia ekspiriens ita laloa. West Africa ena tano ta dekenai idia siaidia murinai, COVID-19 gorerena ia vara. Unai gorere dainai, kongrigeisen taudia ida idia hebou lasi bona ia auka ta ta idia diba namonamo totona. Edena dala ai edia tadikaka taihu dekenai lalokau idia hahedinaraia diba? Idia ese videoconferencing amo tadikaka taihu idia hereva henia bona idia hamaorodia idia ura dikadika idia ta ta do idia diba namonamo. Ruma bese ta ta be unai misinari tau bona hahine edia lalokau karana idia mamia dainai, hanaihanai fon amo idia rini henia bona teks mesiji idia siaia. Dahaka dainai unai misinari tau bona hahine idia ura edia kongrigeisen matamata idia diba namonamo? Anna ia gwau, “Nega namo bona nega dika ai, tadikaka bona taihu ese lau bona egu famili dekenai idia hahedinaraia lalokau karadia lau laloaboio diba lasi, bona unai ese lau ia hagoadaia haida dekenai lalokau lau hahedinaraia totona.”

15. Vanessa ese tadikaka taihu ibounai ia lalokau henia karana amo dahaka ita dibaia? (Laulau itaia danu.)

¹⁵ Kongrigeisen lalonai ita momo eda mauri dalana bona kara be idauidau. Idia ibounai totona  iseda lalokau ita hagoadaia diba bema edia kara namodia ita laloa bada. New Zealand ai, taihu ta ladana Vanessa be kongrigeisen lalonai haida ia tura henidia lasi. Bena abia hidi ia karaia edia kara amo ena lalona idia hahisia tadikaka taihu do ia dadaraia lasi, to idia do ia bamoa momo. Unai ia karaia dainai, Iehova ese idia ia lalokau henia ena badina ia lalopararalaia. Ia gwau: “Egu adavana be sekit naria tauna ai ia lao neganai, mai edia kara idauidau tadikaka taihu ai bamoa bona ia auka lasi idia lau tura henidia totona. Hari, tadikaka taihu idauidau lau ura henia. Momokani, Iehova be unai ia ura henia badina ia ese orea tamona lalonai ia idia tomadiho henia taudia idauidau ia haboua.” Iehova ese taunimanima ia laloa hegeregerena ma haida ita lalodia neganai, ita hahedinaraia idia ita lalokau henia.​—2 Kor. 8:24.   

16. Dahaka dainai hisihisi badana lalonai, tadikaka taihu ita lalokau henia be gau badana? (Laulau itaia danu.)

¹⁶ Hisihisi badana lalonai tadikaka taihu dekenai lalokau ita hahedinaraia be gau badana. Hisihisi badana ia matamaia neganai, edena dala ai Iehova ese ita do ia gimaia? Idaunega Babulonia idia hadikaia neganai, Iehova ese ena taunimanima dekenai ia henia hadibaia herevana mani ita laloa, ia gwau: “Egu taunimanima e, umui lao, emui lalona daiutu dekenai umui vareai, bona iduara umui koua. Nega sisina lalonai umui hunia ela bona badu ia ore.” (Isa. 26:20) Reana ita danu be hisihisi badana lalonai, unai hadibaia hereva tamona do ita badinaia. “Lalona daiutu” be kongrigeisen ia laulaulaia. Hisihisi badana lalonai bema tadikaka taihu ida Iehova ita hesiai henia hebou, ia gwauhamata ita do ia gimaia. Unai dainai, namona be hari iseda tadikaka taihu ita diba sibona be hegeregere lasi, to ita gaukara goada idia ita lalokau henia totona. Oibe, ita roho mauri totona, iseda tadikaka taihu ita lalokau henidia be gau badana!

17. Bema hari ita hegaegae, hisihisi badana lalonai dahaka do ita karaia diba?

¹⁷ “Iehova ena dina badana” ese taunimanima dekenai lalohekwarahi do ia mailaia. (Sef. 1:14, 15) Iehova ena taunimanima be hisihisi do idia davaria danu. To bema hari ita hegaegae, do ita lalohekwarahi lasi bona ma haida do ita durua diba. Ita davaria hekwakwanai do ita haheaukalaia diba. Iseda tadikaka taihu be hisihisi idia davaria neganai, hebogahisi do ita hahedinaraia bona dala do ita tahua idia ita durua totona. Bona, bema hari iseda tadikaka taihu ita lalokau henidia, vaira nega ai idia dekenai lalokau ita hahedinaraia diba. Iehova ese tanobada matamatana ai ita dekenai mauri hanaihanai do ia henia bona unuseniai disasta bona hisihisi ibounai do ita lalodia lou lasi.​—Isa. 65:17.