MATAMANAI Iehova ese Israela taudia be Aigupito amo ia hamauridia neganai, idia moale bada badina ia idia tomadiho henia diba. (Eso. 14:29–15:​1, 20, 21) To, daudau lasi murinai idia maumau. Dahaka dainai? Tano gagaena ai mauri be auka dainai, Iehova ese idia totona ia karaia kara namodia idia laloaboio bona idia maumau. Mose dekenai idia gwau: “Dahaka dainai Aigupito dekena amo ai oi hakaua? Inai taunimanima noho lasi tano dekenai do ai mase, badina aniani be lasi, ranu danu be lasi. To inai aniani gauna dikana dekenai be ai hesiku momokani.”​—⁠Num. 21:⁠5.

Lagani handred haida murinai, King Davida be ena ane lalonai, ia gwau: “To lau ese oiemu lalokau momokani, be lau abidadama henia noho, bona oi ese lau do oi hamauria dainai, lau be lau moale noho. Lau ese Lohiabada dekenai, ane do lau abia, badina be ia ese, iena hariharibada dekenai, lau ia hanamoa vadaeni.” (Sal. 13:​5, 6) Davida ese Iehova ena hariharibada karana ia laloaboio lasi bona hanaihanai unai kara ia laloa dobu. (Sal. 103:⁠2) Iehova be ita dekenai kara namodia ia karaia danu, bona namona be unai gaudia ita laloa bada. Mani Iehova ese ita dekenai ia henia hahenamo haida ita herevalaia.

Iehova be ‘Ita Kahirakahira Ia Noho’

Salamo torea tauna ia gwau: “Idia boiboi henia mai edia momokani danu taudia dekenai, Lohiabada be idia kahirakahira ia noho.” (Sal. 145:18) Oibe, goevadae lasi taudia ese Iehova idia tura henia be hahenamo badana! To, bema dina ta ta ai gaukara momo ita karaia dainai ita be nega lasi Iehova ita guriguri henia, dahaka ia vara diba? Unai ese iseda hetura karana namona Iehova ida ia hadikaia  diba. Iehova be iseda Turana dainai, ia ura ia do ita abidadama henia bona iseda ura bona lalohekwarahi gaudia be ia dekenai ita gwauraia. (Aon. 3:​5, 6; Fili. 4:​6, 7) Unai dainai namona be ita hekwarahi eda guriguri karana ita hanamoa totona.

Witnes matamata ta, Paul be ena guriguri karana ia laloa neganai, ia laloparara ia hanamoa be namo. a Ia gwau: “Lau be Iehova lau guriguri henia neganai, hereva haida lau gwauraia loulou.” Paul be Watch Tower Publications Index dekenai tahua gaukara ia karaia bona ia davaria Baibel lalonai guriguri ibounai 180 idia noho. Unai guriguri lalodiai, Iehova ena hesiai taudia be edia hemami korikori idia gwauraia. Paul ia gwau: “Unai guriguri idauidau laloa dobu karana ese lau ia durua egu hemami korikori be Iehova dekenai lau gwauraia hedinarai totona. Hari, lau be Dirava guriguri henia karana lau moalelaia bona lau mamia lau be ia kahirakahira lau noho.”

‘Nega Korikori ai Aniani Ia Henia’

Iehova amo ita abia hahenamo ma ta be, ia ese Baibel amo ita dekenai hereva momokanidia ia hadibaia. Unai hereva momokanidia ita diba dainai ita moale. (Isa. 65:​13, 14) To, bema ita naria namonamo lasi, hahediba hereva koikoidia ese ita idia hakaua kerere diba. Hegeregere, aposteit taudia ese idia halasia herevadia ita duahia neganai, Iehova ese “hesiai tauna mai ena kamonai bona mai ena kara maoromaoro” amo ‘nega korikori ai ia henia aniani’ do ita dadaraia.​—⁠Mat. 24:​45-47.

Tadikaka ta ladana André be lagani momo lalodiai Iehova ia hesiai henia, to aposteit taudia edia Web sait amo idia halasia herevadia ia duahia danu. Ia laloa unai ese ia do ia hakaua kerere lasi. Ia gwau: “Matamanai, edia hereva lau ura henia, bona lau stadilaia momo neganai, lau laloa Iehova ena orea lau rakatania be maoro. To, gabeai Iehova ena Witnes taudia idia hadikaia herevadia haida lau tahua namonamo neganai, lau davaria edia hereva momo be koikoi. Aposteit taudia ese hereva momokani idia mogea bona edia hadibaia hereva koikoidia amo momo edia lalona idia veria. Unai dainai, egu lalona lau hadaia iseda buka bona magasin lau duahia matamaia bona kongrigeisen heboudia lau lao. Unai neganai lau itaia lau be Iehova ena orea ese ia halasia gaudia momo lau reaia.” Tadikaka André ia moale badina ia be kongrigeisen dekenai ia giroa lou.

“Tadikaka Oreana Ibounai”

Iehova amo ita abia hahenamo ta be iseda lalokau tadikaka oreana. (Sal. 133:⁠1) Aposetolo Petero ia gwau, iseda ‘tadikaka oreana ibounai ita lalokau henia’ be namo. (1 Pet. 2:17) Iseda tadikaka oreana lalonai, tama, sina, tadikaka bona taihu momo idia noho, bona edia heduru bona hebamo karana ita moalelaia.​—⁠Mar. 10:​29, 30.

To, badina idauidau dainai iseda tadikaka taihu huanai hekwakwanai idia vara diba.  Hegeregere, iseda tadikaka o taihu ta ena kerere ita laloa momo dainai, ia do ita maumauraia. Bema unai ia vara, inai ita laloatao be namo: Ena be Iehova ena hesiai taudia be goevadae lasi, to idia ta ta ia lalokau henia. “Bema ita gwau: ‘Ita dekenai kara dika be lasi,’ ita be sibona ita koia noho bona hereva momokani be ita dekenai ia noho lasi.” (1 Ioa. 1:⁠8) Namona be ita hekwarahi ‘ta ta eda kara ita haheaukalaia noho, bona mai kudouna ibounai ida ita gwauatao heheni.’​—⁠Kol. 3:⁠13.

Witnes kekeni matamata ta ladana Ann be hekwakwanai ta ia davaria murinai, ia laloparara Keristani tadikaka oreana bamoa karana be mai anina bada. Iesu ese ia gwauraia boio merona ena parabole bamona, Ann be Keristani kongrigeisen ia rakatania. To gabeai ia laloparara bona ia giroa lou. (Luka 15:​11-24) Ann be ena hekwakwanai amo dahaka ia dibaia? Ia gwau: “Hari lau be Iehova ena orea dekenai lau giroa lou dainai herevana egu tadikaka taihu be goevadae lasi taudia, to idia ibounai lau laloa bada. Guna, edia kerere lau laloa momo dainai, lau badu haraga. To, hari lau ura lasi egu hebamo namona tadikaka taihu ida be gau ta ese do ia hadikaia. Iehova ena orea lalonai ita moalelaia hebamo namona be gabu ma ta ai ita davaria diba lasi.”

Emu Hahenamo Oi Lalodia Bada

Ita diba Dirava ena Basileia sibona ese taunimanima edia hekwakwanai ibounai do ia haorea. Unai ita diba be hahenamo badana ta. Nega ginigunana unai ita diba neganai, ita moale bada! Ita be Iesu ena parabole ai ia herevalaia “dava bada pel nadi ta” ia davaria hoihoi tauna bamona. Unai tauna ese “ena gau ibounai ia hoihoilaia bona unai pel nadi ia hoia.” (Mat. 13:​45, 46) Unai sivarai amo Iesu ese ia hahedinaraia unai hoihoi tauna ese ena pel ia laloa bada. Unai hegeregerena, iseda helaro nega vaira totona ita laloa bada be namo.​—⁠1 Tes. 5:8; Heb. 6:19.

Taihu Jean be lagani 60 mai kahana lalonai Iehova ia hesiai henia. Ia gwau: “Dirava ena Basileia be ma haida dekenai lau harorolaia karana ese lau ia durua unai Basileia lau laloa noho totona. Lau haroro henia taudia be Basileia ena anina idia lalopararalaia neganai, lau moale. Lau itaia Basileia ena hereva momokani ese Baibel stiuden haida edia mauri ia haidaua dainai, lau diba lau harorolaia sivaraina be mai anina bada!”

Iehova amo hahenamo idauidau ita abia dainai, ia ita tanikiu henia be namo. Ena be hekwakwanai idauidau hegeregere, dagedage, gorere, buruka, lalometau, mase ena lalohisihisi o moni ena hekwakwanai ita davaria, to ita diba unai gaudia be kahirakahira do idia ore. Hari inai negai Iehova be ita dekenai hereva momokani ia hadibaia noho, bona paradaiso lalonai do ita gorere, buruka bona mase lasi. Hari ita davaria hisihisi ibounai be tanobada matamatana ai do idia ore.​—⁠Apok. 21:⁠4.

Gau badana be Iehova amo ita davaria hahenamo idauidau ita lalodia bada, bona Salamo torea tauna bamona ia ita tanikiu henia ita gwau: “Lohiabada e, lauegu Dirava, oiemu durua karadia ai dekenai be momo herea. Tau ta be oiemu kara bamona ia karaia diba lasi. Lau ese oiemu kara, bona oiemu laloa, be taunimanima dekenai lau ura gwauraia, to lau be hegeregere lasi momokani. Badina oiemu kara bona laloa be momo herea, duahia diba lasi.”​—⁠Sal. 40:⁠5.

[Footnote]

[Picture on page 18]

Hekwakwanai negadiai tadikaka bona taihu ese ita idia durua bona hagoadaia