Noga Noho Ieremia Bamona
“Lau [noga noho, NW ] badina lau ura egu hereva gauna be momokani do ia vara.”—IER. 1:12.
1, 2. Dahaka dainai Baibel ia gwau Iehova ia “noga noho” alamono auna bamona?
LEBANONA bona Israela ai, January bona February be keru negadia bona au momo be flaoaflaoa idia atoa lasi. To, alamono auna sibona be mai ena flaoaflaoa, bona edia kala be waiti bona pinki. Unai dainai Heberu gado ai alamono auna ena ladana ena anina be “noga gauna.”
2 Iehova ese Ieremia be peroveta tauna ai ia halaoa neganai, ia ese alamono auna ia gaukaralaia mai anina bada gauna ta ia hahedinaraia totona. Ieremia ena gaukara ia matamaia neganai, matahanai ta lalonai alamono auna ena rigi ta ia itaia. Unai ena anina be dahaka? Iehova ia gwau: “Lau [noga noho, NW ] badina lau ura egu hereva gauna be momokani do ia vara.” (Ier. 1:11, 12) Alamono auna ia “noga” haraga hegeregerena, Iehova “ia toreisi haraga” bona ena taunimanima dekenai peroveta taudia ia siaia, edia gwau-edeede karana dainai do idia davaria hisihisi idia hadibaia totona. (Ier. 7:25, NW ) Iehova be ia laga-ani lasi, to ia “noga noho” ela bona ena peroveta herevana ia guguru. Oibe, Iehova ese ia makaia negana, lagani 607 B.C.E. ai, gwau-edeede besena Iuda ia panisia.
3. Iehova be dahaka do ia karaia?
3 Iseda negai danu, Iehova be ena ura ia hagugurua totona ia noga noho. Ia gwauraia herevadia ibounai do ia hagugurua. Iehova ia noga noho dainai, dahaka oi karaia be namo? Oi abia dae inai lagani 2011 lalonai, Iehova be ia “noga noho” ena gwauhamata ia hagugurua totona, a? Bema ita be Iehova ena gwauhamata herevadia ita daradaralaia, hari be nega namona mahuta amo ita noga totona. (Roma 13:11) Ieremia be Iehova ena peroveta tauna dainai, ia noga noho. To, edena dala ai ia noga noho, bona dahaka dainai? Inai stadi lalonai Ieremia do ita herevalaia, bona do ita tahua edena bamona iseda haroro gaukara ita karaia noho diba.
Mai Anina Bada Herevana
4. Ieremia be dahaka hekwakwanai ia davaria, bona dahaka dainai ia harorolaia sivaraina idia kamonai haraga be namo?
4 Iehova ese Ieremia dekenai gima gaukarana ia henia neganai, ena mauri lagani be 25 bamona. (Ier. 1:1, 2) To, ia mamia ia be mero sibona bona ia hegeregere lasi Israela ena tau badadia, buruka taudia bona mai edia dagi bada taudia ia hereva henia totona. (Ier. 1:6) Ieremia be Dirava ena hahemaoro herevadia be inai taudia dekenai ia harorolaia: hahelaga taudia, peroveta koikoi taudia, lohia taudia, “sibona edia dala, edia dala, idia lao” taudia bona Iehova “dekenai idia giroa mai lasi” taudia. (Ier. 6:13; 8:5, 6) King Solomona ese ia haginia dubu badana, lagani 300 mai kahana lalonai idia gaukaralaia dubu, be do idia hadikaia ore. Ierusalema bona Iuda hanua do idia hadikaia, ta do ia noho lasi, bona hanua taudia be igui hesiai taudia ai do idia halaoa. Unai ese ia hahedinaraia, Ieremia ese do ia harorolaia herevana be mai anina bada bona idia kamonai haraga be namo!
5, 6. (a) Hari Iehova ese edena dala ai horoa taudia ia gaukaralaia? (b) Inai stadi lalonai dahaka do ita herevalaia?
5 Iseda negai, lalokau Diravana ese horoa Keristani taudia ia abia hidi bona idia be gima taudia bamona inai tanobada ena dokona ena hahemaoro herevadia idia harorolaia. Idia be lagani momo lalonai, taunimanima idia hadibaia bona durua nega dokona ai idia gima totona. (Ier. 6:17) Baibel ia gwau Iehova be Nega Naria Tauna Hereadaena, bona do ia leiti lasi. Iehova ena dina be ia makaia negana korikorina, taunimanima ese idia laloa lasi horana ai do ia vara.—Sep. 3:8; Mar. 13:33; 2 Pet. 3:9, 10.
6 Namona be horoa taudia bona edia bamodia idia noga noho, hadibaia herevana idia harorolaia totona. Oibe, Iehova be ia noga noho bona nega korikori ai tanobada matamatana ai ita do ia hakaua vareai. Tanobada taudia ese unai sivarai idia kamonai haraga be gau badana. Unai oi diba dainai dahaka oi karaia be namo? Iesu ia gwau ita ibounai be Dirava ena Basileia ena kahanai ita gini be namo. Hari, ita ese Ieremia ia durua gaudia toi do ita herevalaia. Unai gaudia ese ita do idia durua, ita noga noho bona iseda haroro gaukara do ita karaia.
Taunimanima Ia Lalokau Henia
7. Ena be Ieremia be hekwakwanai ia davaria, to dahaka ese ia durua ia haroro noho totona?
7 Ena be Ieremia be hekwakwanai haida ia davaria, to dahaka ese ia durua ia haroro noho totona? Ia be taunimanima ia lalokau henidia dainai ia haroro noho. Ieremia ia diba gunalaia taudia koikoidia edia kara dainai, taunimanima ese hekwakwanai idia davaria. (Ier. 23:1, 2) Unai dainai Ieremia be mai lalokau bona hebogahisi ida ena gaukara ia karaia. Ia ura Iuda bona Ierusalema ai idia noho taudia be Dirava ena hereva idia kamonai bona do idia mauri. Idia dekenai do ia vara dika ia laloa momo dainai, ia lalohisihisi bona ia tai. (Ieremia 8:21; 9:1 duahia.) Lalohisihisi ena Ane bukana ese ia hahedinaraia, Ieremia be Iehova ena ladana ia laloa bada bona taunimanima ia lalokau henia. (Lal. 4:6, 9) Hari inai negai, taunimanima momo be “mamoe naria tauna ese ia naria lasi mamoe bamona.” Unai taudia dekenai oi ura Dirava ena Basileia ena sivarai namona oi hadibaia, a?—Mat. 9:36.
8. Ena be taunimanima ese Ieremia idia dagedage henia, to edena bamona ia kara henidia?
8 Ena be taunimanima ese Ieremia idia dagedage henia, to ia badu henidia lasi o edia dika davana ia henia lasi. Ia ese King dikana Sedekaia ia matauraia bona ia kara namo henia! Danu, ena be King Sedekaia ese Ieremia be hanua tau badadia dekenai ia henia idia hamasea totona, to Ieremia be Sedekaia ia noia Iehova ena hereva ia kamonai totona. (Ier. 38:4, 5, 19, 20) Ita be Ieremia bamona taunimanima ita lalokau henidia, a?
Dirava ese Ia Hagoadaia
9. Edena bamona ita diba Dirava ese Ieremia ia hagoadaia?
9 Nega ginigunana Iehova ese Ieremia ia hereva henia neganai, ia be ekskius idauidau ia gwauraia. Ieremia ese ia hahedinaraia ena boga auka bona gini goada karana be sibona ena goada amo lasi. To Ieremia ese Dirava ia abidadama henia dainai, ena peroveta gaukara be mai lalogoada ida ia karaia. Oibe, Iehova ese Ieremia ia durua bona hagoadaia dainai, ena hesiai gaukara ia karaia diba. (Ier. 20:11) Taunimanima momo idia diba Ieremia be gari lasi bona haheauka tauna, unai dainai Iesu be tanobada ai ia haroro neganai, idia laloa ia be Ieremia!—Mat. 16:13, 14.
10. Edena dala ai horoa taudia be “bese idauidau bona basileia idauidau edia latanai” idia noho?
10 Iehova be “bese idauidau edia King” dainai, Ieremia ia siaia bese bona basileia idauidau dekenai ena hahemaoro herevadia ia gwauraia totona. (Ier. 10:6, 7) To, edena dala ai horoa taudia be “bese idauidau bona basileia idauidau edia latanai” idia noho? (Ier. 1:10) Ieremia bamona, Iehova ese horoa taudia dekenai gaukara ta ia henia. Idia ia hamaoroa bese bona basileia idauidau dekenai ena hahemaoro herevana do idia harorolaia. Horoa taudia be Ataiai Momokani Diravana amo siahu idia abia bona Baibel amo taunimanima idia hadibaia, Dirava be ia makaia dinana bona ia abia hidi dalana ai, bese bona basileia ibounai do ia hadikaia ore. (Ier. 18:7-10; Apok. 11:18) Horoa taudia idia hesiku lasi, to idia gaukara goada Iehova ena hahemaoro herevadia be tanobada hegegemadai idia harorolaia totona.
11. Hekwakwanai negadiai, dahaka ese ita do ia durua ita haroro noho totona?
11 Nega haida ita lalomanoka badina momo idia ura lasi ita harorolaia sivaraina idia kamonai, idia dagedage, eiava ma hekwakwanai haida dainai ita lalohisihisi. (2 Kor. 1:8) To, Ieremia bamona ita gaukara goada noho, bona ita lalomanoka lasi. Namona be heduru totona Iehova ita guriguri henia loulou, ita abidadama henia, bona ita “gari lasi.” (1 Tes. 2:2) Ita be Keristani taudia dainai, namona be ita noga noho bona Dirava ese ia henia maduna idauidau ita huaia. Namona be Kerisendom ese do ia davaria dika ita harorolaia noho. Unai be idaunegai Ierusalema dekenai ia vara gauna ese ia laulaulaia. Horoa Keristani taudia ese Iehova ena “nega namona” sibona do idia harorolaia lasi, to “iena bese taudia idia dagedage henia taudia, do ia halusia momokani ena sivarai danu, do [idia] harorolaia.”—Isa. 61:1, 2; 2 Kor. 6:2.
Hesiai Gaukara Ia Moalelaia
12. Dahaka ese Ieremia ia durua ena hesiai gaukara ia moalelaia totona?
12 Ieremia be ena hesiai gaukara ia moalelaia. Iehova dekenai ia gwau: “Oi ese oiemu hereva lau dekenai oi henia, bona lau abia dae, aniani lau abia dae bamona. Bona inai oiemu hereva ese lau ia hamoalea momokani, badina be, Lohiabada, Siahu Ibounai Diravana, lau be oiemu.” (Ier. 15:16) Ieremia ia diba, ia be Dirava ena gwaukau tauna bona ena hereva ia harorolaia be hahenamo badana. Taunimanima edia hevaseha herevadia ia laloa momo neganai, ena hesiai gaukara ia moalelaia lasi. To, ia harorolaia herevana ena namo ia laloa neganai, ia moale bona ena lalona ia goada lou.—Ier. 20:8, 9.
13. Dahaka dainai Baibel ena hereva dobudia ita stadilaia be mai anina bada?
13 Iseda haroro gaukara ita moalelaia totona, namona be “aniani korikorina” ita ania, unai be Baibel ena hereva dobudia. (Heb. 5:14) Baibel ena hereva dobudia ita stadilaia neganai, iseda abidadama be do ia goada. (Kol. 2:6, 7) Unai ese ita do ia durua bena do ita diba bema iseda kara amo Dirava ita hamoalea eiava lasi. Bema Baibel duahia bona stadilaia totona nega ita atoa be auka, namona be eda sediual ita sekea lou bona gau haida ita haidaua. Dina ta ta ai miniti haida sibona lalonai Baibel ita stadilaia bona laloa dobu neganai, Iehova kahirakahira do ita lao, bona Ieremia bamona, do ita moale.
14, 15. (a) Ieremia be ia haroro noho dainai, dahaka namo ia vara? (b) Haroro gaukara dekenai Dirava ena hesiai taudia edia lalohadai be dahaka?
14 Ieremia be Iehova ena hahemaoro herevadia ia harorolaia goadagoada, badina ena maduna be bese bona basileia idauidau ‘do ia haginia, bona do ia hadoa.’ (Ier. 1:10) Iena haginia bona hadoa gaukarana ese anina namona ia havaraia. Lagani 607 B.C.E. ai Ierusalema idia hadikaia neganai, Iuda taudia bona idau bese taudia haida be idia roho mauri. Rekaba iduhu taudia, Ebede Meleke bona Baruku be idia huanai idia noho. (Ier. 35:19; 39:15-18; 43:5-7) Ieremia ena turadia, Dirava idia abidadama henia bona gari henia taudia, ese hari inai negai horoa Keristani taudia idia bamoa “hutuma bada” taudia idia laulaulaia. Edia helaro be tanobada ai mauri hanaihanai do idia abia. Horoa taudia be mai moale ida hutuma bada taudia edia abidadama idia hagoadaia noho. (Apok. 7:9) Ma danu, hutuma bada taudia be mai moale ida kudou-maoro taudia idia durua Baibel ena hereva momokani idia dibaia totona.
15 Dirava ena hesiai taudia idia laloparara sivarai namona harorolaia gaukarana be taunimanima ia durua sibona lasi, to ia be iseda Dirava tomadiho henia karana ta. Herevana taunimanima idia kamonai eiava lasi, to Iehova totona hesiai gaukara helagana ita karaia neganai, moale ita davaria.—Sal. 71:23; Roma 1:9 duahia.
Hesiai Gaukara Karaia Totona “Noga Noho”!
16, 17. Apokalupo 17:10 bona Habakuku 2:3 ese iseda nega be edena bamona idia herevalaia?
16 Apokalupo 17:10 ena peroveta herevana ese ita ia hadibaia ita be nega dokona ai ita noho. Unai siri ese ia herevalaia king namba 7 be Anglo-America, ia be iseda nega ai ia lohia basileia badana ta. Baibel ia gwau: “Ia [basileia badana namba 7] ginidae neganai, nega sisina do ia noho.” Hari, unai “nega sisina” be kahirakahira do ia ore. Peroveta tauna Habakuku ese inai nega ena dokona be inai bamona ia herevalaia: “To inai lau palania kara be harihari do ia vara lasi. . . . To do oi naria noho, ia be do ia vara momokani.”—Hab. 2:3.
17 Sibona oi nanadaia: ‘Lau abia dae nega dokona be kahirakahira dainai, egu hesiai gaukara lau goadalaia noho, a? Egu mauri dalana amo lau abia dae dokona be kahirakahira, a? Eiava, egu abia hidi bona tahua gaudia ese idia hahedinaraia lau be tanobada ena dokona lau laloa bada lasi, a?’
18, 19. Dahaka dainai hari be hesiku negana lasi?
18 Gima taudia edia gaukara be ia do ore lasi. (Ieremia 1:17-19 duahia.) Ita moale badina horoa taudia be idia gini goada noho “hanua mai ena kohoro goadana” bamona! Edia ‘gabana dekenai hereva momokani ena beleta idia kwatua,’ anina be Dirava ena Hereva ese idia ia hagoadaia noho ela bona edia gaukara ibounai idia haorea. (Efe. 6:14) Unai hegeregerena, hutuma bada taudia danu be horoa Keristani taudia idia durua, Dirava ese ia henia gaukarana idia karaia totona.
19 Hari be hesiku negana lasi. Namona be Basileia ena gaukara idauidau ita karaia noho Ieremia 12:5 (duahia) ena hereva hegeregerena. Ita ibounai ese hekwakwanai idauidau ita davaria, to ita haheauka be namo. Iseda abidadama idia tohoa gaudia ita haheaukalaia karana be ‘taunimanima danu ita heau helulu’ bamona. “Hisihisi badana” be kahirakahira dainai, hekwakwanai momo do ita davaria. (Mat. 24:21) Iseda hekwakwanai ita hanaidia totona, namona be ita gaukara goada, hosi ida ita heau helulu bamona. Tau ta be hosi ida ia heau helulu totona, namona be mai haheauka ida ia heau goadagoada. Bema hari ita davaria hekwakwanai ita haheaukalaia, vadaeni nega vaira ai ita davaria hekwakwanai ita haheaukalaia diba.
20. Emu lalona oi hadaia dahaka do oi karaia totona?
20 Bema ita ibounai be Ieremia ita tohotohoa, iseda haroro gaukara ita hagugurua diba! Ieremia be taunimanima ia lalokau henia dainai, mai lalogoada ida lagani 67 lalodiai haroro gaukara ia moalelaia. Alamono au hairaina ena haheitalai amo ita diba, Iehova be ia “noga noho” ena gwauhamata herevadia ia hagugurua totona. Ita danu, Iehova bona Ieremia bamona ita “noga noho” be gau badana.
Oi Laloatao, A?
• Edena dala ai lalokau ese Ieremia ia durua ia “noga noho” bona ia haroro totona?
• Dahaka dainai Dirava amo goada ita abia be namo?
• Dahaka ese Ieremia ia durua ia moale noho totona?
• Dahaka dainai oi ura oi “noga noho”?
[Study Questions]
[Pictures on page 31]
Bema dagedage oi davaria, do oi haroro noho, a?
