“Umui gima noho bona umui guriguri noho.”​—⁠MAT. 26:41.

EDENA BAMONA DO OI HAERE?

Edena dala ai guriguri karana amo ita hahedinaraia ita gima noho?

Edena dala ai ita hahedinaraia iseda haroro gaukara ai ita gima noho?

Dahaka dainai hahetoho negadiai ita gima noho be namo, bona edena dala ai unai ita karaia diba?

1, 2. (a) Iesu ena haheitalai dainai dahaka henanadai idia vara? (b) Goevadae lasi taudia ese Iesu idia tohotohoa diba, a? Haheitalai gwauraia.

 NEGA ta sibona oi nanadaia: ‘Lau be Iesu bamona lau gima noho diba, a?’ Reana oi laloa ia bamona oi gima diba lasi, badina ia be goevadae tauna. Iesu be vaira negai do idia vara gaudia haida ia diba dainai, ia gima noho be namo, a? (Mat. 24:37-39; Heb. 4:15) Namona be unai henanadai rua edia haere ita tahua. Unai amo ita gima noho ena badina do ita lalopararalaia.

² To, goevadae lasi tauna ese goevadae tauna ia tohotohoa diba, a? Oibe. Mani inai haheitalai ita laloa: Tau ta be nega ginigunana ragibi gadara ai bolo ia kikia dalana ia dibaia. Matamanai golo dekenai ia kikia vareai lasi, to ia tohoa loulou. Bolo kikia dalana ia manadalaia totona, ena hadibaia tauna ena kara ia tohotohoa. Ena hadibaia tauna ese bolo ia atoa dalana, ena aena ia atoa dalana, bona bolo ia kikia dalana ia stadilaia namonamo. Danu, golo ena daudau hegeregerena bolo ia kikia dalana ia manadalaia; lai ia toa dalana ia stadilaia bona ia hekwarahi golo ia atoa totona. Ena hadibaia tauna ia tohotohoa dainai golo ia atoa diba. Unai hegeregerena, bema ita ese Iesu ena hadibaia herevadia ita badinaia bona ena haheitalai goevadaena ita tohotohoa, Keristani taudia goadadia ai ita lao diba.

3. (a) Gima karana dekenai Iesu be dahaka ia gwau? (b) Inai stadi lalonai dahaka do ita herevalaia?

³ Iesu ia gima noho be namo, a? Oibe. Hegeregere, do ia mase hanuaboina ai, ena aposetolo taudia ia hamaorodia: “Lau ida do umui gima noho.” Bena ia gwau: “Namona be umui gima noho bona umui guriguri noho, unai amo hedibagani lalonai  do umui vareai lasi.” (Mat. 26:38, 41) Iesu be tanobada ai ia noho neganai, ia be hanaihanai ia gima. Idia hamasea gwauraia hanuaboina ai, ia ura lasi ia mahuta to ia gima bona ena guba Tamana badinai ia noho. Danu, ia ura ena hahediba taudia be unai hanuaboi sibona do idia gima lasi, to hanaihanai idia gima be namo. Inai stadi lalonai, Iesu ia ura ita gima noho ena badina do ita herevalaia. Iesu bamona ita gima noho totona, ita idia durua gaudia toi do ita herevalaia danu.

IESU IA URA ITA GIMA ENA BADINA

4. Dahaka dainai ita gima noho be gau badana?

⁴ Iesu ia ura ita gima ena badina be rua. Badina ginigunana be nega vaira ai do idia vara gaudia ibounai ita diba lasi. Iesu be tanobada ai ia noho neganai, vaira negai do idia vara gaudia haida ia diba lasi. Mai manau ida ia gwau: “Unai dina bona hora be tau ta ia diba lasi, guba anerudia idia diba lasi, Natuna danu be ia diba lasi, to Tamana sibona.” (Mat. 24:36) Unai negai, “Natuna” o Iesu, be ia diba lasi edena negai inai tanobada dikana ena dokona do ia mai. Ita be edena bamona? Iehova ese ena Natuna do ia siaia inai tanobada do ia hadikaia ore negana be ita diba lasi. Bema unai nega ita diba do ita gima lasi, ani? To, Iesu ia gwau inai tanobada ena dokona be ita laloa lasi negana ai do ia mai. Unai dainai ita gima noho be gau badana.​—⁠Mataio 24:43 duahia.

5, 6. (a) Dirava ena Basileia ena sivarai ita diba dainai, dahaka ita karaia be namo? (b) Satani ena kara ita diba dainai, dahaka ita karaia be namo?

⁵ Iesu ia ura do ita gima ena badina iharuana be nega vairai do idia vara gaudia momo ita diba lasi. Iesu be tanobada ai ia noho neganai, ia be nega vaira ai do idia vara gau namodia momo ia diba, to iena negai idia noho taudia be unai idia diba lasi. Ena be Iesu ia diba gaudia ibounai ita diba lasi, to Dirava ena Basileia bona nega vairai do ia karaia gaudia be ita ia hadibaia. Iseda sikuli, gaukara gabudiai, eiava teritori ai taunimanima momo be unai idia diba lasi. Iesu bamona, namona be ita noho hegaegae ita davaria taudia dekenai Dirava ena Basileia ita harorolaia totona. Unai be mai anina bada badina unai ese taunimanima momo ia hamauria diba!​—⁠1 Tim. 4:16.

⁶ Badina ma ta dainai Iesu ia gima. Ia diba Satani ia ura dikadika ia do ia dibagania, dagedage henia, bona ena abidadama ia hadikaia. Satani be hanaihanai “nega namona” ia tahua Iesu ia tohoa totona. (Luka 4:13) Iesu be nega ibounai ia gima hahetoho o dagedage ia hanaia totona. Ita danu ita gima noho be namo, badina ita diba Satani be “boiboi bada laiona bamona ia raka loaloa, do ia ania ore tauna ia tahua noho.” Unai dainai Baibel ia gwau: “Do umui laloa maoromaoro bona do umui gima noho.” (1 Pet. 5:8) Edena dala ai unai ita karaia diba?

GURIGURI KARANA ESE ITA IA DURUA

7, 8. Guriguri karana dekenai Iesu ena sisiba be dahaka? Bona ena guriguri karana amo dahaka ita dibaia?

⁷ Baibel ia gwau ita gima noho totona guriguri karana be mai anina bada, unai ese ita ia durua iseda hetura karana Iehova ida ia goada noho totona. (Kol. 4:2; 1 Pet. 4:7) Iesu ese ena hahediba taudia ia hamaoroa ia ida do idia gima noho murinai, ia gwau: “Namona be umui gima noho bona umui guriguri noho, unai amo hedibagani lalonai do umui vareai lasi.” (Mat. 26:41) Anina be hekwakwanai idia davaria negadia sibona ai do idia guriguri, a? Lasi, to Iesu ena sisiba  be dina ta ta ai ita guriguri be gau badana.

⁸ Iesu ena haheitalai amo ita diba guriguri karana be mai anina bada. Reana oi laloatao, nega ta Iesu be hanuaboi ibounai lalonai ena Tamana ia guriguri henia. (Luka 6:12, 13 duahia.) Mani inai oi laloa: Iesu be Kaperanauma taoni kahirakahira ia noho, bona gabu ia dibura neganai, Galilea Gohuna badinai ia noho ororo dekenai ia lao. Ororo amo ia roha diho neganai, Kaperanauma bona badina hanua maragidia edia lamepa ena diari ia itaia. Vadaeni, Iesu be ena tamana ia guriguri henia matamaia neganai, ia be ma gau ta ia laloa lasi. Hora momo idia hanaia bona hanua rumadia edia lamepa idia habodoa bona hua ia hedinarai be ia itaia lasi. Danu, uda lalonai animal edia regena ia kamonai lasi. Ia be abia hidi badana ta ia ura karaia dainai ia guriguri​—⁠ia ura ena aposetolo taudia 12 do ia abia hidi. Ita diba ena hahediba taudia ta ta be ena Tamana dekenai ia gwauraia hedinarai, bona aonega bona heduru totona ia noinoi.

9. Iesu ena haheitalai amo dahaka ita dibaia?

⁹ Iesu bamona ita danu be hanuaboi ibounai lalonai do ita guriguri, a? Lasi. Iesu be ena hahediba taudia ia herevalaia neganai, ia gwau: “Momokani, lalona be ia ura, to tauanina ia manoka.” (Mat. 26:41) Unai siri ena hereva be momokani, to Iesu bamona mai anina bada gaudia totona ita guriguri be namo. Hegeregere, bema ita ura karaia abia hidi be mai anina bada iseda abidadama, ruma bese, eiava kongrigeisen taudia dekenai, iseda guba Tamana dekenai unai ita gurigurilaia, a? Kongrigeisen tadikaka taihu totona ita guriguri, a? ita be mai lalona ibounai ida ita guriguri, o hereva haida sibona ita gwauraia loulou, a? Iesu be regerege lasi gabuna ai ena Tamana hereva henia karana ia laloa bada. Hari inai negai, ita bisi bada dainai mai anina bada gaudia ita laloaboio diba. To bema mai eda lalona ibounai ida Iehova ita guriguri henia totona nega ita atoa, ita gima noho diba. (Mat. 6:6, 7) Iehova kahirakahira do ita lao, iseda hetura karana ia ida do ia goada bona iseda abidadama idia hadikaia diba gaudia do ita dadaraia.​—⁠Sal. 25:14.

HARORO AI ITA GIMA DALANA

10. Edena sivarai ese ia hahedinaraia Iesu be ia noho hegaegae ma haida ia haroro henidia totona?

¹⁰ Iesu be Iehova ese ia henia gaukarana ia karaia neganai, ia gima. Gaukara haida dekenai taunimanima be gaukara idia karaia lalonai, gau ma haida idia laloa diba. To, gaukara ma haida dekenai gaukara taudia idia gima noho be namo, unai amo aksiden do ia vara lasi. Unai hegeregerena, eda haroro gaukara ai ita gima be namo. Iesu be nega ibounai dala ia tahua ma haida dekenai sivarai namona ia harorolaia totona. Hegeregere, Iesu be ena hahediba taudia ida ia raka ela bona Sukara taoni dekenai idia ginidae neganai, ena hahediba taudia be aniani hoia totona idia lao. To Iesu be ranu guri badinai ia laga-ani. Ia mahuta lasi to ia noho hegaegae taunimanima ia haroro henidia totona. Unai dainai Samaria hahinena ta be ranu abia totona ia mai neganai, Iesu ese ia haroro henia. Ia gwauraia herevana ese unai taoni taudia momo ia durua. (Ioa. 4:4-26, 39-42) Iesu bamona, ita noho hegaegae dina ta ta ai ita davaria taudia ita haroro henidia totona, a?

11, 12. (a) Haida ese iena gaukara idia koua gwauraia neganai, Iesu be dahaka ia gwau? (b) Iesu be haroro gaukara sibona ia laloa, a?

¹¹ Nega haida, kamonai taudia haida idia ura Iesu ena gaukara idia koua.  Hegeregere, Kaperanauma taudia idia ura Iesu be idia ida do ia noho bona edia gorere taudia do ia hanamoa. To, Iesu be siti tamona dekenai ia noho lasi. Iena gaukara badana be “Israela besena ena boio mamoe” ibounai do ia haroro henidia. (Mat. 15:24) Iesu ese ia hamaorodia: “Taoni ma haida dekenai danu Dirava ena Basileia ena sivarai namona lau harorolaia be namo, unai badina totona Dirava ese lau ia siaia.” (Luka 4:40-44) Oibe, Iesu be ena mauri lalonai haroro gaukara ia atoa guna bona ia ura lasi gau ta ese ena gaukara ia koua.

¹² Iesu be ena gaukara sibona ia laloa dainai, ia be kara auka tauna bona moale karadia ia karaia lasi, a? Eiava haroro gaukara dekenai ia bisi dainai, taunimanima edia dabu gaudia ia laloa lasi, a? Iesu be ena haroro gaukara ia laloa bada bona ena turadia ida moale karadia ia karaia danu. Ia be ruma bese ia lalodia bada, edia dabu gaudia bona hekwakwanai ia diba bona natu maragidia ia tura henidia danu.​—⁠Mareko 10:13-16 duahia.

13. Edena dala ai Iesu bamona, ita gima bona moale karadia ita karaia danu?

¹³ Edena dala ai Iesu bamona ita gima noho bona ita moalelaia gaudia haida ita karaia diba danu? Ita ura lasi inai tanobada ena lalona veria gaudia ese iseda haroro gaukara idia hadikaia. Reana nega haida iseda tura namodia bona varavara do idia gwau, namona be iseda hesiai gaukara ita rakatania bona iseda mauri ita moalelaia. To, bema Iesu ita tohotohoa, iseda mauri lalonai haroro gaukara do ita atoa guna. (Ioa. 4:34) Momokani, haroro gaukara ese eda hetura karana Iehova ida ia hagoadaia bona ita ia hamoalea. To, namo lasi ita laloa ita be kara maoromaoro taudia bona ma haida ita hereaia. Namona be iseda nega ita haria, haroro bona moale karadia ita karaia totona. Iesu bamona ita ura ita moale badina ita be “moale Diravana” ita hesiai henia.​—⁠1 Tim. 1:11.

HAHETOHO NEGADIAI ITA GIMA NOHO DALANA

14. Hahetoho ita davaria neganai, dahaka ita laloatao be namo, bona dahaka dainai?

¹⁴ Iesu be hahetoho ia davaria negadiai, iena hahediba taudia dekenai sisiba namodia ia henia. (Mareko 14:37 duahia.) Hahetoho ita davaria neganai, Iesu ena haheitalai ita laloatao be namo. To, momo be Aonega Herevadia bukana ese ia gwauraia herevana idia laloaboio. Ia gwau: “Dala ta ia noho, sedira iena toana oi dekenai be maoro, to iena dokona be mase dekenai do ia lao.” (Aon. 14:12; 16:25) Unai dainai, hekwakwanai badadia ita davaria neganai, namo lasi iseda diba dekenai ita tabekau. Bema unai bamona ita karaia, ita bona eda ruma bese do ita lalohisihisi.

15. Tama ta be ena ruma bese naria totona, dahaka hahetoho ia davaria diba?

¹⁵ Hegeregere, tama ta be reana ia  hekwarahi bada tauanina dalanai “iena ruma bese taudia ia naridia” totona. (1 Tim. 5:8) Unai dainai moni gaukara ta ia tahua. To, ia ura abia hidi moni gaukara ese hebou lao karana, ruma bese tomadiho bona haroro gaukara do ia koua. Bema sibona ena diba dekenai ia tabekau, reana unai gaukara do ia abia dae badina ia laloa unai be abia hidi maorona. To, unai ese ena hetura karana Iehova ida ia hadikaia diba. Namona be Aonega Herevadia 3:5, 6 ena sisiba ia badinaia, ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”

16. (a) Iesu be Iehova dekenai ia tabekau karana amo dahaka ita dibaia? (b) Tama momo be edena dala ai Iesu idia tohotohoa?

¹⁶ Iesu be hahetoho ia davaria neganai, sibona ena diba dekenai ia tabekau lasi. Mani unai oi laloa, ena be ia be aonega tauna, to sibona ena diba dekenai ia tabekau lasi. Hegeregere, Satani ese nega toi ia dibagania neganai, nega ibounai ena haere be: “Toretore Helagadia ia gwau.” (Mat. 4:4, 7, 10) Unai hahetoho ia hanaia totona, Iesu be ena Tamana dekenai ia tabekau. Unai ese ia hahedinaraia ia be manau tauna. To, Satani be hekokoroku tauna bona manau karana ia inai henia. Ita danu be Iehova dekenai ita tabekau, a? Bema tama ta be Iesu bamona ia gima, hekwakwanai negadiai Dirava ena Hereva do ia badinaia. Tanobada hegegemadai, tama momo be unai bamona idia karaia. Hegeregere kohu idia tahua guna lasi, to Dirava ena Basileia bona tomadiho momokani idia atoa guna. Unai amo edia ruma bese idia naria namonamo. Iehova be ena gwauhamata hegeregerena, edia dabu gaudia do ia henia.​—⁠Mat. 6:33.

17. Dahaka dainai oi ura Iesu bamona oi gima noho?

¹⁷ Momokani, gima noho karana dekenai Iesu be haheitalai namona. Iena haheitalai ese ita ia durua bona hamauria diba. Laloatao, Satani ia ura emu hetura karana Iehova ida ia hadikaia, emu abidadama ia hamanokaia bona Iehova oi rakatania. (1 Tes. 5:6) Namo lasi Satani ia kwalimu! Iesu bamona oi gima noho. Namona be nega oi atoa mai kudouna ibounai ida Iehova oi guriguri henia totona, haroro gaukara ai oi gima, bona hekwakwanai negadiai Iehova dekenai oi tabekau. Ena be inai tanobada dikana ena dokona be ia kahirakahira, to bema unai gaudia oi karaia, emu mauri oi moalelaia diba. Bema Iesu be inai tanobada hadikaia totona ia mai, bona ia davaria oi noga noho bona Dirava oi hesiai henia, do oi moale. Emu abidadama karana dainai Iehova be mai moale ida oi do ia hanamoa!​—⁠Apok. 16:15.

[Study Questions]

[Picture on page 6]

Iesu be ranu guri badinai hahine ta ia haroro henia. Dina ta ta ai ma haida oi haroro henidia, a?

[Picture on page 7]

Bema emu ruma bese oi durua Iehova idia tura henia totona, ia hahedinaraia oi gima noho