Iesu be iena hahediba taudia dekenai ia gwau: “Farisea taudia edia hatubua muramura dainai do umui naria namonamo, unai be edia koikoi karadia.” (Luka 12:1) Mataio be unai hereva ia torea danu bona ia hahedinaraia Iesu be Farisea taudia edia hahediba hereva koikoidia ia herevalaia.​—Mat. 16:12.

Nega haida Baibel ese “paraoa hatubua muramurana” o isti ia gaukaralaia kara dika ia laulaulaia totona. Momo be Farisea taudia edia hahediba herevadia bona lalohadai kereredia idia badinaia dainai, kara dika idia karaia. Dahaka dainai edia hahediba herevadia ese momo ia hakaudia kerere?

1 Farisea taudia idia hekokoroku bona idia laloa idia ese ma haida idia hereaia.

Iesu ena parabole ta lalonai unai kara ia herevalaia, ia gwau: “Farisea tauna be ia gini bona ena lalona dekenai ia guriguri matamaia, ia gwau, ‘Dirava e, oi lau tanikiu henia badina lau be taunimanima ma haida bamona lasi, idia be henaohenao taudia, kara maoromaoro lasi taudia, heudahanai taudia, danu lau be inai takisi gogoa tauna bamona lasi. Pura ta lalonai nega rua lau anivaga, bona lau abia kohu ibounai ena kahana 10 amo kahana ta lau henia.’ To takisi gogoa tauna be daudau dekenai ia gini bona ia ura lasi guba dekenai ia roha isi, to ena kemena ia botaia noho, ia gwau, ‘Dirava e, lau be kara dika tauna, lau oi hebogahisi henia.’”​—Luka 18:11-13.

Takisi gogoa tauna ena manau karana dainai Iesu ese ia hanamoa, bona ia gwau ena kara maoromaoro ese Farisea taudia edia kara maoromaoro ia hereaia. Dahaka dainai? “Badina sibona idia abia isi taudia be do idia hahemaraia, to sibona ia hamanaua tauna be do idia abia isi.” (Luka 18:14) Taunimanima momo idia laloa takisi gogoa taudia ibounai be henaohenao taudia. To, takisi gogoa taudia be Iesu ena hereva idia kamonai dainai ia ura ia durudia. Takisi gogoa taudia rua Mataio bona Sakaio be Iesu ena hahediba taudia ai idia lao.

Reana ita be gau momo ita diba eiava Iehova ena orea lalonai maduna momo ita abia dainai, ita laloa ma haida ita hereaia. Eiava ma haida edia kerere ita itaia, bona ita laloa ita be idia ita hereaia. Bema unai bamona ita laloa, dahaka ita karaia be namo? Namona be unai lalohadai ita kokia haraga. Badina Baibel ia gwau, lalokau idia hahedinaraia taudia be mai edia boga-auka bona hebogahisi, idia mama lasi, heagi lasi bona hekokoroku lasi. Danu, sibona edia namo idia tahua lasi, bona ma haida edia kara dika, idia moalelaia lasi.​—1 Kor. 13:4-6.

Aposetolo Paulo ia gwau: “Keriso Iesu be tanobada dekenai ia mai, kara dika taudia hamauria totona.” Ma ia gwau: “Idia ibounai amo lau be dika momokani.” (1 Tim. 1:15) Paulo ena lalohadai ita abia be namo.

Inai henanadai oi laloa:

Lau abia dae lau be kara dika tauna bona Iehova ena hebogahisi hereadaena dainai hahemauri do lau abia, a? Eiava lagani momo lalonai Iehova lau hesiai henia, o kongrigeisen ai maduna haida lau abia, o gau momo lau diba dainai, lau laloa ma haida lau hereaia, a?

  2 Farisea taudia ese kara namodia idia karaia badina idia ura taunimanima ese do idia itaia bona hanamodia. Idia ura taunimanima ese idia matauraia bona edia ladana idia hanamoa.

Iesu ia gwau: “Gau iboudiai idia karaia taunimanima ese idia itaia totona. Maua maragidia be idia habadaia bona edia baguna bona imana laurina dekenai idia kwatua, bona edia dabua dorina idia halataia. Aria negadiai idia ura gabu namona dekenai idia helai, bona sinagoga lalonai vaira kahanai idia helai. Bona taunimanima momo gabudiai, idia ura haida ese idia hanamodia bona idia gwauraia Rabi.” (Mat. 23:5-7) Iesu ena lalohadai be Farisea taudia edia amo ia idau. Ena be ia be Dirava ena Natuna bona goevadae tauna to ia manau. Tau ta ese ia gwauraia “namo” neganai, Iesu ia gwau: “Dahaka dainai lau oi gwauraia namo? Tau ta be ia namo lasi, to tamona sibona, Dirava unai.” (Mar. 10:18) Ma nega ta, Iesu ese ena hahediba taudia edia aena ia huria badina ia ura idia dekenai manau karana ia hadibaia.​—Ioa. 13:1-15.

Keristani taudia korikoridia ibounai ese edia tadikaka taihu idia hesiai henia be namo. (Gal. 5:13) Kongrigeisen lalonai elda maduna idia ura abia taudia ese unai idia laloatao be namo. Bema tadikaka ta ia ura kongrigeisen lalonai maduna ia abia, unai be namo. To, namona be unai maduna ia ura henia ena badina be ia ura ma haida ia durua. Elda taudia be ma haida idia hereaia lasi bona lohiaia lasi. To, namona be Iesu bamona “lalomanada” karana idia hahedinaraia.​—1 Tim. 3:1, 6; Mat. 11:29.

Inai henanadai oi laloa:

Kongrigeisen lalonai elda taudia lau kara namo henidia badina lau ura idia ese lau dekenai maduna momo idia henia, a? Gaukara ta lau karaia neganai, lau ura ma haida ese lau idia itaia bona hanamoa, a? Nega ibounai lau ura ma haida lau hereaia, a?

  3 Farisea taudia be taravatu bona kastom momo idia atoa dainai, taunimanima edia mauri idia ha-aukaia.

Iehova ese Israela taudia dekenai Taravatu ia henia, unai amo dala maorona ai ia idia tomadiho henia diba. To Taravatu maragimaragidia momo ia atoa lasi. Hegeregere, Taravatu ia gwau Sabati dinana ai do idia gaukara lasi. To, idia karaia o karaia lasi gaudia edia lista ia gwauraia lasi. (Eso. 20:10) Farisea taudia be sibodia edia taravatu bona kastom haida idia atoa kau, badina idia laloa Iehova ena Taravatu be gau ibounai ia herevalaia lasi. Iesu be Dirava ena Taravatu ia badinaia, bona Farisea taudia edia taravatu metaudia ia dadaraia. (Mat. 5:17, 18; 23:23) Iesu be Dirava ena Taravatu ena badina ia lalopararalaia. Ia diba Dirava ia ura taunimanima ese ma haida dekenai hebogahisi do idia hahedinaraia. Ena hahediba taudia edia kara ese ena lalona ia hahisia neganai, mai manau ida ia durudia. Hegeregere, ia do idia dogoatao hanuaboina ai, Iesu ese ena aposetolo taudia toi ia hamaorodia do idia gima noho, to nega toi ia davaria idia mahuta. Ena be unai ia vara, Iesu be mai manau ida ia hereva henidia ia gwau: “Momokani, lalona be ia ura, to tauanina ia manoka.”​—Mar. 14:34-42.

Inai henanadai oi laloa:

Taravatu aukadia lau atoa bona haida lau doria idia badinaia totona, a? Nega ibounai haida lau doria egu ura sibona do idia badinaia, a? Eiava lau doria idia karaia diba lasi gaudia idia karaia totona, a?

Iesu ena hahediba herevadia be Farisea taudia edia amo ia idau. Emu kara ta oi haidaua be namo, unai amo Iesu ena kara oi tohotohoa diba, a? Namona be oi hekwarahi emu kara oi hanamoa totona.

[Picture on page 28]

Farisea taudia be edia baguna dekenai maua maragina ta idia kwatua; ia lalonai siri idia noho.​—Mat. 23:2, 5

[Pictures on page 29]

Elda taudia be hekokoroku Farisea taudia bamona lasi, to idia manau bona haida idia hesiai henia

[Picture on page 30]

Iesu bamona hebogahisi oi hahedinaraia, o haida oi doria idia karaia diba lasi gaudia idia karaia totona?